Éxodo 13
13
Punta yuriqkuna Teyta Diospaq kayanqan
1Tsëpitanam Moisésta Teyta Dios nirqan: 2<<Israel nunakunapa punta yuriq ollqu tsurinkunata y wätankunapa punta yuriq orqu wawankunatapis noqapaq apayämunki. Tsëkunaqa noqapam>>.#Éxo. 13.11-16; Núm. 3.13; Luc. 2.23.
3Tsënam Moisés llapan nunakunata nirqan: <<Egiptupita kanan junaq poderninwan Teyta Dios jorqamashqantsikta ama qonqayankitsu. Kanan junaqmi esclävu këkashqantsikpita jorqëkämantsik. Wata wata kë junaqta yarparar levadürayuq tantata ama mikuyankitsu. 4Abib killachömi yarqïkantsik. 5Tsëmi unë castantsikkunata Teyta Dios äninqan nacionman chëkur Abib killachö wata wata fiestata celebrayanki. Tsëchöqa lichipis mielpis yakunöran atska këkan. Tsëchömi tëkäyan cananeo nunakuna, heteo nunakuna, amorreo nunakuna, heveo nunakuna y jebuseo nunakunapis. Pëkuna tëkäyashqan naciontam Teyta Dios qoyäshunki.
6<<Tsë fiestata celebrarmi qanchis junaq levadürannaq tantallata mikuyanki. Fiestapa ushanan qanchis kaq junaqnam Teyta Diosta adorayanki. 7Qanchis junaqninpim levadüranaq tantallata mikuyanki. Tsë junaqkuna ama katsuntsu levadüra ni levadürayuq tanta qamkuna täräyanqëkichö.
8<<Tsë junaqmi tsurikikunata willayanki: <Kë fiestataqa rurëkantsik Egiptupita Teyta Dios jorqamanqantsikta yarparninmi. 9Nunakunapa rikranchö o urkunchö señalnömi tsë fiestapis señal kanqa Teyta Dios qomanqantsik leykunata imëpis mana qonqashpa parlanantsikpaq. Tsënö kanqa Egiptupita poderninwan Teyta Dios jorqamanqantsikpitam. 10Tsënö kaptinmi cada wata Teyta Dios nimanqantsik junaqchö tsë fiestata mana qonqëta rurëkantsik>.
11<<Cananeo nunakuna täräyanqan nacionta qoyäshunëkipaqmi unë castantsikkunata y qamkunatapis Teyta Dios äniyäshurqunki. Tsëman Teyta Dios chëkatsir qoykuyäshuptikim 12punta yuriq ollqu tsurikikuna Teyta Diospaq kanqa. Tsënöllam wätëkikunapa punta yurikuq orqu wawankunapis Teyta Diospaq kanqa.#Luc. 2.23. 13Ashnupa punta yuriq orqu wawanpa rantin mallwa üshata o juk watayuq chiwata sacrificiupaq apayanki. Tsënö mana aparqa pollïnupa kunkanta pakiriyanki. Punta kaq tsurikikunapa rantin ofrendata#Núm. 18.15-16. apayanki.
14<<Warë warätin tsurikikuna <¿imanirtaq kë fiestata rurantsik?> nir tapushuptiki niyanki: <Egiptuchö esclävu kayanqäpitam poderninwan Teyta Dios jorqayämarqan. 15Faraónmi shonqun chukruyaptin yarqayämunäta munarqantsu. Tsëmi Teyta Dios wanutsirqan llapan Egipto nunakunapa wamaqshu ollqu tsurinkunata. Tsënöllam wanutsirqan llapan wätankunapa punta yuriq orqu wawankunatapis. Tsëmi wätapa punta wawan orqu yuriptinqa sacrificiupaq kayantsik. Wamaqshu tsurintsik ollqu yuriptinqa rantinmi ofrendata Teyta Diospaq apantsik. 16Egiptupita Teyta Dios poderninwan jorqamanqantsikta imëpis yarparänantsikpaqmi nunakunapa rikranchö o urkunchö señal kanqannö kë fiestapis sëña këkan> >>.
Ninawan pukutë kanqan
17Teyta Diosqa musyarqanmi filisteo nunakuna atacayaptin Israel nunakuna mantsakur Egiptuman kutikuyänanpaq kanqanta. Tsëmi Israel nunakunata Egiptupita ewkuyänanpaq Faraón jaqiriptin Teyta Dios manam pusharqantsu filisteo nunakunapa nacionninman ëwaq nänipaqa, amänu këkaptinpis. 18Tsëpa rantinqa chusyaq jirkapam pusharqan Puka Lamarman ëwaq nänipa. Egiptupita yarqamur Israel nunakunaqa tröpa tröpam soldädukunanöraq yarqayämurqan.
19Egiptupita Israel nunakunawan yarqamurmi Moisésqa Josépa tullunkunata apamurqan. Manaraq wanukurmi Israel nunakunata José rowarqan: <<Canaánman kutiyänëkipaq Teyta Dios shamurmi yanapayäshunki. Tsënö yanapayäshuptiki këpita ewkurqa tullükunatapis apakuyanki#Gén. 50.25; Jos. 24.32.>>.
Tsënö nirmi Teyta Diospa shutinchö juratsirqan.
20Sucotpita ewkurmi Israel nunakuna chäyarqan Etamman. Tsëpitaqa chusyaqllanam qallëkun. 21Israel nunakunata pusharmi junaqpa Teyta Dios ëwarqan shëkaq pukutëchö. Paqaspanam atsikyänanpaq shëkaq ninachö ëwarqan. Tsënöpam paqaspapis y junaqpapis Israel nunakuna ëwayarqan. 22Junaqpaqa shëkaq pukutëmi pëkunapa puntankunata imëpis ëwaq. Paqaspanam shëkaq nina imëpis atsikyaq.#Éxo. 40.34-38; Núm. 9.15-23.
Právě zvoleno:
Éxodo 13: qwhB
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2018, Wycliffe Bible Translators, Inc. All rights reserved.