मत्ती 12
12
म्हुङ बाट्च दिनौ बारेयाङ
(मर्कूस २:२३-२८; ३:१-६; लूका ६:१-११)
1होडीक बेला येशू र मेखोल्हौ चेलाको म्हुङ बाट्च याकाङ गहुँ बारीयो लाम लकीङ नुङ्ङ न लेया। होसकुङ चेलाकोलाक मीटुक रन्छीच बाटै गहुँओ बालाको ढुमार ज्याकी ठाला।#१२:१ इडीक सुर भर्मी लामाङ ह्वानाङ मीटुक रन्छीया डेनाङ ह्याङ म्हीन्च बालीको ढुमार ज्याकी छानन्या। र होटजाट्न ज्यानाङ खुस्च माडेमन्या। ङोस्नी व्यवस्था २३:२५ 2इसे डाङार फरिसीकै येशूकी डेया, “ङोस्नी, नाकुङ चेलाको म्हुङ बाट्चनीक व्यवस्थै ही जाट्की माछान्ने डेमने होसे न जाट्ले।”
3येशूये होखुरीककी डेया, “दाऊद र मेन लाफाकै मीटुक रन्छीच बेलाङ होखुरीकै ही जाट्नन्या? नाखुरीकै धर्मशास्त्राङ मापरेस्नने? 4होचे परमेश्वरौ मन्दिर भित्री पर्यार परमेश्वरकी चढडीच रोटो लाफाकोखाटा खाटार ज्यामन्या। व्यवस्था अनुसार च पूजाहारीकै बाहेक अरु सुयेर होसे रोटो ज्याकी माछान्नन्या। 5नाखुरीकै व्यवस्थाङ मापरेस्नने? कुटजाट्न मन्दिराङ लेच पूजाहारीकै म्हुङ बाट्च याकाङ र सधैँ न काम जाटार अपवित्र खास्ले, र पनि होखुरीक दोषी माठहरीस्ले। 6ङा नाखुरीककी डेले, मन्दिर डेनाङ महान इला काट जना ले। 7तर ‘ङाकी बलिदान याछ होइन तर ङा नाखुरीकै अरुकी दया जाट्च मीमन जाट्ले’#होशे ६:६ डेच कुरौ अर्थ नाखुरीकै वार्छ लेनाङ च नाखुरीकै ङौ निर्दोष चेलाकोलाक दोष मालैडीच लेया। 8हीजैडेनाङ भर्मीयो मीजा म्हुङ बाट्च दिनौ र प्रभु हो।”
9होटै ख्योहार येशू होखुरीकुङ सभा ङुच इमाङ नुङा। 10होला काट जना मीहुट छोक्च भर्मी लेया। येशूकी दोष लैडीकी डेम अन्त ङोसार फरिसीकै होसकोकी गीना, “व्यवस्था अनुसार म्हुङ बाट्चनीक छाचकी गेपाक्की छान्ने की माछान्ने?” 11येशूये होखुरीककी डेया, “नाखुरीक मध्याङ सुओर भेडा म्हुङ बाट्चनीक खाडलाङ पर्या डेनाङ, ही होसकी नाखुरीकै झट्टै डोन्की माक्योट्ले र? 12भेडा डेनाङ च भर्मी कुडीक वास्टै मुल्यवानौ ले। होटबाटै व्यवस्था अनुसार म्हुङ बाट्चनीक भलो काम जाट्की खाट्ले।” 13तब येशूये होसे मीहुट छोक्च भर्मीकी डेया, “नाकुङ मीहुट तन्कडीनी!” होचे मीहुट तन्कडीया, र होसे मीहुट र अर्को मीहुट ल्याक्च न सेम्ह छान्की क्योटा। 14तर फरिसीको बाहिर नुङा, अनि येशूकी कुटजाट्न साटीङ डेयार सल्लाह जाट्की ठाला।
परमेश्वरै भाक्च सेवक
(मर्कूस ३:७-१२; लूका ६:१७-१९)
15जब येशूये होसकुङ विरुद्धाङ खास्च योजना थाहा डीन्हार होसको होटै ह्वा। वास्टै भर्मीकै होसकोकी डुटा, अनि होसकै होखुरीकुङ छाचकोलाक पट्ट न गेपाका, 16र होसको सु हो होसे कुरा सुकीर मासेटाक्की डेयार होखुरीककी चेतावनी याहा। 17इटजाट्न परमेश्वरै यशैया अगमवक्ता लकीङ ङाक्च वचन पूरा छान्कीयो लागि इसे छान्च हो,
18“इसे ङौ सेवक हो, इसकी ङै भाक्ङने,
इसकी ङा माया जाट्ले, इसेखाटा ङा माह्राङ्ने,
