2Sam 13
13
Aminoni Aivukya Tamalĩ
1Mwana wa Ndeviti ũla weetawa Avisalomu asyaanĩw'e na mwĩĩtu mwanake mũno weetawa Tamalĩ. Mwana ũngĩ wa Ndeviti weetawa Aminoni nĩwendie Tamalĩ mũno. 2Aminoni nĩwendie Tamalĩ mũno nginya awaa, nũndũ Tamalĩ ndaĩ aamanyana kĩ-mwĩĩ na mũndũ-ũme, na ndwaĩ ũndũ wĩ laisi kwa Aminoni kwĩka Tamalĩ ũndũ. 3Aminoni aĩ na mũnyanyae weetawa Yonatavu mwana wa Simea, ũla waĩ mwana-a-inyia wa Ndeviti. Yonatavu aĩ mũndũ nzeleke mũno. 4Nĩwakũlilye Aminoni atĩĩ, “We wĩ mwana wa mũsumbĩ, ĩndĩ ũu wĩ o vo kĩla mũthenya ngwonaa wĩmakĩĩte. Thĩna waku nĩ mwaũ?”
Aminoni amũsũngĩa, “Nĩnĩmwendaa Tamalĩ, mwĩĩtu-a-inyia wa mwana-a-ĩthe wakwa Avisalomu.”
5Nĩvo ĩndĩ Yonatavu wamwĩie atĩĩ, “Enda ũkomonĩ, na ũyĩwaĩthya. Ĩthe waku ooka ũkũsisya, neena nake ũmwĩe atĩĩ, ‘Nĩkwĩsũva ũeke mwĩĩtu-a-ĩthe wakwa Tamalĩ oke anenge lĩu nĩye. Nĩenda oke anduĩe lĩu e vaa nĩmwene, na ĩndĩ aimbĩvũĩa we mwene nĩye.’ ” 6Kwoou Aminoni nĩweewaĩthisye na athi kũkoma.
Mũsumbĩ Ndeviti nĩwaendie kũmũsisya, na Aminoni amwĩa atĩĩ, “Nĩkwĩsũva ũeke Tamalĩ oke anduĩe tũmĩkate e vaa nĩmwene, na ĩndĩ aimbĩvũĩa we mwene.”
7Nĩvo ĩndĩ Ndeviti watũmanie kũla kwĩ Tamalĩ nyũmbanĩ ya kĩ-ũsumbĩ amwĩa atĩĩ, “Enda nyũmba kwa Aminoni ũkamũuĩe lĩu aye.” 8Tamalĩ nĩwaendie nyũmba kwa mwana-a-ĩthe Aminoni vala wakomete. Nĩwoosie mũtu, aũkima, aũseũvya tũmĩkate na atũua Aminoni asyaĩĩsye. 9Nĩwaumisye tũmĩkate tũu kalaĩnĩ kala wauaa nako na anenga Aminoni aye, ĩndĩ Aminoni nĩwaleile kũya. Nĩvo ĩndĩ Aminoni waisye atĩĩ, “Tavya andũ onthe maumaale.” Kwoou andũ onthe nĩmaumaalile. 10Nĩvo ĩndĩ weeie Tamalĩ atĩĩ, “Ndetee tũmĩkate vaa ũkomonĩ, na ũinenga nĩye noue mwene.” Kwoou Tamalĩ nĩwoosie tũmĩkate na athi vala ve Aminoni. 11Ĩndĩ yĩla Tamalĩ wamũnengae tũmĩkate aye, Aminoni nĩwamũkwatie na amwĩa, “Mwĩĩtu-a-asa ũka tũmanyane kĩ-mwĩĩ!”
