2 Corintios 10
10
Pablo defendikunqan
1Jesucristo ankupëkäyäshunqëki rëkurmi noqa Pablo rowayaq.#10.1 Pablo imata rowakushqanta musyanëkipaq leyinki versïculu 2. Wakinnikish manakaqpaq churayämar nikäyanki: <<Noqantsikchö Pablo karninqa mantsa mantsallam parlapämantsik. Juk lädu markachö karqa wäpïpam cartakamun>>.
2Tsënöllash wakinniki nikäyanki Diosta mana cäsuq nunanölla kashqäta. Tsëmi rowayaq conträ mana parlayänëkipaq. Tsënölla conträ parlayaptikiqa shamurmi piñapakacharkuyashqëki.
3Nuna karpis manam nunanötsu guërrata rurayä.#10.3 Guërrata rurayänanpaq parlarqa Satanásta y llutan yachatsikuqkunata pärapuyänanpaq kashqanpitam parlëkan. 4Noqakunapa armäkunaqa manam nunakuna inshiyashqan armakunatsu, sinöqa Teyta Dios churamushqan armakunam.#10.4 Tsë armakuna këkan Diospa palabranmi (Rom. 1.16; 1Cor. 1.18; Efe. 6.17), Dios munashqannö kawashqantsikmi (2Cor. 6.6-7) y Espíritu Santuwan Teyta Dios yanapamashqantsikmi (2Cor. 3.18). Tsë armakunawanmi contrankunata ushakätsiq soldädunö këkä. 5Tsënöpam nunakuna yachaq tukur Teyta Diospa willakïninta mana chaskikuyänëkipaq ima atäjuta churayämuptinpis käyitsiyaq Jesucristuta cäsukuyänëkipaq y yarpäyashqëkikunapis pë munashqannö kananpaq. 6Tsëmi noqaman qaqäyaptikiqa shamur qamkunachö këkaq conträ parlaqkunata piñapäshaq.
7Shumaq käyikuyë imanö këkäyashqëkitapis. Mëqëkipis rasunpa Jesucristupa willakuqnin karqa käyikuyankimanmi noqakunapis pëpa willapäkuqnin kayashqäta. 8Willakuqnin kanäpaq Teyta Dios churamashqa kaptinmi#Hech. 22.21. willapäyänaqpaq poderyuq këkä. Willapäyarnikipis manam manakaqpaq churayänaqpaqtsu willapäyaq, sinöqa qamkunata kallpatsayarniki alli yachatsiyänaqpaqmi. Poderyuq kashqäpita alläpa alabakushqäta wakinkuna niyaptinpis manam penqakushaqtsu.
9Tsëmi yarpäyankimantsu mantsakätsita munarlla cartakamushqäta. 10Wakinkunash conträ shärir kënö niyan: <<Pabluqa cartallachömi mantsaripaq piñapämantsik. Kikin këchö karqa manam shumaq parlëtapis puëdintsu>>.
11Tsënö niqkuna shumaq käyikuyätsun: Cartäkunachö nishqänöllam qamkuna kaqman chëkamurpis piñapäyashqëki.
12Tsë alli tukur alabakuqkunanöqa kayämanraqku. Pëkunaqa kikinkunapa favornin parlarmi upanö këkäyan. 13Tsënöllam alabakuyan Teyta Dios mana kachashqan kaqman chärir willakuyashqanpita. Noqakunaqa manam pëkunanötsu kayä, sinöqa Teyta Dios kachayämashqan kaqllachömi willakuyä. Tsëkunallachö willakurmi qamkuna kaqmanpis chëkamur willakuyarqü.#Gál. 2.7-9.
14Musyayashqëkinöpis wakinkunapita mas puntatam qamkunata Jesucristupa willakïninta willapäyarquq. Qamkunaman puntata mana chämushqa karqa willapäyänaqpaq manam puëdiqtsu kayäman. 15Juk nuna willakushqanchö willakuyashqäpita alabakuyänäpa rantin juk markaman ëwar wakin mana Israel nunakunatapis willapëtam munëkäyä. Tsënö munarpis Teyta Diosman shumaq markäkuyänëkipaq käyitsiyashqaqta chaskikuyaptikiran juk läduchöpis willakuyäshaq.
16Tsëmi juk markakunamanpis ëwar pipis manaraq willakuyashqanchö willakuyäshaq. Tsënöpam jukkuna willakuyashqankunamanqa yakakar alabakuyäshaqtsu <<noqakunam pëkunata alli willakïta willapäyarqü>> nir.
17Teyta Diospa palabranmi nin: <<Pipis alabakunanpa rantinqa Teyta Diosta alabatsun>>.#Jer. 9.24.
18Alabakuqkunataqa pipis manam alliqa rikantsu, sinöqa Teyta Dios alli rikashqan kaqtam alli rikäyan.
Právě zvoleno:
2 Corintios 10: qwhB
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2018, Wycliffe Bible Translators, Inc. All rights reserved.