ङा ङौ आत्मा इसे मीटाक ह्वाक्ङ याल्हे,
अनि होचे न पट्ट न जातिकोलाक न्यायौ घोषणा जाट्ले।
19न होचे बहस जाट्ले, न त बाड्को स्वरै न च्याक्ले, होच्यो स्वर गल्लीकोवाङ सुयेर मासेले।
20भाट्च आर्क्याम र होचे माग्याक्ले,
अनि धिप-धिप छान्न ङुच बत्तीयो सलेदो होचे मासाट्ले,
की जबसम्म होचे न्यायकी विजयाङ माटाहाक्ले।
21अनि होच्यो न म्यार्मीनाङ जाति-जातिकै लहो आशा डाले।”#यशैया ४२:१-४
येशू र शैतान
(मर्कूस ३:२०-३०; लूका ११:१४-२३)
22तब भर्मीकै भूत लग्डीसार मीमीक माडाङ्च र ङाक्की माह्योक्च काट भर्मीकी येशू लेठाङ राका। होसकै होसकी गेपाका अनि होचे डाङ्की र ङाक्की ह्योका। 23र इसे घटना डाङार पट्ट न भर्मीको छक्क पर्चै डेया, “ही इसे दाऊदौ मीजा होइन?” 24तर फरिसीकै इसे कुरा सेयार डेया, “इसे भर्मीये च भूतकुङ राजा बालजिबुलौ शक्तिये टी भूतकोलाक छ्युक्ले।”
25तर होखुरीकै याङ्च विचार जाट्च थाहा डीन्हार येशूये होखुरीककी डेया, “लाहा लाहाङ फाटो छान्च राज्य नाश छान्ने। अनि कुसेर सहर वा परिवार भित्री लाहा लाहाङ फाटो छाना डेनाङ होसे र नाश छान्ने। 26इडीक शैतानै शैतानकी छ्युक्ले डेनाङ, होसे लहो न विरुद्धाङ फाटो छान्ने, अनि होच्यो राज्य कुटजाट्न टीक्डीस्की ह्योक्ले र? 27अनि ङै बालजिबुलौ शक्ति लकीङ भूतको छ्युक्ले डेनाङ नाखुरीकुङ चेलाकै चहिँ सुओ शक्ति लकीङ छ्युक्ले ट? होटबाटै होखुरीक न नाखुरीकुङ न्यायकर्ता छान्ने। 28तर इडीक ङै परमेश्वरौ आत्मा लकीङ भूतको छ्युक्ले डेनाङ, परमेश्वरौ राज्य नाखुरीक लेठाङ राम्हभ्यामने। 29पहिला इमुङ बलियो भर्मीकी माछ्याक्ङ, सुयेर होच्यो इमाङ पर्यार होच्यो धनमालको खुसार आल्खी ह्योक्ले र? तर होसे बलियो भर्मीकी छ्याकार मट्टै होचे खुसकी ह्योक्ले।
30 “सु ङाखाटा माले, होसे ङौ विरुद्धाङ ले, अनि सुये ङाखाटा माबटुलीले, होचे छरपष्ट जाट्ले। 31होटबाटै ङा नाखुरीककी डेले, भर्मीकुङ पट्ट न पाप र ङाक्च दुष्ट कुराको क्षमा छान्की ह्योक्ले, तर पवित्र आत्मौ विरुद्धाङ ङाक्च दुष्ट कुराको चहिँ क्षमा छान्की माह्योक्ले। 32सुयेर भर्मीयो मीजौ विरुद्धाङ हीर डेया डेनाङ होसकी क्षमा छान्ने, तर सुयेर पवित्र आत्मौ विरुद्धाङ ङाका डेनाङ होसकी इसे युगाङ र राछ युगाङ र क्षमा माछान्ने।
म्यार्टुङकी होच्यो मीस्या लकीङ न चीन्डीले
(लूका ६:४३-४५)
33 “इडीक म्यार्टुङ सेछ ले डेनाङ, होच्यो मीस्या र सेछ छान्ने। इडीक म्यार्टुङ मास्च ले डेनाङ, होच्यो मीस्या र मास्च न छान्ने। हीजैडेनाङ मीस्या लकीङ न म्यार्टुङ चीन्डीले। 34ए विषालु बुलौ मीजाको! दुष्ट छानार नाखुरीक कुटजाट्न सेछ कुरा ङाक्की ह्योक्ले? मीमनाङ हीये न्हेप्मने होसे कुराको न मेङ्गेरीङ बाहिर ख्योल्हे। 35सेछ भर्मीये मेल्हा भित्री जम्मा छानार ङुच सेछ कुराको बाहिर छ्युक्ले, तर दुष्ट भर्मीये लाहा भित्री जम्मा छानार ङुच दुष्ट कुराको न बाहिर छ्युक्ले। 36ङा नाखुरीककी डेले, न्यायौ दिनाङ पट्ट न भर्मीकै ङाक्च व्यर्थौ कुराकुङ लेखा याखी पर्ले। 37हीजैडेनाङ नाखुरीकै ङाक्च वचनै न नाखुरीक निर्दोष ठहरीस्ले, र नाखुरीकुङ वचनै न नाखुरीक दोषी ठहरीस्ले।”
