Hechos 24
24
Félixpa nöpanchö Pablo parlanqan
1Tsëpita pitsqa junaqtanam juk ishkë precisaq Israel nunakunata y Tértulo shutiyuq abogäduta pushashqa sumo sacerdöti Ananías Cesareaman chäriyarqan. Pablupa contran parlayänanpaqmi Félixpa despächunman ëwayarqan. 2Despächuman Pabluta chäratsiyaptinnam Tértulo kënö nirqan: <<Tëta Félix, qam alli mandakuq kaptikim noqakuna alli kawayä. Tsënöllam shumaq käyikur kë nacionchö alli kaqkunata ruratsirqunki. 3Tsëta rikarmi jinantinchö kushishqa payllä nilläyaq.
4<<Tiempïkita alläpa mana perdishllapa rätulla wiyaramänëkipaq rowakushqëki. 5Kë prësu apayämushqan nunaqa muyakuq qeshyanömi këkan. Pëqa Nazareno sectapa mandakuqnin karmi jinantinchö Israel nunakunata chikinakëkätsin. 6Jerusalénchö templutapis manakaqmanmi churëta munashqa. Tsëmi prësu tsarir [leynïkuna nishqannö arreglëta munayarqü. 7Prësurëkätsiyaptïmi Lisias chëkamur maqayämar qochiyämashqa. 8Tsëpitam niyämashqa qampa nöpëkichöraq ima jutsan kashqantapis shimpiyänäpaq kashqanta.] Llapan niyanqäkuna rasun kaq kashqanta musyanëkipaq kanan kikiki tapïkullë>>.
9Tértulo nishqannöllam pëwan këkaq Israel nunakunapis niyarqan.
10Tsëmi parlamunanpaq Félix sëñasta ruraptin Pablo kënö nirqan: <<Teyta Félix, atska watanam kë nacionchö nunakuna quejakuyashqanta arreglarqunki. Tsëmi manakaqkunapita conträ shäriyashqanta mana mantsakushpa willashqëki. 11Teyta Diosta adoraq Jerusalénman chashqä tsëran chunka ishkë junaq. Tapukuptikiqa pïmëpis nishqänöllam willayäshunki. 12Templuchöpis ni sinagögakunachöpis ni markachöpis manam piwanpis liryëkaqtatsu ni pitapis piñëkätsiqtatsu tariyämashqa. 13Tumpayämashqannö llutanta rurashqa kaptïqa kanan mëqanpis shimpiyämätsun.
14<<Diospa Nänin#24.14 Diospa Näninpaq parlarqa Jesucristupa willakïninpaqmi parlëkan. nishqannöllam unë castäkuna adorayashqan Teyta Diosta sirwï. Diospa Nänin juk secta kashqanta pëkuna niyaptinpis Moisés llapan qellqashqan leykunaman y profëtakuna llapan qellqayashqanmanmi creyï. 15Alli nunakunatapis mana alli nunakunatapis Teyta Dios kawaritsimunanpaq kashqanta pëkuna creyiyashqannömi noqapis creyï. 16Tsëmi Teyta Diospa nöpanchö y nunakunapa rikëninchö imëpis allikunallata rurëta munä.
17<<Atska watatam qellëta apar Jerusalénman kutirqü waktsakunata yanapanäpaq y Teyta Diospaq sacrificiuta kayanäpaq. 18Sacrificiukunata sacerdötikunaman templuchö qoykaptïmi [Asia provinciapita shamuq Israel nunakuna] templuchö purificäkushqa këkaqta tariyämashqa. Manam atskaq nunakunatawantsu ni pitapis büllata rurëkätsiqtatsu tariyämashqa.#Hech. 21.17-28. 19Imatapis manakaqkunata rurashqa kaptïqa nöpëkichö shimpiyämänanpaq tsë nunakuna shayämunman karqan. 20Sanedrín juezkunapis manam ima jutsä kashqantapis tariyashqatsu. Tapuptiki kë nunakunapis tsënö kashqantam niyäshunki. 21Tsë autoridäkunapa nöpanchö kënömi nirqä: <Wanushqakunata Teyta Dios kawaritsimunanpaq kashqanta creyiptïmi juzguëkäyämanki>.#Hech. 23.6. Tsë imachi jutsä këkan>>.
22Tsënö nishqanta wiyëkurmi Félix kënö nirqan: <<Comandanti Lisias shamur willamaptinran arreglayashqëki>>.
Félix shumaqmi käyirqan Diospa Näninta qatiraqkuna#24.22 Diospa Näninta qatiraqkunapaq parlarqa Jesucristuman markäkuqkunapaqmi parlëkan. imata creyiyashqantapis.
23Tsëpitanam Pablo täpaq capitanta kënö nirqan: <<Carcelman Pabluta kutitsi. Imanllapis aparkur pipis watukaq shamuptin ama michankitsu>>.
24Tsëpita waräninkunanam Félix warmin Drusilawan despächunman kutirir Pabluta qayatsirqan. Drusilaqa Israel warmim karqan. Pablo chärirmi pëkunata parlaparqan Jesucristuman markäkuyänanpaq. 25Tsënöllam käyitsirqan Dios munashqannö kawayänanpaq, jutsata mana rurayänanpaq y juiciu junaqchö Teyta Dios juzgananpaq kashqantapis. Tsëta wiyëkurmi Félix mantsakar nirqan: <<Llawirashqëkiman kutikïna. Tiempü kashqan höram yapë qayatsimushqëki>>.
26Pakëllapa pagananta munarmi Pabluta atska kuti Félix qayatsir pëwan parlarqan. 27Tsëpita ishkë watatanam Félixpa rantin gobernador kananpaq jukna yëkurirqan. Pëpa shutinmi karqan Porcio Festo. Félix yarqukur alli autoridä kashqanta Israel nunakuna niyänanta munarmi carcelpita Pabluta kacharirqantsu.
Právě zvoleno:
Hechos 24: qwhB
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2018, Wycliffe Bible Translators, Inc. All rights reserved.