ܡܓܰܠܝܘܢ ܕܠܘܩܐ 23
23
ܝܶܫܽܘܥ ܟܩܳܝ݄ܡ ܩ݄ܕ̱ܡ ܦܺܝܠܰܛܳܘܣ ܗ̄ܽܘ ܫܰܠܺܝܛܳܐ
ܡܬܝ 27:1‐2؛ 27:11‐14؛ ܡܪܩܘܣ 16:1‐5؛ ܝܘܚܢܢ 18:28‐38
1ܘܩܰܝܺܝܡܺܝ ܟܽܘܠّܶܗ ܕܒܽܗ̄ܘ ܟܢܽܘܫܝܳܐ ܘܡܰܝܬܰܠّܶܗ ܠܓܰܒ ܦܺܝܠܰܛܳܘܣ، 2ܘ݄ܡܫܰܪܰܠّܶܗ ܕܡܰܫܟ݄ܢ ܐܰܥܠܶܗ ܘ݄ܐܡّܺܪ̱ܝ: ”ܠܰܗ̄ܢܳܐ ܚܙܶܐ ܠܰܢ ܕ݄ܟܡܰܛܥܶܐ ܗ̄ܽܘ ܥܰܡܰܝܕ̥ܰܢ، ܘܟܳܡܰܟܠܶܐ (ܘܡܰܚܪ݄ܡ) ܕܠܳܐ ܗ̄ܳܒܺܝܢܰܐ ܟܣܶܦܪܺܝܫܳܐ ܠܩܶܣܰܪ، ܘܟܳܐܡ݄ܪ ܥܰܠ ܢܰܦܫܶܗ ܕܟ݄ܬ ܝܳܐ ܡܰܠܟܳܐ، ܡܫܺܝܚܳܐ.“ 3ܘܦܺܝܠܰܛܳܘܣ ܡܫܰܐܶܠ ܠܶܗ ܘܐܡ݄ܪ ܠܶܗ ܠܶܗ: ”ܗܰܬ ܗ̄ܰܬ ܗ̄ܽܘ ܡܰܠܟܳܐ ܕܰܝّܽܘܕ̥̈ܳܝܶܐ؟“ ܐܡ݄ܪ ܠܶܗ ܠܶܗ: ”ܗܰܬ ܟ݄ܐܡّܰܪ̱ܬ.“ 4ܘܐܡ݄ܪ ܠܶܗ ܦܺܝܠܰܛܳܘܣ ܠܰܪّܰܒ̈ܶܐ ܕܰܟّܳܗ̈ܢܶܐ ܘܠܽܗ̄ܘ ܟܢܽܘܫܝܳܐ: ”ܐܳܢܳܐ ܥܶܠܬ̥ܳܐ ܡܶܕܶܐ ܠ݄ܐ ܟܚܳܙܶܐ ܐ̱ܢܳܐ ܥܰܠ ܗ̄ܽܘ ܓܰܒ̥ܪܰܢܳܐ.“ 5ܐܶܠܳܐ ܗ݄ܢّܶܝ ܡܰܙܥܩܺܝ ܗ̄ܘܰܘ̱ ܘ݄ܐܡّܺܪ̱ܝ ܗ̄ܘܰܘ̱: ”ܫܓ̥݄ܫ ܠܶܗ ܗ̄ܽܘ ܥܰܡܰܝܕ̥ܰܢ ܘܗܺܝّܶܗ ܟܡܰܘܠ݄ܦ ܒܺܝܗܽܘܕ̥ ܟܽܘܠܰܗ، ܘ݄ܡܫܰܪܶܐ ܠܶܗ ܡܽܗ̄ܘ ܓܠܺܝܠܳܐ ܘܗܳܠ ܠܰܗ̄ܪܟܶܐ.“
ܝܶܫܽܘܥ ܟܩܳܝ݄ܡ ܩ݄ܕ̱ܡ ܗܶܪܳܘܕ̥ܶܣ