12Tamalĩ nĩwamwĩie atĩĩ, “Aiee, mwana-a-asa, ndũkangwate na vinya. Ũndũ ũthũkĩte ta ũũ ndwaĩlĩte kwĩkwa andũnĩ ma Ĩsilaeli! Ndũkeke ũndũ ũũ mũthũku mũno. 13Nyie ngeethĩwa ndonya kũvitha nthoni syakwa ata? Naku wĩĩthĩwa wĩ ũmwe wa ndia mbuku andũnĩ ma Ĩsilaeli. Mwa neena na mũsumbĩ; ndekũvata ũindwaa.” 14Ĩndĩ Aminoni ndaaĩthukĩĩsya Tamalĩ, na nũndũ aĩ na vinya mbee wake, nĩwamũkwatie na vinya amũvukya.
15Nĩvo ĩndĩ Aminoni wamenie Tamalĩ mũno, weethĩa kĩmena kĩla wamũmena nakyo nĩkyo kĩnene kwĩ wendo ũla wamwendaa naw'o mbeenĩ. Nĩweeie Tamalĩ, “Ũkĩla ũthi!”
16Tamalĩ amũsũngĩa, “Aiee, kũndũngya nĩthi nĩ naĩ nene mbeange wa ũndũ wamina kũmbĩka!”
Ĩndĩ Aminoni ndaaĩthukĩĩsya. 17Nĩweetie mũthũkũmi wake ũla wamũtetheasya wĩa na amwĩa atĩĩ, “Umaalya mũndũ mũka ũũ nza na ũivinga mũomo!” 18Mũthũkũmi ũsu nĩwaumaalilye Tamalĩ nza na avinga mũomo.
Tamalĩ eekĩĩte ngũa ndaasa yĩ moko maasa,#13.18 Ngũa ndaasa yĩ moko maasa kana ngũa ndaasa mbanakavye. (Sisya mwa 37.3) nũndũ ĩsu nĩyo ngũa ĩla yeekĩawa nĩ eĩtu ma mũsumbĩ, ala mataamanyana kĩ-mwĩĩ na mũndũ-ũme. 19Tamalĩ nĩweeyũmbie mũu mũtwe na atembũa ngũa yake ndaasa ĩla weekĩĩte. O ta ũu nĩwailĩĩile moko mũtwe na athi aĩĩte na wasya mũnene. 20Yĩla mwana-a-inyia Avisalomu wamwonie nĩwamũkũlilye atĩĩ, “Aminoni ko waũvukya? Mwa, mwĩĩtu-a-ia, ndũkaeke ũndũ ũsu ũkũthĩny'e mũno. Aminoni nĩ mwana-a-ĩthe waku, na kwoou ndũkatavye mũndũ ĩũlũ wa ũndũ ũsu.” Kwoou Tamalĩ nĩwekalile nyũmba kwa Avisalomu e na kĩmako na kwĩw'a ta watiiwe nĩ andũ ala angĩ e weka.
21Yĩla Mũsumbĩ Ndeviti wamanyie maũndũ asu onthe, nĩwathatie mũno. 22Avisalomu nĩwamenie Aminoni mũno nũndũ wa kũkwata mwĩĩtu-a-inyia na vinya na kũmũvukya, nginya weethĩa o na ndamũneeny'a.
Avisalomu Akĩyĩĩvanĩsya kũla kwĩ Aminoni
23Ĩtina wa myaka ĩlĩ, yĩla andũ ala matilaa malondu ma Avisalomu w'ĩa maĩ Mbaali-asoli vakuvĩ na mũvaka wa ndũa ya Evalaimu, Avisalomu nĩwathokisye ana ma mũsumbĩ onthe moke kũu. 24Avisalomu nĩwaendie kũla kwĩ Mũsumbĩ Ndeviti na amwĩa atĩĩ, “Mũnene, malondu makwa nĩmeũtilwa w'ĩa. Nũkũka wĩ na anini maku twĩthĩwe vamwe mbokanĩ ĩsu?”
25Nake mũsumbĩ amũsũngĩa atĩĩ, “Aiee, mwana wakwa. Ithyonthe tũyaĩlĩte kũthi, nũndũ twĩĩthĩwa twakwongela mũio.” O na kau Avisalomu nĩwaendeeie na kũmwĩsũva, mũsumbĩ nĩwaleile kũthi, ĩndĩ nĩwamwendeie ũseo.
