1 Makabisi 9
9
Judasi Makabisi mbwakafwa munkondo
1Demetiliyasi ndyaakanyumfwa ayi Nikano abeshilumamba bakwe bakacaikwa munkondo, wakatuma Bakidesi alimwi aAlikumusi kuJuda pantu pomwi a cipaansha ca likoto lya beshilumamba bacishi kulwana. 2Bakeenda nshila iinda kuGalili, akuyaka misumba yabo yankondo kuMesaloti mucishi caAlibela. Bakabwesa ndabala iyo, akucaya bantu baanji. 3Mumweenshi utashi wa mwaaka wa 152, bakayaka misumba yabo yankondo pafwaafwi aku Jelusalemu. 4Kuswa kooko bakaya kuBeleya pantu pomwi abeshilumamba beshikulwanina paanshi 20,000 abaabo beshikutanta maaki 2,000. 5Paciindi ico ceenka Judasi lakwe wakayaka misumba yakwe yankondo kuElasa, kaacite beshilumamba basalitwe 3,000. 6Ndibakabona kufula kwabalwanibabo, beshilumamba bakwe Judasi bakanyumfwa boowa, baanji bakacica cakuyubayuba, cakwaamba ayi wakacaala abali 800. 7Judasi wakatyoompolwa ndyaakabona ayi beshilumamba bakwe bamwi bakacica. Nkondo yakalinga pafwaafwi kutalika, alimwi taakalinga kucite ciindi cakubunganya beshilumamba. 8Wakalinga kulefukite, sombi wakaambila abo bakacaala ayi, “Katiya tunyamuke, tukalwanaabo balwanibesu tubone na inga twabakoma.” 9Beshilumamba bakwe bakeelesha kumukasha, bakaamba ayi, “Tatubakonshi. Ciliiwo ono bulya cakwaamba ayi tupulushe buumi bwesu. Tucite kuboola alimwi pantu pomwi abamakwesu balya ayi tulwanaabo, swebo twaceeya.” 10Judasi wakaamba ayi, “Kutacaniki muntu weshi akaambe ayi nebo ndacica kunkondo. Na ciindi cesu cashika, atufwite bamakwesu amoyo utacite boowa, sombi mutasuminishi ayi mpuuwo yesu ibice.” 11Likoto lyabalwani lyakaswa mumisumba yabo yankondo, akusena ayi likumane abaJuda. Beshikutanta maaki bakababika mushipansha shobilo; beshikuwaala mabwe alimwi amifwi kabeendela panembo, pantu pomwi abeshilumamba bayumu myooyo. 12Bakidesi wakalinga alikoto lya kalinga kweendela kulyaansa lyakwe lyalulyo. Beshilumamba bakalinga kuya bweenda mushipansha shabo shobilo akunoolisha mapeenga. 13Alakwe Judasi abantu bakwe bakalisha mapeenga, cishi cakatenkaana ceebo caciyobeyobe ca makoto abeshilumamba abo. Kulwana kwakakomena kutalika macuunsa akuya mukushika macolesha. 14Judasi wakabona ayi likoto litocafwa Bakidesi lili kulyaansa lyakwe lya lulyo, wakabunjika bantu bakwe bacishi kulwana ayi bakale pafwaafwi anguwe. 15Wakakoma likoto lilya lyakalinga kulyaansa lya lulyo. Wakalitandaanya kuya mukushika kuAshidodi. 16Sombi likoto lyabulwani lyakalinga kucipiko ndilyakabona ayi abo bakalinga kululyo bacica, bakasanduluka akutalika kulwana Judasi abantu bakwe kabaya cibatandaanya mwisule lyabo. 17Nkondo yakakomena abuumbi! Lyalo makoto oonse obilo baanji bakayaswa akufwa. 18Judasi alakwe wakafwa, bantu bakwe bakacaala bakacica.
19Jonasani aSimoni bakanyamuna mutuuntu wa mukwababo akumubika mucuumbwe cabashali bakwe kuModeyini. 20Bene Isilaeli bakamulila abuumbi. Bakalila malilo ayo nshiku shiinji. 21Pakulila bakalinga kwaamba ayi,
“Maawe, makani awita mupulushi wa nkusu ulya,
mufuni wabene Isilaeli!”
22Milimo imwi yakwe Judasi, nkondo ashimwi shoonse isho shakacita, kubikaawo shabunene bwakwe, tashikwe kulembwa shoonse sobwe, ceebo shakalinga shiinji abuumbi.
