2Sam 11
11
Ndeviti na Mbathi-sieva
1 #
1Mav 20.1
Mwaka ũyambĩĩa, ĩvinda yĩla asumbĩ maendaa kaũnĩ, Ndeviti nĩwatũmie Yoavu e vamwe na anini ma mũsumbĩ na asikalĩ onthe ma Ĩsilaeli. Nĩmooaie Aamimoni na mathyũlũlũka ndũa ya Lava. Ĩndĩ Ndeviti nĩwekalile Yelũsalemu.
2Mũthenya ũmwe ĩa mawĩoo, Ndeviti nĩwookĩlile auma ũkomonĩ wake na athi kũtembeela nyũmbanĩ yake ya kĩ-ũsumbĩ ĩũlũ. Aendee kũtembeela vau nĩwoonie kĩveti kĩithamba. Kĩveti kĩu kyaĩ kyanake mũno. 3Kwoou Ndeviti nĩwatũmie mũndũ akamanye kĩveti kĩu. Mũndũ ũsu nĩwakũlilye, “Ũũ ti Mbathi-sieva mwĩĩtu wa Eliamu, kĩveti kya Ulia ũla Mũititi?” 4Ndeviti nĩwatũmie andũ mathi makakĩete. Nĩmaendie makĩete kũla kwĩ Ndeviti, na amanyana kĩ-mwĩĩ nakyo. (Kĩveti kĩu kyaĩ kĩnamina kwĩthesya kuma ũvukunĩ wakyo wa mwei.) Nĩvo ĩndĩ kyenũkie.
5Ĩtina wa ũu nĩkyamanyie kana nĩ kĩito, na kyatũmana kũla kwĩ Ndeviti akatavw'e ũndũ ũsu.
6Ndeviti nĩwatũmanie kũla kwĩ Yoavu ayasya, “Tũma Ulia ũla Mũititi oke kũũ nĩĩ.” Kwoou Yoavu nĩwatũmie Ulia athi kũla kwĩ Ndeviti. 7Yĩla Ulia wookie kũla waĩ, Ndeviti nĩwamũkũlilye ũndũ Yoavu waendee, ũndũ asikalĩ mailyĩ, na ũndũ kaũ ũendee. 8Nĩvo ĩndĩ Ndeviti weeie Ulia atĩĩ, “Ĩnũka ũkathũmũe.” Kwoou Ulia nĩwaumie nyũmba kwa mũsumbĩ, nake Ndeviti atũmana atwaĩwe mũthĩnzĩo. 9Ĩndĩ Ulia ndaaĩnũka, akomele mũvĩanĩ wa nyũmba ya kĩ-ũsumbĩ, e vamwe na asikalĩ ala masungaa vo. 10Yĩla Ndeviti weewie kana Ulia ndanenũka, nĩwamũkũlilye atĩĩ, “We ndũkie wumĩte kyalonĩ kĩasa, ũleile kwĩnũka nĩkĩ?”
11Ulia amũsũngĩa, “Aũme ma Ĩsilaeli na ma Yuta me kaũnĩ, na mena Ĩsandũkũ ya Ũtianĩo. Mũtongoi wakwa Yoavu na anini make me maeemanĩ kĩsesinĩ. Ndonya kwĩnũka ata, ngaye na kũnyw'a na kũkoma na kĩveti kyakwa? Nĩngwĩvĩta na thayũ waku kana ndiĩka ũndũ wa mũthemba ũsu!”
12Kwoou Ndeviti nĩwamwĩie atĩĩ, “Ĩkala vaa mũthenya ũngĩ ũmwe, na ũnĩ ngakũtũma ũsyoke kaũnĩ.” Ulia nĩwekalile Yelũsalemu mũthenya ũsu na ũla waatĩĩe. 13Ndeviti nĩwamũthokisye aĩsanĩa lĩu wa wĩoo nake na manyusanĩa. Ndeviti nĩwatumie Ulia amilwa. Ĩndĩ wĩoo ũsu Ulia ndaaĩnũka. Nĩwaendie akoma mũkekanĩ wake e vamwe na athũkũmi ma kwa mũsumbĩ.
