Matama 12
12
Bugalo gung'ompela gwe kunamata
1“Eyi milayo yamakafanila yela njele kuilondolodza mu shango Yahwe Ndzimu wa bobatategulu benyu yabakamupa kuithuwa mazhuba wose amunotjila mu shango. 2Nge malebeswa wose mukolomodze magalo wose ekunamata midzimu e njudzi dzamunowotolela shango, pezhugwi kwe matombo malefu na pezhugwi kwe matuthu na kusi kwe nti mmwe ne mmwe una mazhani manyolo. 3#Matama 7:5Mulige zwibeso zwabo zwe zwibhayilo mube mupkhwanya mapango abo mupise bo Ashera babo nge moto. Muteme mulige midzimu yabo ye zwifano muduse zina labo mu magalo iyawaje. 4Musitongo namata Yahwe Ndzimu wenyu sayikoko. 5Koga imwi mu shake bugalo gwamunoshaluligwa ndi Yahwe Ndzimu wenyu pakati kwe njudzi dzose kubiga zina labo ne kuthama bugaloko, ikoko ndiko kwamunowoyenda. 6Ngono ikoko kube iko kwamunoyisa zwibhayilo zwenyu zwinopisiwa ne zwimwe zwibhayilo zwenyu ne zwebugumi zwenyu ne zwipo zwamunodusa ne zwipo zwe kutuna kwenyu ne zwipo zwe kuda kwenyu ne mbano dze zwithuwo zwenyu. 7Ikoko mowojila mbeli kwa Yahwe Ndzimu wenyu, mowoshatha, imwi ne misha yenyu mu tjimwe ne tjimwe tjamunowothama, ngoti Yahwe Ndzimu wenyu banomukombolela. 8Musitongo thama sekwa tinothama ipapa sangwenu mu zhuba lino, mmwe ne mmwe ethama tjimwe ne tjimwe tjaanobona tjakalulwama mu mesho awe, 9ngoti amuthu mukaswika mu kunyaluluka ne mu thaka yamunopiwa ndi Yahwe Ndzimu wenyu. 10Koga muti mutjuluka Jorodani, mugala mu shango yamunopiwa ndi Yahwe Ndzimu wenyu kuithuwa, ngono bemupa kunyaluluka mu kugwa ne zwita zwenyu zose kumupoteleka kuti mutjile makabakililika. 11Ipapo ku bugalo gunowoshalugwa ndi Yahwe Ndzimu wenyu kuthama kuti zina labo ligale ko, ikoko ndiko kwamunowozhisa kose kwandinowomudwa: Zwibhayilo zwenyu zwinopisiwa ne zwibhayilo zwimwe ne zwe bugumi ne zwipo zwamunodusa ne zwibhayilo zwe kutuna zwamakatuna kuna Yahwe. 12Ngono ikoko mushathe mbeli kwa Yahwe Ndzimu wenyu, imwi ne bakololo benyu ne bakololokadzi benyu ne balandalume ne balandakadzi ne Nlevi umu mizi yenyu se asina gobe kene thaka mu mumuli. 13Mube ne njele kuti musitongo pa zwibhayilo zwenyu zwinopisiwa pa bugalo gumwe ne gumwe gwamabona, 14koga muyise ku bugalo gunowoshalugwa ndi Yahwe mu gumwe gwe ludzi gwenyu, ikoko ndiko kwamunowopila zwibhayilo zwenyu zwinopisiwa, ikoko ndiko kwamumowothamila kose kwandinomudwa.
