ܐܶܓܰܪܬ̥ܳܐ ܠܰܪّܽܘܡܳܝ̈ܶܐ 7
7
ܗ̄ܽܘ ܢܳܡܽܘܣܳܐ ܕܺܗ̄ܝ ܪܽܘܚܳܐ
ܗ̄ܽܘ ܙܰܒܢܳܐ ܕܽܗ̄ܘ ܢܳܡܽܘܣܳܐ
1ܐܰܘ ܠܳܐ ܟ݄ܐܕ̥ܥܺܝܬܽܘ، ܝܰܐ ܐܰܚ̈ܽܘܢܳܢܶܐ، ܟܡ݄ܫܓ̥ܰܠ ܐ̱ܢܳܐ ܥܰܡ ܗܰܢܺܝ ܕܟܳܐܕ̥ܥܺܝ ܗ̄ܽܘ ܢܳܡܽܘܣܳܐ: ܗ̄ܽܘ ܢܳܡܽܘܣܳܐ ܡܫܰܠܛܳܐ ܝܳܐ ܥܰܠ ܗ̄ܽܘ ܓܰܒ̥ܪܳܐ ܗܳܠ ܕܟ݄ܬ ܝܳܐ ܒܰܚّܰܝ̈ܶܐ، 2ܐܟ̥ ܕܺܗ̄ܝ ܐܰܢ̱ܬ̥ܬܳܐ ܕܟ݄ܬ ܝܳܐ ܡܰܐܣ݄ܪܬܳܐ ܒܽܗ̄ܘ ܓܰܒ̥ܪܰܝܕ̥ܰܗ ܒܽܗ̄ܘ ܢܳܡܽܘܣܳܐ ܟܽܘܠ ܕܟ݄ܬ ܝܳܐ ܒܰܚّܰܝ̈ܶܐ. ܘ݄ܕܡܳܝ݄ܬ̥ ܗ̄ܽܘ ܓܰܒ̥ܪܰܝܕ̥ܰܗ ܟܳܗ̄ܘܝܳܐ ܚܺܐܪܬܳܐ ܡܽܗ̄ܘ ܢܳܡܽܘܣܳܐ ܕܽܗ̄ܘ ܓܰܒ̥ܪܰܝܕ̥ܰܗ. 3ܘܕܳܗ̄ܘܶܐ ܒܰܚّܰܝ̈ܶܐ ܗ̄ܽܘ ܓܰܒ̥ܪܰܝܕ̥ܰܗ، ܘܡ݄ܛܝܳܐ ܠܓܰܒ̥ܪܳܐ ܚܪܶܢܳܐ ܟܳܗ̄ܘܝܳܐ ܓܰܝܳܪܬܳܐ. ܐܶܠܳܐ ܕܡܳܝ݄ܬ̥ ܗ̄ܽܘ ܓܰܒ̥ܪܰܝܕ̥ܰܗ، ܟܡܺܝܚܰܪܪܳܐ ܡܽܗ̄ܘ ܢܳܡܽܘܣܳܐ ܘܠܳܐ ܟܳܗ̄ܘܝܳܐ ܓܰܝܳܪܬܳܐ ܐܶܢ ܓܰܒ̥ܺܝܪܳܐ ܠܓܰܒ̥ܪܳܐ ܚܪܶܢܳܐ. 4ܘܳܐܥܕܳܐ، ܝܰܐ ܐܰܚ̈ܽܘܢܳܢܶܐ، ܗܰܬܽܘ ܣܬܶܝ ܡܰܝܺܝܬ̥ܺܝܬܽܘ ܡܽܗ̄ܘ ܢܳܡܽܘܣܳܐ ܒܽܗ̄ܘ ܦܰܓ̥ܪܳܐ ܕ݄ܡܫܺܝܚܳܐ ܠܰܫܰܢ ܕܗܳܘܺܝܬܽܘ ܠܚܰܕ̱ ܚܪܶܢܳܐ، ܠܰܗ̄ܢܳܐ ܕܩܰܝ݄ܡ ܡܒܰܝܢ ܗ̄ܰܡّܺܝ̈ܬ̥ܶܐ ܠܰܫܰܢ ܕܳܗ̄ܒܺܝܬܽܘ ܦܺܐܪ̈ܶܐ ܠܰܐܠܳܗܳܐ. 5ܗ̄ܺܝ ܢܰܩܠܐ ܕܟ݄ܬ ܗ̄ܘܰܝܢܰܐ ܒܰܚّܰܝ̈ܶܐ ܕܽܗ̄ܘ ܦܰܓ̥ܪܳܐ، ܗ̄ܰܟّܶܐܒ̥̈ܶܐ ܕܺܗ̄ܝ ܚܛܺܝܬ̥ܳܐ ܕܒܽܗ̄ܘ ܢܳܡܽܘܣܳܐ ܥܳܒ̥ܕܺܝ ܗ̄ܘܰܘ̱ ܒܰܗّܰܕ̈ܳܡܰܝܕ̥ܰܢ ܠܰܫܰܢ ܕܳܗ̄ܒܺܝܢܰܐ ܦܺܐܪ̈ܶܐ ܠܽܗ̄ܘ ܡܰܘܬܳܐ. 6ܘܳܐܥܕܳܐ ܕ݄ܡܚܰܪܪܺܝܢܰܐ (ܕܗܰܘܺܝܢܰܐ ܚܺܐܪ̈ܶܐ) ܡܽܗ̄ܘ ܢܳܡܽܘܣܳܐ، ܘܡܰܝܺܝܬ̥ܺܝܢܰܐ ܠܰܗ̄ܘܳܐ ܕܡܰܐܣ݄ܪ ܗ̄ܘܰܝ ܠܰܢ، ܠܰܫܰܢ ܡܳܐܥܕܳܐ ܘܰܐܙܳܠܳܐ ܕ݄ܡܫܰܡܫܺܝܢܰܐ ܒܪܽܘܚܳܐ ܚܰܕ̥ܬܳܐ ܘܠܳܐ ܒ݄ܟܬ̥ܳܒ̥ܳܐ ܥܰܬܺܝܩܳܐ.
ܗ̄ܺܝ ܚܛܺܝܬ̥ܳܐ ܘܽܗ̄ܘ ܢܳܡܽܘܣܳܐ
7ܗܰܢ ܢܰܩܠܐ ܡ݄ܢ ܐ݄ܡّܺܪ̱ܝܢܰܐ: ܗ̄ܽܘ ܢܳܡܽܘܣܳܐ ܚܛܺܝܬ̥ܳܐ ܝܳܐ؟ ܠܳܐ، ܚܳܣ! ܐܶܠܳܐ ܠܳܐ ܝܰܠ݄ܦ ܐ̱ܢܳܐ ܗ̄ܺܝ ܚܛܺܝܬ̥ܳܐ ܐܶܠܳܐ ܡܽܗ̄ܘ ܢܳܡܽܘܣܳܐ. ܡܺܐܝܕ̥ܶܗ ܕܠܳܐ ܐܕ̥ܰܥ ܗ̄ܘܰܝ ܐ̱ܢܳܐ ܗ̄ܺܝ ܪܶܓܬ̥ܳܐ ܕܠܳܐ ܐܡܰܪ ܗ̄ܘܰܐ ܗ̄ܽܘ ܢܳܡܽܘܣܳܐ ”ܠܳܐ ܪܰܝܓ̥ܰܬ“. 8ܘܒܽܗ̄ܘ ܦܽܘܩܕܳܢܰܢܳܐ، ܗ̄ܺܝ ܚܛܺܝܬ̥ܳܐ ܚܙܶܐ ܠܰܗ ܦܽܘܪܣܳܐ ܘ݄ܡܠܶܐ ܠܰܗ ܐܶܒܺܝ ܟܽܘܠ ܪܶܓܬ̥ܳܐ. ܘ݄ܕܠܳܐ ܢܳܡܽܘܣܳܐ، ܗ̄ܺܝ ܚܛܺܝܬ̥ܳܐ ܡܺܝܬ̥ܬܳܐ ܗ̄ܘܰܐ. 9ܘܳܐܢܳܐ ܒܰܚّܰܝ̈ܶܐ ܗ̄ܘܰܝ ܐ̱ܢܳܐ ܕܠܳܐ ܢܳܡܽܘܣܳܐ ܡܶܢ̱ ܡܶܩ݄ܕ̱ܡ. ܘܺܗ̄ܝ ܢܰܩܠܐ ܕܰܐܬ̥ܺܝ ܗ̄ܽܘ ܦܽܘܩܕܳܢܳܐ، ܗ̄ܺܝ ܚܛܺܝܬ̥ܳܐ ܐܰܬ̥ܝܳܐ ܠܰܚّܰܝ̈ܶܐ ܘܳܐܢܳܐ ܡܰܝ݄ܬ̥ ܐ̱ܢܳܐ. 10ܘܽܗ̄ܘ ܦܽܘܩܕܳܢܰܘܳܐ ܕܰܚّܰܝ̈ܶܐ، ܗܰܘܺܝ ܠܺܝ ܝܳܐ ܠܽܗ̄ܘ ܡܰܘܬܳܐ. 11ܘܺܗ̄ܝ ܚܛܺܝܬ̥ܳܐ ܒܽܗ̄ܘ ܦܽܘܪܣܳܐ ܕ݄ܚܙܶܐ ܠܰܗ ܒܽܗ̄ܘ ܦܽܘܩܕܳܢܳܐ ܡܰܛܥܶܐ ܠܰܗ ܠܺܝ، ܘܶܐܒܶܗ ܩܛܺܝܠ ܠܰܗ ܠܺܝ. 12ܗܰܢ ܢܰܩܠܐ ܗ̄ܽܘ ܢܳܡܽܘܣܳܐ ܩܰܕܺܝܫܳܐ ܝܳܐ، ܘܽܗ̄ܘ ܦܽܘܩܕܳܢܳܐ ܩܰܕܺܝܫܳܐ ܝܳܐ ܘܟܺܐܢܳܐ ܘܛܳܒ̥ܳܐ. 13ܩܰܝ ܗ̄ܺܝ ܛܳܒ̥ܽܘܬ̥ܳܐ ܗܰܘܝܳܐ ܠܺܝ (ܕܰܪܒܳܐ) ܠܽܗ̄ܘ ܡܰܘܬܳܐ؟ ܠܳܐ، ܚܳܣ. ܐܶܠܳܐ ܗ̄ܺܝ ܚܛܺܝܬ̥ܳܐ ܠܰܫܰܢ ܕܡ݄ܚܙܳܝܳܐ ܚܛܺܝܬ̥ܳܐ ܝܳܐ، ܒܽܗ̄ܘ ܕܰܪܒܳܐ ܕܺܗ̄ܝ ܛܳܒ̥ܽܘܬ̥ܳܐ ܡܰܝܬܶܐ ܠܰܗ ܗ̄ܽܘ ܡܰܘܬܳܐ ܐܰܥܠܺܝ، ܠܰܫܰܢ ܙ݄ܕ ܡܺܝܕܳܢܳܐ ܗ̄ܺܝ ܚܛܺܝܬ̥ܳܐ ܒܽܗ̄ܘ ܦܽܘܩܕܳܢܳܐ. 14ܡܺܐܝܕ̥ܶܗ ܕܟܳܐܕ̥ܥܺܝܢܰܐ ܕܽܗ̄ܘ ܢܳܡܽܘܣܳܐ ܕܺܗ̄ܝ ܪܽܘܚܳܐ ܝܳܐ، ܘܳܐܢܳܐ ܕܽܗ̄ܘ ܦܰܓ̥ܪܳܐ ܐ̱ܢܳܐ، ܘ݄ܡܙܰܒܰܢ ܐ̱ܢܳܐ ܠܺܗ̄ܝ ܚܛܺܝܬ̥ܳܐ. 15ܡܺܐܝܕ̥ܶܗ ܕܽܗ̄ܘ ܡܶܕܶܐ ܕ݄ܟܣܳܝܰܡ ܐ̱ܢܳܐ، ܠ݄ܐ ܟܳܐܕ̥ܰܥܢܶܗ. ܘܠܳܐ ܗ̄ܽܘ ܡܶܕܶܐ ܕܟܳܐܒܰܥ ܐ̱ܢܳܐ ܟܣܳܝܰܡ ܐ̱ܢܳܐ، ܐܶܠܳܐ ܗ̄ܽܘ ܡܶܕܶܐ ܕܠ݄ܐ ܟܳܐܒܰܥ ܐ̱ܢܳܐ ܘܥܳܝܰܩ ܠܺܝ ܡܶܢܶܗ، ܗܰܘܳܐ ܝܳܐ ܕ݄ܟܣܳܝܰܡ ܐ̱ܢܳܐ. 16ܘܶܐܢ ܗ̄ܽܘ ܡܶܕܶܐ ܕܠ݄ܐ ܟܳܐܒܰܥ ܐ̱ܢܳܐ ܟܣܳܝܰܡ ܐ̱ܢܳܐ، ܟܣܳܗܰܕ ܐ̱ܢܳܐ ܕܽܗ̄ܘ ܢܳܡܽܘܣܳܐ ܫܰܦܺܝܪܳܐ ܝܳܐ. 17ܘܳܐܥܕܳܐ، ܠܳܐ ܐܳܢܳܐ ܐ̱ܢܳܐ ܕ݄ܟܣܳܝܰܡ ܐ̱ܢܳܐ ܗ̄ܺܝ ܚܛܺܝܬ̥ܳܐ، ܐܶܠܳܐ ܗ̄ܺܝ ܚܛܺܝܬ̥ܳܐ ܕ݄ܟܥܳܡܪܳܐ ܐܶܒܺܝ. 18ܡܺܐܝܕ̥ܶܗ ܕܟܳܐܕ̥ܰܥ ܐ̱ܢܳܐ ܕܠ݄ܐ ܟܥ݄ܡܪܳܐ ܐܶܒܺܝ، ܒܓܽܘܫܡܺܝ، ܗ̄ܺܝ ܛܳܒ̥ܽܘܬ̥ܳܐ، ܡܺܐܝܕ̥ܶܗ ܕ݄ܦܫܺܝܛܳܐ ܝܳܐ ܕܳܐܒܰܥ ܐ̱ܢܳܐ ܗ̄ܺܝ ܛܳܒ̥ܽܘܬ̥ܳܐ، ܐܶܠܳܐ ܥܰܣܩܳܐ ܝܳܐ ܕܣܳܝܰܡ ܐ̱ܢܳܐ ܠܰܗ. 19ܥܰܠ ܕܠܳܐ ܗ̄ܺܝ ܛܳܒ̥ܽܘܬ̥ܳܐ ܕܟܳܐܒܰܥ ܐ̱ܢܳܐ ܕܣܳܝܰܡ ܐ̱ܢܳܐ ܟܣܳܝܰܡ ܐ̱ܢܳܐ، ܐܶܠܳܐ ܗ̄ܺܝ ܒܺܝܫܬܳܐ ܕܠܳܐ ܟܳܐܒܰܥ ܐ̱ܢܳܐ ܕܣܳܝܰܡ ܐ̱ܢܳܐ، ܟܣܳܝܰܡܢܰܗ. 20ܘܶܐܢ ܗ̄ܽܘ ܡܶܕܶܐ ܕܠܳܐ ܟܳܐܒܰܥ ܐ̱ܢܳܐ ܟܣܳܝܰܡ ܐ̱ܢܳܐ، ܠܰܝ̱ܬ ܐ̱ܢܳܐ ܐܳܢܳܐ ܕ݄ܟܣܳܝܰܡ ܐ̱ܢܳܐ، ܐܶܠܳܐ ܗ̄ܺܝ ܚܛܺܝܬ̥ܳܐ ܝܳܐ ܕ݄ܟܥܳܡܪܳܐ ܐܶܒܺܝ. 21ܗܰܢ ܢܰܩܠܐ ܟܚܳܙܶܐ ܐ̱ܢܳܐ ܕܽܗ̄ܘ ܢܳܡܽܘܣܳܐ ܟܠܳܚ݄ܡ ܠܗܰܘܢܺܝ ܗܰܘܳܐ ܕܟܳܐܒ݄ܥ ܕܣܳܝ݄ܡ ܗ̄ܺܝ ܛܳܒ̥ܽܘܬ̥ܳܐ، ܡܺܐܝܕ̥ܶܗ ܕܺܗ̄ܝ ܒܺܝܫܬܳܐ ܩܰܪܽܒ̥ܬܳܐ ܝܳܐ ܐܶܠܺܝ. 22ܥܰܠ ܕ݄ܟܡ݄ܦܨܰܚ ܐ̱ܢܳܐ ܒܽܗ̄ܘ ܢܳܡܽܘܣܳܐ ܕܰܐܠܳܗܳܐ ܒܽܗ̄ܘ ܢܳܫܳܐ ܕܠܰܘܓ̥݄ܠ (ܒܠܶܒܺܝ). 23ܘ݄ܟܚܳܙܶܐ ܐ̱ܢܳܐ ܢܳܡܽܘܣܳܐ ܚܪܶܢܳܐ ܒܰܗّܰܕ̈ܳܡܰܝܕ̥ܺܝ (ܒܓܽܘܫܡܺܝ) ܕ݄ܟܩܳܝ݄ܡ ܒܺܗ̄ܝ ܦܳܬ̥ܳܐ ܕܽܗ̄ܘ ܢܳܡܽܘܣܳܐ ܕܟ݄ܬ ܝܳܐ ܒܠܶܒܺܝ، ܘ݄ܟܓܳܪܰܫ ܠܺܝ ܠܽܗ̄ܘ ܢܳܡܽܘܣܳܐ ܕܺܗ̄ܝ ܚܛܺܝܬ̥ܳܐ ܕܟ݄ܬ ܝܳܐ ܒܰܗّܰܕ̈ܳܡܰܝܕ̥ܺܝ. 24ܢܳܫܳܐ ܦܰܩܺܝܪܳܐ ܐ̱ܢܳܐ، ܡܰܢ ܟܺܝܒܶܗ ܡܰܦܠܰܛ ܠܺܝ ܡܽܗ̄ܘ ܦܰܓ̥ܪܰܢܳܐ ܕܽܗ̄ܘ ܡܰܘܬܳܐ؟ 25ܬܰܘܕܺܝ ܠܰܐܠܳܗܳܐ ܒܡܳܪܰܢ ܝܶܫܽܘܥ ܡܫܺܝܚܳܐ، ܕܳܐܥܕܳܐ ܒܠܶܒܺܝ ܥܰܒܕܳܐ ܐ̱ܢܳܐ ܠܽܗ̄ܘ ܢܳܡܽܘܣܳܐ ܕܰܐܠܳܗܳܐ، ܐܶܠܳܐ ܒܓܽܘܫܡܺܝ، ܥܰܒܕܳܐ ܐ̱ܢܳܐ ܠܽܗ̄ܘ ܢܳܡܽܘܣܳܐ ܕܺܗ̄ܝ ܚܛܺܝܬ̥ܳܐ.
Právě zvoleno:
ܐܶܓܰܪܬ̥ܳܐ ܠܰܪّܽܘܡܳܝ̈ܶܐ 7: ܟܬܒܐ
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Suryoyo Bible © 2024 Aramaic Bible Translation