14Ũnĩ ũsu Ndeviti nĩwaandĩkie valũa ũtwaĩwe Yoavu na atũma Ulia amũtwaĩe. 15Valũanĩ ũsu aandĩkĩte akasya, “Iai Ulia mbee vala ve kaũ mũvyũ. Mũkĩĩei nĩ kana aũmĩw'e na aikw'a.” 16Kwoou yĩla Yoavu waendee kũthyũlũlũka ndũa ya Lava, nĩwaiie Ulia vala weesĩ kana nĩvo ve amaitha ala me vinya. 17Yĩla aũme ma ndũa ĩsu mookie kũkita Yoavu, asikalĩ amwe ma kĩkundi kya Ndeviti nĩmooaiwe. Ulia o nake nĩwooaiwe.
18Yoavu nĩwatũmanie kũla kwĩ Ndeviti amũtavĩtye maũndũ onthe ĩũlũ wa ũndũ kaũ ũendee. 19Nĩweeaĩie mũndũ ũla watũmie amwĩa atĩĩ, “Wamina kũtavya mũsumbĩ maũndũ onthe ĩũlũ wa ũndũ kaũ ũendee, 20mũsumbĩ nũtonya kũthata mũno na aikũkũlya, ‘Mũthengeeie ndũa mũno ũu nĩkĩ na kũkita? Nomwĩĩsĩ kana nĩmatonya kũmũatha na maangi kuma mokũtanĩ? 21#Asi 9.53 Nomũũlilikana ũndũ Avimeleki mwana wa Ngitioni wooaĩiwe Thevesi, vala kĩveti kyekisye ĩvia ya ũthia kĩ ũkũtanĩ kyamũaa? Nĩkĩ ĩndĩ mũthengeeie mũno vakuvĩ na ũkũta?’ Mũsumbĩ akũkũlya ũu, mwĩe atĩĩ, ‘Mũthũkũmi waku Ulia o nake nĩwũaiwe.’ ”
22Kwoou mũndũ ũsu nĩwaendie kũla kwĩ Ndeviti, na amũtavya ũndũ Yoavu ũmwĩaĩie akamwĩe. 23Nĩweeie Ndeviti atĩĩ, “Amaitha maitũ nĩmethĩiwe me na vinya mũno mbee waitũ, na nĩmaumaalile ndũanĩ mooka kũtũkitĩa kĩsesinĩ, ĩndĩ nĩtũmalũngilye masyoka mũvĩanĩ wa ndũa. 24Nĩvo ĩndĩ matũathangie na maangi kuma ũkũtanĩ wa ndũa, na kwoou amwe ma athũkũmi maku we mũsumbĩ nĩmoaiwe; o ta ũu mũthũkũmi waku Ulia ũla Mũititi nĩwũaiwe.”
25Ndeviti nĩweeie mũndũ ũsu atĩĩ, “Enda ũkekĩe Yoavu vinya na ũimwĩa ndakathĩnĩke, nĩkwĩthĩwa mũndũ ndethĩawa atonya kũmanya ũla ũkũkw'ĩĩa kaũnĩ nũũ. Mwĩe nĩathi okite andũ ma ndũa ĩsu na vinya mbeange na aimĩkwata.”
26Yĩla Mbathi-sieva kĩveti kya Ulia kyamanyie kana mũũme wakyo nĩ mũkw'ũ, nĩkyeethĩiwe na kyeva nũndũ wake. 27Ĩtina wa ĩvinda yĩu ya kyeva yathela, Ndeviti nĩwatũmanie nĩ kana kĩveti kĩu kĩkaetwe nyũmbanĩ yake ya Kĩ-ũsumbĩ. Nĩkyatw'ĩkie mũka wake, na kyamũsyaĩa kavĩsĩ. Ĩndĩ ũndũ ũsu Ndeviti weekie ndwaamwendeesya Mwĩai Ngai.
BIBLE SOCIETY OF KENYA © 2011