Hechos 21
21
Jerusalénman Pablo ëwanqan
1Pëkunapita despidikurirmi Cos islayaq barcuwan ëwayarqä. Waräninnam Rodas islayaq ëwayarqä y tsëpitanam Pátara markayaq chäyarqä. 2Tsëchömi Feniciaman ëwaq barcuta tariyarqä. Tsë barcuwan ëwarmi 3Chipre islata itsuq kaq lädupa pasayarqä. Tsëpita Siria provinciapa ëwarmi Tiro markaman chäyarqä. Tsëchömi barcuwan apayashqan cargankunata jaqiriyarqan.
4Tsëchö discïpulukunata#21.4 Discïpulukunapaq parlarqa Jesucristuman markäkuqkunapaqmi parlëkan. tarïkurmi qanchis junaq pëkunawan quedakuyarqä. Pëkunam Espíritu Santu käyitsiptin Pabluta niyarqan Jerusalénman mana ëwananpaq. 5Tsë markapita ewkuyaptïnam wawqikuna warminkunawan y wamrankunawan lamar kuchunyaq yanaqäyämarqan. Tsëchömi qonqurikur Teyta Diosta llapäkuna mañakuyarqä. 6Tsëpita despidikurirmi barcuman lloqayarqä. Pëkunanam wayinkunapa kutikuyarqan.
7Tiro markapita ewkurnam Tolemaida markayaq chäyarqä. Tsëchö wawqikunawan y panikunawan tinkurirmi pëkunawan juk junaq quedakuyarqä. 8Waränin junaq ewkurnam Cesareaman chärir Teyta Diospa alli willakïninta willakuq Felipipa wayinchö posadakuyarqä. Pëtam Jerusalénchö mikïta qoykunanpaq joqta wawqikunatawan nöpata akrashqa kayarqan.#Hech. 6.5; 8.5. 9Felipipa chusku shipash tsurinkunam Teyta Diospa profetïsankuna kayarqan.
10Tsëchö atska junaqna këkäyaptïmi Judea provinciapita Agabo shutiyuq profëta chämurqan.#Hech. 11.28. 11Noqakuna këkäyashqä kaqman shamurmi Pablupa wachukunta aptarkur makinta y chakintapis pankakurqan. Tsëpitanam nirqan: <<Espíritu Santum kënö nin: <Kënömi kë wachukupa duëñunta Israel nunakuna Jerusalénchö pankarätsiyanqa. Tsëpitam mana Israel nunakunaman qoykuyanqa> >>.
12Tsëta wiyëkurmi llapan wawqikunawan y panikunawan Pabluta rowayarqä Jerusalénman mana ëwananpaq. 13Pablunam niyämarqan: <<¿Imanirtaq waqar llakitsiyämanki? Señor Jesucristupa shutinchö willakushqäpita manam pankaränällapaqtsu listu këkä, sinöqa Jerusalénchö wanunäpaqpis listum këkä>>.
14Imanöpa niyaptïpis Pablo mana cäsuyämaptinmi mastaqa rowayarqänatsu. Tsëpa rantinqa <<Teyta Diospa munënin kaptinqa jina tsënöpis kanqachi>> niyarqä.
15Tsëpitanam Jerusalénman ëwayänäpaq alistakuyarqä. 16Cesareachö täraq wakin discïpulukunam yanaqäyämar Mnasónpa wayinman pushayämarqan. Mnasónqa karqan Chipripitam. Pëqa unëpitanam Jesúspa discïpulun karqan. Pëpa wayinchönam posadakuyarqä.
Santiaguta Pablo watukanqan
17Jerusalénman chäriyaptïnam wawqikuna y panikuna kushishqa chaskiyämarqan. 18Waränin junaq Santiaguta watukaq Pabluwan ëwarmi anciänukunatapis ëllukashqa këkäyaqta tariyarqä. 19Pëkunata naparirmi Pablo willaparqan mana Israel nunakuna kaqchö willakuptin Teyta Dios imata rurashqantapis.#21.19 Tsënö willaparmi Pablo käyitsirqan Jesucristuta chaskikuyänanpaq mana Israel nunakunata Teyta Dios käyitsishqanta, nunakunata kachakätsishqanta y supëkunata qarqushqantapis.
20Tsëta musyarirmi Teyta Diosta kushishqa payllä nikuyarqan. Tsëpitanam Pabluta kënö niyarqan: <<Wawqi Pablo, musyankim waranqapayan Israel nunakunapis Jesucristuman markäkïkäyashqanta. Pëkunam llapanpis nikäyan Moisés qellqashqan leykunata cäsukunantsikpaq kashqanta. 21Pëkunatam nunakuna kënö nikäyan: <Pabluqa mana reqishqa markachö täraq Israel mayintsikkunatam yachëkätsin Moiséspa leyninkunata mana cumpliyänanpaq. Manam munantsu wamrankunata señalatsiyänanta ni costumbrintsikkunata cumpliyänantapis>. 22Kanan ¿imatataq rurashun? Chämushqëkita musyarmi [atskaq nunakuna ëllukäyanqa].
