1 Tesalonicenses 2
2
Cuajipiaca ljiaji idejikjeti Pablo idejirri Tesalonicalricu
1Shaa, yajintsa matsia currim macuadadalrica ljiaji wanuca wacapa aaji iikjaolre. 2Mitsa caiji yajicapishuena, lripeyatua waucacao aji iyacalrerriculje, naji Filipolricuperri cacupia maahicalretsa warsunja, nacarrunieta waicao njite nacadaapia ferrapjita, mitsa lrirricudacadacu faa, Dios piatsa ikitsindata faa wacaitecarru ljiaji lriaco matsiadalri napeculricu njaji aimadan aji nayacalrerricu naji jipundacapepia kjaidaa faa. 3Ima curripia wamatada lrinacu ljiaji wacaiterri irsu, currimtsakja wacaiteni wawaopiakje maashidalrishu, currimtsakja wacashatacarru apada. 4Curripiatsa caica, ima liwinpekena lricapao faa ljiaji Dios njite lricadatsa wacaitecarru lriaco walridalri, caishupa wacanantani. Currim waoma matsiaca nacapaca faa lrishu ljiaji wacaiterri, lricapaodekja ljiaji Dios icapalri pjiumi wacaolrerricu. 5Ima yaajintsa, curritsa cuancaolje wacaite irsu yacuti matsiaperri jimica, wacashatacarru shaa, currimtsakja wanaitjacantja cuanca fetacarru palrata yuya. Dios yaajintsa cayuca. 6Curritsa cuadao warsu ljiaji matsiaca waacuna ipeculricu, njite napeculricutsakja naji apaana. 7Mitsa wataitapiantja watatapiaca iinai yaacarru warsu waufashupao, Jesucristo imenacanpecapua faa, Mitsa meerruapiatsa wawapaca shaa. Caiji kenipedarrushu itawiñacapishu matsia ruenipe, 8Cayutsakja, Macadalri ljiaji ipeyukjeti warsulri iinacu, caishupa curritsa ljiacatsantja wauma wacaiteca ljiaji yacuti matsiadalri Dios inanda wacaiteca mitsa mayamitsa kjantja faa iikjaote wapeyucapua shaa aima. 9Shaa wakitsiñape iwaopia cuancapiaca wadeejica kjaidaa wataitacarru waofacawa, wadeejipia jeecuapjite njite deepjitetsakja, wadeetuantja wamaca icapaca wacaitecadanacupia ljiaji yacuti matsiadalri Dios inanda wacaiteca.
10Jiaa, Dios-tsakja icapjentsa cuajipiaca waofaacawa ipeculrico shaa sheepacaperri caiji Dios yuumacapishu, waufawa mamatsicanaperritsa, pjiumi ljiaji wanaitjalri mayacandalripia njite curripia cuca nacaite mashi wanacu. 11-12Yaajintsakja wakjaidatapiaca-tsakja shaa icuanamtsa njite wajuiwita iwaopiakje, caiji njanirri inaitjacapishu napiya naji lrienipe, wacaitjenpiena shaa mataitacana irsucatsa yufaacawa caiji naufaacapishua naji Dios iyarrupe, ljiaji iwanalrina naufacarruatsa lriinai lrimatsiaca kjaidadalrirricu aji lritalricanatalriutsa niini.
13Nini lrikjaote tsakja waaca caidalritsa matsiadalri Dios irsu, ima jimicadanacupia ljiaji yaacuti matsiadalri Dios inanda wacaiteca, jipapia inacuani Dios yaacu ajadalricapuani, currim cayucaji inaiki yaacushu. Njite ajadalri Dios yacucan, ima lripadametakena iwaopiakje shaa icadacapena icaolreo lrinacu. 14Cai nuaco irsu shaa wakitsiñape Tesalónicalricupe, ima ipacuacataca inaikica napiya njaji icadacape icaolreo Dios-nacu Jesucristo iyarrupe apeji judealrico. Ima jiyapetjenpiena ljiaminitsa jirrapjitakjeti nacapirricu njaji iyacalreta caiji njeyapacapishupiawa naji Judionai nacapirricu njaji nakitsiñape curriperri icada icaolreo Jesucristo-nacu. 15Njaapia njaji judionaica-naji icapiatsa iinulrica Waminalri Jesús, caiji nainucapishupia njaji inuparrutacapepia lripjeyatua, njite aimawalriapia napeecuca nauyao faa. Currim nanaitja caiji Dios ipeyucapishu njite njepundatacafa pjiumi njite padenirri inaiquitsakja. 16Aimawalriapia waumacadanacu wacaiteca njaji curriperritsa judionaica cuajica Dios itaitaca iyumjetacana, currim nacadaa wanaitjaca cayu. Caipia napakjantaca nanacua ljiaji namashicana njite lricuada narsu njaji judionai curritsa Dios imatsietacarru lriinaiwana. Ajadalriwatsa Dios iirua inucautsa naikjaolre.
Pablo yuumatsenakja icapaca Tesalonicalricu
17Nukitsiñape, wamacacadanacupiatua shaa aima jalredauca, ninitjatsa curripiaketsa wacapa shaa, wawaopjientsa shaa caidalritsa wacaolerricu, njite tsakja waumjempia waaca wacapa iikjaolre. 18Waumapia waacao; njua Pablo aimawalria nuumapia nuacao, mitsa ljiaji fepunda Ñacaim lridanata pia waacao. 19Njite ajadalri, icatsa shaa imalri catimaca faa, waanjicapua cacuadacautsa ljiaji wadejicalre, njitetsakjautsa ikjautewatsa warsuatsa matsia waacuna Waminalri Jesucristo ipjeyalre lrinucadanacuatsa lripieta. 20Ajadalri, nucaite shaa ikjaotecautsa warsu waacuna matsia njite icatsa shaa icatimatalrica wacaolre.
© 2025 CLAN
© 2025 Seed Company