2Sam 14
14
Avisalomu Aisyoka Yelũsalemu
1Yoavu mwana wa Nzeluia nĩwamanyie kana Mũsumbĩ Ndeviti nĩwasũanĩaa mũno ĩũlũ wa ũndũ ũtonya kwona Avisalomu. 2Kwoou nĩwatũmanie mũndũ mũka mũĩ watwĩe ndũanĩ ya Tekoa. Ooka nĩwamwĩie atĩĩ, “Ĩtw'ĩkĩthye ta mũndũ wĩ na kyeva; ĩkĩa ngũa syaku ila syĩkĩawa ĩvinda ya kyeva na ndũkevake mauta. Ĩyĩkalye ta mũndũ mũka wĩthĩĩtwe e na kyeva vandũ va ĩvinda ĩasa, aiĩa nũndũ wa mũndũ ũkw'ĩte. 3Nĩvo ĩndĩ ũũthi vala ve mũsumbĩ na kũmũtavya ũndũ ngũũtũma ũkamũtavye.” Yoavu nĩwatavisye mũndũ mũka ũsu ndeto ila ũkũthi kũtavya mũsumbĩ.
4Yĩla mũndũ mũka ũsu kuma Tekoa waendie vala ve mũsumbĩ, nĩwakumanie atina nthĩ na ũthyũ amũnenge ndaĩa na amwĩa atĩĩ, “Ame mũsumbĩ ndetheesye!”
5Nake mũsumbĩ amũkũlya atĩĩ, “Thĩna waku nĩ mwaũ?”
Mũndũ mũka ũsu amũsũngĩa amwĩa atĩĩ, “Nyie nĩ ndiwa. Mũũme wakwa nĩwakwie. 6Nyie mũthũkũmi waku naĩ na ana elĩ. Mũthenya ũmwe nĩmokitĩie kĩsesinĩ, na vayaĩ mũndũ wa kũmataany'a. Ũmwe nĩwakũnie ũla ũngĩ na amũaa. 7Mũnene, yu andũ onthe ala tũileny'e ũndũ nĩmeũnthĩny'a, na nĩmekwenda nĩnengane mwana wakwa kũla maĩ, nĩ kana mamũae nũndũ wa kũaa mwana-a-inyia. Ethĩwa nĩmekwĩka ũu, nĩĩthĩwa natiwa nde mwana; metuma wĩkwatyo wakwa ũthela, na kũtuma mũũme wakwa ethĩwa ate na mwana ũendeesya ĩsyĩtwa yake, kana kwĩthĩwa na nzyawa ĩũlũ wa nthĩ.”
8Mũsumbĩ nĩweeie mũndũ mũka ũsu, “Ĩnũka, nĩngũsisya nĩ kana vata waku wĩanĩe.”
9Nake mũndũ mũka ũsu eea mũsumbĩ atĩĩ, “Mũnene wakwa mũsumbĩ, eka ĩvĩtyo yĩu yĩthĩwe ĩũlũ wakwa, na andũ ma mũsyĩ wakwa. Ĩndĩ we mũsumbĩ, na andũ ma nyũmba yaku ya kĩ-ũsumbĩ mwĩĩthĩwa mũte na ĩvĩtyo.”
10Mũsumbĩ eea mũndũ mũka ũsu atĩĩ, “Mũndũ o na wĩva aneena ũndũ ĩũlũ waku, mũete kũla nĩĩ, na ndakaũthĩny'a ĩngĩ.”
11Nake mũndũ mũka ũsu eea mũsumbĩ, “Mũnene, mwa voya Mwĩai Ngai, Ngai waku, nĩ kana mũndũ wa mũsyĩ ũla waĩlĩte kwĩyĩĩvanĩsya kwondũ wa kĩkw'ũ kya mwana wakwa, ndakeke ũndũ mũthũku mbeange, kwa kũaa mwana ũla ũngĩ wakwa.”
Ndeviti asũngĩa, “Nĩngwĩvĩta ĩsyĩtwanĩ ya Mwĩai Ngai ũla wĩ thayũ, kana mwana waku ndakekwa naĩ o na vanini.”
12Mũndũ mũka ũsu amwĩa, “Mwa mũsumbĩ, eka nĩneene ũndũ ũngĩ o ũmwe.”
Mũsumbĩ amũsũngĩa amwĩa, “Neena.”
13Mũndũ mũka ũsu amwĩa atĩĩ, “Wĩkĩte andũ ma Ngai ũndũ ũthũkĩte ũu nĩkĩ? Ndũnanenga mwana waku mwanya wa kũsyoka kuma nthĩ ĩla walũngilw'e athi kwĩkala. Kwoou we mwene nĩweetalĩla kwĩthĩwa wĩ mavĩtyo kumana na ndeto ila waneena. 14No nginya ithyonthe tũkw'e; tũilyĩ kĩw'ũ kĩtĩkĩte nthĩ, kĩla kĩtatonya kũkolanw'a ĩngĩ. Ngai ndavetaa thayũ, ĩndĩ nũmanthaa nzĩa ya kũtũnga mũndũ ũla ũlũngĩtw'e akathi nthĩ ya ũeninĩ. 15Nũkie kũneena ndeto isu kũla ũĩ we mũsumbĩ nũndũ andũ nĩmatumĩte ngwatwa nĩ w'ĩa. Nyie mũthũkũmi waku nzũanĩie nasya, ‘Nĩngũthi kũneena na mũsumbĩ; nĩkũtonyeka we mũsumbĩ ũkeanĩsya vata wakwa, nyie mũthũkũmi waku. 16Nĩsũanĩaa nũtonya kũmbĩthukĩĩsya na kũndangĩĩa kuma kwa mũndũ ũla ũkwenda kũmbũaa nĩ na mwana wakwa, na kwoou aitũveta nthĩ ĩla Ngai wanengie andũ make.’ 17#2Sam 19.27 O ta ũu nyie mũthũkũmi waku nĩnĩnasũanĩie nasya, ‘Ndeto ila mũsumbĩ ũkũneena niũtuma nĩthĩwa na mũuo.’ We mũnene wakwa mũsumbĩ ũilyĩ ta mũlaĩka wa Ngai ũla ũmanyaa ũseo na ũthũku. Mwĩai Ngai, Ngai waku nĩethĩwe vamwe naku!”