6ܘܦܺܝܠܰܛܳܘܣ، ܗ̄ܺܝ ܢܰܩܠܐ ܕܫܰܡ݄ܥ ܗ̄ܽܘ ܐ݄ܫܡܳܐ ܕܽܗ̄ܘ ܓܠܺܝܠܳܐ، ܡܫܰܐܶܠ ܠܶܗ ܕܶܐܢ ܓܰܒ̥ܪܳܐ ܓܠܺܝܠܳܝܳܐ ܝܳܐ؟ 7ܘܺܗ̄ܝ ܢܰܩܠܐ ܕܰܐܕ̥݄ܥ ܕܬܰܚܬ ܗ̄ܽܘ ܫܽܘܠܛܳܢܳܐ ܕܗܶܪܳܘܕ̥ܶܣ ܝܳܐ، ܡܫܰܕܰܪ ܠܶܗ ܠܓܰܒ ܗܶܪܳܘܕ̥ܶܣ ܕܟ݄ܬ ܗ̄ܘܰܐ ܒܰܝّܰܘܡ̈ܳܬ̥ܰܢ݄ܟ ܒܽܐܘܪܶܫܠܶܡ. 8ܘܗܶܪܳܘܕ̥ܶܣ ܗ̄ܺܝ ܢܰܩܠܐ ܕ݄ܚܙܶܐ ܠܶܗ ܝܶܫܽܘܥ ܦܨܺܝܚ ܓ̥ܰܠܰܒܶܐ، ܥܰܠ ܕܳܐܒܰܥ ܗ̄ܘܰܐ ܕܚܳܙܶܐ ܠܶܗ ܡܶܢ̱ ܙܰܒܢܳܐ ܝܰܪܺܝܟ̥ܳܐ، ܥܰܠ ܕܫܳܡܰܥ ܗ̄ܘܰܐ ܐܰܥܠܶܗ ܡܶܕ̈ܳܢܶܐ ܓ̥ܰܠܰܒܶܐ، ܘܟ݄ܬ ܗ̄ܘܰܝ ܠܶܗ ܣܰܒܪܳܐ ܕܚܳܙܶܐ ܡܶܢܶܗ ܬܶܕܡܽܘܪܬܳܐ ܡܶܕܶܐ. 9ܘ݄ܡܫܰܐܶܠ ܗ̄ܘܰܝ ܠܶܗ ܥܰܠ ܫܶܘ̈ܳܐܠܶܐ ܓ̥ܰܠܰܒܶܐ، ܐܶܠܳܐ ܝܶܫܽܘܥ ܠܳܐ ܡܰܕܥܰܪ ܠܶܗ ܐܰܥܠܶܗ ܒܡܶܕܶܐ. 10ܘܩܰܝܡܺܝ ܗ̄ܘܰܘ̱ ܗ̄ܰܪّܰܒ̈ܶܐ ܕܰܟّܳܗ̈ܢܶܐ ܘܰܣّܳܦܪ̈ܶܐ ܘܡܰܫܟ݄ܢ ܗ̄ܘܰܘ̱ ܐܰܥܠܶܗ ܒܚܰܝܠܳܐ ܘܪܽܘܓ̥ܙܳܐ. 11ܘܗܶܪܳܘܕ̥ܶܣ ܡܚܰܩܰܪ ܠܶܗ، ܗܺܝّܶܗ ܘܰܕّܰܚ̈ܫܰܝܕ̥ܶܗ. ܘܗܺܝّܶܗ ܟܳܡܒܰܙ݄ܚ ܐܶܒܶܗ، ܡܰܠܒ̥ܰܫ ܠܶܗ ܠܒܽܘܫܳܐ ܣܶܡܳܩܳܐ ܕܟܳܡܰܒܪ݄ܩ، ܘ݄ܡܫܰܕܰܪ ܠܶܗ ܠܓܰܒ ܦܺܝܠܰܛܳܘܣ. 12ܘܒܽܗ̄ܘ ܝܰܘܡܰܘܳܐ، ܦܺܝܠܰܛܳܘܣ ܘܗܶܪܳܘܕ̥ܶܣ ܗܰܘ݄ܢ ܪ̈ܳܚܡܶܐ ܥܰܡ ܚܕ̥ܳܕ̥̈ܶܐ، ܡܺܐܝܕ̥ܶܗ ܕܟ݄ܬ ܗ̄ܘܰܐ ܒܥܶܠܕܒܳܒܽܘܬ̥ܳܐ ܒܰܝܢܳܬ̥ܰܝّܶܗ ܡܶܢ̱ ܡܶܩ݄ܕ̱ܡ.
