Tito 1
1
Pablo icaite yacuti lrinitacarru cacucan
1Njua, Pablo, Dios irsudalri njite Jesucristo imenacanda nucaitecarru lriacu, lrimenacanda njua naicaolre njaji Dios iniwananipe nacadacarru nacaolreo lrinacu njite naajicarru lrinacu ljiaji yacuti ajadalri icanantacada paufacarruwa matsia Dios irsu. 2Niini cayuatsa nataitautsa nacadaaca nacaulreo narsucautsa ljiaji jalredauca mawayacacadalri, ljiaji lricaiterripiena ljiaji Dios mashaadalritsa, jalredauca iinitaca ipjeyapiatua lricaitepiena lrinacu ljiaji lricadalriutsa. 3Njite panaya, ljinanalricuena, lricadaa waajicarru ljiaji yacuti lricadalripia nucanantaca lrinacale ljiaji Dios Iyumjetacaita faa. 4Panaya nudana paperra pirsu pjia Tito, nuenipe ajadalri lrinacu ljiaji feepalri. Fanirri Dios njite Jesucristo ljia Iyumjetacaita faa nacadaawatsa pirsu namatsiaca njite pimaudacacarru.
Narsuwalre njaji cacunape iwapacape Dios iipana
5Numacapia pjia aji cadunulri Cretalricu piwayacacarru pinaitja ljiaji curridalri wataita wanaitjaca njite pikepitanatacarru napiyawalreu ancianunai iwapacaope Dios iipana yaacalre icuam, caiji nucaitecapishupiena. 6Ljiaji napiyawalre anciano iwapacada Dios iipana lirsutsa curridalrica nauketaca inacu cucacan nacaitecarru maashi lrinacu. Aapamadalritsa iinu, njite njaji lrienipe narsutsa nacadaca nacaolreo Dios inacu, njeepa nanirri yaacu njite currim cuca itaita icaiteca mashi nanacu. 7Ima ljiaji napiyawalre njaji icadacape icaolreo lirsutsa lrinaitjaca matsia wadee nacapaca lrinacu lrimatsicana. Currim lrinaitjaca caiji lriwaopiakje yuumacapishu, meerruadalritsa kjeya, madewanacadalritsa, currim tsakja lrinuacacao njite currim lricashataca lriganacarrupja lrirsuwawa. 8Mitsa dekja, lrirsutsa pumenadalricani lricuadatacarru inaiki lriipanalricu, njite lrirsutsa lripeyuca pjuimi ljiaji matsiadalri, yaajicada iwaopiaca njite inaitjaca, lirsuta lriumaca lriwaopiakjewa Dios iinai lricaitecarru pacuaca lriinaiwa njaji inaiki, lrirsutsa maupjitadalricani njite lrirsutsa lriajica lriwapacacao pjiumi maashidalri yuuya. 9Lirsuta lriemaca taimiwa lrinacu ljiaji yaacuti ajadalri nacanantalri inacun, lritaitacarru-tsakja lrikitsindataca njaji inaiki naacarru lrinacu ljiaji icanantakjeti mayacandalri lrinacu ljiaji yaacuti ajadalri njite njaji jipundatapeni lrirsutsa lricañjataca nacapa namatadacacao.
Cuamperrica njaji icanantacape teeculjetsa
10Ima aimaca njaji mjeepacaperritsa, wadepepja pjiumica judionai inakjuiteperricana, njaji icaitepecape ljiaji midalritsa nacashatacarru njaji inaiki. 11Nja njaji caiperri parsutsa pamacutacana, ima namatsiketaca nawaopiakje njaji inaiki pjiumi naapaneta yaapiya, nacanantaca inaiki lrishu ljiaji icanantakjeti teeculjedalritsa naumacapuatsa njetaca palrata lricuada.
12Aape cajikedalipia Cretalricudalripia lricaitepia nanacutsa njaji lriyacalremnanai: —"Njaji Cretalricuperri nacashataca caidalritsa, maaficalri keerruaperrishucana, maapirracanaperritsa, jurreperri iñjaca njite iinu nadejica". 13Ajadalri ljiaji lricaiterri nanacu; caishupa, pirsutsa picaiteminicatsana yaacuti kjaidadalrishu, naufacarruwa taimi lrinacu ljiaji yaacuti feepalri 14njite curricarru njemi lrirsu ljiaji midalritsa nacaiterri njaji judionai, curritsakja lrirsu ljiaji yacuti nananda nanaitjaca naji atsianai icapucucape lriuya ljiaji yaacuti ajadalri. 15Maupitjadalricani pjiumi narsu njaji maupitjaperri iwaopiakje, mitsa narsu njaji mjeepacaperritsa njite caupitjaperri iwaopiakje, currim pacapaca maupitjadalri narsu ima caupitjaca nacaulrerricu njite nawaopiakjerricu. 16Nacaite naajica Dios nacu, mitsa lrishu ljiaji nanaitjalri nacadaa wajii currica nanaitja cayu; inaiki maashiperricana njite mjeepacaperritsa, curriperrisha itaita inaitjaca matsia.
© 2025 CLAN
© 2025 Seed Company