मत्ती 13
13
छोयो भेरेट्च उदाहरण
(मर्कूस ४:१-१२,२५; लूका ८:४-१०; १०:२३-२४)
1होसनीक येशू होसे इमीङ ख्योहा र तालौ छेवाङ नुङार ङुवा। 2होसकुङ वरिपरि बाड्को भर्मीकुङ भीड जम्मा छाना, होटबाटै होसको काट डुङ्गाङ काल्हार ङुवा। भर्मीकुङ भीड चहिँ तालौ छेवाङ न टोङ्ह ङुवा। 3येशूये होखुरीककी उदाहरण लकीङ वास्टै कुराको डेया। होसकै डेया, “सेनी, काट जना किसान छोयो भेरेट्की ह्याङ नुङा। 4छोयो भेरेट्चै जाट्नाङ कुडीक छोयो लामाङ पर्या र ग्वाजाको राहार ज्याम याहा। 5कुडीक छोयो चहिँ ल्हुङ घारीयाङ पर्या, होला चे-चेस्जा मट्टै झा लेचबाटै छोयो छिटो न गीटा, 6तर लुप्म जरा काकी माह्योक्चबाटै जब नाखान खान्हा र होसे ओइलडीसार छोका। 7कुडीक छोयो चहिँ जु घारीयाङ पर्या, तर जुको ल्होङ्ङ राहार गीट्च बिरुवाकी ल्होङ्की माह्या र म्हाटार नुङा। 8तर कुडीक छोयो चहिँ मलिलो झाङ पर्यार कोये सय गुणा, कोये साठी गुणा र कोये तीस गुणा स्याटाका। 9सुओ सेच मेनेकेप ले, होचे सेख्यो!”
10होटै न्हुइङ चेलाकै येशू लेठाङ राहार डेया, “हीजै नाको भर्मीकोलाक शिक्षा यान्हाङ उदाहरणको याहार पाहाक्ले?” 11होसकै होखुरीककी जवाफ याहा, “नाखुरीककी च स्वर्गौ राज्यौ रहस्यको वार्छ ज्ञान याम्हने, तर होखुरीककी च माह्यामने। 12हीजैडेनाङ सुखाटा ले, होसकी अझै याल्हे र होसेखाटा वास्टै डेनाङ वास्टै छान्ने। तर सुखाटा माले, होसेखाटा लेच चेक्जा र स्याट्न याल्हे। 13होटबाटै ङा होखुरीककी शिक्षा यान्हाङ उदाहरणको याहार पाहाक्ले हीजैडेनाङ होखुरीकै ङोस्नाङ र माडाङ्ले, सेनाङ र माबुझडीस्ले। 14होखुरीक लेठाङ यशैया अगमवक्तै ङाक्च वचन पूरा छान्नने:
‘होसे भर्मीकै सेकी च सेले तर होखुरीकै माबुझडीस्ले,
होखुरीकै ङोस्की च ङोस्ले तर होखुरीकै माचीन्डीले।
15 हीजैडेनाङ होसे भर्मीकुङ हृदय कठोर छान्नने,
होखुरीकुङ मेनेकेप मासेच छान्नने,
र होखुरीकै मीमीक चिम जाट्नने।
नभा च होखुरीकै लहो मीमीकै डाङ्च लेया, मेनेकेपै सेच लेया र मीमनै बुझडीस्च लेया,
अनि होखुरीक ङा पट्टी ल्हेस्च लेया
र ङा होखुरीककी गेपाक्च लेया।’ #
यशैया ६:९-१०
16 “तर नाखुरीकुङ मीमीक आशिषित ले, हीजैडेनाङ होचे डाङ्ले। अनि नाखुरीकुङ मेनेकेप आशिषित ले, हीजैडेनाङ होचे सेले। 17साँच्ची न ङा नाखुरीककी डेले, नाखुरीकै डाङ्च र सेच कुराको वास्टै अगमवक्ता र परमेश्वरौ भर्मीकै डाङ्की र सेकी बाड्को मीमन जाट्नन्या। तर होखुरीकै डाङ्की र माडुपा सेकी र माडुपा।
छोयो भेरेट्चओ उदाहरणौ अर्थ
(मर्कूस ४:१३-२०; लूका ८:११-१५)
18 “होटबाटै छोयो भेरेट्चओ उदाहरणौ अर्थ सेनी। 19जब सुयेर स्वर्गौ राज्यौ वचन सेले, र होसे माबुझडीसा डेनाङ शैतान राहार होच्यो हृदयाङ ही भेरेट्नन्या होसे खुसार आल्हे। इसे चहिँ होसे लामाङ पर्च छोयौ उदाहरण लेखा न हो। 20अनि ल्हुङ घारीयाङ पर्च छोयो चहिँ होसे हो, वचन सेच बित्तिकै आनन्दखाटा होचे स्वीकार जाट्ले। 21तर होच्यो लहो लुप्म जरा मानुङ्चबाटै होसे थोरै समय मट्टै ङुले। जब परमेश्वरौ वचनाङ विश्वास जाट्च कारणै कष्ट र खेदो आइपर्न राछ बित्तिकै होसे विश्वास लकीङ हटडीस्ले। 22जुघारीयाङ पर्च छोयो चहिँ होसे हो, वचन च सेले तर संसारुङ चिन्ता फिक्री र धन-सम्पत्तियो छलै परमेश्वरौ वचनकी बाधा याल्हे, अनि होचे सेन र मीस्या मास्याटाक्ले। 23तर मलिलो झाङ पर्च छोयो चहिँ होसे हो, सुये परमेश्वरौ वचन सेले र वचनकी बुझडीस्ले, होचे न मीस्या स्याटाक्ले। अनि भेरेट्च छोयो लकीङ कोये सय गुणा कोये साठी गुणा र कोये तीस गुणा मीस्या स्याटाक्ले।”