Jonasani mbwakaba mwaami mumusena wakwe Judasi
23Judasi ndyaakafwa, kwakatalika alimwi kuboneka bantu bakakaka kulambila Lesa mucishi cabene Isilaeli, lyalo boonse bamucita shibi bakabonekela patuba. 24Paciindi ceenka ico kwakalinga nsala inene, lyalo bantu bamucishi ico bakacicila kubalwani. 25Ono Bakidesi wakasala bantu bakasha kulambila Lesa, akubika ayi banoolela cishi. 26Balo aba bantu bakatalika kuyandoola babye Judasi. Na babacana bakalinga kubatola kuli Bakidesi, lyalo wakalinga kuboosha cishole alimwi akubapensha abuumbi. 27Aboobo bene muIsilaeli bakaba a boowa. Takuna kubonekaawo mapesho alibobulya kuswabo ciindi balaluki ndyeebakacileka kuboneka muIsilaeli.
28Mpomunyaawo babye Judasi boonse bakabungana kuli Jonasani, lyalo bakamwaambila ayi, 29“Kuswabo ndyaakafwa mukwanu Judasi, taaku muntu umwi ukoshenye aakwe mukulwana nkondo a Bakidesi alimwi boonse bapatene amushobo wesu. 30Ono twakusala webo sunu ayi ube mwaami wesu mumusena wamulobe alimwi ayi unootutanjilila ku nkondo shesu.” 31Bushiku bweenka ubo Jonasani wakasumina mulimo wabutanjilili, wakabwesa musena wakwe Judasi mukwabo.
Jonasani mbwaakalwana aBakidesi
32Bakidesi ndyaakanyumfwa ubo, wakayeeya ayi acaye Jonasani. 33Jonasani amukwabo Simoni abantu boonse bakalinga kubacafwa, bakanyumfwa makani ayo, bakacicila muluyanga lwa Tekowa, akuya mukuyaka misumba ya nkondo pafwaafwi amukalo wa maanshi waku Asifa. 34(Bakidesi wakaanyumfwa, wakaya abeshilumamba bakwe boonse pa bushiku bwa Cibelu kwitala lya Joodani.) 35Jonasani wakatuma mukwabo Joni, uyo wakalinga munene wabeshilumamba, ayi akasenge babye bene Nabate kubalaminaako shintu shabo isho shakalinga shiinji. 36Sombi banabakwe Jambuli bakaswa ku Medeba bakamulwana cakuyubilila. Bakamucata Joni akumunyaya buboni boonse mbwakalinga kucite, akuboolelabo kumishaabo. 37Pesule lyasheeshi, bamwi bantu bakashibisha Jonasani amukwabo Simoni ayi banabakwe Jambuli batoocita cisangalalo cabwiinga, lyalo ndibakaswa ku Nadabati, bakesa anabwiinga alikoto linene lya bantu. Nabwiinga uyo wakalinga mwanaakwe womwi waba cinenenene ba pukite ku Kenani. 38Peenka apo baJuda bakeebaluka lufu lwa mukwababo Joni, lyalo bakatanta kalundu akuyuba mushifwengo. 39Lyalo ndibakabona bantu baanji balinyamute shintu shiinji. Bakabona ashibwiinga, abakwabo alimwi ababye batoosa mukumucinsha kabacite shilwanyo shankondo kumwi kabeemba akulisha ngoma atunkobele. 40Lyalo baJuda bakasokoloka nkobakalinga kuyubite, akubasotokela, batalika kubalwana. Baanji bakacaikwa, abo bakapuluka bakacicila kutulundu. Lyalo baJuda bakabwesa shintu shabo shoonse. 41Aboobo cisangalalo cabwiinga bulya cakaba malilo, nyimbo shabo shakaba shamatongooshi. 42Pakucita sheeshi Jonasani a Simoni bakaboosha cishole ca lufu lwa mukwababo Joni, kuswawaawo bakaboolela ku shinyika shaku Joodani.
43Bakidesi ndyaakanyumfwa boobo, wakaya pabushiku bwacibelu ku Loombe lwa Joodani pantu pomwi a likoto lya beshilumamba. 44Jonasani wakaambila bantu bakwe ayi, “Katiya tunyamuke tukalwane ayi tupulushe buumi bwesu, sunu shintu tashibete mbuli mboshakalinga kale kale. 45Kunembo uku nkobali balwanibesu, akwalo kwisule kuli Mulonga waJoodani. Mumbali lyesu kuli tusamu samu abwisu bushinkite. Takuuwo kwenga twacicila. 46Ono amupaile kuli Lesa ayi amupulushe kubalwani aba.” 47Jonasani bakalinga weelesha kucaya Bakidesi, sombi lakwe wakabensuka akuboolela mwisule. 48Lyalo Jonasani abantu bakwe bakasotokela muJoodani. Bakasubukila kwitala, sombi balwanibabo tabakwe kusubuka ayi babakonkele. 49Bushiku bweenka ubo bantu bakwe Bakidesi bakacaikwa bakashika ndabona 1,000.
