2Sam 12
12
Mwathani Nathani Aitavya Ndeviti Mavĩtyo make
1 #
Sav 51.1
Mwĩai Ngai nĩwatũmie mwathani Nathani kũla kwĩ Ndeviti. Yĩla Nathani waendie vala ve Ndeviti nĩwamwĩie atĩĩ, “Kwaĩ aũme elĩ mekalaa ndũanĩ ĩmwe, ũmwe aĩ mũthwii na ũla ũngĩ aĩ ngya. 2Mũndũ ũsu mũthwii aĩ na ndĩthya nene ya ng'ombe, mbũi na malondu. 3Ĩndĩ mũndũ ũsu ngya ndaĩ na kĩndũ kĩngĩ, ate o kalondu kamwe kala wathooete. Nĩwakaeie na keana vamwe na syana syake. Nĩwakanengae lĩu ũla waĩsaa, kĩw'ũ kĩla wanyusaa, na nĩwakakwataa kakomee kĩthũi kyake. Kalondu kau kaĩ ta mwĩĩtu wake. 4Mũthenya ũmwe mũndũ ũsu mũthwii nĩwakwatie mũeni. Mũndũ ũsu ndendaa kũmũaĩa ĩmwe ya indo syake amũuĩe lĩu. Vandũ va kwĩka ũu nĩwaendie oosa kalondu kau ka mũndũ ũsu ngya, na athĩnzĩa mũeni ũsu wake.”
5Ndeviti nĩweewie woo mũno nũndũ wa mũndũ ũsu mũthwii na eea Nathani atĩĩ, “Nĩngwĩvĩta ĩsyĩtwanĩ ya Mwĩai Ngai ũla wĩ thayũ, kana mũndũ ũsu wĩkĩte ũu aĩlĩte kũkw'a! 6Aĩlĩte kũĩva kalondu kau kũndũ kũna, nũndũ nũneekie ũndũ ũsu mũthũku, na ndanaĩ na tei.”
7Nĩvo ĩndĩ Nathani weeie Ndeviti atĩĩ, “Nue mũndũ ũsu! Mwĩai Ngai, Ngai wa Ĩsilaeli easya, ‘Nĩnakwĩtĩkĩisye mauta ũtw'ĩke mũsumbĩ wa Ĩsilaeli, na nĩnakũtangĩĩie ndũkoawe nĩ Saũlo. 8Nĩnakũnengie nyũmba ya mũnene waku, na iveti syake syĩthĩwe ungu waku. Nĩnakũnengie nyũmba ya Ĩsilaeli na ya Yuta. Kethĩwa syĩndũ isu nakũnengie nĩ nini, nĩthĩwa ngũnengete ingĩ mbingĩ. 9Ũvũthisye ndeto yakwa nĩkĩ kwa kwĩka ũndũ ũla ũtambendeeasya? Nũnooaĩthisye Ulia ũla Mũititi kaũnĩ, nũnaekie Aamimoni mamũaa, na woosa kĩveti kyake kyatw'ĩka kyaku! 10Yu kwoou kĩla ĩvinda, imwe sya nzyawa syaku ikakusaa kwa nzĩa ya kũawa, nũndũ nũleete kũmbĩw'a na ũkosa kĩveti kya Ulia. 11#2Sam 16.22 Mwĩai Ngai easya kana akatuma ũmwe wa andũ ma mũsyĩ waku akũthĩny'a. Akoosa iveti syaku ũsyaĩĩsye na kũinenga mũndũ-ũme ũngĩ. Mũndũ-ũme ũsu akamanyana kĩ-mwĩĩ nasyo kĩla mũndũ asyaĩĩsye. 12Ũneekie naĩ ĩsu wĩvithĩte, ĩndĩ ngakwĩka ũu mũthenya andũ onthe ma Ĩsilaeli mene.’ ”
13Nĩvo ĩndĩ Ndeviti waisye atĩĩ, “Nĩnĩmũvĩtĩsye Mwĩai Ngai.”
Nathani nĩwamũsũngĩie amwĩa, “Mwĩai Ngai nĩwakũekea naĩ yaku; ndwĩkw'a. 14Ĩndĩ nũndũ nĩwĩkie ũndũ ũsu mũthũku, na watuma amaitha ma Mwĩai Ngai mamũvũthya, kavĩsĩ kau ũsyaĩwe nĩkeũkw'a.” 15Nĩvo ĩndĩ Nathani wenũkie.
Kĩkw'ũ kya Kana ka Ndeviti ka Kavĩsĩ
Mwĩai Ngai nĩwatumie kana kala kĩveti kya Ulia kyasyaĩe Ndeviti kethĩwa ke kawau mũno. 16Ndeviti nĩwavoyie Ngai kana kau kavoe. Nĩwaleile kũya kĩndũ, na kĩla wĩoo nĩwaendaa nyũmba kwake na kũkoma nthĩ nginya kũkakya.