ܗ̄ܽܘ ܕܺܝܢܳܐ ܕܦܺܝܠܰܛܳܘܣ
ܡܬܝ 27:15‐26؛ ܡܪܩܘܣ 15:6‐15؛ ܝܘܚܢܢ 18:39‐40؛ 19:1‐16
13ܘܦܺܝܠܰܛܳܘܣ ܩܪܶܐ ܠܶܗ ܠܰܪّܰܒ̈ܶܐ ܕܰܟّܳܗ̈ܢܶܐ ܘܠܰܪّܰܒ̈ܶܐ ܘܠܽܗ̄ܘ ܥܰܡܳܐ، 14ܘܐܡ݄ܪ ܠܰܗ ܠّܶܗ: ”ܡܰܝܬܰܠܟ̥ܽܘ ܠܺܝ ܗ̄ܽܘ ܓܰܒ̥ܪܰܢܳܐ ܐܟ̥ ܡܰܚ݄ܪܒ̥ܳܢܳܐ ܠܽܗ̄ܘ ܥܰܡܰܬ̥ܟ̥ܽܘ، ܘܟܰܐܠܺܝ ܐܳܢܳܐ ܡܥܰܩܰܒ ܠܺܝ ܩ݄ܕ̱ܡ ܥܰܝܢ̈ܳܬ̥ܰܝܟ̥ܽܘ ܘܥܶܠܬ̥ܳܐ ܡܶܕܶܐ ܠܳܐ ܚܙܶܐ ܠܺܝ ܒܽܗ̄ܘ ܓܰܒ̥ܪܰܢܳܐ ܡܶܢ̱ ܟܽܘܠ ܕܟܳܡܰܫܟܺܝܬܽܘ ܐܰܥܠܶܗ. 15ܘܠܳܐ ܗܶܪܳܘܕ̥ܶܣ ܣܬܶܝ، ܟܰܐܠܶܗ ܠܳܐ ܚܙܶܐ ܠܶܗ ܡܶܕܶܐ ܕܣ݄ܡ ܠܶܗ ܕܫܳܘܶܐ ܠܽܗ̄ܘ ܡܰܘܬܳܐ، ܡܺܐܝܕ̥ܶܗ ܕ݄ܡܫܰܕܰܪ ܠܺܝ ܠܓܰܒܶܗ. 16ܗܰܢ ܢܰܩܠܐ ܓ݄ܕܡܳܚܶܢܶܗ ܘܡܰܪܦܶܢܶܗ،“ 17ܥܰܠ ܕܟ݄ܬ ܗ̄ܘܰܐ ܥܝܳܕ̥ܳܐ ܕ݄ܒܟܽܘܠ ܥܶܐܕ̥ܳܐ ܡܰܪܦܶܐ ܗ̄ܘܰܐ ܠّܶܗ ܚܰܕ̱. 18ܘܰܗ̄ܢ ܢܳܫ̈ܶܐ ܟܽܘܠّܶܗ ܡܰܙܥܰܩّܶܗ ܘܐܡ݄ܪّܶܗ: ”ܡܽܘܕܶܗ ܠܰܗ̄ܢܳܐ ܘܡܰܪܦܰܝ ܠܰܢ ܠܒܰܪ ܐܰܒܰܐ!“ 19ܗܰܘܳܐ ܕ݄ܡܚܰܠ݄ܩ ܒܽܗ̄ܘ ܚܒܽܘܫܝܳܐ ܥܰܠ ܗ̄ܽܘ ܫܓ̥ܽܘܫܝܳܐ ܘܽܗ̄ܘ ܩܰܛܠܳܐ ܕܗܰܘܺܝ ܗ̄ܘܰܐ ܒܺܗ̄ܝ ܡܕ̥ܺܝܢ̱ܬܳܐ. 20ܘܢܰܩܠܐ ܚܪܶܬܳܐ ܦܺܝܠܰܛܳܘܣ ܫܓ̥ܺܝܠ ܐܰܥܡܰܝّܶܗ ܘܗܺܝّܶܗ ܐܳܒܰܥ ܗ̄ܘܰܐ ܕܡܰܪܦܶܐ ܠܝܶܫܽܘܥ، 21ܐܶܠܳܐ ܗ݄ܢّܶܝ ܡܰܙܥܩܺܝ ܗ̄ܘܰܘ̱ ܘ݄ܐܡّܺܪ̱ܝ ܗ̄ܘܰܘ̱: ”ܨܠܰܒ̥ܶܗ ܨܠܰܒ̥ܶܗ!