ܡܓܰܠܝܘܢ ܕܠܘܩܐ 22
22
ܗ̄ܽܘ ܚܰܫܳܐ ܕܡܳܪܰܢ
ܕܽܘܒܳܪܳܐ ܕܥܰܠ ܝܶܫܽܘܥ
ܡܬܝ 26:1‐5؛ 26:41‐61؛ ܡܪܩܘܣ 14:1‐2؛ 14:10‐11؛ ܝܘܚܢܢ 11:45‐53
1ܘܩܰܪܽܒ̥ ܗ̄ܘܰܐ ܗ̄ܽܘ ܥܶܐܕ̥ܳܐ ܕܰܦّܰܛܺܝܪ̈ܶܐ ܕ݄ܟܡ݄ܩܪܶܐ ܦܶܨܚܳܐ. 2ܘܰܪّܰܒ̈ܶܐ ܕܰܟّܳܗ̈ܢܶܐ ܘܰܣّܳܦܪ̈ܶܐ ܟܳܪܟ̥ܺܝ ܗ̄ܘܰܘ̱ ܕܰܐܝܕܰܪܒܳܐ ܕܩܳܛܠܺܝ ܠܶܗ، ܥܰܠ ܕܙܰܝܥܺܝ ܗ̄ܘܰܘ̱ ܡܽܗ̄ܘ ܥܰܡܳܐ.
ܢܶܟ̥ܠܳܐ ܕܺܝܗܽܘܕ̥ܳܐ
3ܘܥܰܒ݄ܪ ܗ̄ܘܰܐ ܗ̄ܽܘ ܣܳܛܳܢܳܐ ܒܺܝܗܽܘܕ̥ܳܐ ܕ݄ܟܡ݄ܩܪܶܐ ܣܟ̥ܰܪܝܽܘܛܳܐ، ܕܟ݄ܬ ܗ̄ܘܰܐ ܚܰܕ̱ ܡܰܢ̱ ܬܪܰܥܣܰܪ. 4ܘܰܐܙّܶܗ ܫܓ̥ܺܝܠ ܥܰܡ ܗ̄ܰܪّܰܒ̈ܶܐ ܕܰܟّܳܗ̈ܢܶܐ ܘܰܣّܳܦܪ̈ܶܐ ܘܰܪّܺܝܫܳܢ̈ܶܐ ܕܰܗ̄ܢ ܢܳܛܽܘܪ̈ܶܐ ܕܽܗ̄ܘ ܗܰܝܟܠܳܐ ܠܰܫܰܢ ܕܡܰܫܠܰܡّܶܗ. 5ܘ݄ܦܨܺܝܚܺܝ ܘ݄ܡܘܰܥܰܕّܶܗ ܕܳܗ̄ܒ݄ܢ ܠܶܗ ܙܽܘܙ̈ܶܐ. 6ܘܗܺܝّܶܗ ܡܘܰܥܰܕّܶܗ، ܘܟܳܪܰܟ̥ ܗ̄ܘܰܐ ܥܰܠ ܦܽܘܪܣܳܐ ܕܡܰܫܠܰܡ ܠܶܗ ܐܰܠّܶܗ ܐܶܠܳܐ ܠܳܐ ܩ݄ܕ̱ܡ ܗ̄ܰܢ ܢܳܫ̈ܶܐ (ܗ̄ܽܘ ܟܶܢܫܳܐ).
ܗ̄ܽܘ ܛܽܘܝܳܒܳܐ ܕܽܗ̄ܘ ܦܶܨܚܳܐ
ܡܬܝ 26:17‐25؛ ܡܪܩܘܣ 14:12‐21؛ ܝܘܚܢܢ 13:21‐30
7ܘܡܰܛܺܝ ܗ̄ܽܘ ܝܰܘܡܳܐ ܕܰܦّܰܛܺܝܪ̈ܶܐ ܕܶܐܒܶܗ ܟ݄ܬ ܗ̄ܘܰܐ ܥܝܳܕ̥ܳܐ ܕܢܳܚܪܺܝ (ܗ̄ܽܘ ܦܰܪܳܐ ܕܽܗ̄ܘ) ܦܶܨܚܳܐ. 8ܘ݄ܡܫܰܕܰܪ ܠܶܗ ܝܶܫܽܘܥ ܠܟܶܐܦܳܐ ܘ݄ܠܝܽܘܚܰܢܳܢ ܘܐܡ݄ܪ ܠܰܗ ܠّܶܗ: ”ܙܳܟ̥ܽܘ ܡܛܰܝܶܒܽܘ ܠܰܢ ܗ̄ܽܘ ܦܶܨܚܳܐ ܕܳܐܟ̥ܠܺܝܢܰܐ.“ 9ܘܗ݄ܢّܶܝ ܐܡ݄ܪّܰܗ ܠܶܗ: ”ܐܰܝܟܳܐ ܟ݄ܐܒܥܰܬ ܕ݄ܡܛܰܝܒܺܝܢܰܐ؟