26Ĩndĩ Avisalomu nĩwamwĩie atĩĩ, “Ethĩwa ti ũu, nĩkwĩsũva ũeke mwana-a-ĩthe wakwa Aminoni oke.”
Mũsumbĩ amũkũlya, “Wĩenda oke nĩkĩ?” 27Ĩndĩ Avisalomu nĩwaendeeie na kwĩsũva mũsumbĩ, nginya mũsumbĩ amaeka maendany'e vamwe na ana ala angĩ ma mũsumbĩ. 28Avisalomu nĩweeaĩie athũkũmi make amea atĩĩ, “Ĩthukĩĩsyei! Yĩla Aminoni ũkwĩthĩwa atanĩthĩtw'e mũno nĩ kũnyw'a ndivai na ngĩmwĩa, ‘Kũnai Aminoni’ Mũaei, mũikakĩe. Nyie nĩnamũnenga mwĩao ũsu. Ĩthĩwai na vinya na ũkũmbaũ!” 29Kwoou athũkũmi asu nĩmaatĩĩie mwĩao wa Avisalomu na mooaa Aminoni. Ana ala angĩ ma Ndeviti nĩmalĩsile nyũmbũ syoo na makĩa mathi.
30Me nzĩanĩ menũkĩte, Ndeviti nĩwataviw'e eewa atĩĩ, “Avisalomu nĩwũaie ana maku onthe; vai ũmwe woo ũnatiala!” 31Mũsumbĩ nĩwaũngamie, atembũanga ngũa syake nĩ kyeva, na akoma nthĩ. O ta ũu namo athũkũmi make nĩmatembũangie ngũa syoo na maũngama ũtee wake. 32Ĩndĩ Yonatavu mwana wa Simea ũla nĩ mwana-a-inyia wa Ndeviti nĩwaisye atĩĩ, “Mũnene, mainoaa ana maku onthe. Aminoni nowe wũaiwe. Avisalomu aĩ avangie kwĩka ũu kuma ĩvinda yĩla Aminoni wakwatie mwĩĩtu-a-inyia Tamalĩ na vinya amũvukya. 33Kwoou ndũkaĩkĩĩe ndeto isu kana ana maku onthe nĩmakwie; Aminoni nowe wũaiwe.”
34Ĩvindanĩ yĩu Avisalomu aĩ anakĩa akathi. Mũsikalĩ ũla waĩ wĩanĩ wa kũsyaĩĩsya ĩvindanĩ yĩu, nĩwasyaisye na oona andũ aingĩ matheelele kĩĩmanĩ me nzĩanĩ ĩla yumĩte Olonaimu. Nĩvo ĩndĩ waendie na eea mũsumbĩ atĩĩ, “Nĩnoona andũ mokĩte na nzĩa ĩla yumĩte Olonaimu, nguumo wa kĩĩma.” 35Yonatavu nĩweeie Ndeviti atĩĩ, “Asu nĩ ana maku mokĩte, o tondũ neethĩwa nakũtavya.” 36Yonatavu aimina kũneena oou, ana ma mũsumbĩ nĩmalikile maĩĩte kĩĩo kĩ woo mũno. O ta ũu o nake mũsumbĩ na anini make onthe nĩmaĩie kĩĩo kĩ woo.
37 #
2Sam 3.3
Avisalomu nĩwakĩie na athi kwa Talimai mwana wa Amiuti, mũsumbĩ wa Ngesuli. Ĩndĩ mũsumbĩ Ndeviti nĩwaendeeie kĩla mũthenya kwĩthĩwa na kyeva kwondũ wa mwana wake Aminoni. 38Avisalomu amina kũkĩa na kũthi Ngesuli, nĩwekalile kw'o vandũ va myaka ĩtatũ. 39Ĩndĩ yĩla Mũsumbĩ Ndeviti waekie kwĩthĩwa na kyeva nũndũ wa kĩkw'ũ kya Aminoni, nĩwambĩĩie kwĩthĩwa na mea ma kwona mwana wake Avisalomu.
BIBLE SOCIETY OF KENYA © 2011