23<<Kanan niyashqëki imata ruranëkipaqpis. Këchömi chuskuq nunakuna Teyta Diosta äniyashqanta cumplikäyan. 24Tsë nunakunawan templuman ëwar purificäkuyë. Aqtsankunata rutukuyänanpaq gastunkuna alistë.#Núm. 6.13-21. Tsënöpam llapanpis käyiyanqa contrëki parlaqkuna manakaqkunata parlëkäyashqanta. Tsënöllam tantiyayanqa qampis Moisés qellqashqan leykunata cumplikashqëkita.
25<<Jesucristuman markäkuq mana Israel nunakunamanqa unënam cartakurquntsik. Tsë cartachömi nirquntsik [tsë leykunata mana cumplirpis] ïdulukunapa shutinchö pishtayashqan ëtsata, wätapa yawarninta y jurkakëpa wanushqa wätakunapa ëtsanta mana mikuyänanpaq y fornicación jutsata mana rurayänanpaq>>.#Hech. 15.29.
26Tsëmi willanakuyashqannölla waränin qoya tsë chuskun wawqikunawan Pablo ëwarqan. Waqtachö purificäkurirmi templuman yëkur sacerdötikunata willarqan ofrendankunata churar Teyta Diosta änishqanta imë cumpliyänanpaq kashqantapis.
Pabluta prësu tsariyanqan
27Qanchis junaqta cumplikäyaptinnam Asia provinciapita shamuq Israel nunakuna rikäyarqan templuchö Pablo këkaqta. Tsëmi Pabluta tsarïkur 28qaparir qayarir niyarqan: <<¡Israel mayikuna, yanapayämë! ¡Kë nunam mëtsë markakunapa purin contrantsik parlar! ¡Tsënömi llutanta yachatsikur leynintsikta y templuntsiktapis manakaqpaq churëkan! ¡Sagrädu templuntsikta mana respetarmi mana Israel nunakunata yëkatsimushqa!#Eze. 44.7-9.>>
29(Tsënö niyarqan Trófimuta y Pabluta cällichö purikäyaqta rikäyashqa karmi. Trófimuqa Éfeso markapita mana Israel nunam karqan.)#Hech. 20.4.
30Tsënö niyaptinmi llapan nunakuna alläpa piñar raslla shamur Pabluta qarachëpa waqta patiuman jorqurir templupa ruri patiun punkunkunata wichqarkuyarqan. 31Tsëchömi Pabluta wanutsita munar maqayarqan. Roma soldädukunapa comandantin tsëta musyëkurmi 32capitankunata y soldädukunata pusharkur ëqillapa ëwayarqan Pabluta maqëkäyashqan kaqman. Soldädunkunawan comandanti chëkäyaqta rikärirmi Pabluta jaqirïkuyarqan. 33Comandantinam Pabluta prësutsir ishkë cadënawan watatsirqan. Tsëpitanam nunakunata tapurqan: <<¿Pitaq kë nuna? ¿Imatataq rurashqa?>> nir.
34Juknöpa juknöpa parlar büllakurkuyaptinmi ima pasashqantapis mana musyar Pabluta cuartelman apatsirqan. 35Qepanpa ëwar nunakuna maqëta munayaptinmi grädaman chëkatsir soldädukuna Pabluta wantïpa cuartelman witsätsiyarqan. 36Pëkunatam atskaq nunakuna qatir <<¡wanutsun!>> niyarqan.
Nunakunapa nöpanchö Pablo willakunqan
37Cuartelman yëkatsiyänanpaq këkaptinnam comandantita Pablo kënö nirqan: <<Tëtë, ¿parlakaramümanku?>>
Niptinmi Pabluta kënö nirqan: <<¿Griego parlëta yachankiku? 38Qamqa ¿manaku Egipto nuna kanki? ¿Manaku qam gobiernupa contran shäriq kanki? ¿Manaku chusku waranqa (4,000) wanutsikuq nunakunata pushashqa chusyaq jirkapa puriq kanki?>>
39Pablunam nirqan: <<Noqaqa Cilicia provinciapa capitalnin Tarso markachö yurikuq Israel nunam kä. Israel mayïkunawan parlarinäpaq rowakullashqëki, tëtë>>.
40Tsënö rowakuptinmi comandanti änirqan. Tsëmi grädachö shëkur nunakuna upälläriyänanpaq Pablo makinwan sëñasta rurarqan. Llapanpis upälläriyaptinmi hebreo idiömapa parlapar nirqan:
Právě zvoleno:
Hechos 21: qwhB
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2018, Wycliffe Bible Translators, Inc. All rights reserved.