Eksodas 36
36
1“Besalel an Oholiab, wetem olketa narafala man wea Yawe hemi givim save an waes long olketa fo wakem olketa samting long Tambu Haostent blong hem, olketa ya mas wakem evrisamting barava olsem wea Yawe hemi bin talem.”
Olketa pipol i tekem kam staka samting moa
2Mosis hemi kolem kam Besalel an Oholiab, wetem olketa narafala man wea Yawe bin givim save long olketa fo duim olketa waka, an hu i wiling fo help. An taem olketa kam tugeta, hemi talem olketa fo statem waka ya. 3An Mosis hemi givim long olketa evrisamting wea olketa pipol blong Israel bin givim long hem fo wakem Tambu Haostent ya. Evri moning, olketa pipol hu i laek fo mekem ofaring go long Yawe, olketa gohed fo tekem kam plande samting moa. 4So evri man hu hemi save duim waka long Tambu Haostent ya i lusim waka fo go lukim Mosis. 5Oraet, olketa tok olsem long hem, “Olketa pipol i gohed fo givim plande samting tumas nao. Yumi garem plande samting finis winim wanem yumi nidim fo finisim olketa waka wea Yawe hemi talem yumi mas duim.”
6So Mosis hemi sendem toktok goraon long olketa pipol, fo no givim moa olketa samting fo wakem Tambu Haostent ya. Den olketa pipol i no tekem kam enisamting moa. 7Olketa samting wea olketa givim finis i plande tumas nao winim wanem olketa nidim fo finisim waka ya.
Waka long Tambu Haostent blong Yawe
(Eksodas 26:1-37)
8Nao from olketa wakaman, evri man hu hemi save duim, olketa wakem Tambu Haostent ya. Olketa ya wakem hem long tenfala pis nambawan waet kaleko an olketa bin yusim blu koton, an papol koton, an red koton fo somap samfala piksa blong olketa enjel long olketa pis kaleko ya. 9Olketa makem tenfala pis kaleko ya long sem saes, wea longfala blong olketa evriwan i kasem 12 mita 60 sentemita, an waed blong olketa evriwan i kasem 180 sentemita. 10Olketa tekem faefala long olketa pis kaleko ya an somap tugeta fo mekem wanfala bikfala kaleko, an olketa duim semsamting long olketa narafala faefala pis kaleko ya. 11An olketa mekem olketa ring long blu kaleko an putum long en blong tufala bikfala kaleko ya. 12Hemi garem fiftifala ring long wanfala bikfala kaleko ya, an fiftifala ring moa long narafala bikfala kaleko. 13Olketa wakem fiftifala huk long gol fo joenem tufala bikfala kaleko ya, mekem tufala ya i olsem wanfala nomoa fo disfala haostent.
14Nao olketa mekem levenfala pis kaleko moa long hea blong nanigot fo kavarem disfala Tambu Haostent. 15Levenfala pis kaleko ya evriwan i wanfala saes nomoa, wea longfala blong olketa evriwan hemi kasem 13 mita 50 sentemita, an waed blong olketa evriwan hemi kasem 180 sentemita. 16Olketa somapem faefala pis kaleko tugeta long wanfala bikfala kaleko, an olketa duim semsamting long olketa narafala siksfala pis kaleko ya tu. 17Olketa somapem fiftifala ring long kaleko an putum long en blong tufala bikfala kaleko ya. 18Olketa wakem fiftifala huk long bras fo joenem tufala bikfala kaleko ya, mekem tufala i olsem wanfala nomoa fo disfala haostent. 19Olketa somapem tufala bikfala samting fo kavarem antap long haostent ya. Wanfala, olketa wakem long skin blong man sipsip wea hemi red, an narawan, olketa wakem long skin blong jiukong.
20An olketa yusim timba blong akesia tri fo wakem olketa frem long wol blong Tambu Haostent ya. 21Longfala blong evri pos blong olketa frem ya i kasem 450 sentemita. An longfala blong evri reil long en blong olketa frem ya i kasem 67 sentemita. 22An long en blong olketa frem ya long daon, evriwan i garem tufala pis timba fo godaon insaet long olketa spesol botom blong olketa. Olketa wakem evri frem blong haostent ya long disfala sem wei nomoa. 23Olketa wakem tuentifala frem olsem fo putum long saot saet blong haostent ya. 24An olketa wakem fotifala botom long silva mekem olketa frem ya i stanap long hem. Evri frem hemi garem tufala botom long hem, mekem tufala pis timba ya long en blong frem hemi go insaet long tufala botom. 25An olketa wakem tuentifala frem moa fo putum long not saet long haostent ya, 26an olketa mekem fotifala botom long silva mekem olketa frem ya i stanap long hem. 27Den olketa wakem siksfala frem moa fo putum long west saet blong haostent ya. 28Olketa wakem tufala narafala frem fo stap long tufala kona long bihaen. 29Tufala frem long kona i joen gudfala, stat long botom go-go kasem gol ring antap long frem ya. An olketa wakem tufala kona frem ya long disfala sem wei nao. 30So, olketa bin wakem eitfala frem ya olsem, an wakem sikstinfala botom long silva mekem olketa frem ya i stanap long hem.
31An olketa wakem fiftinfala longfala pis timba long akesia tri fo go akros long olketa frem ya. Faefala long olketa longfala pis timba ya i fo holemstrong olketa frem long wol long wanfala saet blong haostent ya, 32an faefala fo holemstrong olketa frem long wol long narasaet blong hem, an faefala fo holemstrong olketa frem long wol bihaen long hem. 33Nao olketa longfala pis timba long midol long olketa frem, i stat long wanfala en blong wol go-go kasem narafala en fo holemstrong wol ya. 34Olketa bin kavarem olketa timba frem long gol. An olketa putum olketa ring long gol long olketa frem fo holem olketa longfala pis timba ya. An olketa kavarem olketa longfala pis timba long gol tu.
35Olketa somap wanfala bikfala kaleko moa. Olketa man hu i save duim, olketa tekem nambawan waet kaleko, an blu koton, an papol koton, an red koton, den olketa somap olketa piksa blong olketa enjel long bikfala kaleko ya. 36An olketa wakem fofala pos long timba blong akesia tri, an kavarem olketa pos ya long gol. An olketa wakem fofala spesol botom fo olketa pos ya long silva, an olketa botom i barava fitim gudfala olketa pos ya. Olketa wakem tu olketa huk long gol, fo putum antap long olketa pos ya fo hangem bikfala kaleko ya long olketa.
37Olketa wakem wanfala bikfala kaleko moa long barava nambawan waet kaleko, an olketa somap olketa piksa long hem, long blu koton, an papol koton, an red koton. Disfala bikfala kaleko nao hemi fo satem frant blong haostent ya. 38Olketa wakem faefala pos, an olketa putum olketa huk antap long olketa fo hangem disfala bikfala kaleko ya. An olketa kavaremap olketa pos ya wetem olketa strap blong olketa long gol, an olketa wakem tu faefala spesol botom long bras fo olketa pos ya.
Právě zvoleno:
Eksodas 36: SIPB
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Pijin Catholic Bible © Bible Society of the South Pacific, 2008.