Éxodo 12
12
Wamaqshu kaqkunata Teyta Dios ushakätsinqan
1Egiptuchöraq Israel nunakuna këkäyaptinmi Moiséstawan Aarónta Teyta Dios nirqan: 2<<Kë killam qamkunapaq wata qallëkunan killa kanqa. 3Llapan Israel nunakunata willayanki kë killa chunka kaq junaqchö mallwa üshata karpis o mallwa chiwata karpis llapan wayichö alistayänanpaq. 4Juk wayichö wallkaqlla kar llapanta mana ushayänanpaq kanqanta yarparqa vecïnunwan ëllukäyätsun rakinakur llapan ëtsata mikuyänanpaq. 5Orqu üshatapis o chiwatapis juk watayuqta y sänuta akrayätsun.
6<<Tsë akrayanqan wätata tsararäyätsun kë killa chunka chusku junaqyaq. Tsë tardina llapan Israel nunakuna wätata pishtayätsun. 7Pishtarirna wayikunapa numbralninkunata y marcunkunata wätapa yawarninwan llushiyanqa. 8Tsë paqas ëtsata kankëllapa mikuyätsun asqaq qorakunatawan#12.8 Asqaq qorakunata mikuyänanpaq Teyta Dios nirqan Egiptuchö jipayanqanta yarpäyänanpaqmi. y levadürannaq tantatawan. 9Ama chawëpa ni caldïpa mikuyätsuntsu. Tsëpa rantinqa kankëllapa mikuyätsun ëtsanta, peqanta, chakinta, pachanta, shonqunta, ñatinninta y pacha ruruntapis. 10Waränin qoyapaqqa imatapis ama churayätsuntsu. Katukunataqa llapanta kayayätsun. 11Ratashninkunatapis llanqinkunatapis yakashqallana y tukruntapis#12.11 Wakin nunakunaqa shukshuntapis niyanmi. tsarashqallana tsë kankashqa ëtsata raslla mikuyätsun. Tsë Pascua fiestataqa#Lev. 23.5; Núm. 9.1-5; 28.16; Deut. 16.1-2; Mat. 26.1-2, 17-29; Mar. 14.1-2, 12-25; Luc. 22.1-2, 7-19; 1Cor. 5.7. shutïchö rurayätsun.
12<<Tsë paqas jinantin nacionpa pasarmi llapan Egipto nunakunapa wamaqshu kaq tsurinkunata y wätankunapa punta yurikuq orqu wawankunatapis wanutsishaq. Tsënö wanutsirmi Egipto nunakuna adorayashqan diosninkunata manakaqpaq churashaq. Noqaqa Teyta Diosmi kä. 13Wayi punkukunachö yawar llushirëkaqta rikarqa pasakushaqmi. Tsëmi Egipto nunakunata wanutsirpis Israel nunakunataqa ni jukllëllatapis wanutsishaqtsu.
14<<Tsë junaqtaqa cada wata mana qonqëpa noqa Teyta Diosta adoramar jatun fiestata rurayanki. Tsë ninqaqkunaqa imëyaqpis leymi kanqa qamkunapaq y mirënikikunapaqpis.
15<<Fiesta qallanqan junaqpitam qanchis junaqyaq levadürannaq tantata mikuyanki. Punta kaq junaqllachömi wayikikunapita llapan levadürata jitariyanki. Tsë semäna levadürayuq tantata mikuq kaqtaqa Israel nunakunapita qarquyanki. 16Punta kaq junaq y qanchis kaq junaq adorayämänëkipaq ëllukäyanki. Tsë junaqkunaqa ima uryëtapis ama uryayankitsu. Mikïtaqa jukniki jukniki mikuyänëkipaq arukuyanki.
