1 Pedro 4
4
1Nini caishupa, caiji Cristo jirrapitacapishupia lridaki yapiya panaya sha irsutsa imachietacacau jirrapitacarru. Ima ljiaji jirrapitacadapia lridaki yapiya lrimakjenina ljiaji lrimashicana. 2Icatsa ljiaji icaiteshupaca imacaquena ivaupiakje upidalrin njite yumaca inaitjaca caiji Dios yumacapishu lriviaca yufacau aji jalredaucalricu. 3Aimena jalredauca yufaca inaitja ljiaji nanaitjalri njaji mjepacaperri, lridepia navaupiakje ljiaji macadadalritsa naumalri nanaitjaca, navaquetacau nairracarru, nekepinaatacau ijñaodatishu, nanaitjaca macadatsa nadaquishu, njite naapia machiadalri narsu njanji idolonai. 4Nini panaya, njeta nacaulreu cuadaca currinatsa iquichindatana lrinacu ljiaji machidalritsa nanaitjalri njite cacuna machi inacu. 5Mitsa narsutsautsa nemaca lripjeyalje ljiaji ivapalriutsa lricaitecarru nacunau njaji cafiperri njite mayanperritsaca. 6Icatsa lrikjaute ljiaji nacanantapia ljiaji yacuti Cristo nacu narsu njaji mayanperrina, ninitsaotsa mayamicadana cayuji mayamicapiu pja inaiki, Dios i Espiritun watsa icada cafina caidalrivetsa.
Ivapa machia ljiaji Dios yanda idejishupau
7Shuminatsa lrivayacacarrua ljiaji jalredauca, nini ivaupia machia njite ivapaquena machiava icatsa ljiaji iquichindatalriutsa sha itatacarru Dios inai. 8Njite pjiumi lriuya ljiaji, ipeyuacau perritsa, ima ljiaji ipeyukjeti lritaita ljiyapetaca iama mashiperri. 9Icuadata njaji yucacape ipanalriculje macupenatsa. 10Ivapena machia njaji Dios yanpe irsu macuadatsa idenjishupau, inaitja machia lrishu ljiaji lricadanda irsu ikichindatacarru njaji apana. 11Cacucadanacuatsa sha, cacuvatsa sha caiji Dios icadacapishu, ikitsindatacadanacuatsa apaana irsutsa lrinaitjacani lishu pjiumi ljiaji jidati Dios icadanda lirsu. Pjiumi ljiaji inaitjalri inaitjani yacarru mashiadalri Dios irsu Jesucristo nacuite, ljiaji irsulri jidati njite nalri irsu mashiadalri caidalrivetsa. Amén.
Nanaiquica njaji shepacaperri njerrapjitacadanacu nacadacapua nacaulreu Cristonacu
12Nukishiñape nupeyunipe, macadasha ljipa sha queyanatsa ljiaji jirrapitidalri lrivichupa sha ljiaji jiyapalriu inacu macadatsa midalricapishutsani. 13Machiapjadekja, icatimatacacau itaitacapua jirrapitaca caiji Cristo jirrapitacapishupia pakjamicarruarsa sha lishu ljiaji itimati ljiadavatsa lripietacaulje lrinuca lrimachiaca macadalri yapiya. 14Catimaperricautsa shaa namacadalretacadanacu sha Cristo ikjaute njaji inaiqui. Ima ljiaji Dios i Espíritun imachiaca acaniji inacu. 15Apada jirrapjitacada inacjuite, curritsa lrinucapuaca inaiqui, currin lriñaite imaca currin lrinaitjacapua machi apana irsu, currintsakja lriumacapua ljimica ape iyadanacu. 16Mitsa ljirrapitacada nacaite capua, shepacadacani mapaimantsa pjia lrikjaute, machiapja piaca mashiadalri Dios irsu caicapua nacaiteca pinacu.
17Ima ljinana yucaquenau Dios initacarruena icaiteca nacuna njaji inaiqui, lrinitavatsa nanacu njaji lrinaiquite lrinivananji. Njite lrinitacada vanacu fa, ¿cuamivatsa paya njeyapacau njaji imacuadatacape ljiaji Dios yacu mashiadalri? 18Nini yumjecada ljiaji shepacada ljirrapjitacayalricu, ¿cuajivatsa paya ljiyapacau ljiaji curridalri ifiu Dios ivana njite pakjamidalri lrimachicanashu? 19Ninivatsa, njaji jirrapitacaperri njepacapua Dios yacu, narsutsa nacadacacau lricapirricu, ljiaji inaitjacada sha, njite inaitjaminicatsa machia, currivatsa cuancaulje lrimatada irsu.
© 2025 CLAN
© 2025 Seed Company