2Sam 6
6
Ĩsandũkũ ya Ũtianĩo Yĩietwe Yelũsalemu
(1Mav 13.1-14; 15.25—16.6,43)
1Ndeviti nĩwoombanisye asikalĩ ala aseo ma Ĩsilaeli ĩngĩ. Asikalĩ asu maĩ ngili mĩongo ĩtatũ. 2#Kuma 25.22 Nĩwaendanisye vamwe namo kũvika Mbaale-yuta, nĩ kana makaete kuma vo Ĩsandũkũ ya Ũtianĩo ya Ngai, yĩla yĩtanĩaw'a na ĩsyĩtwa ya Mwĩai Ngai Mwene Ũtonyi W'onthe, ũla ũsumbĩkaa e ĩũlũ wa syũmbe syĩ nthwau syĩtawa akelũvi. 3#1Sam 7.1-2 Nĩmoosie Ĩsandũkũ yĩu kuma nyũmba kwa Avinatavu ĩla yaĩ kĩĩmanĩ, na mayilĩĩla ĩkasyanĩ yĩtaatũmĩwa ĩngĩ. Ana ma Avinatavu, ala nĩ Usa na Aio nĩmo matongoesye Ĩsandũkũ yĩu. 4Aio aendete e mbee wa Ĩsandũkũ yĩu. 5Ndeviti na andũ onthe ma Ĩsilaeli nĩmasũngĩte na kwina na vinya woo w'onthe mamũnenge Mwĩai Ngai ndaĩa. Nĩmakũnĩte ngitaa nini, ngitaa nene, ndambulĩnĩ, tũmĩtĩ twa ũkũnangany'a na tũmasaya.
6Yĩla mavikie kĩvũĩonĩ kya Nakoni, Usa nĩwatambũũkisye kw'oko atw'ĩĩke Ĩsandũkũ ya Ũtianĩo ya Ngai, nĩkwĩthĩwa nzaũ ila syayĩkuĩte nĩsyatiũũkie. 7Mwĩai Ngai nĩwathatiw'e nĩ Usa na amũaa nũndũ wa ũndũ ũsu ũtaĩlĩte weekie. Usa nĩwakw'ĩĩie vau ũtee wa Ĩsandũkũ ya Ũtianĩo, 8na kwoou vandũ vau veetwa Velesi-usa#6.8 Velesi-usa: Ũalyũlo wa ĩsyĩtwa yĩĩ kĩthyomonĩ kya Kĩevelania nĩ ũkany'o wa Usa. kũvika o na ũmũnthĩ. Ndeviti nĩwathatie mũno nũndũ Mwĩai Ngai nĩwathatiw'e nĩ Usa na amũkany'a.
9Mũthenya ũsu Ndeviti nĩwakĩie Mwĩai Ngai na akũlya atĩĩ, “Ndonya ata kwosa Ĩsandũkũ ya Ũtianĩo na kũyĩkua?” 10Kwoou nĩwavangie kana ndeyĩkua ayĩtwae Yelũsalemu. Vandũ va kwĩka ũu nĩwayathũkisye ayĩtwaa nyũmba kwa Oveti-etomu mũndũ wa kuma Ngathi. 11#1Mav 26.4-5 Ĩsandũkũ yĩu yekalile vau vandũ va myei ĩtatũ, na Mwĩai Ngai aathima Oveti-etomu vamwe na andũ ma mũsyĩ wake.
12Mũsumbĩ Ndeviti nĩwataviw'e eewa atĩĩ, “Mwĩai Ngai nũathimĩte andũ ma mũsyĩ wa Oveti-etomu na syĩndũ syake syonthe, nũndũ wa Ĩsandũkũ ya Ngai.” Kwoou Ndeviti nĩwatheeie athi kũkua Ĩsandũkũ ya Ngai kuma nyũmba kwa Oveti-etomu ayĩtwaa Yelũsalemu. Andũ ma Ĩsilaeli maĩ na ũtanu mũnene. 13Yĩla andũ ala makuĩte Ĩsandũkũ yĩu maendie matambya thanthatũ, Ndeviti nĩwathembeie Mwĩai Ngai nzaũ ĩmwe na kasalũ kanou. 14Ndeviti eekĩĩte ngũa ya ĩũlũ ndũmu yĩtawa evoti. Nĩwasũngie na vinya wake w'onthe anenge Mwĩai Ngai ndaĩa. 15Kwoou Ndeviti na andũ onthe ma Ĩsilaeli nĩmatwaie Ĩsandũkũ ya Ũtianĩo Yelũsalemu, mokĩlĩtye mawasya ma ũtanu na kũvuva soo.
16Yĩla Ĩsandũkũ ya Ũtianĩo yaetetwe Yelũsalemu, Mikali mwĩĩtu wa Saũlo nĩwasyaĩlye ndĩlĩsyanĩ, na oona Mũsumbĩ Ndeviti asũngĩte na kũthaanyũkangĩla mbee wa Mwĩai Ngai. Ũndũ ũsu nĩwatumie Mikali avũthya Ndeviti mũno ngoonĩ. 17Andũ asu nĩmaetie Ĩsandũkũ yĩu na mayia Ĩeemanĩ yĩla Ndeviti wayĩseũvĩsye. Nĩvo ĩndĩ Ndeviti wathembeie Mwĩai Ngai nthembo sya kũvĩvw'a, na nthembo sya ngwatanĩo. 18Amina kũthemba nthembo isu sya kũvĩvw'a na sya ngwatanĩo, nĩwaathimie andũ ĩsyĩtwanĩ ya Mwĩai Ngai Mwene Ũtonyi W'onthe. 19#1Mav 16.43 Nĩwanengie andũ onthe ma Ĩsilaeli, aũme na aka kĩla ũmwe woo mũkate, kĩlungu kya nyama mbĩvye#6.19 kĩlungu kya nyama mbĩvye: kana tũmĩkate twa ndengũ. na nzavivũ mbovu. Nĩvo ĩndĩ andũ onthe menũkie.
20Yĩla Ndeviti wenũkie akakethye andũ ma mũsyĩ wake, Mikali nĩwamũthaũie na amwĩa atĩĩ, “Ũmũnthĩ mũsumbĩ wa Ĩsilaeli nĩwĩnenevisye; evuie ngũa e mbee wa athũkũmi eĩtu ma anini make, o tondũ mũndũ ũte mũelee ũtonya kwĩka atekwĩw'a nthoni!”
21Ndeviti nĩwasũngĩie Mikali amwĩa atĩĩ, “Nĩsũngaa nĩnenge Mwĩai Ngai ndaĩa, ũla wanyuvie nyie vandũ va ĩthe waku na andũ ma nyũmba yake, andw'ĩkĩthye mũtongoi wa andũ make ma Ĩsilaeli. Nĩendeea kũsũnga nĩnenge Mwĩai Ngai ndaĩa. 22Nĩendeea kwĩyĩkĩĩthya nthoni mbeange, na kũendeea kwĩvũthĩĩsya methonĩ maku, ĩndĩ athũkũmi aa eĩtu ũũneena ĩũlũ wamo nĩmeũnenga ndaĩa!”
23Mikali mwĩĩtu wa Saũlo ndaasyaa nginya kũkw'a kwake.
BIBLE SOCIETY OF KENYA © 2011