Génesis 33
33
Jacob wawqin Esaúwan tinkushqan
1Chusku pachak (400) runakunawan Esaú yaykuykaqta rikarmi surinkunata Jacob rakirqan wakinta Leawan aywayänanpaq, wakinta Raquelwan aywayänanpaq, wakinta Bilhawan aywayänanpaq y wakintana Zilpawan aywayänanpaq. 2Puntata aywayänanpaqmi ashmaynin kaq ishkan warminkunata wawankunatawan churarqan. Paykunapa qepanta aywayänanpaqmi Leata wawantinta churarqan. Saypita mas qepanta aywayänanpaqnami Raquelta wawan Josétawan churarqan. 3Nirkurnami Jacob paykunapa puntanman churakarkur aywarqan. Wawqinwan tinkushqanyaqmi qanchis kuti qonqurpakuraykar aywarqan. 4Sayno aywaykaptinmi wawqin Esaú cörrir makalakurkur musarqan. Saychömi ishkan wamayänakushpan waqayarqan.
5Warmikunatawan wamrakunata rikärirmi Esaú tapurqan: <<¿Pitaq paykunaqa?>> nir.
Sayno tapuptinmi Jacob nirqan: <<Tayta Dios qomashqan wamräkunami kaykäyan, papä>>.
6Saypitanami Jacobpa ashmaynin kaq ishkan warminkuna wawankunawan nawpanman aywayarqan. Paykunapis Esaúta respitayashpanmi urkunkunatapis pasaman töpasiypa qonqurpakuyarqan. 7Saynölami Leapis chaykur wawankunawan Esaúpa puntanman qonqurpakuyarqan. Saypitanami Raquelpis chaykur wawan Joséwan Esaúpa puntanman qonqurpakuyarqan.
8Saypitanami Esaú nirqan: <<¿Imanirtaq punta punta rakiykur uywaykikunata qatiykäsimunki, wawqi?>>
Sayno niptinmi Jacob nirqan: <<Walkalatapis qampaqmi qatisimushkä, papä>>.
9Saymi Esaú nirqan: <<Wawqi, noqapapis askami uywäkuna kaykäyan. Qaramänaykipaq qatisimushqayki kikikipaq kakusun>>.
10Sayno niptinnami Jacob nirqan: <<Qaranäpaq apamushqä uywakunata chaskiykalämay, papä. Chaskimaptikimi musyashaq ali shonquykiwan chaskimashqaykita. Ali chaskimashqaykipita Tayta Diosta rikaykuqnöraqmi kushish kaykä. 11Qampaq apamushqä uywakunata chaskiykalämay, ari. Tayta Dios yanapämaptinmi rïcuyashkä>>.
Jacob sayno yaparir yaparir ruwakuptinmi Esaú chaskirqan qarashqan uywakunata.
12Chaskirkurnami Esaú nirqan: <<Aywakushunna. Noqa aywashaq qamkunapa puntaykita>>.
13Saymi Jacob nirqan: <<Rikashqaykinöpis wamräkuna pishilaraqmi y uywäkunapis wawayuqmi kaykäyan. Juk junaqlacho chaypa qatiptïqa uyshäkuna cabräkuna capazchi utikar wanuykuyanmanpis. 14Mejor puntakuy, papä. Uywäkuna wamräkuna japayashlanmanmi shamushaq. Tashqayki Seirmanmi chäyämushaq>>.
15Sayno niptinmi Esaúpis nirqan: <<Sayno kaptinqa wakin pushamushqä runakunata kachapäshayki yanapäyäshunaykipaq>>.
Saymi Jacob nirqan: <<Ama afanakuysu, papä. Ali chaskimashqaykilawanmi kushish kaykä>>.
16Saymi Esaú say junaqla Seirman kutikurqan. 17Jacobnami aywakurqan Sucotman. Saychönami täyänanpaq wayita rurar uywankunapaqpis ramädakunata rurarqan. Saymi say partita jutisirqan Sucot#33.17 Sucot ninanqa ramäda ninanmi. jutin kananpaq.
18Saynöpami Padan-arampita kutimur Canaánman jawkala chäyarqan. Siquem marka wak simpanman chaykurmi posädakuyarqan. 19Say posädakuyashqan partitami Jacob rantirqan pachak (100) qellaywan Hamor runapa surinkunapita. Hamorpa jukaq surinpa jutinmi karqan Siquem.#Jos. 24.32; Juan 4.5. 20Saychömi altarta Jacob perqaykur jutisirqan El-Elohe-Israel#33.20 El-Elohe-Israel ninanqa Tayta Dios Israelpa Diosninmi kaykan ninanmi. jutin kananpaq.
Právě zvoleno:
Génesis 33: qvhB
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
© 2003, Wycliffe Bible Translators, Inc. All rights reserved.