“ 22ܘܠܰܬܠ݄ܬ̥ ܟܳܪ̈ܶܐ، ܐܡ݄ܪ ܠܰܗ ܠّܶܗ: ”ܡ݄ܢ ܚܰܪܒܽܘܬ̥ܳܐ ܣ݄ܡ ܠܶܗ ܠܰܗ̄ܢܳܐ؟ ܥܶܠܬ̥ܳܐ ܡܶܕܶܐ ܕܫܳܘܝܳܐ ܠܽܗ̄ܘ ܡܰܘܬܳܐ ܠܳܐ ܚܙܶܐ ܠܺܝ ܐܶܒܶܗ، ܗܰܢ ܢܰܩܠܐ ܓ݄ܕܡܳܚܶܢܶܗ ܘܡܰܪܦܶܢܶܗ.“ 23ܐܶܠܳܐ ܗ݄ܢّܶܝ ܦܰܝܺܝܫܺܝ ܟܡܰܙܥܩܺܝ ܘ݄ܐܒܥܺܝ ܗ̄ܘܰܘ̱ ܡܶܢܶܗ ܕܨܳܠܰܒ̥ ܠܶܗ. ܘܙ݄ܕ ܥܰܠܺܝ ܩܳܠܰܝّܶܗ، ܗ݄ܢّܶܝ ܘܰܪّܰܒ̈ܶܐ ܕܰܟّܳܗ̈ܢܶܐ. 24ܗ̄ܺܝ ܢܰܩܠܝܳܐ، ܦܺܝܠܰܛܳܘܣ ܗܽܒ̥ ܠܶܗ ܦܽܘܩܕܳܢܳܐ ܕܳܗ̄ܘܶܐ ܐܟ̥ ܕܰܐܒܺܝܥܺܝ. 25ܘܡܰܪܦܶܐ ܠܰܗ ܠّܶܗ ܗܰܘܳܐ ܕ݄ܡܚܰܠ݄ܩ ܒܽܗ̄ܘ ܚܒܽܘܫܝܳܐ ܥܰܠ ܗ̄ܽܘ ܒܽܘܠܒܳܠܳܐ ܘܽܗ̄ܘ ܩܰܛܠܳܐ، ܘܡܰܫܠܰܡ ܠܶܗ ܝܶܫܽܘܥ ܠܽܗ̄ܘ ܨܶܒܝܳܢܰܬّ̥ܶܗ.
ܒܽܗ̄ܘ ܕܰܪܒܳܐ ܠܽܗ̄ܘ ܡܰܘܬܳܐ
ܡܬܝ 27:32‐44؛ ܡܪܩܘܣ 15:21‐32؛ ܝܘܚܢܢ 19:17‐27
26ܘܒܽܗ̄ܘ ܕܰܪܒܳܐ ܕܡܰܘܒܠܺܝ ܠܶܗ (ܠܝܶܫܽܘܥ)، ܙܒ݄ܛّܶܗ ܫܶܡܥܽܘܢ ܩܽܘܪܺܝܢܳܝܳܐ ܕܟ݄ܬ ܗ̄ܘܰܐ ܕܰܥܳܪܳܐ ܡܺܗ̄ܝ ܩܪܺܝܬ̥ܳܐ، ܘܡܰܛܥܰܢّܶܗ ܗ̄ܽܘ ܨܠܺܝܒܳܐ ܕ݄ܡܗܰܠ݄ܟ̥ ܒ݄ܬ̥ܪܶܗ ܕܝܶܫܽܘܥ. 27ܘܰܐܬ̥ܺܝ ܗ̄ܘܰܐ ܒ݄ܬ̥ܪܶܗ ܥܰܡܳܐ ܓ̥ܰܠܰܒܶܐ ܘܢܶܫ̈ܶܐ ܕ݄ܡܩܰܘܠܺܝ ܗ̄ܘܰܘ̱ ܘ݄ܡܘܰܠܽܘܠܺܝ ܗ̄ܘܰܘ̱ ܘܒܳܟ̥݄ܢ ܗ̄ܘܰܘ̱ ܐܰܥܠܶܗ. 28ܘܚ݄ܪ ܠܶܗ ܝܶܫܽܘܥ ܐܰܒّܶܗ ܘܐܡ݄ܪ ܠܶܗ: ”ܝܰܐ ܒܢ̈ܳܬ̥ܳܐ ܕܽܐܘܪܶܫܠܶܡ ܠܳܐ ܒܳܟ̥ܺܝܬܽܘ ܐܰܥܠܺܝ، ܐܶܠܳܐ ܥܰܠ ܢܰܦܫ̈ܰܝܟ̥ܽܘ ܒܟ̥ܰܝܽܘ ܘܥܰܠ ܗ̄ܰܢ ܐܰܒܢ̈ܰܬ̥ܟ̥ܽܘ، 29ܥܰܠ ܕܟܰܐܠܶܗ ܟܳܐܬ̥݄ܢ ܗ̄ܰܝّܰܘܡ̈ܶܐ ܕܰܐܒّܶܗ ܓܕ݄ܐܡّܺܪ̱ܝ: ’ܛܽܘܒܳܐ ܠܰܥّܰܩܪ̈ܳܬ̥ܳܐ ܘܠܰܓّܰܘ̈ܶܐ ܕܠܳܐ ܡܰܘܠܰܕّ̥ܶܗ ܘܠܰܨّܰܕܪ̈ܳܢܶܐ ܕܠܳܐ ܡܰܘܢܰܩّܶܗ.‘ 30ܗ̄ܺܝ ܢܰܩܠܝܳܐ ܓ݄ܡܫܰܪܺܝܬܽܘ ܕ݄ܐܡّܺܪ̱ܝܬܽܘ ܠܰܛّܽܘܪ̈ܶܐ ܢܦܰܠܽܘ ܐܰܥܠܰܢ، ܘܠ̈ܰܬّܶܠܶܐ ܡܟܰܣܰܝܽܘ ܠܰܢ. 31ܕܶܐܢ ܒܽܗ̄ܘ ܪܰܘܛܳܐ ܪܰܛܺܝܒܳܐ ܗܰܢܺܝ ܟܣܰܝܡܺܝ، ܒܽܗ̄ܘ ܝܰܒܺܝܫܳܐ ܡ݄ܢ ܓܕܳܗ̄ܘܶܐ؟“ 32ܘܡܰܘܒܠܺܝ ܗ̄ܘܰܘ̱ ܐܰܥܡܶܗ ܬܪܶܝ ܚܪ̈ܶܢܶܐ، ܣܰܝܳܡ̈ܶܐ ܕܒܺܝܫ̈ܳܬ̥ܳܐ ܠܰܫܰܢ ܕܡ݄ܩܛܳܠܺܝ.
ܗ̄ܽܘ ܨܠܳܒ̥ܳܐ ܕܡܳܪܰܢ
33ܘܺܗ̄ܝ ܢܰܩܠܐ ܕܰܐܬ̥݄ܢ ܠܕܽܘܟܬ̥ܳܐ ܕ݄ܟܡ݄ܩܪܳܝܳܐ ܩܰܪܩܰܦܬܳܐ، ܨܠܽܒّ̥ܶܗ ܬܰܡܳܐ، ܘܠܰܗ̄ܢ݄ܟ ܗ̄ܰܣّܰܝܳܡ̈ܶܐ ܕܰܒّܺܝܫ̈ܳܬ̥ܳܐ، ܚܰܕ̱ ܡܽܗ̄ܘ ܝܰܡܺܝܢܰܝܕ̥ܶܗ ܘܚܰܕ̱ ܡܽܗ̄ܘ ܣܶܡܳܠܰܝܕ̥ܶܗ. 34ܘܗܺܝّܶܗ ܝܶܫܽܘܥ ܐܳܡܰܪ ܗ̄ܘܰܐ: ”ܐܰܒܳܐ، ܫܒܰܩ ܐܰܠّܶܗ (ܗ̄ܰܚ̈ܛܳܗܰܬّ̥ܶܗ) ܡܺܐܝܕ̥ܶܗ ܕܠ݄ܐ ܟ݄ܐܕ̥ܥܺܝ ܡ݄ܢ ܟܣܰܝܡܺܝ.“ ܘ݄ܡܦܰܠܰܓّ̥ܶܗ ܗ̄ܰܠܒܽܘܫ̈ܰܝܕ̥ܶܗ ܘ݄ܡܚܰܠܰܩّܶܗ ܐܰܥܠܰܝّܶܗ ܩܰܪܥܳܐ. 35ܘܥܰܡܳܐ ܩܳܝܰܡ ܗ̄ܘܰܐ ܘܚܳܙܶܐ، ܘܰܪّܺܝܫܳܢ̈ܶܐ ܣܬܶܝ ܡܒܰܙܚܺܝ ܗ̄ܘܰܘ̱ ܐܶܒܶܗ ܘ݄ܐܡّܺܪ̱ܝ ܗ̄ܘܰܘ̱: ”ܠܰܚܪ̈ܶܢܶܐ ܗܽܒ̥ ܠܶܗ ܚܰܝ̈ܶܐ، ܛܪܳܐ ܡܰܚܶܐ ܪܽܘܚܶܗ ܕܳܗ̄ܘܶܐ ܗܺܝّܶܗ ܡܫܺܝܚܳܐ ܗ̄ܽܘ ܓܰܒܝܳܐ ܕܰܐܠܳܗܳܐ.