2 Corintios 11
11
Apóstol tukuqkunata mana chaskiyänanpaq ninqan
1Löcu kashqäta conträ nunakuna niyaptinpis mana piñakïllapa wiyayämë. Yapëmi niyaq: Wiyayämë. 2Teyta Diosnömi qamkunapaq alläpa llakikü. Shipash tsurinta manaraq ollqu reqiqta ollquman churëta munashqannömi qamkunatapis Jesucristuman churëta munayaq. 3Alläpam llakikü Evata Satanás engañashqannö#Gén. 3.1-5, 13. qamkunatapis llutan yachatsikuqkuna engañayäshunëkita. Casakunanpaq parlashqan jövinllapaq shipash kashqannömi qamkunapis Jesucristullapaq këkäyanki.
4Tsënö këkaptinqa ¿imanirtaq chaskikäyanki llutan yachatsikuqkuna <<Jesucristupaq, Espíritu Santupaq y Teyta Diospa willakïninpaq manam yachakuyashqëkinötsu këkan>> niyäshuptiki? 5Tsë llutan yachatsikuqkuna <<mas allin kaq apostolmi kayä>> niyäshuptikipis noqam pëkunapitapis mas rasunpa apostolqa këkä. 6Nunakunapa nöpanchö shumaq parlëta mana yacharpis musyämi imapita parlashqätapis. Tsënö karmi Teyta Diospa willakïninta tukïnöpa qamkunata willapäyarquq.
7Teyta Diospa willakïninta mana cobrakushllapa willakur ¿mana allitatsuraq rurarqü? Pagayämänëkipa rantinmi gastükunapaq uryapukurqü. Tsënö uryarqü Jesucristupa willakïninta chaskikur salvakuyänëki rëkurmi. 8Qamkunata sirwiyänaqpaqmi wakin iglesiakuna wanayanqäkunapaq yanapayämashqa. 9Llakikuyänëkita mana munarmi pishipakurpis qamkunata mañayarquqtsu. Tsëpa rantinmi Macedoniapita wawqikuna wanayashqäpaq yanapayämarqan.#Fil. 4.15-18.
Gastükunapaq peqëkikunata mana nanatsishqänöllam kananpis peqëkikunata nanatsishaqtsu. 10Teyta Dios musyanmi rasun kaqllata nikashqäta. Jesucristupa alli willakïninta mana cobrashllapa willakunäpaq manam Acaya provinciachö pipis michämanqatsu. 11Gastükunapaq yanapayämänëkita mana munaptï itsa qamkunata manakaqpaq churayashqaqta yarpäyanki. ¡Manam tsënötsu! ¡Teyta Dios musyanmi qamkunata kuyayashqaqta!
12Kuyayarnikipis Teyta Diospa willakïninta willakur gastükunapaq manam imëpis mañakuyashqëkitsu. Tsënöpam tsë llutan yachatsikuqkuna noqakunanö apóstol kayashqanta yarpäyanqatsu.
13Pëkunaqa manam Jesucristupa apostolnintsu kayan, sinöqa apóstol tukurmi nunakunata engañar purikäyan. 14Tsënö puriyashqan manam espantakïpaqtsu këkan. Kikin Satanáspis alli ángel tukurmi purin. 15Alli ángel tukur Satanás purishqannömi pëkunapis Satanáspa sirwiqninkuna kar Diospa sirwiqnin tukurlla purikäyan. Tsënö kayashqanpitam Teyta Dios juzgar castiganqa.
Pablo imanö jipanqan
16Yapëmi niyaq: Löcu kashqäta ama pipis yarpätsuntsu. Tsënö kaptinpis löcunö ichiklla alabakushqäta kanan mä wiyarayämë. 17Señor Jesucristo tsënö mana alabakuptinpis käyikuyänëkipaqmi löcunö alabakushaq. 18Llutan yachatsikuqkuna alabakïkäyaptinqa ¿imanirtaq noqapis alabakümantsu?