17<<Levadürannaq Tanta Mikuna fiestata#Éxo. 23.15; 34.18; Lev. 23.6-8; Núm. 28.17-25; Deut. 16.3-8. rurar imëpis yarpäyanki Egiptupita jorquyanqaqta. Tsë fiestata imëyaqpis cada wata rurayanki qamkuna y mirënikikunapis. 18Punta kaq killa chunka chusku junaq tardipita qallëkur levadürannaq tantata mikuyanki ishkë chunka juk (21) junaq tardiyaq. 19Tsë qanchis junaqyaqqa wayikikunachö levadüra ama kanqatsu. Tsë junaqkuna levadürayuq tantata mikuq kaqtaqa Israel nunakunapita qarquyanki Israel mayiki kaptin o forastëru nuna kaptinpis. 20Tsë junaqkuna ama imatapis mikuyankitsu levadürayuqtaqa. Mëchö tärarpis mikuyanki levadürannaq tantallata>>.
21Tsënam Moisés precisaq Israel nunakunata qayëkatsir nirqan: <<Pascua mikïta mikuyänanpaq mallwa üshata kar o chiwata kar cada wayichö pishtayätsun. 22Tsë wätapa yawarninta winayanki juk matiman. Nïkur hisöpu niyashqan qorata#12.22 Hisöpu qoraqa ishmunä qoranömi këkan. yawarman tullpurkur punkïkikunapa numbralnintawan marcunkunata llushiyanki. Tsë paqas waräninyaq wayikikunapita ama yarquyankitsu. 23Egipto nunakunapa wamaqshu tsurinkunata wanutsinanpaq Teyta Dios pasar wayi punkukunataran rikanqa. Punkupa numbralninchö y marcunchö yawar llushirëkaqta rikarqa pasakunqam. Pëqa manam jaqinqatsu wanutsikuq ángel tsë wayiman yëkunanta.
24<<Pascua fiestata ruranëkipaq ninqätaqa imëpis mana qonqëta rurayanki. Tsënölla mirënikikunapis imëpis rurayätsun. 25Teyta Dios äniyäshunqëki nacionman yëkurpis mana qonqëta Pascua fiestata rurayanki. 26Tsurikikuna <¿imanirtaq kë fiestata rurantsik?> nir tapuyäshuptikiqa 27kënö käyitsiyanki: <Cada watam wätakunata pishtar Pascua fiestata celebrantsik Israel mayintsikkunapa wayinpa Teyta Dios Egiptuchö pasanqanta yarpänantsikpaq. Tsëpa pasar Egipto nunakunapa tsurinkunata wanutsirpis Israel mayintsikkunapataqa manam wanutsirqantsu. Tsënö salvanqanpitam Teyta Diosta adorar Pascua fiestata celebrantsik> >>.
Moisés tsënö niptinmi llapan Israel nunakuna qonqurikur Teyta Diosta adorayarqan. 28Tsëpitanam Moisésta Aarónta Teyta Dios ninqannölla llapanta rurayarqan.
29Tsë pullan paqasmi Teyta Dios wanutsirqan Egipto nunakunapa llapan wamaqshu ollqu tsurinkunata.#Éxo. 4.22-23. Tsënö wanutsirqan Faraónpa wamaqshu ollqu tsurinpita qallëkur hasta carcelchö llawirëkaq nunakunapa wamaqshu ollqu tsurinyaqmi. Tsënöllam wanutsirqan llapan wätakunapa punta yuriq orqu wawankunatapis. 30Cada wayichö wamaqshu tsurinkuna wanuyaptinmi Faraónpis, mandakur yanapaqninkunapis y llapan Egipto nunakunapis tsë paqas alläpa waqayarqan.
Israel nunakuna Egiptupita yarquyanqan
31Tsënam tsë paqas Moiséstawan Aarónta qayëkatsir Faraón nirqan: <<Qamkuna y Israel mayikikunapis kë nacionpita raslla ewkuyë. Kananqa mañakayämanqëkinö Teyta Diosta adoraq ewkuyë. 32Niyämanqëkinö üshëkikunata, chiwëkikunata y wäkëkikunata qatikurkur ewkuyë. Teyta Diosta adorar noqapaqpis pëta mañakïkulläyanki>>.
