2Sam 10
10
Ndeviti Aisinda Aamimoni na Asilia
(1Mav 19.1-19)
1Ĩtina wa maũndũ asu, Naasu mũsumbĩ wa Aamimoni nĩwakwie, na Anuni mwana wake atw'ĩka mũsumbĩ ĩtina wake. 2Mũsumbĩ Ndeviti nĩwaisye atĩĩ, “Nĩngwĩka Anuni mwana wa Naasu nesa, o tondũ ĩthe wake wambĩkaa nesa.” Kwoou Ndeviti nĩwatũmie andũ makakiakisye Anuni nũndũ wa kĩkw'ũ kya ĩthe wake.
Yĩla andũ asu mavikie nthĩ ya Aamimoni, 3atongoi ma Aamimoni nĩmakũlilye Anuni mũsumbĩ woo atĩĩ, “We wĩsũanĩa kana nĩ kwondũ wa ndaĩa ya ĩthe waku Ndeviti ũtũmie andũ aa moke ũkũkiakisya? Aiee, amatũmie moke kũmanya kwa kĩmbithĩ ũndũ ndũa ĩno ĩilyĩ, nĩ kana amyũkite na kũmĩsinda!” 4Kwoou Anuni nĩwakwatie andũ asu matũmĩtwe nĩ Ndeviti na eenza kĩla ũmwe kĩng'ew'a nyusu, atilanĩlya ngũa syoo katĩ inyunyunĩ syoo, na amalekya mathi.
5Yĩla Ndeviti wataviw'e ĩũlũ wa ũndũ ũsu, nĩwatũmie andũ mathi makamathaũe, nĩkwĩthĩwa andũ asu maĩ na nthoni mbingĩ mũno. Mũsumbĩ nĩwameie atĩĩ, “Ĩkalai Yeliko nginya ing'ew'a syenyu imee ĩngĩ, na ĩndĩ mũyũka.”
6Aamimoni nĩmamanyie kana nĩmatw'ĩkĩte amaitha ma Ndeviti, na kwoou makomboa asikalĩ ma Asilia ngili mĩongo ĩlĩ kuma ndũanĩ sya Mbethi-leovu na Sova, na asikalĩ ngili ĩkũmi na ilĩ kuma Tovu, na mũsumbĩ wa Maaka e na asikalĩ make ngili ĩmwe. 7Yĩla Ndeviti weewie ũu, nĩwatũmie Yoavu athi vamwe na asikalĩ onthe ala ngũmbaũ. 8Aamimoni nĩmaumaalile na meevanga mũvĩanĩ wa ndũa ya Laava meyũmbanĩtye kũkita, Asilia ala maumĩte Nzova na Leovu, na andũ ma Tovu na Maaka nĩmeevangie kĩsesinĩ me oka.
9Yĩla Yoavu woonie kana asikalĩ nĩmevangĩte mbee na ĩtina wake, nĩwanyuvie asikalĩ ma Ĩsilaeli ala aseo vyũ, nĩ kana mokite na Asilia. 10Nĩwanenganie asikalĩ ala angĩ make matongoew'e nĩ mwana-a-inyia Avisai nĩ kana mokite Aamimoni. 11Yoavu nĩweeie Avisai atĩĩ, “Woona Asilia mambĩĩa kũnzinda, ũka ũndetheesye, na ethĩwa Aamimoni nĩmeũkũsinda, nĩngũka ũkũtetheesya. 12Ĩthĩwa na vinya, na tũyũkita na ũkũmbaũ kwondũ wa andũ maitũ, na kwondũ wa ndũa sya Ngai waitũ. Mwĩai Ngai nũkwĩka ũla ũkwona wĩ ũseo!”
13Nĩvo ĩndĩ Yoavu na asikalĩ make mathengeeie mokite na Asilia, namo Asilia masemba makĩa. 14Yĩla Aamimoni moonie kana Asilia nĩmasemba makĩa, o namo nĩmasembie makĩa Avisai na malika ndũanĩ. Yoavu nĩwasyokie Yelũsalemu kuma kaũnĩ wake na Aamimoni.
15Ĩndĩ yĩla Asilia moonie kana nĩmasindwa nĩ andũ ma Ĩsilaeli, nĩmoombanie vamwe. 16Mũsumbĩ Atateseli nĩwatũmie andũ makaete asikalĩ kuma nthĩ sya Silia, ila syaĩ ngalĩko ya wumĩlonĩ wa syũa ya Ũsĩ wa Euvalati. Asikalĩ asu nĩmookie Eelamu matongoew'e nĩ Sovaku, ũla waĩ mũnene wa asikalĩ ma Atateseli mũsumbĩ wa Sova. 17Yĩla Ndeviti wataviw'e ũvoo ũsu, nĩwoombanisye asikalĩ onthe ma Ĩsilaeli, mainga Ũsĩ wa Yolotani, na mathi Eelamu. Asilia nĩmeevangie mooka kũkomana na Ndeviti na mokita nake. 18Ĩndĩ Asilia nĩmasembie makĩa andũ ma Ĩsilaeli. Ndeviti nĩwooaie asikalĩ moo maana mũonza ala malĩsĩte mbalasinĩ, na asikalĩ moo ala maendete na maũũ ngili mĩongo ĩna. O ta ũu nĩwaũmĩisye Sovaku, mũnene wa asikalĩ moo, na kwoou akw'ĩĩa kaũnĩ. 19Yĩla asumbĩ onthe ala maĩ athũkũmi ma Atateseli moonie kana nĩmasindwa nĩ andũ ma Ĩsilaeli, nĩmaseũvisye wĩw'ano wa mũuo namo, na matw'ĩka athũkũmi moo. Asilia nĩmakwatiwe nĩ w'ĩa weethĩa maitonya kũtetheesya Aamimoni ĩngĩ.
BIBLE SOCIETY OF KENYA © 2011