2Sam 5
5
Ndeviti Aitw'ĩkĩthw'a Mũsumbĩ wa Ĩsilaeli na Yuta
(1Mav 11.1-9; 14.1-7)
1Andũ ma mbaĩ syonthe sya Ĩsilaeli nĩmookie Eviloni kũla kwĩ Ndeviti na mamwĩa atĩĩ, “Ithyĩ nĩtũileny'e ũndũ naku kĩ-nthakame. 2Ĩvindanĩ ya tene, yĩla Saũlo waĩ mũsumbĩ waitũ, nue watũtongoeasya kũthi kaũnĩ. Mwĩai Ngai nĩwaneenie naku akwĩa atĩĩ, ‘Ũkatw'ĩka mũĩthi wa andũ makwa ma Ĩsilaeli, na ũkatw'ĩka mũsumbĩ woo.’ ” 3Kwoou atongoi onthe ma andũ ma Ĩsilaeli nĩmaendie Eviloni kũla kwĩ mũsumbĩ. Mũsumbĩ Ndeviti nĩwaseũvisye ũtianĩo vau Eviloni mbee wa Mwĩai Ngai, na metĩkĩsya Ndeviti mauta atw'ĩke mũsumbĩ wa Ĩsilaeli. 4#1Asu 2.11; 1Mav 3.4; 29.27 Ndeviti aĩ na ũkũũ wa myaka mĩongo ĩtatũ yĩla wambĩĩie kũsumbĩka, na asumbĩkie vandũ va myaka mĩongo ĩna. 5E Eviloni asumbĩkie Yuta vandũ va myaka mũonza na nyusu, na e Yelũsalemu asumbĩka Ĩsilaeli na Yuta vandũ va myaka mĩongo ĩtatũ na ĩtatũ.
6 #
Yos 15.63; Asi 1.21 Mũsumbĩ na asikalĩ make nĩmaendie Yelũsalemu kũkita Ayevusi ala matwĩe vo. Ayevusi nĩmeeie Ndeviti atĩĩ, “Ndwĩlika vaa; o na ilalinda na ala me maũũ mathũku nĩmeũkũsiĩĩa.” Masũanĩaa mayasya, “Ndeviti ndatonya kũlika Yelũsalemu.” 7Ĩndĩ Ndeviti nĩwakwatie wĩvitho ũsu woo mũlũmu wa Saioni, naw'o wambĩĩa kwĩtwa, “Ndũa ya Ndeviti.”
8Mũthenyanĩ ũsu Ndeviti nĩwaneenie asya atĩĩ, “Ũla ũkũthi kũaa Ayevusi, nĩesĩle mũtaũnĩ wa kĩw'ũ akokite ala me maũũ mathũku na ilalinda, ala nyie nĩmenete.” Kĩu nĩkyo kĩtumaa andũ maneena na kwasya, “Ilalinda na ala me maũũ mathũku maikalika nyũmbanĩ yakwa.”
9Ndeviti amina kũkwata wĩvitho ũsu mũlũmu wa Ayevusi, nĩwatũie vo na awĩta, “Ndũa ya Ndeviti.” Nĩwaakie ndũa ĩsu ĩngĩ kwambĩĩa ngalĩko ya wumĩlonĩ wa syũa, vala mũthanga wa kũtw'ĩĩka ndũa ĩsu woombĩtwe. 10Ndeviti nĩwaendeeie kwĩthĩwa e na ũtonyi mbee na mbee, nũndũ Mwĩai Ngai, Ngai Mwene Ũtonyi W'onthe aĩ vamwe nake.
11Ilamu mũsumbĩ wa Tile nĩwatũmie andũ kũla kwĩ Ndeviti makuĩte iting'ĩ sya mĩtĩ ya mũkũũ. Andũ asu nĩmaendanĩtye na ala maseũvasya syĩndũ sya mbwaũ, na aki ma nyũmba sya mavia nĩ kana makĩe Ndeviti nyũmba ya kĩ-ũsumbĩ. 12Kwoou Ndeviti nĩwamanyie kana Mwĩai Ngai nĩwatumĩte ethĩwa na ũlũmu ta mũsumbĩ wa Ĩsilaeli, na nĩwatumĩte ũsumbĩ wake ũendeea nesa kwondũ wa andũ make.
13Amina kuma Eviloni na kũthi Yelũsalemu, Ndeviti nĩwatwaie aka angĩ na iveti ingĩ sya ndũsyo. Nĩwasyaĩiwe syana ingĩ sya aũme na sya eĩtu. 14Ii nĩsyo syana ila wasyaĩiwe Yelũsalemu: Samua, Sovavu, Nathani, Solomoni, 15Ĩviali, Elisua, Neveki, Yavia, 16Elisama, Eliata na Eliveleti.
Ndeviti Aisinda Avilisiti
(1Mav 14.8-17)
17Yĩla Avilisiti meewie kana Ndeviti nũnatw'ĩkĩthiw'e mũsumbĩ wa Ĩsilaeli, asikalĩ moo onthe nĩmaendie kũmũmantha mamũkwate. Ĩndĩ Ndeviti nĩwamanyie ũu na atheea athi kũlika mwakonĩ mũlũmu. 18Avilisiti nĩmavikie Mwandanĩ wa Alevai na manyaĩĩkĩa vo meyũmbanĩtye kũkita. 19Nĩvo ĩndĩ Ndeviti wakũlilye Mwĩai Ngai atĩĩ, “Nĩngũthi ngavithũkĩe Avilisiti? Nũũndonyethya kũmasinda?”
Nake Mwĩai Ngai amũsũngĩa, “Ĩĩ, enda ũkamavithũkĩe, na nĩngũũtonyethya kũmasinda!”
20Kwoou Ndeviti nĩwaendie Mbaali-velasimu, na okitĩa namo vau na amasinda. Nĩwaneenie asya atĩĩ, “Mwĩai Ngai nĩwavĩtĩla katĩ wa amaitha makwa o tondũ kĩw'ũ kingĩ kĩvĩtaa.” Kwoou vandũ vau vetawa Mbaali-velasimu#5.20 Mbaali-velasimu: Ũalyũlo wa ĩsyĩtwa yĩĩ kĩthyomonĩ kya Kĩevelania nĩ “Mwĩai Ngai ũla wĩsĩlaa katĩ.” 21Avilisiti nĩmatiie ngai syoo sya mĩvw'anano vau, na Ndeviti na asikalĩ make maikua.
22Nĩvo ĩndĩ Avilisiti masyokie Mwandanĩ wa Alevai ĩngĩ, na manyaĩĩkĩa vo meyũmbanĩtye kũkita. 23Ndeviti nĩwakũlilye Mwĩai Ngai ũtao, nake amũsũngĩa amwĩa atĩĩ, “Ndũkathi kũvithũkĩa Avilisiti kuma vau ũĩ, ĩndĩ melingĩle na ũimavithũkĩa kuma ngalĩko ĩla ĩngĩ, vakũvĩ na mĩtĩ ya mĩvolosati. 24Wamina kwĩw'a matuu ta ma andũ mesĩlĩte mĩtĩnĩ ĩsu ĩũlũ oou, mavithũkĩe mĩtũkĩ, nũndũ nĩĩthĩwa nĩendete mbee waku ngasinde asikalĩ ma Avilisiti.” 25Ndeviti nĩweekie ũndũ Mwĩai Ngai wamwĩaĩĩte, na okita asinda asikalĩ ma Avilisiti kuma Ngeva kũvika Ngeseli.
BIBLE SOCIETY OF KENYA © 2011