Joshuwa 22
22
Bgwiliziwa kwe bathu be kunobhuda zhuba
1Joshuwa wakadana be ludzi gwa Rubheni ne gwa Gadi ne gwamu le ludzi gwa Manase 2#Mbalo 32:20-32; Joshuwa 1:12-15ngono kabadwa kati, “Makalondolodza kose kwamakadwiwa ndi Mushe nlanda wa Yahwe, kakale makabe mushinga kose kwandakabe ndi mudwa. 3Amuzotongo letjedzela zwikamu zwenyu muzwibaka zwinjinji kuswikila nasi, koga makabe nako kuti muthame itjo tjamakabe mudwiwa ndi Yahwe Ndzimu wenyu kuti mutjithame. 4Ngono ngwenu Yahwe Ndzimu wenyu watjipa zwikamu zwenyu kunyaluluka koga sekwa akabe abagadzabgwe, ndizo ngwenu bgwililani ku mizi yenyu ku shango yamakapiwa seli ye gwizi gwe Jorodani ndi Mushe nlanda wa Yahwe. 5Mubone kuti molondolodza ndaulo ne milayo yamakapiwa ndi Mushe nlanda wa Yahwe, kuda Yahwe Ndzimu wenyu, kulondolodza zila dzabo dzose ne kubhulutana ndayo ne kuzwibhatilila mubali ne kubashingila nge moyo wose ne meya dzenyu dzose.” 6Ngono Joshuwa kabakombolela kabapa zila bakayenda ku mizi yabo. 7Mushe wakabe apa gwamu limwe le ludzi gwa Manase shango mu Bhashani kuti ibe thaka yabo, ngono gwamu limwe labo Joshuwa wakalipa shango ikunomila zhuba kwe gwizi gwe Jorodani. Ngono kwakati Joshuwa ebapa zila kabakombolela ngono 8kabadwa kati, “Yendani ku mizi yenyu nge fumwa yenyu isi shoma, ye zwithuwo zwisizwishoma ne siliva ne golide ne phangula ne butale ne zwiambalo zwinjinji ngono muswike mukobele bo bamwe zwamakatapa mu zwita zwenyu.” 9Ndizo ludzi gwa Rubheni ne gwa Gadi ne gwamu le ludzi gwa Manase bakabgwilila kanyi kwabo, bethubukana ne Baiziraela ku Shilo, mu shango ye Kanana, beyenda ku shango yabo ye Giliyadi yabakapiwa nge ndaulo ya Yahwe yabakapa Mushe.
Tjibeso pa gwizi gwe Jorodani
10Bakati bali mu zila beyenda kanyi kwabo bakaswika mu ntuthu we Geliloti umu shango ye Kanana pejo ne gwizi gwe Jorodani, bathu be ludzi gwa Rubheni ne gwa Gadi ne gwamu le ludzi gwa Manase bakabaka tjibeso tjinopisigwa zwibhayilo tjikulukulu tjakanaka wunde ye gwizi gwe Jorodani. 11Ngono Baiziraela bakahwa kuti bathu be Rubheni ne be Gadi babaka tjibeso tjinopisigwa zwibhayilo ku ndzibo uku gwizi gwe Jorodani kwakalingisana ne shango ye Kanana. 12Ngono Baiziraela bakati behwa ngekwako bakanozwikubunganya ku Shilo kuti ndizo bagwe nabo.
13Ndizo Baiziraela bakatuma Finihasi nkololo wa Eleazari we mpirisiti ku bathu be ludzi gwa Rubheni na Gadi negwe gwamu limwe le ludzi gwa Manase mu shango ye Giliyadi. 14Bakantuma ne goko le batungamili bali gumi mmwe ne mmwe ali nsholo we nsha mu njudzi dze Iziraela 15Bakati beswika ku nzi we Giliyadi bakadwa bathu be ludzi gwa Rubheni ne gwa Gadi ne gwamu limwe le ludzi gwa Manase bakati, 16#Matama 12:13, 14“Tatumwa nge gubungano la Yahwe ngono toshakaziba kuti ini mashaya kugalabgwe mu Ndzimu we Iziraela kene? Ini mafupatila Ndzimu we Iziraela saikoku kene, mu kupanduka kwenyu mube muzwibakila tjibeso tjinopisigwa zwibhayilo kene? 17#Mbalo 25:1-9Tjibi tjawakathamila Yahwe tili ku Peori tjatisathu tikazwitjenapadza mu tjili ne tjifo tjakawila gubungano la Yahwe azwizolizana kene? 18Ndiko nasi kwamunga fupatila Yahwe kene? Ha mupandukila Yahwe nasi banowomuka mangwana bezhalila gubungano le Baiziraela bushongola. 19Ndizo ngwenu ha shango yamakapiwa yakatemapala, izhani ku shango ya Yahwe iko kuna bugalo gwe Ndzimu, ngono mugale naswi mu shango yedu. Koga musi pandukile Yahwe kene iswi ngo zwibakila tjibeso tjinopisigwa zwibhayilo kusi tja Yahwe Ndzimu wedu. 20#Joshuwa 7:1-26Apa Akani nkololo wa Zera wakati asalondolodza tjabakabe badwiwa ngekwe zwija zwabakayi basitole, apa bushongola gwa Yahwe aguzowila gubungano lose le Iziraela kene? Akani azofila jinyo lile ega.”