सामौ उदाहरण
24येशूये होखुरीककी अर्को उदाहरण याछै डेया, “स्वर्गौ राज्य काट जना भर्मी ल्याक्च हो, होचे लहो ह्याङ सेछ छोयो भेरेटा। 25तर कायाक नाबीक जब भर्मीको मीसा तब होच्यो शत्रु राहा, अनि गहुँओ मीघ्याङ सामा भेरेटार होसे नुङा। 26जब गहुँ गीटार बाला का, तब होला सामा र डाङ्की ठाला।
27 “अनि होसे भर्मीयो नोकरको राहार मालिककी डेया, ‘मालिक, ही नाकै लहो ह्याङ सेछ गहुँओ छोयो न भेरेट्च होइन र? होला सामा चहिँ कुटै राहा?’ 28मालिकै होखुरीककी डेया, ‘कुसे शत्रुये होट जाट्च हो।’ नोकरकै होसकी गीना, ‘ही कान नुङार होसे सामाकी हुटीङ?’
29 “तर बारीयो मालिकै जवाफ याहा, ‘होट माजाट्नी, हीजैडेनाङ नाखुरीकै सामा हुट्नाङ गहुँ र हुट्की ह्योक्ले। 30बरु गहुँ चेच बेला माछान्ठर नीसकी न काठोवाङ ल्होङ्की यान्ही। अनि जब गहुँ म्हीनार चेच बेला छान्ने तब ङा गहुँ चेचकोलाक डेले, पहिला सामा हुटार सीकाक्कीयो लागि मुठा छ्याक्नी, अनि गहुँ जति बटुलीयार ङौ ढुकुटीयाङ राक्नी।’”
राइगानौ छोयो र खमीरौ उदाहरण
(मर्कूस ४:३०-३४; लूका १३:१८-२१)
31येशूये फेरि होखुरीककी अर्को उदाहरण याहार डेया, “स्वर्गौ राज्य काट राइगानौ छोयो ल्याक्च हो, होसकी काट जना भर्मीये आल्हार लहो ह्याङ रोप्डीया। 32होसे अरु पट्ट छोयो डेनाङ मार्जा छान्ने, तर जब होसे गीटार ल्होङ्ले, होसे ह्याङ लेच पट्ट बिरुवाको डेनाङ बाड्को छानार झाङ्गडीस्ले। अनि ग्वाजाको राहार होच्यो हाँगाकोवाङ मीम खासार ङुले।”
33येशूये अर्को उदाहरण याहार डेया, “स्वर्गौ राज्य खमिर ल्याक्च हो, होचे चहिँ रोटो सोकाक्ले। काट मास्टोये चेक्जा खमिर सोम पाथी बेभोकाङ मोल्होक्ले अनि होसे पट्ट न सोकार ठिक माछान्ठर काट ठावाङ डा।”
34येशूये भर्मीकोलाक इसे पट्ट न कुराको उदाहरण याहार डेया। अनि उदाहरण बिना होसकै होखुरीककी हीर कुरा मापाहाका। 35इटजाट्न परमेश्वरै अगमवक्ता लकीङ ङाक्च वचन पूरा छाना:
“ङा उदाहरणको याहार ङाक्ले,
ङा संसार उत्पत्ति छान्च लकीङ आर्च्युकार डाच कुराको ङाक्ले।”#भजनसंग्रह ७८:२
सामौ उदाहरणौ अर्थ
36तब येशू भीडकी डासार इमाङ राहा। अनि होसकुङ चेलाको राहार होसकोकी डेया, “कानकी गहुँबारीयाङ लेच सामौ उदाहरणौ अर्थ बुझडीम यान्ही।” 37येशूये होखुरीककी जवाफ याहा, “सेछ छोयो भेरेट्च चहिँ भर्मीयो मीजा हो। 38ह्या संसार हो, सेछ छोयो चहिँ स्वर्गौ राज्यौ भर्मीको हो। अनि सामा चहिँ शैतानौ भर्मीको हो। 39सामा भेरेट्च शत्रु चहिँ शैतान हो, अनि म्हीन्च बाली चेच बेला चहिँ संसारौ अन्त्यौ दिन हो, बाली चेच ह्यामीको चहिँ स्वर्गदूतको हो। 40कुटजाट्न सामाकी हुटार म्हेयाङ सीकाक्ले होटजाट्न न संसारौ अन्त्यौ दिनाङ र होङ्च न छान्ने। 41होसनीक भर्मीयो मीजै होसकुङ स्वर्गदूतकोलाक बीर्न्हकाले, अनि होखुरीकै पाप जाट्की लैडीच र दुष्ट काम जाट्च पट्टकी होसकुङ राज्य लकीङ बटुलीले। 42अनि होखुरीककी म्हेओ भट्टीयाङ लोम्हकाले। होला भर्मीको राप्ले र मीस्याक जीक्ले। 43तब धर्मी जनको लहो बोयो राज्याङ नाखान लेखा न चम्कडीस्ले। सुओ सेच मेनेकेप ले, होचे सेख्यो!
