2Sam 4
4
Kũawa kwa Isivosethi
1Yĩla Isivosethi mwana wa Saũlo weewie kana Avineli nũnakw'ĩĩe Eviloni, nĩwakwie ngoo, na andũ onthe ma Ĩsilaeli namo makwatwa nĩ kĩũũyũ. 2Isivosethi aĩ na anini make elĩ ala maĩ atongoi ma ikundi syaendaa kũvithũkĩa. Atongoi asu maĩ Mbaana na Lekavi, ala maĩ ana ma Limoni kuma Mbeelothi mbaĩnĩ ya Mbengyameni. Ndũa ya Mbeelothi ĩtalawa ta ĩmwe ya ndũa sya mbaĩ ya Mbengyameni. 3Andũ ala matwĩe ndũanĩ ĩsu tene nĩmakĩĩte makathi Ngitaimu, vala matũaa o na kũvika ũmũnthĩ.
4 #
2Sam 9.3
Yonathani mwana wa Saũlo aĩ na mwana weetawa Mevivosethi ũla waĩ na maũũ monzu. Mevivosethi aĩ na ũkũũ wa myaka ĩtano yĩla Saũlo na Yonathani mooaiwe. Yĩla ũvoo wa kĩkw'ũ kyoo waetiwe kuma ndũanĩ ya Yesileeli, mũei wake nĩwamwosie na asemba akĩĩte; yĩla wasembete akĩĩte nĩwavalũkilye Mevivosethi athũka maũũ.
5Lekavi na Mbaana ana ma Limoni ũla waĩ wa ndũa ya Mbeelothi, nĩmaumaalile mathi nyũmba kwa Isivosethi. Mavikie kwake ta mũthenya katĩ na meethĩa athũmũĩte. 6Nĩmalikile nyũmbanĩ yake ya nthĩnĩ ta maendete kwosa nganũ, na mamũtonya ĩvu na kavyũ. Nĩvo ĩndĩ Lekavi na mwana-a-inyia Mbaana maumaalile makĩa mathi. 7Malikile nyũmbanĩ ĩsu yĩla Isivosethi wakomete ũkomonĩ wake akalĩkwa. Mamina kũmũtonya na kũmũaa, nĩmamũtilile mũtwe. Nĩmakuie mũtwe ũsu na mathi ũtukũ w'onthe maatĩĩe nzĩa ĩla yĩsĩlĩte Mwandanĩ wa Yolotani. 8Nĩmatwaĩie Mũsumbĩ Ndeviti e Eviloni mũtwe wa Isivosethi na mamwĩa atĩĩ, “Mũtwe wa Isivosethi mwana wa mũmaitha waku Saũlo, ũla ũnendaa ũkũaa nũyũ. Mũnene, ũmũnthĩ Mwĩai Ngai nũkũnengie mwanya wa kwĩyĩĩvanĩsya kũla kwĩ Saũlo na nzyawa syake.”
9Ndeviti nĩwamasũngĩie amea atĩĩ, “Nĩngwĩvĩta ĩsyĩtwanĩ ya Mwĩai Ngai ũla wĩ thayũ, ũla wandangĩĩie kuma mĩisyonĩ yonthe! 10#2Sam 1.1-16 Mũndũ ũla ũnookie Nzikilaki kũla nĩĩ na andavya ĩũlũ wa kĩkw'ũ kya Saũlo anasũanĩaa kana okĩte kũndavya ũndũ ũseo. Ĩndĩ nĩnĩnamũkwatie na namũaa. Yĩu nĩyo ĩtuvi yĩla nĩnamũtuvie nũndũ wa ũvoo ũsu ũnaetie! 11Nĩ ũkany'o wĩana ata waĩlĩte kũnengwa andũ athũku ala moaie mũndũ ũte na ĩvĩtyo akomete nyũmba kwake? No nginya nĩĩvanĩsye kĩkw'ũ kyake kũla mũĩ kwondũ wa kũmũaa, na ngĩmũvetanga inyw'ĩ ĩũlũ wa nthĩ!” 12Nĩvo ĩndĩ Ndeviti weeaĩie asikalĩ make, na mooaa Lekavi na Mbaana. Nĩmatilile moko moo na maũũ, na masũsya mĩĩ yoo vakuvĩ na ndia ĩla yĩ Eviloni. Nĩmoosie mũtwe wa Isivosethi na maũthika mbũanĩ ya Avineli ĩla yĩ Eviloni.
BIBLE SOCIETY OF KENYA © 2011