21Be ludzi gwa Rubheni ne gwa Gadi ne gwamu le ludzi gwa Manase bakashandula batungamili be bathu be Iziraela beti, 22“Masimbawose ndibo Ndzimu! Ndzimu ndiwo Yahwe! Banoziba kuti ini tathama saikoku, ngono toshaka kuti namwi mose nasi muzibe bo! Ha ili kuti ikoku bupanduki kene sateedza Yahwe mutibulaye ngwenu. 23Ha tazwibakila tjibeso tjedu tjinopisigwa zwibhayilo kuti ndizo tikowofupatila Yahwe, tibetidusa zwibhayilo zwinopisiwa ne zwe mathunde kene zwe moyo ntjena mutjili Yahwe ngaba tibone nlandu. 24Aa, tathama saikoku ngotja kuti limwe zhuba zwizekugwana zwenyu zwingadwa zwizekugwana zwedu zwiti, ‘Gobe lenyu mu Ndzimu we Iziraela ini?’ 25Ngoti Yahwe bakathama kuti gwizi gwe Jorodani gube n'gathu pakati kwedu namwi, imwi Barubheni namwi Bagadi amuna gobe muna Yahwe. Ndizo zwizekugwana zwenyu zwingathama kuti zwizekugwana zwedu zwisitongo namata Yahwe. 26Ndizo tati, ‘Ngati bakeni tjibeso tjisi tje zwibhayilo zwinopisiwa kene zwimwe koga, 27koga tjibe butendeki pakati kwedu namwi ne pakati kwe bana bedu banozha kuti towonamata Yahwe mu bugalo gwabo gwa kayengemala, tibetiyisa zwibhayilo zwinopisiwa ne zwimwe ne zwe moyo ntjena, tithamila kuti mangwana bana benyu basitongodwa bana bedu beti abana gobe muna Yahwe.’ 28Takakumbula titi ha kungati limwe zhuba tikadwiwa saikoku kene kudwiwa bana bedu saikoku, tingadabila titi, ‘Bonani tjifano tje tjibeso tjinopisigwa zwibhayilo tja Yahwe tjakabakiwa ndi bobatategulu bedu, tjisinga bakigwe kuti tjipisigwe zwibhayilo kene tjidusigwe zwibhayilo, koga tjibakigwa kuti tjibe butendeki pakati kwedu namwi.’ 29Ngono gwenu ngakube kutjena naswi kuti tingapandukila Yahwe ngono tikabafupatila ngobaka tjibeso tjinopisigwa zwibhayilo zwinopisiwa ne zwe mathunde ne zwibhayilo koga kusi tjibeso tjinopisigwa zwibhayilo tja Yahwe Ndzimu wedu tjakabakwa pa bugalo gwe Ndzimu.”
30Kwakati mpirisiti Finihasi ne batungamili be gubungano ne wola dze misha ye Iziraela behwa matama akabe elebgwa ne bathu be ludzi gwa Rubheni ne gwa Gadi ne gwamu le ludzi gwa Manase bakagutshika. 31Ngono Finihasi we mpirisiti nkololo wa Eleazari kadwa ludzi gwa Rubheni negwa Gadi ne gwamu le ludzi gwa Manase kati, “Nasi toziba kuti Yahwe bayapo pakati kwedu, ngobe amuzo bapandukila. Ngwenu matjidza Baiziraela mu shamu ya Yahwe.” 32Kudwapo Finihasi ne batungamili bakasiya Barubheni ne Bagadi mu shango ye Giliyadi bakashandukila ku shango ye Kanana kubamwe Baiziraela ngono bakaswika bebabikila. 33Mbiko yakashathisa Baiziraela, ngono bakakudza Ndzimu. Bakamisa kululwamisila kunokolomola nge ngwa shango ye Giliyadi yakabe igala bathu be ludzi gwa Rubheni ne gwa Gadi. 34Barubheni ne Bagadi bakadana tjibeso tjinopisigwa zwibhayilo beti, “Ntendeki wedu namwi kuti Yahwe ba Ndzimu.”
Právě zvoleno:
Joshuwa 22: KBTP
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
Kalanga Bible © Bible Society of Botswana, 2008, 2018.