15“Koga, imwi mungabulaya phuka mukaja nyama mu mmwe ne mmwe we mizi yenyu sekwa munoda kuyendidzana nge makombolelo a Yahwe Ndzimu wenyu abamupa, usimbuyanana ne mbuyanana ungayija, ingana ikabe ili ye phala kene ye phembgwe. 16#Kutangisa 9:4; Zwipo 7:26, 27; 17:10-14; 19:26; Matama 15:23Koga musitongo ja malopa, muatebulile pasi se vula. 17Musitongo jila mu mizi yenyu, tjebugumi tje mathunde kene tje nkumbi we zhambi kene tje mafuta kene mbano dze ng'ombe dzenyu kene dze ngubi dzenyu kene tjimwe tje zwibhayilo zwe kutuna zwamakatunila kene zwibhayilo zwenyu zwe kuda kwenyu, kene zwibhayilo zwamadusa nge kwenyu, 18koga muzwijile mbeli kwa Yahwe Ndzimu wenyu mu bugalo gunowoshalugwa ndi Yahwe Ndzimu wenyu, imwi ne bakololo benyu ne bakololokadzi benyu ne balandalume benyu ne balandakadzi benyu ne Nlevi umu mizi yenyu, ndizo mowoshatha mbeli kwa Yahwe Ndzimu wenyu mu tjimwe ne tjimwe tjamunothama. 19Mube ne njele kuti musitongo siya Nlevi tjibaka tjose ha mutjila mu shango yenyu.
20“Kowoti Yahwe Ndzimu wenyu betalabudza ntuthu wenyu sekwa bakamugadzabgwe, ngono imwi mube muti, ‘Toshaka ja nyama,’ ngoti modwila moyo nyama, mungaja sekwa munoshaka. 21Ha bugalo gwakashalugwa ndi Yahwe Ndzimu wenyu kubiga zina labo ikoko kuli kule kule namwi, ipapo mungabulaya tjimwe tje zwithuwo zwenyu zwamakapiwa ndi Yahwe sekwa ndamudwa ngono muje mu mizi yenyu se kuda kwenyu. 22Se phala ijiwa kene phembgwe, munga ija, usakatjenapala kene wakatjenapala kofanana aije. 23#Zwipo 17:10-14Koga mube ne malebeswa kuti amutoja malopa, ngoti malopa ndiwo butjilo ndizo musitongo jilanya nyama ne butjilo. 24Musitongo aja muatebulile pasi se vula. 25Musitongo aja, kuti ndiko kowomuyendila zubuyanana imwi ne bana benyu banozha shule kwenyu ha mushinga tjakalulwama mu mesho a Yahwe. 26Koga zwithu zwakayengemala zwinodwa kumuli ne zwibhayilo zwe kutuna muzwiyise ku bugalo gunowoshalugwa ndi Yahwe, 27muyise zwibhayilo zwenyu zwinopisiwa, kuli nyama ne malopa mu tjibeso tjinopisigwa zwibhayilo tja Yahwe Ndzimu wenyu. Malopa e zwibhayilo zwenyu atebuligwe pezhugwi kwe tjibeso tjinopisigwa zwibhayilo tja Yahwe Ndzimu wenyu koga nyama mungayija. 28Mube ne njele kulondolodza matama wose iyawa andinomupa kuti kumuyendile zubuyanana nge kusingapele imwi ne bana benyu banozha shule kwenyu ha mushinga tjakalulwama ne tjakatambunuka mu mesho a Yahwe Ndzimu wenyu.”
29“Kowoti Yahwe Ndzimu wenyu bepaladza njudzi mbeli kwenyu dzamunongina kudzitolela shango, ngono mube mudzitolela shango mube mugala muili, 30mube ne njele kuti musiwile mu bhuzhu nge kubasala shule, shule kwe balobesiwa mbeli kwenyu. Musitongo bhuzwa tjimwe ngekwe midzimu yabo muti, ‘Njudzi idzedzi dzakabe dzishingila midzimu yadzo tjini kuti naswibo tithame tiyijalo?’ 31Musitongo thama muijalo kuna Yahwe Ndzimu wenyu ngoti tjimwe ne tjimwe tjinobengiwa tjisingadiwe ndi Yahwe bakatjithamila midzimu yabo ngoti bakabuya bakapisa bakololo ne bakololokadzi babo bepisila midzimu yabo.”
32 #
Matama 4:2; Zumbunulo 22:18, 19 “Tjimwe ne tjimwe tjandinomupa muyele njele kutjithama, musitongo dusa tjimwe mu tjili kene mukatjipaphidza nge tjimwe.
Právě zvoleno:
Matama 12: KBTP
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
Kalanga Bible © Bible Society of Botswana, 2008, 2018.