गाडधन र सेछ मोतीयो उदाहरण
44 “स्वर्गौ राज्य ह्याङ ठाकार आर्च्युक्ङ डाच गाडधन ल्याक्च हो। जब काट जना भर्मीये होसे डुपा, होचे फेरि आर्च्युकार डा र आनन्दखाटा होसे माह्राङ्छै नुङार लाहाखाटा लेच पट्ट ठोक आर्ला र होसे ह्या लोवा।
45 “फेरि स्वर्गौ राज्य चहिँ सेछ मोतीकी पाम ह्वाच काट व्यापारी ल्याक्च हो। 46जब होचे काट बहुमुल्य मोती डुपा, अनि होसे नुङ्की क्योटा र लाहाखाटा लेच पट्ट ठोक आर्लार होसे मोती लोवा।
डीस्या घोच जालौ उदाहरण
47 “स्वर्गौ राज्य तालाङ ङाप्च काट जाल ल्याक्च न हो। होला पट्ट खाल्या डीस्याको पर्ले। 48अनि होसे जाल डीस्यै न्हेपा, जालहारीकै होसकी टान्डीयार तालौ छेवाङ डोना। होटै न्हुइङ होखुरीक ङुवार सेछ-सेछ डीस्याको चहिँ भाकार मेखुरीकुङ फुर्लुङाङ जम्मा जाटा, तर मास्च डीस्याकोलाक#१३:४८ मास्च डीस्या: यहूदी चलन अनुसार व्यवस्थै ज्याकी माछान्ले डेच डीस्या चहिँ मास्च डीस्या हो। चहिँ बाहिर लोम्ह याहा। 49इसे संसारौ अन्त्यौ दिनाङ र होङ्च न छान्ने। स्वर्गदूतको राहार दुष्टकोलाक धर्मीकुङ मीघीङ भाक्ले। 50अनि होखुरीककी म्हेओ भट्टीयाङ लोम्हकाले। होला होखुरीक मीस्याक जीक्चै राप्ले।”
51येशूये चेलाकोलाक गीना, “ही नाखुरीकै इसे कुराको बुझडीसा?” होखुरीकै डेया, “हजुर, बुझडीसा।” 52येशूये फेरि डेया, “होटबाटै स्वर्गौ राज्यौ बारेयाङ शिक्षा डुप्च पट्ट न धर्मगुरुको चहिँ इमुङ काट जना मीमुरुङ ल्याक्च न हो। होचे लहो ढुकुटीलकीङ नयाँ र पुरानो मुल्यवान सामानको बाहिर डोन्ने।”
आदर माडुप्च अगमवक्ता
(मर्कूस ६:१-६; लूका ४:१६-३०)
53जब येशूये इसे उदाहरणको डेम भ्या होटै होसको ह्वा, 54अनि लहो इम लेच नासरत सहराङ राहा। होला होसकै भर्मीकोलाक होखुरीकुङ सभा ङुच इमाङ याङ्च शिक्षा याखी ठाला। होखुरीक छक्क पर्चै डेया, “इसकी याङ्च बुद्धि र अचम्मौ काम जाट्च शक्तिको कुटै डुपा? 55ही इसे सिकर्मी काम जाट्चौ मीजा होइन र? ही इच्यौ मोयो म्यार्मीन मरियम होइन, इच्यौ भाइको याकूब, योसेफ, सिमोन र यहूदा होइन र? 56ही इच्यौ बहिनीको पट्ट न कानखाटा न माले र? अनि इचे इसे शक्ति र बुद्धि चहिँ कुटै डुपा ट?” 57होखुरीक होसकोखाटा मीरीस ख्योहा। येशूये होखुरीककी डेया, “अगमवक्ताकी लहो ठावाङ र लहो इमाङ आदर माजाट्ले, तर अरु ठावाङ चहिँ पट्टकै आदर जाट्ले।” 58होखुरीकै येशूकी विश्वास माजाट्चबाटै येशूये होला अचम्मौ कामको वास्टै माजाटा।
Valgt i Øjeblikket:
मत्ती 13: EMGP
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2025 by Mother Tongue Translators Society and Wycliffe Bible Translators, Inc.