19Qamkuna alli yachaq kayashqëkita nikarqa ¿imanirtaq llutan yachatsikuqkuna alabakur niyäshushqëkita kushishqa chaskikäyanki? 20Qamkunaqa wiyaräkuyankim munayashqanta ruratsiyäshuptikipis, qellënikikunata ushapäyäshuptikipis, engañayäshuptikipis, manakaqpaq churayäshuptikipis y laqyayäshuptikipis. 21Tsënöllam nikäyan pëkunanö mana kar poderninnaqlla kashqäta. ¡Achyä, pëkunanö mana karqa penqakümanchi!
Pëkuna alabakuyashqannöllam noqapis alabaküman. Tsënö kaptinpis pëkunanö alabakurqa löcunömi parläman. 22Pëkuna hebreo casta kayashqannöllam noqapis hebreo casta kä. Pëkuna Israel nuna kayashqannöllam noqapis Israel nuna kä. Pëkuna Abrahampa castan kayashqannöllam noqapis Abrahampa castan kä. 23Pëkuna Jesucristupa sirwiqnin kayashqanta niyaptinpis noqaqa masran Jesucristuta sirwï. (Kënö parlarmi löcunö parlëkä.) Jinantinchömi pëkunapita mas willakurqü. Willakushqäpitam carcelchöpis mas atska kuti wichqararqü.#Hech. 16.23. Autoridäkunapis yapëkuryanmi astayämashqa. Atska kutim conträkunapis wanutsiyämëta munayashqa.
24Israel nunakunapa autoridäninkunam pitsqa kuti kima chunka isqun (39) kuti astayämashqa.#Deut. 25.3. 25Kima kutim Roma soldädukuna alläpa wilukïkayämashqa.#Hech. 16.22. Juk kutim nunakuna tsampir ichikllapa wanuratsiyämashqatsu.#Hech. 14.19. Kima kutim ëwëkäyashqä barcupis hundikarqan. Juk paqas juk junaqmi qerullä waqukushqa lamarchö kaskarqä. 26Diospa willakïninta willakurmi mëtsëpapis purirqü. Atska kutim mayupis ichikllapa apamashqatsu. Suwakunapa makinpitapis safarqämi. Israel nunakunapis#Hech. 9.23. y mana Israel nunakunapis wanutsitam munayämashqa.#Hech. 14.5. Markachöpis, chusyaqchöpis y lamarchöpis ichikllapam wanurqütsu. Jesucristuman janan shonqulla markäkuqkunapis wanutsimëtam munayashqa.
27Mëman chärirpis sasa uryëkunachömi uryarqü. Atska kutim yarpakachar punïtapis tarirqütsu. Mallaqarmi yakunarmi purirqü. Ratashnï mana kaptinmi alalätsikurqü. 28Tsë jananmanpis waran waranmi mëchö tsëchö këkaq wawqikunapaq y panikunapaq yarpakachëkä. 29Juk wawqi o juk pani jipaptinqa alläpam llakikü. Pitapis jutsata ruratsiptinqa jutsata ruratsiq nunapaq alläpam piñakü.
30Alabakunäta munayaptikiqa poderninnaq kashqäpitam alabakushaq. 31Señor Jesucristupa Teytan Diosmi musyan rasun kaqllata parlëkashqäta. Pë imëpis alabashqa këkullätsun. 32Damascuchömi rey Aretaspa gobernadornin soldädukunata churarqan marka punkupa yarquptï prësu tsariyämänanpaq. 33Tsëmi wawqikuna canastaman winarkamar marka tumariq perqa jananpa urätsiyämarqan. Tsënöpam Teyta Dios yanapamarqan safanäpaq.#Hech. 9.23-25.
Právě zvoleno:
2 Corintios 11: qwhB
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2018, Wycliffe Bible Translators, Inc. All rights reserved.