Efesios 2
2
Dios imachieta faa mayamicalri yuya Cristo ikjautje
1Upipia mayamperrica shaa naikjautje njaji imjepacan njite imashicanati 2njaji yufalripia inacu, ima inaitjapiaca pjiumi caiji lriumacapishu ljiaji jalredauca iyada njite inaitjapiatsakja caiji lriumacapishu ljiaji icauljetin italricanatacada caulrirricu njite lrifuiwita naji imjepatacape ljiaji Dios. 3Caipiatsakja waufacau pjiumi upitua, wanaitjapia njaji wawaupiakje machiperritsa njite wanaitja caiji wanaiquica matsidalritsa yumacapishu njite wawaupiakje yumacapishutsaca. Naikjaute naji, warsupiatsanta ferrapjitaca ljiaji lrirrua cafainadalri ljiaji Dios, pacuacatsa nacaishu naji apaana. 4Mitsa ljiaji Dios kjena lricapaca warsu njite lripeyu faa lrishu ljiaji ipeyukjeti macadalri, 5lria warsu wacaficau lricafietacadanacupia Cristo, mayamperrin cadanapia faa wamashicana ikjaute. Njite lrimatsiaca macadalrishu ljiaji Dios, irsu ljiaji yumjecai. 6Njite pacuacatsautsa Jesucristo inai ljirreta faa, njite lricada waufa lrinai enolriculje. 7Lrinaitja ljiaji lricañatacarruatsa papia jalredauca ljiaji lrimatsiaca macadalri warsuwalreu Cristo Jesús inakjuite. 8Mitsa Dios imatsiacalrico macadalri irsu ljiaji yumjecai icadacapua icaolreo lrinaco. Curritsa itaitandaca yuketaca jiwacatsa, mitsa Dios tsa icada irsun macuadatsa. 9Curritsautsa lricuadaca ljiaji inaitjanda jiwacatsa, ima curriwatsa matsiacarruca shaa nashu njaji inaitjampe; 10ima Dios tsa inaitja faa cayu; ljiatsa inaitja faa Cristo Jesús inakjuite wanaitjacarru ljiaji idejikjetji machiadalri, wacarru lrirricuda ljiaji inipu lrinaitjandapia warsu upitua.
Apapucuetsa faa Cristo inai
11Njaji judionai naajica shaa «curriperritsa kjenanaca», njite njawacatsa nacaite nanacuwaca «kjenanaperricana», ima nakjenanatacacau njavacatsa nadakinaco. 12Nini shaa, yajintsa upipiatua curripiatsa yajinca ljiaji Cristo, njite tecoperripiatsa shaa nauya njaji Irsraelnai, curripiatsakja irsuwalreca ljiaji yacuti Dios irsulri napiya njaji irsraelnai currintsakja njaji lricaiterripia lricadaca narsu. Yufapia aji jalredaucalricu caiji curriperrishutsa coca iwapa icapa matsiadalri njite curripiatsaca yajinca ljiaji Dios. 13Mitsa panaya, apapocuquetsa faa Cristo Jesús nacu lrikjaute ljiaji lirrana lripeculri, sha tecoperripia Dios yuya mitsa panaya tsumiperrikena shaa.
14Cristoca ljiaji icadacada wamaudacaca wainaiwaca. Ljiatsa icada apapucoquetsa njaji jundionai njite curriperritsa judionaica, lrikeljua ljiaji idanatalripiana nauyawaca njite lriwayaqueta nauya ljiaji njepundatacacawau napiyawaca lricadacapua nainuni cruzanacu. 15Lriwayaqueta ljiaji yacuti upidalrin inalripia nanaitjaca njite nanaitjapia cayuji lricatecapishu, njite lricada papucuetsa walriperrishu njaji yamapocudepia. Cayu lricadaca imaudacakjeti napiyawaca. 16Lriwayaquetapia nauya ljiaji njepondatacacawau njaji yamapucude inaiqui, mayamicapuani cruzanaco, njite mayamicapuani lricada namachietacau Dios inai tsakja, njite lriwaquetana lricadacarruna apapucuetsa.
17Cristo inu lridecarru yacuti walridalri icadacada pamaudacaca pjiumi, irsuwalre sha tecuperripia Dios yuya njite narsutsakja njaji tsumiperritsa lriuya. 18Nini Cristo nakjuite, judionai njite curriperri judioca wataita watsumitaca ljiaji Fanirri lrinakjuite ljaji Espíritu. 19Lrikjaute ljiaji, currinatsa tekjuiteperrica sha, currin tsakja tecuperrica sha lrijipaite yuya, mitsa panaya aperriquena shaji nainai njaji ljienitanpe lrirsuwau njite irsutsakja ljiaminitsa ljiaji narsulri, njite icatsa Dios ikichiñape inakuiteperrica sha. 20Icatsa sha caiperricaji apada pantishu yenunni njerretanna jipadanacu, lripucudaca njaji lriniwanaji icaitecaope lriaco njite njaji inuparrutacape, njite Jesucristo tsa ljiaji jipada icatsa lripjeca. 21Cristo-nacu, pjiumi ljiaji panti macani ljirretacacau pacuacatsa, kjerrecautsa nataita nanaitjacani pjiumi Waminalri nacu, apada panti lrirsuwalreu. 22Lrinakjuite apapucuetsa shaa pjiumi yapiyawaca Dios iipanacarruatsa sha lri-Espíritun inakjuite.
© 2025 CLAN
© 2025 Seed Company