1 Pedro 3
3
Narsuvalre njaji canirrinaiperri cainuperritsaca
1Caitsakja sha naninai irsutsa icadaca inirrinai yanji inacu, napadametacarruvatsa navaupiakje mjepacaperricadatuana nacapacapua ljiaji runaitjanda machiadalri runaiquicashu currinatsautsa canacaica rucaitecantjani yacuti shu. 2Lricapacapua runaiquica maupitjadalri njite cuanjica rufiuca Dios ivana. 3Ljiaji imachiaca inaculri currin lrimaca ljiaji ipiacapua itsiculje, njite irrueta uwirrudape nanacu o ishayan cacuadaperrica, 4ljiaji imachiaca lrimutucau ivaupiakje machiadalrirricuite, ljiaji imatsiaca currivacha iwayacacadacao lriuya ljiaji ivaupiaque matsiadali icadalji imaudaca. Ljia imatsiacaca ljiaji cacuadadalri Dios ipjeyalje. 5Ima caipia nanaitjaca namachiacau njaji inaitjepe icadape icaulreu Diosnacu upi. Nacadapia nacaulreu Dios-nacu njite nacadapia nanirrinai yanji nanacu. 6Caipia rucaishu rsuaji Sara, rsuepapia Abraham yacu njite ruanjicani "numinalri"#Gn 18:12. Iniatjacadavatsa machia njite curri ifiu inaitjacani, cayucautsa shaji runacuiteparrishu rsuaji Sara.
7Panaya nudana irsu sha, nanirrinai, irsutsa yanjica yufaca napiya njaji ininai. Icacuadatana yanjicapoa cayecaperricatsana, ima narrucatsacaotsa jalredaoca mawayacacadalri Dios inai caidalriwetsa. Inaitja cayuji nucaitecapishu vadevatsa ljiaca idanata itatacadanacu Dios inai.
Cuajica narsutsa nanaitjaca njaji shepacaperri
8Nini piquendalrina nucaiteca yufena catima yapiyavaca ivauppikje pacuacadadlri yapiya, njaji iquichiñape njite ipeyuacacarrutsacau. Icadacau kjenaperrishursa njite iquichindata njaji iquichiñape njeyapacadanacu jirrapitinadalrirricu. 9Apada inaitjacada irsu machi maumatsa icuadau, cacucada machi apada irsu mjepatsani yacuti machidalrishu tsakja. Machiapjadeca, inaitjacamachia narsu, ima Dios inivananpeca sha irsucarru njaji machiaperri. 10Ima:
"Njaji yumacape yufaca catimau njite viaa aji jalredaucalricu,
narsutsa navapaca ljiaji nenene vade lrimutuetaca yacuti machidalri
njite vadetsakja lricaiteca ishati lrinumalricuite.
11Imaca yuyau ljiaji inaitjaca machi njite inaitjenakja machia.
Yuma yufacarrua imaudacatsa njite yumapja irsuvauni.
12Ima ljiaji vaminalri lrivapavatsa njaji inaitjacaperri mayacan caiji liumacapishu.
Njite ljimica natatacadanacu lrinai,
mitsa Dios yemaca nacueta njaji inaitjacaperri machi".#Sal 34:12-16
13Currivatsa cuca inaitjaca machi irsu, idejicada kjaida inaitjacarru machia. 14Mitsa njerrapitetacada sha inaitjacapua caiji lriumacapishu. ¡Dios icadavatsa lricuadau irsu! Nini mafiutsa naivana, 15mitsadekja icaconata ljiaji Cristo iminalricapuani, natatacadanacuvatsa sha cuadaca icada icaulreu Jesucristo-nacu njite nanacu njaji lricaiteni lricadacaotsa irsu, irsutsautsa yanjica icaiteca njemi. 16Icaite njemi cajiperrishutsa currin padalre perrishuca. Inaitja machia iwaupiakje machiadalri yapiya. Capaimancarruatsa naicau njaji icaitecape machi inacu nacapadanacuatsa yufacawa cayuji nanaitjacapishu njaji Cristo iyarrupe.
17Machiapja pjerrapitaca panaitjacapua ljiaji machiadalri, cayu Dios yumaca, lriuya ljiaji panaitjacapua machi. 18Ivaupia cuajipiaca mayamica ljiaji Cristo vamachicana ikjaute, mayamicani papiatsa. Curripia cuca lrinaitja machi, mitsa ljirrapitapiaca naikjaute njaji machiperrin, lridecarru sha Dios ikjaulre. Upipia mayamicani lridaqui yapiya mitsa lridia lricafiawa lidaki yapiya mamashicanalri. 19Espiritu shu Cristo ya icaite njemi njaji icauljetin Dios ipresotanipen. 20Njapia njaji icapiatsa imjepatacaperripia Dios upitua#Gn 6:1—7:24, Noé shavaljepia, Dios ivapacadana pia napadameta navaupiakje Noé inaitjacadanacu ljiaji ita macani, padapenalritsa shevaca nirse, namaimaca ochoda, njaji yumjerripia unirricuite 21Ljiapia unica ljiaji icatsa lritjinaca ljiaji bautismo lricañatacarru Dios-ca iyumjeta faa. Ljiaji bautismo curritsa ljitacarru lriupjitja ljiaji idaqui, irsutsadekja itataca Dios inai irsucarru iwaupiakje maupitjadalri; lriyumjetacarru fa lrikjaute ljiaji lridiacapuapia ljinicua mayamicalri yuya ljiaji Jesucristo, 22ljiaji idialrina enulriculelje yufalri Dios iyekjemjete njite lritalricanata nanacu njaji angelenai njite njaji apana icaulretin irsucape jidati.
© 2025 CLAN
© 2025 Seed Company