2 Timoteo 4
4
1Dios ipjeyalre njite Jesucristo-tsakja ljiawatsa ljiaji italricanati inulriwatsa icaite naacuna njaji caafiperritua njite njaji mayamiperripiena, nucaiteca pjia caiwirricutsa pinaitjacarru cayuji: 2Nucaite pjia : picanantacarru ljiaji yaacuti, picanantautsani naumacadanacu njemica pisru u curricadanacu nauma njemica pirsu. Picaite njemi ljiaji namatsicana, picaite pinaiwana njite pimayacalrena picanantacarruna tacaatsa caidalritsa caiji Dios yacu icaitecapishu. 3Ima papiawatsa jalrredauca lriucawatsao ljiaji curricawetsautsa nauma njeepaca ljiaji yaacuti ajadali; mitsa lrimautsa ljiaji nawaopiakje teeculjedalri, naumawatsa njemica nacanantaca ljiaji napeyundatsa njemica. 4Njenitacautsao lriuya ljiaji ajadalri njite neepawatsa ljiaji nacaitependa midalritsa. 5Micatsa pjia, Timoteo, picapautsa piuyao cuancawacatsa njite cuancadanacucatsa, pitarrawatena lriapiya ljiaji jirrapjitakjeti, picananatena ljiaji yaacuti narsu njaji mjepacaperri, pideejina matsia ljiaji pidejicalre.
6Njua, Pablo, uupinautsa lriucao ljiaji njunana mayamicarru njua, ima tsuuminatsa nainucarru njua. 7Nutaitjenia nuemaca taimiwa lrikjuete ljiaji fepunda, nuwayakjenina nunaitjaca pjiumi ljiaji idejikjeti Waminalri icadanda nursu, nuemjenina taimiwa njuepacapua mayacan. 8Panaya Dios imatsietjenina nupia ljiaji lrialriwatsa nursu, lrialriwatsa nurso ljiaji Waminalri Jesucristo ljiaji icaitecada matsia paacuna ljiadaawatsa Jesucristo inucadanacutsa ipieta lricaitecarru naacuna. Njite curriwatsa nursuminicatsa lriani, narsutsakjaotsa pjiumi njaji iwapacape nacaolrerricuitje lrinuca lripieta.
Pablo icadaa piketemdalri yacuti Timoteo irsu
9Timoteo pinaitja matsiacalri pinu picapa nuicaolre kjeyapjatsa; 10ima ljiaji Demas uupi lrimaca njua lripeyucapua ljiaji jalredauca iyaada njite uupi lriawa Tesalónicalriculje. Ljiaji Crescente uupi lriawa Galacialriculje, njite Tito lriawa yacalre Dalmacialriculje. 11Apadalritsa Lucas aji nuinai. Pideewatsa piinaiwa ljiaji Marcos, ima ljia itaitalriutsa ikitsindataca njua aji nudejicalrerricu. 12Ljiaji Tíquico numenaca lriawa Efeso-lriculje. 13Pinucadanacuenautsa, pideewatsa nurso ljiaji njuetanda nunacua nutsayan iicao ljiaji numacalri aji Tróarricu, Carpo iipanalricu; njite tsakja njaji nupaperran nacalrapimpe, njaapawatsa njaji nudanaji maaficalri iyamrricu.
14Alejandro ljiaji ideejicada shipalra lrinaitja jurredalri mashi nurso; mitsa Waminalrinawatsa icawiña lrishu ljiaji lrinaitjalri. 15Picapatsakjaotsa piuyaoni, ima lriemaca taimi lrikjuete ljiaji yaacuti wacanantalri.
16Aji nainitacadanacupiena nadeeca njua talricanati ipjeyalje aji Romalricu nucaitecarru nuacunawaca lirsu nudanatacacarrua nauya naji nucuema icaitecape mashi nuacuna, currimpia pacau apada cacudalri nuikjaote. Nacadaa apadetsa njua. Nutatja Dios iinai curricarruatsa lritatja lricuadao nainai. 17Mitsa Waminalritsa ikitsindata njua njite lriapia nurso jiidati, nutaitacarru nucanantaca ljiaji yaacuti iyumjetacada njemicarrutsakjan pjiumi njaji curriperri judionaica. Njite Waminalri iyumjetaca njua mayamicalri yuya, caiji yuumjecapishu pja lrinuma yuuya ljiaji yaawi iiwacanetsa iiñjao, 18Waminalriwatsa iyumjeta njua naumacadanacu nanaitjaca maashi nurso, njite lrideewatsa njua enulriculje lritalricanatalriutsa nirse. Waaa lirsu matsiadalri ljiaji Jesucristo caidalriwetsa ¡Cayuwatsa!
Pablo icaite yaacunao
19Numenacatsa yacuti narsu njaji Priscila ruinirri Aquila yapiya, njite narsutsakja pjiumi njaji yuufacape Onesíforo iipanalricu. 20Njite ljiaji Erasto lriufaa nuya aji yacarle Corinto-lricu, njite ljiaji Trófimo numacani aji Mileto-lricu lriyamicapua. 21Piumawatsa cuajica pinucarru kjeyapjatsa uunia iinitaca ipjeya. Namenaca pirsu yaacuti njaji Eubolo, Pudente, Lino, Claudia njite pjiumi njaji sheepacaperri aperriji.
22Ljiatsautsa ljiaji Waminalri Jesucristo-watsa piinai. Njite Dios-watsa icadaa inacu padenirri lrimatsiaca macadalri.
© 2025 CLAN
© 2025 Seed Company