Jon 1
1
Nakharan taha Ughin
1Lə nɨruouɨnan Nakharan rɨmamarɨk. Nakharan rɨmamarɨk ilau Ughin ne Nakharan In Ughin.
2In rɨmamarɨk ilau Ughin lə nɨruouɨnan.
3In Nakharan iərəm kamol narɨmnar min pətɨm lan, ne nar ker rɨka mɨn a ikɨn to rɨpɨsɨsɨpənan mɨn lə Nakharan an.
4In noukɨrɨ nəmiuhan, kəni ne nəmiuhan an in nɨsia taha nərəmim.
5Kəni nɨsia an ramasiakəpɨn napinəpan, kəni napinəpan rɨsaukɨmanin. #1:5 Suatu kiu a ikɨn məma takvhin nakharan Kris ətuatu. Irpɨsɨn in ɨk, “kəni napinəpan rɨshinatinan In.”
Jon ramavsitoin Nɨsia pərhien
6 #
Mat 3:1; Mak 1:4; Luk 3:1,2 Ughin rɨmhalipa iərəmim ker, nətɨgɨn ka Jon.
7In rɨva to navsitoan, məma tɨrəmavsitoin Nɨsia, məma lə navsitoan ka nərəmim min pətɨm takani nɨpərhienan.
8Rɨsolan məma in Nɨsia ka, mɨro in iərəm kamhalipa to navsitoanin Nɨsia ka.
9In Nɨsia pərhien iərəm rɨva lə tui tən ɨk mamasiakəpɨn nərəmim min pətɨm.
10In ka iərəm kamol tui tən ɨk lan, kəni In rɨmamarɨk lə tən ɨk, mɨro tən ɨk rɨshinatinan In.
11In rɨva iman əna, mɨro tahan əna nərəmim kɨsariran.
12Mɨro nərəmim min pətɨm iərəm kamarir In, In ramofən nɨsanənan kəm ilar məma takarva nərərɨ Ughin, kəm ilar min pətɨm iərəm kəmani nɨpərhienan lə Nətɨgɨn.
13Ilar min an kɨsaritan lə nɨtatil, o lə nɨkin iərəm rɨmsɨpən am lə nɨpəlakɨtil, o lə nɨkin iərəm rɨmsɨpən am lə nərəmim, mɨro lə Ughin.
Nakharan rɨva In iərəmim
14Nakharan an rɨva In iərəmim, mɨva mamarɨk kamar min, kəni kamar iɨmaip nɨvɨt-asulan tahan, nɨvɨt-asulan taha iərəmim ɨk iərəm In Nərɨ Ughin, nouan karena am, mipɨr lə navrean ne nɨpərhienan.
15Jon ramavsitoin mamɨni əpomh məma, “In ɨk iərəm iɨmamɨni məma, ‘Iərəm tɨroatisɨgin io, In rɨt mapitha io, mɨro-in-ka In rɨmaupan marɨk koatisɨg io.’”
16In rətiauh lə navrean, kəni katar min pətɨm kɨnaros navrean ka ton, ramofa, ramofa, ramofa əna.
17Mɨro-in-ka lə Moses Noua Asul riərpa, mɨro navrean ne nɨpərhienan rɨmsɨpən lə Iesu Kristo.
18Iərəmim ker rɨka iərəm ramap Ughin nian ker. Mɨro Nərɨn, nouan karena am, iərəm ramarɨk lə nouanənaui Rɨmɨn, In ramhuatɨkun.
Jon ramavsitoin Iərəmɨra ikɨn rəpia məpia ikɨn
19In ɨk navsitoan taha Jon, loanian nərəm Isrel min kamhailipən nərəmim nɨvin ton, nərəm kamarhuasɨg kəm Ughin ne nɨpsen taha Lifae. Kamariər Jerusalem marva məma takeirhapɨk ton məma, “?Ik pehe?”
20In ramɨniatɨv mɨsapninan, mɨro ramɨniatɨv məma, “Rɨsolan məma io Mesaea.”
21 #
Mal 4:5;
Dut 18:15,18 Kəni kameirhapɨk ton məma, “?Mɨro ik fe? ?Ik Elaeja o?” Kəni ramɨni məma, “Rɨsolan məma io un.” “?Ik iəni ka taha Ughin?” Kəni rɨmarəm mɨni məma, “Kəpə.”
22Kəni ka kəmani ton məma, “?Ik fe un, məma sakarofən narəman to nərəm kamhailipa kamar? ?Ik nakamɨni məma ik pehe?”
23 #
Aes 40:3
Ramɨni məma, “Io nɨpəlakɨ nakharan ɨk taha iəni taha Ughin Aesaea:
‘Nouia iərəmim ramakar əpomh ikɨn rəpia məpia ikɨn.
Arol ətuatu suatu taha IƏRƏMƗRA.’”
24Nərəm ka kamhalipən ilar nərəmim taha Farɨsi min.
25Kəni kameirhapɨk ton mɨmani məma, “?Mɨro takəma rɨsolan məma ik Mesaea o Elaeja o iəni ka taha Ughin, rɨtol ik nakamaui til?”
26Jon rəmarəm mamɨni to ilar məma, “Io iakamaui til lə nu, mɨro iərəmim ker ramail lə nɨkimiar iərəm kamiar nakatɨktɨk.
