मत्ती 11
11
येशू र बप्तिस्मा याछ यूहन्ना
(लूका ७:१८-३५)
1लहो बाह्र जना चेलाकोलाक इसे कुराको डेम भ्यारखीङ येशू होटै गालीलुङ सहरलाक शिक्षा याखी र सेछ समाचार प्रचार जाट्की डेम नुङा।
2बप्तिस्मा याछ यूहन्ना झ्यालखानाङ लेच बेलाङ मुक्ति याछ ख्रीष्टै जाट्च कामकुङ बारेयाङ सेया। अनि होचे लहो चेलाकोलाक येशू लेठाङ इसे कुरा गीन्की बीर्न्हका। 3नुङार होखुरीकै येशूकी गीना, “ही राछवाला मुक्ति याछ ख्रीष्ट नाको न हो की कानै अरुकी न लाम ङोसीङ?” 4येशूये होखुरीककी डेया, “नाखुरीकै ही सेमने र डाङ्ङने, नुङार होसे न कुरा यूहन्नाकी डेम यान्ही: 5मीमीक माडाङ्चकै डाङ्ङ न ले, लङ्गडाको ह्वामन ले, कुष्ठरोगीको गेप्मन ले, मेनेकेप मासेचकै सेमन ले, सीचको फेरि जीवाम सोमन ले र गरीबकै सेछ समाचार सेकी डुप्मन ले। 6ङौ बारेयाङ शंका माजाट्च भर्मी साँच्ची न आशिष डुप्च हो।”
7यूहन्नौ चेलाको नुङ्रखीङ येशूये भर्मीयो भीडकी यूहन्नौ बारेयाङ डेया, “नाखुरीक उजाड ठावाङ ही ङोस्की नुङ्ङन्या? ही नाम्सुये होयोक्ङ डाच आर्क्यामकी? 8नभा ही ङोस्की नुङा ट? ही सेछ-सेछ बढीन बील्छ भर्मीकोलाक? सेछ-सेछ बढीन बील्छ भर्मीको च राजौ दरबाराङ टी ङुले। 9होटडेनाङ नाखुरीक ही ङोस्की नुङा ट? ही अगमवक्ताकी? हो, साँच्ची न ङा नाखुरीककी डेले, यूहन्ना काट अगमवक्ता डेनाङ बाड्को ले। 10इसे होसे न हो सुओ बारेयाङ परमेश्वरै धर्मशास्त्राङ याङ्च डेमने,
‘ङोस्नी, ङा ङौ दूतकी नाकुङ अघि बीर्न्हकाले,
अनि होचे न नाकुङ अघि लाम तयार खास्ले।’ #मलाकी ३:१
11 “साँच्ची न ङा नाखुरीककी डेले, मास्टो भर्मीको लकीङ डीन्छ मध्याङ बप्तिस्मा याछ यूहन्ना डेनाङ बाड्को सुर माले। तर स्वर्गौ राज्याङ पट्ट डेनाङ मार्जा सु ले, होसे यूहन्ना डेनाङ बाड्को हो। 12बप्तिस्मा याछ यूहन्नै प्रचार जाट्च समय लकीङ चाहाँसम्म भर्मीको चहिँ स्वर्गुङ राज्यौ विरोधाङ जोडखाटा लडाइँ जाट्न न ले। 13हीजैडेनाङ पट्ट न अगमवक्ताको र मोशौ व्यवस्थै, बप्तिस्मा याछ यूहन्नौ समयसम्म स्वर्गौ राज्यौ बारेयाङ अगमवाणी जाटा। 14ङै डेच कुरा नाखुरीक विश्वास जाट्ले डेनाङ, होखुरीकै डेच राखी पर्च एलिया चहिँ इसे यूहन्ना न हो। 15सुओ सेच मेनेकेप ले, होचे सेख्यो।
16 “इसे पुस्तुङ भर्मीकोलाक ङा हीखाटा तुलना जाटीङ? होखुरीक बजाराङ ङुवार लाफाकोलाक आर्घाचै इट डेच जजाको ल्याक्च हो,
17 ‘कानै नाखुरीकुङ लागि बाँसुरी आर्म्हाटा, तर नाखुरीक मास्याहा।