18Mũsumbĩ amũsũngĩa amwĩa atĩĩ, “Ndũkalee kũnzũngĩa ĩkũlyo yĩla ngũũkũlya.”
Mũndũ mũka ũsu amwĩa, “Mũsumbĩ, kũlya ũndũ ũkwenda.”
19Mũsumbĩ amũkũlya, “Yoavu nĩwe ũkũtũmie wũke kũndavya maũndũ aa?”
Nake mũndũ mũka asũngĩa asya, “Nĩngwĩvĩta na thayũ waku we mũnene na mũsumbĩ wakwa, vai mũndũ ũtonya kũalyũla ũndũ o na wĩva ũla we ũminĩte kũneena. Nĩw'o, nĩ mũthũkũmi waku Yoavu ũla ũndavisye ndeto syonthe ila nyie mũthũkũmi waku nakũtavya. 20Ĩndĩ ekie ũu nĩ kana ũndũ ũũ ũseũve. Mũnene, wĩ na ũĩ ta wa mũlaĩka wa Ngai, na nĩwĩsĩ maũndũ onthe ala maendeeaa ĩũlũ wa nthĩ.”
21Ĩtina wa ũu mũsumbĩ nĩweeie Yoavu atĩĩ, “Nĩnĩtwie kwĩka ũndũ ũkwenda. Enda ũkaete mwanake Avisalomu ũmũtũnge vaa.”
22Nĩvo ĩndĩ Yoavu wakumanie atina nthĩ na ũthyũ anenge Ndeviti ndaĩa na asya atĩĩ, “Mũnene, Ngai nĩakũathime. Yu nĩnamanya kana nĩwendeeaw'a ninyie, nũndũ nĩweanĩsya ũndũ naũkũlya.” 23Yoavu nĩwookĩlile athi Ngesuli na atũnga Avisalomu Yelũsalemu. 24Ĩndĩ mũsumbĩ nĩwaisye atĩĩ, “No nginya Avisalomu athi mũsyĩ kwake; ndikwenda kũmwona.” Kwoou Avisalomu nĩwaendie mũsyĩ kwake na ndaaona mũsumbĩ.
Avisalomu Ayĩw'ana na Ndeviti
25Andũnĩ onthe ma Ĩsilaeli kũyaĩ mũndũ-ũme wakathĩĩawa nũndũ wa kwĩthĩwa e mũmbe nesa ta Avisalomu. Ndaĩ kĩema kuma mũtwe kũvika nyaĩĩnĩ. 26Nĩweenzaa nzw'ĩĩ yake ĩvinda yĩmwe kwa mwaka yĩla nzw'ĩĩ ĩsu yaasava mũno na yeethĩwa yĩ ngito. Nzw'ĩĩ ĩsu yeethĩawa na ũito wa mbee wa kĩlo ilĩ kwĩanana na kĩthimo kya kĩ-ũsumbĩ. 27Avisalomu aĩ na ana atatũ na mwĩĩtu ũmwe mwanake mũno weetawa Tamalĩ.
28Avisalomu nĩwekalile Yelũsalemu myaka ĩlĩ mĩima ate kwonana na mũsumbĩ. 29Nĩvo ĩndĩ watũmanie Yoavu nĩ kana amũtũme kũla kwĩ mũsumbĩ, ĩndĩ Yoavu nĩwaleile. Kwoou Avisalomu nĩwamũtũmanie ĩvinda ya kelĩ, na o ta ũu alea kũka. 30Avisalomu nĩweeie athũkũmi make atĩĩ, “Mũũnda wa Yoavu ũvakanĩte na mũũnda wakwa, na wĩ na nganũ ĩla yĩtawa mbaale ĩendee kwĩana. Endai mũkamĩkwatye mwaki.” Nĩmaendie na makwatya mũũnda ũsu mwaki.
31Yoavu nĩwaendie nyũmba kwa Avisalomu na amũkũlya atĩĩ, “Athũkũmi maku mavĩvisye mũũnda wakwa nĩkĩ?”
32Avisalomu amũsũngĩa amwĩa, “Nũndũ nĩnakũtũmanie na walea kũka. Nĩnendaa ũkũtũma vala ve mũsumbĩ ũkamũkũlye atĩĩ, ‘Nĩnaumie Ngesuli nũke vaa nĩkĩ? Nĩ kavaa kethĩwa nĩo kw'o kũvika yu. Yu nĩenda kwona mũsumbĩ, na ethĩwa nĩnĩkĩte ĩvĩtyo o na yĩmwe, nĩambũae.’ ”
33Kwoou Yoavu nĩwaendie kũla kwĩ Mũsumbĩ Ndeviti na amũtavya ũndũ Avisalomu waisye. Nĩvo ĩndĩ mũsumbĩ watũmanie Avisalomu, nake athi vala waĩ akumana mbee wake atina nthĩ na ũthyũ amũnenge ndaĩa. Mũsumbĩ nĩwathokisye Avisalomu kwa kũmũkethya na ngethi ya wendo.
BIBLE SOCIETY OF KENYA © 2011