Génesis 40
40
Ishkay runakuna sueñuyashqanta José tantiyasishqan
1Saypitanami vïnu ruraqkunapa y tanta ruraqkunapa mandaqninkuna lutanta rurar 2Egipto nacionpa mandaqnin rey Faraónta fiyupa rabyanäsiyarqan. 3Saymi paykunata prësu apasirqan wardiakunapa capitanninpa wayincho kaykaq carcilman. Say carcilchömi Josépis wichqaraykarqan. 4Paykunatami wardiakunapa capitanninqa Josépa makinman churarqan. Say ishkay runakunami aska killa carcilcho wichqaräyarqan.
5Juk sakaymi vïnu ruraqkunapa y tanta ruraqkunapa mandaqninkuna sueñuyarqan imapis päsananpaq kashqanta. 6Paykunata watukaq tutala José aywarmi pasaypa lakish kaykäyaqta tarirqan. 7Saymi tapurqan: <<¿Imanirtaq pasaypa lakish kaykäyanki?>> nir.
8Saymi niyarqan: <<Mana alitami sueñuyashkä. Manami pipis kansu sueñuyashqä imapaq kashqantapis tantiyasiyämänanpaq>>.
Sayno niyaptinmi José nirqan: <<Say sueñuyashqayki imapaq kashqantapis Tayta Dioslami tantiyasimäshun. Sueñuyashqaykita mä wilayämay>>.
9Sayno niptinmi vïnu ruraqkunapa mandaqnin wilar nirqan: <<Sueñuynïchömi rikashkä juk üva jacha 10kimsa rämayuq kaykaqta. Say rämakunami chinkimur tuktuyashpan poquraykaq üvakunaman tikrayash. 11Say poqush üvata Faraónpa väsunta aptaraykashqäman qapirkurmi Faraónta makyaykashkä>>.
12Sayno wilaptinmi José nirqan: <<Sueñuynikicho kimsa rämakunata rikashqaykiqa kimsa junaqmi kaykan. 13Kananpita kimsa junaqtami kay carcilpita Faraón jorqushushpayki puntata arushqaykiman kutisishunki. Saymi väsuwan vïnuta yapay sirvinki. 14Nishqänöla arushqaykiman kutiykur noqatapis yarparkalämanki ari. Kuyapämashpayki tayta Faraónta ruwakuykulanki kaypita jorqaykamänanpaq. 15Hebreo runakuna täyashqanpitami liyarkur kay markaman apayämash. Jusaynaq kaykarmi kaycho wichqaraykä>>.
16Alipaq sueñushqanta wilaptinmi tanta ruraqkunapa mandaqninpis Joséta wilapar nirqan: <<Sueñuynïchömi kimsa taksha canastakunawan janay janay umächo tantakunata puriykäsishkä. 17Janan kaq canastachömi tukuy niraq böllukuna Faraón mikunanpaq kash. Say böllukunatami pishqukuna shamur mikukurkuyash>>.
18Sayno wilaptinmi paytapis José nirqan: <<Sueñuynikicho kimsa taksha canastakunata rikashqayki kimsa junaqmi kaykan. 19Kananpita kimsa junaqtami umaykita roqurasir qeruman Faraón warkusishuptiki ayaykita wiskurkuna mikuyanqa>>.
20Saypita kimsa junaqtami Faraónpa diyan karqan. Saymi Faraón mandäsiqnin runakunawan fiestata rurar mikur y upur qoyäyarqan. Say junaqmi carcilpita jorqasimurqan tanta ruraqkunapa y vïnu ruraqkunapa mandaqninkunata. 21Nirkurmi vïnu ruraqkunapa mandaqninta yapay churarqan nawpata arushqanman. Saymi payqa väsuwan vïnuta Faraónta yapay makyarqan. 22Tanta ruraqkunapa mandaqnintami isanqa José wilashqannöla wanuskasir ayanta qeruman warkusirqan. 23Vïnu ruraqkunapa mandaqninqa José ruwakushqanta manami yarparqansu.
Právě zvoleno:
Génesis 40: qvhB
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2003, Wycliffe Bible Translators, Inc. All rights reserved.