50Bakidesi ndyaakaboolela kuJelusalemu, wakatuma bantu ayi bayake muumbu shiyumu alimwi amaanda alaamfu ankondo kundabala shaku Juda mbuli Jeliko, Emausi, Beti Oloni, Betelo, Timunati, Pilatoni, alimwi aku Tefoni. Mumisena yoonse iyi bakayaka muumbu shilaamfu ashisasa alimwi ampingilo. 51Wakabikaako beshikulindilila ayi banoolwana bene Isilaeli. 52Wakayaka amwi muumbu mundabala ya Betisuwa alimwi kuGesa alimwi a caanda cankondo ku Siyoni, wabikaako beshilumamba ashakulya. 53Wakacata baana babantu bapukite ba mucishi umo bakabacata nkole akubacaila mucaanda ca nkondo cilya cakalinga muJelusalemu.
54Mumwaaka wa 153, mumweenshi wabili, Alikumusi mupailishi munene boonse, wakapingula ayi bamwayulule lubumbu lwamukati kaŊanda yakwe Lesa. Pakucita sheeshi wakalinga kusuni ayi anyonyoole milimo yoonse yabalaluki. 55Sombi mulimo uyo ndyoowakatalikabo, ciindi ceenka ico Lesa wakamupensha Alikumusi lyalo milimo iyo yakeemikana. Mibanga yakayuma, shifuwa shakacisa, wakalinga kwaalilwa kwaamba nabi kupa mulasho mu ŋanda yakwe. 56Tapakwe kwiinda ciindi cilaamfu Alikumusi wakafwa ndyaakamana kupenshekwa abuumbi. 57Bakidesi ndyaakabona ayi Alikumusi wafwa, wakaboolela ku mwaami, lyalo mucishi caJuda mwakaba luumuno myaaka yobilo.
Nkondo imwi yakwe Bakidesi
58Ono baJuda bakashuka kulambila Lesa bakapangana akunyumfwana, bakaamba ayi, “Amubone, Jonasani ababye batookala muluumuno tabacite shitoobapensha. Aboobo katiya tumwiite Bakidesi, ese abacate boonse bushiku bomwi.” 59Lyalo bakaya mukupangana aBakidesi makani aya. 60Bakidesi wakanyamuka alikoto linene, lya beshilumamba. Wakatuma makalata abushishi kubabye bekala kuJuda ayi bacate Jonasani ababye. Sombi bakaalilwa kubacata, ceebo bakoonyumfwa muyeeyo mubiibi uyu. 61Peenka apo Jonasani ababye bakacata bantu makumi osanwe babiibi mucishi umo, balya bakatanjilila babyaabo bakesa mukucita cibiibi ico, akubacaya.
62Kuswawaawo Jonasani a Simoni pantu pomwi abantu mbobekalaabo bakaya kuBetibasi muluyanga, akuyaka alimwi maanda aya ngobakalinga bamwayulula, yalo wakayumya muumbu shangawo. 63Bakidesi ndyaakanyumfwa boobo, wakabunganya beshilumamba bakwe boonse, wakeeta abamwi bantu bakuJuda. 64Bakesa mukuyaka misumba yabo ya nkondo kufwaafwi aBakidesi, bakashinguluka ndabala iyo nshiku shiinji a shilwanyo shankondo.
65Sombi Jonasani wakashiya mukwabo Simoni mundabala iyo, wakaya mumaansa alikoto luniinibo lya beshilumamba. 66Kweenka uko wakakoma Odomela abamakwabo alimwi abanabakwe Fasiloni mumisumba yabo. Kuswawaawo wakatalika bashingulukite akubalwana. 67Alakwe Simoni wakaswa mundabala iyo akutenta shilwanyo shabalwanibabo. 68Bantu bobilo aba bakamulwana Bakidesi akumukomenabo limwi. Ono Bakidesi ndyaakabona ayi miyeeyo yakwe pa nkondo iyo teekwe kusebensa, 69wakakalala abuumbi ceebo cabantu balya bakakaka kulambila kwabo, abo bakacita ayi ese alwane nkondo iyo mucishi ico. Wakababukila akucaya bantu baanji baanji muli mbabo, akutalika kulibambila shakuboolela kumishaabo.
70Jonasani ndyaakanyumfwa makani ayo, wakatuma nkombe ayi bapanganaakwe shaluumuno akusenga ayi bantu mbakacata munkondo ababooshe. 71Bakidesi wakabatambula kabotu beshinkombe balya, wakasumina makani akwe Jonasani. Wakamushomesha cakulumbila ayi teshi akamucitile cibiibi alimwi mubuumi bwakwe boonse. 72Wakababoosha bantu mbakalinga acata munkondo, lyalo wakaboolela kumishaabo kutacilyata alimwi cishi caJuda. 73Aboobo nkondo yakamana mu Isilaeli, lyalo Jonasani wakaya mukwikala ku Mikimashi. Wakatalika kulela bantu bakwe, wakatandaanya boonse bakakaka kulambila Lesa kuswa mucishi cabene Isilaeli.
Právě zvoleno:
1 Makabisi 9: BBBLI
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
Lenje Bible with Deuterocanon © Bible Society of Zambia, 2003.