मत्ती 10
10
बाह्र जना प्रेरितकुङ काम सुरु
(मर्कूस ३:१३-१९; ६:७-१३; लूका ६:१२-१६; ९:१-६)
1येशूये लहो बाह्र जना चेलाकोलाक आर्घार अशुद्ध आत्माको छ्युक्च र खाल-खालुङ रोग र छाचकोलाक गेपाक्च अधिकार याहा।
2बाह्र जना प्रेरितकुङ म्यार्मीन इसे न हो पहिलो पत्रुस डेच सिमोन र मेन भाइ अन्द्रियास, जब्दियो मीजाको याकूब र होच्यो भाइ यूहन्ना, 3फिलिप र बारथोलोमाइ, थोमा र कर सोट्च मत्ती, अल्फयासौ लेन्जा मीजा याकूब, थेदियस, 4देशभक्त दलुङ सिमोन र येशूकी घोवाक्च यहूदास इस्करियोत।
5येशूये होसे बाह्र जना प्रेरितकोलाक इट डेयार बीर्न्हका, “नाखुरीक अन्यजातिकुङ मीघ्याङ र सामरीकुङ सहरकोवाङ मानुङ्की। 6तर म्हाट्च भेडाको ल्याक्च इस्राएली जातिको लेठाङ मट्टै नुङ्नी। 7‘स्वर्गुङ राज्य खेरेप राम्हने’ डेयार प्रचार जाट्नी। 8छाचकोलाक गेपाक्नी, सीचकोलाक जीवाटाक्नी, कुष्ठरोग लग्डीस्चकोलाक शुद्ध पार्नी र भूतको छ्युक्नी। नाखुरीकै होटन डीन्हा र अरुकोलाक र होटन यान्ही। 9नाखुरीकै पल्टोवाङ सुन, चाँदी र तामौ काट पैसा र माबुनी। 10नुङ्नाङ लामुङ लागि झोला, फेर्च दौरा, जुत्ता, डाङ्गा हीर मालानी। हीजैडेनाङ ह्यामीये होसे काम लकीङ न ज्याकी डीन्खी पर्ले।
11 “नाखुरीक कुसे लाङ्घा र सहराङ नुङ्ले, होला नाखुरीककी सुये स्वागत जाट्ले होखुरीककी पानी र होटै बिदा माछान्ठर होखुरीकखाटा न ङुनी। 12नाखुरीक होसे इम भित्री पर्नाङ ‘नाखुरीककी शान्ति छान्ख्यो’ डेनी। 13होसे इमुङ भर्मीको नाखुरीकुङ शान्ति लाकी योग्य लेसा डेनाङ होला शान्ति ङुले। तर होखुरीक योग्य मालेसा डेनाङ होसे शान्ति नाखुरीक लेठाङ न ल्हेसार राल्हे। 14इडीक सुयेर नाखुरीककी स्वीकार माजाटा डेनाङ र नाखुरीकुङ वचन मासेया डेनाङ र, होसे इम र सहरीङ ख्योन्हाङ लहो मीखुट्यौ झाबुल होला न खाह्राम यान्ही।#१०:१४ पाइतालुङ धुलो खाह्राकी डेच अर्थ चहिँ येशूकी विश्वास माजाट्च सहरुङ भर्मीकोलाक इन्कार जाट्की हो। होटै होखुरीकुङ लागि नाकै हीर ठोक जाट्की बाँकी मालेकी हो। 15साँच्ची न, ङा नाखुरीककी डेले, न्यायौ दिनाङ होसे सहरौ दशा डेनाङ बरु सदोम र गमोरौ#१०:१५ सदोम र गमोरौ: सदोम र गमोरा डेच सहरुङ भर्मीकुङ वास्टै पापै जाट्नाङ परमेश्वरै होखुरीककी नष्ट पार्नन्या। ङोस्नी उत्पत्ति १९ दशा सहडीकी ह्योक्च छान्ने।
राखी पाच सतावटौ बारेयाङ
(मर्कूस १३:९-१३; लूका २१:१२-१७)
16 “सेनी, ङा नाखुरीककी सीलाकुङ मीघ्याङ भेडाकी बीर्न्हकानाङ लेखा न बीर्न्हकामन ले। होटबाटै नाखुरीक बुल लेखा चङ्ख र ढुकुर लेखा सोझो छान्नी। 17तर भर्मीको लकीङ होशियार छान्नी, हीजैडेनाङ होखुरीकै नाखुरीककी अदालतकोवाङ जिम्मा याल्हे, अनि होखुरीकुङ सभा ङुच इमकोवाङ नाखुरीककी कोर्रा ङाप्ले। 18नाखुरीककी ङौ खातिर हाकिम र राजाकुङ म्याहासाङ टोङ्हाक्ले। होखुरीक र अन्यजातिकुङ लागि नाखुरीक साक्षी छान्ने। 19जब होखुरीकै नाखुरीककी घोले, तब होडीक बेला ही डेकी र कुटजाट्न ङाक्की डेयार सुर्ता माजाट्नी। हीजैडेनाङ नाखुरीकै ही ङाक्की पर्च हो, होडीक न बेला नाखुरीककी याल्हे। 20हीजैडेनाङ होडीक बेला ङाक्च नाखुरीक लाहा न होइन, तर नाखुरीकुङ परमेश्वर बोयो आत्मा नाखुरीक लकीङ ङाक्ले।
21 “भाये लहो न डाजेकी साट्कीयो लागि घोवाक्ले, बोये मीजाकोलाक र मीजाकै बोइ-मोयो विरुद्धाङ सोवार होखुरीककी साट्की लैडीले। 22ङाकी विश्वास जाट्च बाटै नाखुरीककी पट्टकै झीर्ले। तर सु न्हुइङसम्म न स्थिर ङुले, होचे न मुक्ति डुप्ले। 23जब होखुरीकै नाखुरीककी काट सहराङ सतडीले तब अर्को सहराङ भोक्डीस्नी। साँच्ची न ङा नाखुरीककी डेले, भर्मीयो मीजा राखी अगाडि नाखुरीकै पट्ट न इस्राएलुङ सहरकोवाङ काम जाट्न भ्याच माछान्ने।
24 “चेला लहो गुरु डेनाङ र नोकर लहो मीमुरुङ डेनाङ बाड्को माछान्ने। 25चेलै लहो गुरु ल्याक्च छान्नाङ सन्तोक मन्डीख्यो, होटजाट्न न नोकरै र लहो मालिक ल्याक्च छान्नाङ सन्तोक मन्डीख्यो। इडीक होखुरीकै इमुङ मालिककी न भूतौ राजा बालजिबुल डेले डेनाङ, होच्यो जहानकोलाक झन् कुडीक मासेछ डेले औला?