“ 36ܘܰܪّܽܘܡܳܝ̈ܶܐ ܣܬܶܝ ܡܒܰܙܚܺܝ ܗ̄ܘܰܘ̱ ܐܶܒܶܗ، ܘ݄ܡܩܰܕܡܺܝ ܗ̄ܘܰܘ̱ ܡܶܢܶܗ ܘ݄ܡܩܰܪܒ̥ܺܝ ܗ̄ܘܰܝ ܠܶܗ ܚܰܠܳܐ، 37ܘ݄ܐܡّܺܪ̱ܝ ܗ̄ܘܰܝ ܠܶܗ: ”ܐܶܢ ܗܰܬ ܗ̄ܰܬ ܗ̄ܽܘ ܡܰܠܟܳܐ ܕܰܝّܽܘܕ̥̈ܳܝܶܐ ܡܰܚܺܝ ܢܰܦܫܳܟ̥.“ 38ܘܟ݄ܬ ܗ̄ܘܰܐ ܣܬܶܝ ܠܰܠܥ݄ܠ ܡܶܢܶܗ ܟܬ̥ܰܒ̥ܬܳܐ ܕ݄ܟܬ̥ܺܝܒ̥ܳܐ ܒܽܗ̄ܘ ܝܰܘܢܳܝܳܐ ܘܒܽܗ̄ܘ ܪܽܘܡܳܝܳܐ ܘܒܽܗ̄ܘ ܥܶܒܪܳܝܳܐ: ”ܗܰܢܳܐ ܝܳܐ ܡܰܠܟܳܐ ܕܰܝّܽܘܕ̥̈ܳܝܶܐ.“ 39ܘܚܰܕ̱ ܡܰܢ̱ ܣّܰܝܳܡ̈ܶܐ ܕܰܒّܺܝܫ̈ܳܬ̥ܳܐ ܕ݄ܨܠܺܝܒ̥ܺܝ ܐܰܥܡܶܗ ܡܓܰܕܰܦ ܗ̄ܘܰܐ ܐܰܥܠܶܗ ܘܳܐܡ݄ܪ ܗ̄ܘܰܐ: ”ܐܶܢ ܗܰܬ ܗ̄ܰܬ ܡܫܺܝܚܳܐ، ܡܦܰܨܰܝ ܪܽܘܚܳܟ̥ ܘ݄ܡܦܰܨܰܝ ܐܶܠܰܢ ܣܬܶܝ.“ 40ܘ݄ܡܥܰܝܰܛ ܠܶܗ ܐܰܥܠܶܗ ܗ̄ܽܘ ܚܰܒ̥ܪܰܝܕ̥ܶܗ ܘܐܡ݄ܪ ܠܶܗ ܠܶܗ: ”ܘܠܳܐ ܡܰܢ̱ ܐܠܳܗܳܐ ܣܬܶܝ ܟܙܰܝܥ݄ܬ، ܘܗܰܬ ܣܬܶܝ ܒܶܗ ܒܽܗ̄ܘ ܕܺܝܢܰܢܳܐ ܗܰܬ؟ 41ܐܰܚܢܰܐ ܒܟܺܐܢܽܘܬ̥ܳܐ (ܒ݄ܫܪܳܪܳܐ) ܡܰܛܺܝ ܠܰܢ ܐܟ̥ ܕܽܗ̄ܘ ܡܶܕܶܐ ܕܣ݄ܡ ܠܰܢ، ܐܶܠܳܐ ܗܰܢܳܐ ܡܶܕܶܐ ܚܰܪܒܳܐ ܠܳܐ ܣ݄ܡ ܠܶܗ.“ 42ܘܐܡ݄ܪ ܠܶܗ ܠܝܶܫܽܘܥ: ”ܕܟܰܪ ܠܺܝ، ܡܳܪܝ، ܗ̄ܺܝ ܢܰܩܠܐ ܕܳܐܬ̥ܰܬ ܒܺܗ̄ܝ ܡܰܠܟܽܘܬ̥ܰܝܕ̥ܳܟ̥.“ 43ܘܐܡ݄ܪ ܠܶܗ ܠܶܗ ܝܶܫܽܘܥ: ”ܫܪܳܪܳܐ ܟܳܐܡܰܪ ܐ̱ܢܳܐ ܠܳܟ̥: ܐܰܕܝܰܘܡܰܐ ܐܰܥܡܺܝ ܓܕܳܗ̄ܘܰܬ ܒܽܗ̄ܘ ܦܰܪܕܰܝܣܳܐ.“
