1 Tesalonicenses 3
3
Pablo imenacapia Timoteo Tesalonicalriculje
1Curricadanacuetsa wataita lrikjuete ljiaji currica waaji cuajica shaa, niini wacaiteca waufacarrua fawaketsa aji Atenas-lricu, 2njite wamenacaca ljiaji Timoteo idejicada Dios irsu njite ikitsindatacada faa wacaitecarru ljiaji yacuti matsiadalri Cristo-nacu irsu; wamenacani lrikjaidatacarru shaa njite lrikitsindacarru yemacarrupja taimi Jesucristo-nacu, 3curricarruatsa apada shenita lriwaopiakje ljiyapacadanacuatsa jirrapitinadalri-nacu. Ima yaajintsa warsucatsa ferrapjitaca ljia caidalri. 4Ima aacadanacupiatua faa iinai, wacaitjenpia shaa kjeeyaketsautsa lriucacao ljiaji pjerrapjitaca; niini cayu ljiyapacao yaajicapishuena. 5Caishupa, Curricapuetsa nutaita nuwapapjaca numicarru yaacuna, numenaca ljiaji Timoteo lriacarru lricapa cuanca icadaca icaolreo, Ima nutjaca nucaolreo wadeekatsantja ñacaim imañetaca shaa inaitjacarru maashi njite macuadadalrintja ljiaji wadejicalre.
6Mitsa panaya Timoteo idienina yuucao Tesalonicalrikjuite, njite lrideeca yaacuti matsiadalri inacu cuanca icadaca icaolreo njite cuajica ljiaji ipeyukjeti irsulri. Lricaitetsakja iwaadaca faa caidalritsa catimalrico, njite yuumaca icapaca faa caiji waumacapishu wacapaca shaa. 7Niini nukitsiñape, lrirricuda pjiumi ljiaji ferrapjitalri jirrapitinadalri feyapalri inacu, jirretapia wawaopiakje wajicapua itarrawataca lrinacu ljiaji icadalri icaolreo inacu. 8Ima lrikjaidatapjaca faa femicapua yeemaca taimiwa Waminalri-nacu. 9Waa jurre matsiadalri inacu Dios irsu, ima inakjuite warsu jurredalri itimati Waminalri ipjeyalre. 10Caidalritsa watataca caiwirricutsa Dios iinai, lricadacarru wacapa shaa fawacatsa njite wataitacarru wakitsindataca shaa lrinacu ljiaji canacailritua irsu icadacarru icaolreo matsia.
Pablo itataja nanacu naji Tesalonicense-nai
11Mitsa wauma ljiacatsa ljiaji fanirri Dios njite Waminalri Jesucristo tsakja lrikitsindata faa wataitacarru waaca wacapa iikjaolre. 12Njite Waminalri-watsa icadaa itawiñawa, njite irsucarrupjautsa ipeyukjeti yaapiyawaca padenirri, cayuji wapeyucapishu shaa, 13yeemacarruatsa taimiwa lrinacu ljiaji sheepakjeti, njite ljiadawatsa lrinuca lripieta ljiaji Waminalri Jesucristo napiya pjiumi njaji lrinaikite lripecunjina yuuya namashicana curriwatsa pacao yaacuti ikjuete fanirri Dios ipjeyalre shaa ikjaidatacacapewa shenitacacarruwa lriuya ljiaji imashicanati.
© 2025 CLAN
© 2025 Seed Company