सुखाटा बीह्रीखी?
(लूका १२:२-७)
26 “होटबाटै भर्मीकोखाटा माबीह्रीनी, हीजैडेनाङ हुप्च कुरा कुडीक ले, होसे पट्ट न डाङ्ले र आर्च्युक्च कुरा कुडीक ले, होसे पट्टकी थाहा छान्ने। 27ही ङा नाखुरीककी छुम्ठाङ डेले, होसे नाखुरीकै ट्याङ्ठाङ डेनी। अनि ही नाखुरीकै खुसुक्क मेनेकेपाङ सेले, होसे इमौ धुरी लकीङ सेटाक्नी। 28होखुरीकखाटा माबीह्रीनी सुये शरीरकी मट्टै साट्की ह्योक्ले, तर आत्माकी साट्की माह्योक्ले। बरु नाकुङ आत्मा र शरीर नीसकी न नरकाङ नाश जाट्की ह्योक्च परमेश्वरखाटा बीह्रीनी। 29ही काट पैसाङ नीस भँगेरा मालुम्ल्हे र? तर होसे मध्याङ काटजा र नाखुरीकुङ परमेश्वर बोयो इच्छा बिना मासीले। 30नाखुरीकुङ मीटालुङ मीछामको र पट्ट न काट-काट हील्नने। 31होटबाटै नाखुरीक माबीह्रीनी, नाखुरीक वास्टै भँगेरा डेनाङ वास्टै मुल्यवानौ ले।
32 “होटबाटै सुये ङाकी भर्मीकुङ म्याहासाङ स्वीकारीले, ङा र होसकी स्वर्गाङ लेच ङौ बोयो म्याहासाङ स्वीकार जाट्ले। 33तर सुये ङाकी भर्मीकुङ म्याहासाङ माचीन्डीले डेयार इन्कार जाट्ले; ङा र होसकी स्वर्गाङ लेच ङौ बोयो म्याहासाङ इन्कार जाट्ले।
चेलाकै तेरीकी पर्च मोल
(लूका १२:५१-५३; १४:२६-२७)
34 “ङा पृथ्वीयाङ शान्ति राक्की डेम राछ हो डेयार माआर्मीट्नी। शान्ति राक्की होइन, तर तरवार क्योट्की लैडीकीयो लागि ङा राछ हो। 35ङा लेन्जा मीजाकी लहो न बोयो विरुद्धाङ, मास्टो मीजाकी मोयो विरुद्धाङ र मेखोनकी लहो मीनीमौ विरोध जाटाक्की राछ हो। 36भर्मीकुङ शत्रु लहो परिवार भित्रीयुङ न छान्ने।
37 “सुये ङाकी डेनाङ वास्टै लहो बोइ-मोइकी माया जाट्ले, होसे ङौ चेला छान्की योग्य माछान्ने। होटजाट्न न सुये ङाकी डेनाङ वास्टै लहो मीजाकोलाक माया जाट्ले, होसे र ङौ चेला छान्की योग्य माछान्ने। 38लहो क्रूस बुवार#१०:३८ लहो क्रूस बुवार: क्रूस बुकी डेच चहिँ येशूओ लागि दु:ख भोग्डीकी र सीकी र तयार छान्की डेच हो। सुये ङाकी माडुट्ले, होसे ङौ चेला छान्की योग्य माछान्ने। 39सुये लहो जीवन जोगडीकी पाले होचे जीवन गुमडीले, तर लहो जीवन ङौ लागि गुमडीचये चहिँ जीवन डुप्ले।
चेलै डुप्च इनामौ बारेयाङ
(मर्कूस ९:४१; लूका १०:१६)
40 “नाखुरीककी स्वीकार जाट्चये ङाकीर स्वीकार जाट्ले, ङाकी स्वीकार जाट्चये ङाकी बीर्न्हकाचकी र स्वीकार जाट्ले। 41सुये अगमवक्ताकी अगमवक्ता न डेयार स्वीकार जाट्ले होचे अगमवक्तौ न इनाम डुप्ले। होटजाट्न न परमेश्वरौ म्याहासाङ धर्मी भर्मीकी धर्मी न डेयार स्वीकार जाट्ले होचे धर्मी भर्मीयो न इनाम डुप्ले। 42सुये इसे मार्जाको मध्याङ काटकी ङौ चेला मन्डीयार काट गिलास चिसो डी मट्टै गाकी याल्हे, साँच्ची न ङा नाखुरीककी डेले, होचे लहो इनाम डुप्ले।”
Valgt i Øjeblikket:
मत्ती 10: EMGP
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2025 by Mother Tongue Translators Society and Wycliffe Bible Translators, Inc.