ܗ̄ܽܘ ܡܰܘܬܳܐ ܕܝܶܫܽܘܥ
ܡܬܝ 27:45‐56؛ ܡܪܩܘܣ 15:33‐41؛ ܝܘܚܢܢ 19:28‐30
44ܘܠܰܐܦ ܫܳܥܬ̥ܳܐ ܫܶܬ̥ (ܦܰܠܓܶܗ ܕܝܰܘܡܳܐ) ܗܰܘܺܝ ܥܰܡܛܳܢܳܐ ܥܰܠ ܟܽܘܠܰܗ ܗ̄ܺܝ ܐܰܪܥܳܐ ܗܳܠ ܫܳܥܬ̥ܳܐ ܬܫܰܥ (ܬܠ݄ܬ̥ ܒ݄ܬ̥݄ܪ ܦܰܠܓܶܗ ܕܝܰܘܡܳܐ). 45ܘܥܰܬܺܝܡܳܐ ܗ̄ܺܝ ܫܶܡܫܳܐ، ܘܫܺܝܩ ܗ̄ܽܘ ܣܰܬܪܳܐ ܕܽܗ̄ܘ ܬܰܪܥܳܐ ܕܽܗ̄ܘ ܗܰܝܟܠܳܐ ܡܽܗ̄ܘ ܦܰܠܓܳܐ. 46ܘܡܰܙܥܰܩ ܠܶܗ ܝܶܫܽܘܥ ܒܩܳܠܳܐ ܥܶܠܳܝܳܐ ܘܐܡ݄ܪ ܠܶܗ: ”ܝܰܐ ܗ̄ܽܘ ܐܰܒܰܝܕ̥ܺܝ، ܒܺܐܝܕ̥̈ܳܬ̥ܳܟ̥ ܓܡܰܚ݄ܬ ܐ̱ܢܳܐ ܗ̄ܺܝ ܪܽܘܚܰܝܕ̥ܺܝ.“ ܗܰܬ̥ܶܐ ܐܡܺܝܪܳܐ ܠܶܗ ܘ݄ܫܠܶܡ (ܬܰܝ݄ܡ). 47ܘܺܗ̄ܝ ܢܰܩܠܐ ܕ݄ܚܙܶܐ ܠܶܗ ܗ̄ܽܘ ܩܶܢܛܪܽܘܢܳܐ ܗ̄ܽܘ ܡܶܕܶܐ ܕܗܰܘܺܝ، ܡܫܰܒܰܚ ܠܶܗ ܠܰܐܠܳܗܳܐ ܘܐܡ݄ܪ ܠܶܗ: ”ܒ݄ܫܪܳܪܳܐ ܗ̄ܽܘ ܓܰܒ̥ܪܰܢܳܐ ܙܰܕܺܝܩܳܐ ܗ̄ܘܰܐ.“ 48ܘܟܽܘܠّܶܗ ܗ̄ܰܢ ܢܳܫ̈ܶܐ ܕܠܰܬܺܝܡܺܝ ܗ̄ܘܰܘ̱ ܠܺܗ̄ܝ ܚܙܰܝܬܰܬ̥ܶܐ، ܗ̄ܺܝ ܢܰܩܠܐ ܕ݄ܚܙܰܠّܶܗ ܗ̄ܽܘ ܡܶܕܶܐ ܕܗܰܘܺܝ، ܕܰܥܺܝܪܺܝ ܘܗ݄ܢّܶܝ ܟܡܳܚ݄ܢ ܥܰܠ ܨܰܕܪܰܝّܶܗ. 49ܘܩܰܝܡܺܝ ܗ̄ܘܰܘ̱ ܡܶܢ̱ ܪܽܘܚܩܳܐ ܟܽܘܠّܶܗ ܕܳܐܕ̥ܥܺܝ ܗ̄ܘܰܘ̱ ܕܝܶܫܽܘܥ، ܘܰܗ̄ܢ ܢܶܫ̈ܶܐ ܕܰܐܬ̥݄ܢ ܗ̄ܘܰܘ̱ ܐܰܥܡܶܗ ܡܽܗ̄ܘ ܓܠܺܝܠܳܐ، ܘܚܳܙ݄ܢ ܗ̄ܘܰܘ̱ ܗܰܢܺܝ.