योनौ चिन्हौ बारेयाङ
(मर्कूस ८:११-१२; लूका ११:२९-३२)
38कुडीक जना धर्मगुरु र फरिसीको मध्याङ कोइ-कोये येशूकी डेया, “ए गुरु, काट अचम्मौ चिन्ह टान्हाक्नी कानकी ङोस्च मीमन ले।” 39येशूये होखुरीककी जवाफ याहा, “दुष्ट र व्यभिचारी पुस्तै चिन्ह पाले। तर इसे पुस्ताकी योना अगमवक्तौ चिन्ह बाहेक अरु कुसेर चिन्ह माह्याले। 40हीजैडेनाङ कुटजाट्न योना काट बाड्को डीस्यौ मीटुकाङ सोम याक र सोम रात ङुकी पर्न्या, होटजाट्न न भर्मीयो मीजा र पृथ्वीयो गर्भ भित्री सोम याक र सोम रात ङुकी पर्ले। 41न्यायौ दिनाङ निनबेयुङ भर्मीको खडा छान्ने, अनि इसे पुस्ताकी दोषी ठहरीले, हीजैडेनाङ होखुरीकै योनौ प्रचाराङ लाहा-लहे पश्चात्ताप जाट्नन्या। र ङा नाखुरीककी डेले, योना डेनाङ महान काट जना इला ले। 42न्यायौ दिनाङ दक्षिणाङ लेच शेबा देशुङ महारानी खडा छान्ने र इसे पुस्ताकी दोषी ठहरीले, हीजैडेनाङ होसे पृथ्वीयो पार्च छेउ लकीङ सोलोमन राजौ बुद्धियो कुरा सेकीयो लागि राहा। र ङा नाखुरीककी डेले, सोलोमन डेनाङ महान चाहाँ काट जना इला ले।
दुष्टआत्मा ल्हेस्च
(लूका ११:२४-२६)
43 “जब काट भर्मी लकीङ अशुद्ध आत्मा ख्योहार नुङ्ले, अनि होसे म्हुङ्बाट्च ठाउँ पाचै ओबानो ठाउँकोवाङ डुलीस्न ह्वाले, तर कुला र माडुप्ले। 44तब होचे डेले, ‘कुटै ङा ख्योहार राहा, होसे लहो इमाङ न ङा ल्हेसार नुङ्ले।’ ल्हेसार रान्हाङ होचे इम मोर्ल्हयाङ र सफा जाटार सजडीम डाच डुप्म राल्हे। 45तब होसे नुङ्ले र लाहा डेनाङ झन् दुष्ट अरु सात ओटा आत्माकोलाक लार राल्हे, र भित्री पर्यार ङुले। अनि होसे भर्मीयो दशा पहिलुङ डेनाङ न्हुङ्लकुङ दशा झन् मासेछ छान्ने। इसे दुष्ट पुस्ताकी र होङ्च न छान्ने।”
येशूओ मोइ र भाइको
(मर्कूस ३:३१-३५; लूका ८:१९-२१)
46येशू भर्मीकुङ भीडखाटा ङाक्ङन लेनाङ, होसकुङ मोइ र भाइको होला टाह्रा र होसकोखाटा कुरा जाट्की डेम बाहिर लेन्न ङुमन्या। 47तब काट जनै येशूकी डेया, “गुरु ज्यु, नाकुङ मोइ र भाइको नाकोखाटा कुरा जाट्च मीमन जाटार बाहिर टोङ्ह ङुमने।” 48येशूये होसे भर्मीकी जवाफ याहा, “ङौ मोइ सु हो? ङौ भाइको सु हो?” 49तब येशूये लहो चेलाको पट्टी मीहुटै टान्हाकार डेया, “ङोस्नी, ङौ मोइ र भाइको इखुरीक न हो। 50हीजैडेनाङ सुये स्वर्गाङ लेच ङौ बोयो इच्छा पूरा जाट्ले, होखुरीक न ङौ भाइ, बहिनी र मोइ हो।”
Valgt i Øjeblikket:
मत्ती 12: EMGP
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2025 by Mother Tongue Translators Society and Wycliffe Bible Translators, Inc.