33Egipto nunakunaqa llapanpis wanuyänanpaq kayanqanta mantsarninmi Israel nunakunata niyarqan raslla ewkuyänanpaq. 34Tsëmi Israel nunakunaqa artësantin levadürannaq masankunata jakunkunawan wankurkur aparikurkur ewkuyarqan. 35Moisés ninqannöllam Egipto nunakunata mañakuyarqan qoripita y qellëpita kaqtaqa imëkatapis. Tsënöllam mañakuyarqan ratashkunatapis. 36Tsënö mañakuyaptinmi Egipto nunakunapa shonqunta Teyta Dios yatarqan imatapis mañakuyanqanta qarëkuyänanpaq. Tsënöpam Egipto nunakunapata imëkankunatapis alli kaqkunataqa apakuyarqan.#Éxo. 3.21-22.
37Tsënam Israel nunakuna Ramesés partipita ewkur Sucotmanpa ëwayarqan. Egiptupita yarquq nunakunaqa kayarqan joqta pachak waranqanömi (600,000), warmikunata y wamrakunata mana yupashpa. 38Pëkunawanmi mana Israel nunakunapis atskaq ëwayarqan. Tsëpita ewkurmi qatikuyarqan üshankunata, chiwankunata y atska wäkankunatapis. 39Egipto nunakuna nacionninpita raslla qarquyaptinmi Israel nunakunaqa mirkapäkuyänanpaqpis tiempu karqantsu. Tsëmi levadürannaq masa apayanqanpita jamayanqanchö tantata rurayarqan.
40Israel nunakunaqa Egiptuchö täräyarqan chusku pachak kima chunka (430) watam.#Gén. 15.13; Gál. 3.17. 41Tsë wata cumpliyanqan junaqmi Teyta Dios kuyanqan nunakuna trïbunpa trïbunpa Egiptupita yarqayämurqan. 42Tsë paqasmi Israel nunakunata Teyta Dios yanaparqan Egiptupita yarqayämunanpaq. Cada watam tsë yarquyanqan junaq tikramuptin llapan Israel nunakuna Teyta Diosta waraqninpi adorayanqa. Israel nunakunaqa imëpis tsënömi rurayanqa.
Pascua fiestata imanö rurayänanpaq käyitsinqan
43Tsëpitanam Moiséstawan Aarónta Teyta Dios nirqan: <<Kënömi Pascua fiestata rurayanki. Pascuapaq pishtayanqëki wätapa ëtsanta forastëru nunaqa ama mikutsuntsu. 44Sirwiyäshunëkipaq rantiyanqëki nunakunaqa mikuyanqam señalakushqana kar. 45Ama mikutsuntsu forastëru nuna ni uryapakuq nunaqa. 46Tsë ëtsataqa wayillachö mikuyanki. Wayipita juk lädumanqa ama jorquyankitsu ni tulluntapis pakiyankitsu.#Núm. 9.12; Juan 19.36. 47Israel nunakunaqa llapanpis tsënölla rurayätsun.
48<<Mëqanpis forastëru nunakuna qamkunawan tärar Pascua fiestachö mikïta munarqa wayinchö kaq ollqukuna llapan señalakuyätsun. Señalakurqa pëkunapis Israel nunanöna karmi Pascua mikïta mikuyanqa. Manaraq señalakurqa manam pipis tsë wätapa ëtsanta mikunqatsu. 49Qamkunachö täraq forastëru nunakuna señalakuyanqannölla Pascua mikïta mikuyänanpaq jinan nacionchö yurikuqkunapis señalakuyätsun>>.#Núm. 9.14.
50Tsënam Israel nunakuna llapanta rurayarqan Moiséstawan Aarónta Teyta Dios ninqannölla. 51Tsë junaqllam Egiptupita Israel nunakunata tröpa tröpa Teyta Dios jorqamurqan.
Právě zvoleno:
Éxodo 12: qwhB
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2018, Wycliffe Bible Translators, Inc. All rights reserved.