27“Iərəmim ka ramoatisɨgin io, mɨro In rɨt mapitha io, io iɨsavkɨran məma səkrɨsɨn nouanouka lə santel tahan.”
28Narɨmnar min ɨk kamol apa Petani ləvinpən lə nu Jotən, ikɨn Jon ramol nauian ikɨn.
Nərɨ Sipsip taha Ughin
29Lauk in Jon ramap Iesu rakəva ton, mamɨni məma, “!Aip ru, Nərɨ Sipsip taha Ughin, iərəm tɨrositha təvhaga tat taha tui tən ɨk!
30“In ɨk iərəm iɨmamɨni In məma, ‘Iərəmim ker tɨrɨpoatisɨgin io, iərəm In rɨt mapitha io, mɨro-in-ka In rɨmaupan marɨk koatisɨg io.’
31“Io iɨmɨshinatinan In, mɨro iɨva mamaui til lə nu to nar ɨk, məma tɨphuatɨkun In kəm nərəm Isrel.”
32 Kəni Jon ramavsitoin mamɨni məma, “Iɨmap Nanɨmɨn Avsim rɨmatite lə neai ravkɨri iouin makawota lan.
33“Io iɨmɨshinatinan In, mɨro iərəm rɨmhalipa io məma sakaui til lə nu, In ramɨni ton io məma, ‘Iərəm tɨnɨpap Nanɨmɨn Avsim tɨratite mawota lan, In iərəm tɨraui til lə Nanɨmɨn Avsim.’
34“Kəni io inamh mavsitoin məma in ɨk Nərɨ Ughin.”
Iesu ramɨruouɨn mamaunin nərəmim min tahan
35Lauk in mɨn ka Jon ramail ilhel tahan iərəmim mil kiu.
36Kəni rametpənin Iesu ramaliwək, mamɨni məma, “!Aip ru, Nərɨ Sipsip taha Ughin!”
37Kəni iərəmim mil an kuɨro nar ramɨni, kauoatisɨgin Iesu.
38Kəni Iesu rɨvhin map ilau kauoatisɨgin, kəni ramɨni to ilau məma, “?Nakamuatkoin nəta?” Ilau kamuɨni ton, “?Rapae,” (iərəm takɨni lə nakharan ɨk məma Iətɨkun), “nakamarɨk iə?”
39Ramɨni to ilau məma, “Iɨva muap.” Ilau kiɨva muap ikɨn ramarɨk ikɨn, mɨmhairɨk ilhel min loanian ka, mɨro-in-ka rɨnol fo klok lənhaəv.
40Ker lə ilau iərəm kamuɨro Jon muouatisɨgin Iesu in Antɨru, norhɨ Saemon Pita.
41In ramaupan mɨvɨn map pian Saemon mamɨni ton məma, “Inaip Mesaea” (iərəm takɨni lə nakharan ɨk məma Kristo).
42Kəni mir in miɨva to Iesu. Kəni nian Iesu ramap in, ramɨni ton məma, “Ik Saemon, nərɨ Jona. Tɨpaunin ik məma Kifas” (iərəm takɨni lə nakharan ɨk məma Kapiəl).
43Lauk in Iesu rəma tɨrvɨn Kalɨli, kəni ramap Filɨp mamɨni ton məma, “Oatisɨgin Io.”
44Filɨp in iərəm Petsaita, nauanu taha Antɨru ne Pita.
45Filɨp rɨvɨn map Nataniel mamɨni ton məma, “Inaip wus Moses rɨmamakharin mɨrai lə Noua Asul, ilar min iəni min taha Ughin. In Iesu iərəm Nasərət, nərɨ Josef.”
46Mɨro Nataniel ramɨni ton məma, “?Rɨtol nar ɨvt ker tɨrsɨpən Nasərət?” Filɨp ramɨni ton məma, “Va map.”
47Iesu ramap Nataniel rakəva ton, mamɨni lan məma, “!Ap ru, iərəm Isrel pərhien ker, iərəm kikoiko rɨka lan!”
48Nataniel ramɨni ton məma, “?Nɨmɨtuhinatin io?” Iesu rəmarəm mɨnipən ton məma, “Koatisɨg Filɨp rɨpaunin ik, iɨmap ik nakawota lahau loukɨ nimh.”
49Nataniel rəmarəm mamɨni ton məma, “!Iətɨkun, Ik Nərɨ Ughin, Ik Iərəmɨra taha Isrel!”
50Iesu rəmarəm mamɨnipən ton, “?Nakamɨni nɨpərhienan lak mɨro-in-ka iɨmɨni məma iɨmap ik nakawota lahau loukɨ nimh? Ik tɨnɨpap narɨmnar min ripɨr akɨn lə nar ɨk.”
51 #
Jen 28:12
Kəni ramɨni ton məma, “Nɨpərhienan iakamɨni to kamiar, tɨnɨpaip neai kɨnɨtita, kəni agɨlo min taha Ughin tɨparət mamaitite lak, Io Nərɨ Iərəmim.”
Nu rɨva məma waen
Právě zvoleno:
Jon 1: Lenakel NT
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
(c) 2023 Covenanter Press - Presbyterian Reformed Church of Australia