ܗ̄ܽܘ ܩܒ̥ܳܪܳܐ ܕ݄ܡܫܺܝܚܳܐ ܗ̄ܽܘ ܦܳܪܽܘܩܰܝܕܰܢ
ܡܬܝ 27:57‐61؛ ܡܪܩܘܣ 15:42‐47؛ ܝܘܚܢܢ 19:38‐42
50ܘܚܰܕ̱ ܓܰܒ̥ܪܳܐ ܕ݄ܐܫܡܶܗ ܝܰܘܣܶܦ، ܗܰܕܳܡܳܐ ܒܽܗ̄ܘ ܡܰܘܬܒܳܐ ܕܰܝّܽܘܕ̥̈ܳܝܶܐ، ܡܺܗ̄ܝ ܡܕ̥ܺܝܢ̱ܬܳܐ ܕܪܳܡܬ̥ܳܐ ܕܺܝܗܽܘܕ̥، ܓܰܒ̥ܪܳܐ ܛܳܒ̥ܳܐ ܗ̄ܘܰܐ ܘܙܰܕܺܝܩܳܐ. 51ܗܰܢܳܐ ܠܰܝ̱ܬ ܗ̄ܘܰܐ ܥܰܡ ܗ̄ܽܘ ܨܶܒܝܳܢܳܐ ܕܽܗ̄ܘ ܡܰܘܬ̥ܒܳܐ ܘܠܳܐ ܡܰܩܒܰܠ ܗ̄ܘܰܐ ܗ̄ܽܘ ܡܶܕܶܐ ܕܣ݄ܡّܶܗ. ܘܢܳܛܰܪ ܗ̄ܘܰܐ ܗ̄ܺܝ ܡܰܠܟܽܘܬ̥ܳܐ ܕܰܐܠܳܗܳܐ، 52ܗܰܢܳܐ ܥܰܒ݄ܪ ܠܓܰܒ ܦܺܝܠܰܛܳܘܣ ܘܰܐܒ݄ܥ ܗ̄ܽܘ ܦܰܓ̥ܪܳܐ ܕܝܶܫܽܘܥ. 53ܘܡܰܢܚܰܬ ܠܶܗ ܘ݄ܡܟܰܢܦܶܐ ܠܶܗ ܒ݄ܚܝܳܨܳܐ ܕܟܶܬܳܢܳܐ ܘܡܰܚܰܬ ܠܶܗ ܒܩܰܒ̥ܪܳܐ ܢܩܺܝܪܳܐ ܕܢܳܫܳܐ ܗܶܫ ܡܶܢ̱ ܡܶܩ݄ܕ̱ܡ ܠܳܐ ܡܬܰܚܰܬ ܗ̄ܘܰܐ ܐܶܒܶܗ. 54ܘܽܗ̄ܘ ܝܰܘܡܳܐ ܥܪܽܘܒ̥ܬܳܐ ܗ̄ܘܰܐ، ܘܺܗ̄ܝ ܫܰܒܬ̥ܳܐ ܡܫܰܪܶܐ ܠܰܗ ܕܢܳܦܩܳܐ. 55ܘܩܰܪ̈ܺܝܒ̥ܶܐ ܗ̄ܘܰܝܢܶܝ ܗ̄ܰܢ ܢܶܫ̈ܶܐ ܕܰܐܬ̥݄ܢ ܗ̄ܘܰܘ̱ ܐܰܥܡܶܗ ܡܽܗ̄ܘ ܓܠܺܝܠܳܐ، ܘ݄ܚܙܰܠّܶܗ ܗ̄ܽܘ ܩܰܒ̥ܪܳܐ ܘܰܐܝܕܰܪܒܳܐ ܡܰܚ݄ܬ ܐܶܒܶܗ ܗ̄ܽܘ ܦܰܓ̥ܪܳܐ. 56ܘܕܰܥܺܝܪܺܝ ܡܛܰܝܰܒّܶܗ ܒܰܣܡܳܐ ܘܗܶܪ̈ܽܘܡܶܐ. ܘܒܺܗ̄ܝ ܫܰܒܬ̥ܳܐ ܟܰܠ݄ܢ ܐܟ̥ ܕܽܗ̄ܘ ܦܽܘܩܕܳܢܳܐ (ܕܽܗ̄ܘ ܢܳܡܽܘܣܳܐ).
Právě zvoleno:
ܡܓܰܠܝܘܢ ܕܠܘܩܐ 23: ܟܬܒܐ
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Suryoyo Bible © 2024 Aramaic Bible Translation