17Anini make ala mekalaa nyũmba kwake nĩmaũngamie vakuvĩ nake nĩ kana mamũkĩlye, ĩndĩ nĩwaleile, na ndaaĩsanĩa kĩndũ namo. 18Ĩtina wa kyumwa kĩmwe kana kau nĩkakwie. Anini ma Ndeviti nĩmakĩaa kũmũtavya kana kavĩsĩ kau nĩkakwie. Nĩmaneenaa makasya atĩĩ, “Ĩvindanĩ yĩla kana kau kanaĩ thayũ, Ndeviti ndanatwĩthukĩĩasya twaneena nake. Tũtonya ata kũmwĩa kavĩsĩ kake nĩ kakw'ũ? Nũtonya kwĩyĩka naĩ!”
19Ndeviti nĩwoonie athũkũmi make maineenany'a na kĩwe, na amanya kana kavĩsĩ kau nĩkakwie na kwoou amakũlya, “Kana nĩkakwie?”
Namo mamũsũngĩa, “Ĩĩ nĩkakwie?”
20Ndeviti nĩwookĩlile kuma nthĩ, athamba, eevaka mauta na akũany'a ngũa ila weekĩĩte. Nĩwaendie nyũmbanĩ ya Mwĩai Ngai kũthaitha. Yĩla wasyokie nyũmbanĩ yake ya kĩ-ũsumbĩ, nĩweetisye lĩu, na aũnengwa aya. 21Anini make nĩmamwĩie, “Tũikũelewa nĩ mwĩkalĩle waku. Yĩla kana kanaĩ thayũ nũnaĩaa nũndũ wako na ndũnaĩsaa, ĩndĩ kamina kũkw'a oou, nĩwookĩla na waya!”
22Ndeviti nĩwasũngĩie atĩĩ, “Nĩw'o, nĩnĩnatĩĩie kũya na naĩa yĩla kana kanaĩ thayũ. Nĩnasũanĩaa kana Mwĩai Ngai nũtonya kũmbĩw'ĩa tei, na kũekana nako kekale thayũ. 23Ĩndĩ nũndũ nĩkanakwie, yu nĩtĩĩa kũya nĩkĩ? Nĩndonya kũkathayũũkya? Mũthenya ũmwe ngathi kũla kaĩ, ĩndĩ ko kaikasyoka kũla nĩĩ.”
Kũsyawa kwa Solomoni
24Nĩvo ĩndĩ Ndeviti wakiakiisye Mbathi-sieva mũka wake. Nĩwamanyanie kĩ-mwĩĩ nake na asyaa kavĩsĩ, nake Ndeviti aketa Solomoni. Mwĩai Ngai nĩwendete kana kau, 25na eeaĩa Mwathani Nathani akete Yetitia,#12.25 Yetitia:Ũalyũlo wa ĩsyĩtwa yĩĩ kĩthyomonĩ kya Kĩevelania nĩ Ũla wendetwe nĩ Mwĩai Ngai. nũndũ nĩwakendete.
Ndeviti Aikwata Ndũa ya Lava
(1Mav 20.1-3)
26Ĩvindanĩ yĩu Yoavu nĩwaendeeie kũkita ndũa ya Lava, ĩla nĩyo mũsyĩ mũnene wa Aamimoni, na nĩwakilĩlye kũmĩkwata. 27Nĩwatũmie andũ mathi makatavye Ndeviti mamwĩe atĩĩ, “Nĩnũkitie ndũa ya Lava na nakwata kũndũ kwayo kũla kumaa kĩw'ũ. 28Ũmbany'a asikalĩ ala angĩ, na ũyũka wũkite ndũa ĩno ũmĩkwate noue mwene. Walea kwĩka ũu nĩngũmĩkwata na ĩyĩtanĩw'a na ĩsyĩtwa yakwa.” 29Kwoou Ndeviti nĩwoombanisye asikalĩ, athi kũkita Lava na amĩkwata. 30Nĩwoosie kĩlaũnĩ kya thaavu kya ngai ya mũvw'anano ya Aamimoni yĩtawa Moleki. Kĩlaũnĩ kĩu kyaĩ na ũito wa kĩlo mĩongo ĩtatũ na itano na kyaĩ na ĩvia ya thooa mũnene. Nĩwoosie ĩvia yĩu ya thooa mũnene na ayĩkĩa kĩlaũnĩ kyake mwene. O ta ũu nĩwatavie syĩndũ mbingĩ kuma ndũanĩ ĩsu. 31Nĩwakwatie andũ ala maĩ ndũanĩ ĩsu na amanenga wĩa wa kũthũkũma na mĩsumeno, maembe ma kyũma na mathoka ma kyũma, na kũtethya wĩa wa kũmba na kũvĩvya mavali. Nĩweekanie na andũ ma ndũa ila ingĩ sya Aamimoni o ũu. Nĩvo ĩndĩ Ndeviti e na andũ make masyokie Yelũsalemu.
BIBLE SOCIETY OF KENYA © 2011