कानै विलापौ ल्हीङ ल्हीङा तर नाखुरीकै विलाप माजाटा।’
18 “हीजैडेनाङ बप्तिस्मा याछ यूहन्ना अरु भर्मीकै लेखा अङ्गुरौ मद्य मागाम र ज्याच कुराको माज्याम न राहा, अनि होखुरीकै होसकी भूत लग्डीस्नने डेले। 19भर्मीयो मीजा ज्याचै र गाचै राहा, अनि होखुरीक डेले, ‘ङोस्नी, घिचुवा, हान रक्सी गार म्होर्चको, कर सोट्चको र पापीकुङ लाफा!’ तर बुद्धि ठिक हो डेच कुरा होच्यो काम लकीङ न प्रमाणित छान्ने।”
पाप माडास्च सहरौ भर्मीकोलाक चेतावनी
(लूका १०:१३-१५)
20कुसे-कुसे सहराङ येशूओ वास्टै अचम्मौ कामको छान्नन्या, अनि होसकै होसे सहरकोलाक धिक्कारीकी ठाला, हीजैडेनाङ होखुरीकै पश्चात्ताप माजाटा। 21होसकै डेया, “धिक्कार नाङ्की, ए खोराजीन! धिक्कार नाङ्की, ए बेथसेदा! इडीक नाखुरीक लेठाङ जाट्च अचम्मौ कामको टुरोस र सीदोनाङ जाट्च लेनाङ होखुरीकै पहिला न भाङ्ग्रा बील्हार र बाडाप मोल्हार पश्चात्ताप जाट्च लेया। 22ङा नाखुरीककी डेले, न्यायौ दिनाङ नाखुरीकुङ डेनाङ च टुरोस र सीदोनुङ भर्मीकुङ हालत सहडीकी ह्योक्च छान्ने।
23 “ए कफर्नहुम, ही नाखुरीक स्वर्ग नुङ्ले र? होइन नाङ्की नरकाङ लोम्ह याल्हे। हीजैडेनाङ इडीक नाङ लेठाङ जाट्च अचम्मौ कामको सदोमाङ जाट्च लेनाङ होसे छीनीसम्म र लेम ङुच लेया। 24तर ङा नाखुरीककी डेले, न्यायौ दिनाङ नाखुरीकुङ डेनाङ च बरु सदोमुङ भर्मीकोलाक सहडीकी ह्योक्च छान्ने।”
म्हुङ्चकै म्हुङ बाट्च
(लूका १०:२१-२२)
25होडीक बेला येशूये डेया, “ए बोइ, स्वर्ग र पृथ्वीयुङ प्रभु, ङा नाकोकी धन्यवाद डेले, हीजैडेनाङ नाकै इसे कुराको बुद्धिमान र समझदारी लकीङ आर्च्युकार डा, तर मार्जा बालकको ल्याक्चकोलाक होसे टान्हाका। 26हो बोइ, नाकै इसे जाटा हीजैडेनाङ नाकोकी इसे न असल सेया।
27 “पट्ट न ठोक ङौ बोये ङाकी जिम्मा याम्हने, बोये बाहेक मीजाकी अरु सुयेर माचीन्डीले, र मीजै बाहेक बोइकी सुयेर माचीन्डीले। अनि सु लेठाङ मीजै बोइकी टान्हाक्च इच्छा जाट्ले होचे चहिँ चीन्डीले।
28 “ए म्हुङ्चको र लीस्च भारीये फेट्चको, ङा लेठाङ रान्ही, ङा नाखुरीककी शान्तिये म्हुङ बाटाक्ले। 29ङौ जुवा बुनी र ङा लकीङ पान्ही हीजैडेनाङ ङौ मीमन दयालु र नम्र ले अनि नाखुरीकै नाखुरीकुङ आत्माङ आराम डुप्ले। 30हीजैडेनाङ ङौ जुवा सजिलो ले र ङौ भारी ख्याङ्छ ले।”
Valgt i Øjeblikket:
मत्ती 11: EMGP
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2025 by Mother Tongue Translators Society and Wycliffe Bible Translators, Inc.