“ 10ܐܡ݄ܪ ܠܰܗ ܠّܶܗ: ”ܟܰܐܠܶܗ ܗ̄ܺܝ ܢܰܩܠܐ ܕܥܳܒܪܺܝܬܽܘ ܠܺܗ̄ܝ ܡܕ̥ܺܝܢ̱ܬܳܐ، ܓܚܳܙܰܠܟ̥ܽܘ ܚܰܕ̱ ܓܰܒ̥ܪܳܐ ܕܟܳܛܳܥ݄ܢ ܫܰܪܒܳܐ ܕܡܰܝ̈ܶܐ، ܙܳܟ̥ܽܘ ܒ݄ܬ̥ܪܶܗ. 11ܘܰܐܝܟܳܐ ܕܥܳܒ݄ܪ، ܐܡܰܪܽܘ ܠܽܗ̄ܘ ܡܳܪܳܐ ܕܽܗ̄ܘ ܒܰܝܬܳܐ: ܗ̄ܽܘ ܡܰܠܦܳܢܰܝܕ̥ܰܢ ܟܳܐܡ݄ܪ: ܐܰܝܟܳܐ ܝܳܐ ܗ̄ܺܝ ܕܽܘܟܬ̥ܳܐ ܕ݄ܓܕܳܐܟ̥ܰܠ ܐ̱ܢܳܐ ܐܶܒܰܗ ܗ̄ܽܘ ܦܶܨܚܳܐ ܥܰܡ ܗ̄ܰܬّܰܠܡܺܝܕ̥̈ܰܝܕ̥ܺܝ؟ 12ܘܗܺܝّܶܗ ܓܡܰܚܘܰܠܟ̥ܽܘ ܥܶܠܺܝܬ̥ܳܐ ܚܕ̥ܳܐ ܪܰܒܬ̥ܳܐ ܕܟ݄ܬ ܝܳܐ ܦܪܺܝܣܬܳܐ، ܬܰܡܳܐ ܡܛܰܝܶܒܽܘ.“ 13ܘܰܐܙّ݄ܢ ܚܙܰܠّܶܗ ܐܟ̥ ܕܐܡ݄ܪ ܠܰܗ ܠّܶܗ، ܘ݄ܡܛܰܝܰܒّܶܗ ܗ̄ܽܘ ܦܶܨܚܳܐ.
ܗ̄ܺܝ ܚܫܰܡܬܳܐ ܕܰܐܪّܳܙ̈ܶܐ
ܡܬܝ 26:26‐30؛ ܡܪܩܘܣ 14:22‐26؛ ܩܘܪ̈ܢܬܝܐ ܐ 11:23‐25
14ܘܺܗ̄ܝ ܢܰܩܠܐ ܕܗܰܘܺܝ ܗ̄ܽܘ ܙܰܒܢܳܐ، ܐܰܬ̥ܺܝ ܝܶܫܽܘܥ ܝܰܬܽܒ̥ ܥܰܡ ܗ̄ܰܬܪܰܥܣܰܪ ܫܠܺܝܚ̈ܶܐ ܠܽܗ̄ܘ ܡܽܐܘܟܠܳܐ. 15ܘܐܡ݄ܪ ܠܰܗ ܠّܶܗ: ”ܪܶܓܬ̥ܳܐ ܪܰܝ݄ܓ̥ ܠܺܝ ܕܽܗ̄ܘ ܦܶܨܚܰܢܳܐ ܐܳܟ̥ܰܠ ܐ̱ܢܳܐ ܐܰܥܡܰܝܟ̥ܽܘ ܡܶܩ݄ܕ̱ܡ ܡܽܗ̄ܘ ܚܰܫܰܝܕ̥ܺܝ. 16ܘܟܳܐܡܰܪ ܐ̱ܢܳܐ ܠܟ̥ܽܘ: ܡܳܐܥܕܳܐ ܠ݄ܐ ܟܳܐܟ̥ܰܠܢܶܗ ܗܳܠ ܕܟܳܡ݄ܠ ܒܺܗ̄ܝ ܡܰܠܟܽܘܬ̥ܳܐ ܕܰܐܠܳܗܳܐ.“ 17ܘܡ݄ܕ ܠܶܗ ܗ̄ܽܘ ܟܳܣܳܐ ܘܡܰܘܕܶܐ ܠܶܗ ܘܐܡ݄ܪ ܠܶܗ: ”ܡܽܘܕܽܘ ܗܰܢܳܐ ܘ݄ܡܦܰܠܶܓ̥ܽܘ ܒܰܝܢܳܬ̥ܰܝܟ̥ܽܘ. 18ܘܟܳܐܡܰܪ ܐ̱ܢܳܐ ܠܟ̥ܽܘ: ܠ݄ܐ ܓܫܳܬܶܐ ܐ̱ܢܳܐ ܡܽܗ̄ܘ ܦܺܐܪܳܐ ܕܺܗ̄ܝ ܣܰܬܳܐ ܗܳܠ ܕܳܐܬ̥ܝܳܐ ܗ̄ܺܝ ܡܰܠܟܽܘܬ̥ܳܐ ܕܰܐܠܳܗܳܐ.“ 19ܘܡ݄ܕ ܠܶܗ ܗ̄ܽܘ ܠܰܚܡܳܐ ܘܡܰܘܕܶܐ ܠܶܗ ܘ݄ܩܨܶܐ ܠܶܗ ܘܗܽܒ̥ ܠܰܗ ܠّܶܗ ܘܐܡ݄ܪ ܠܶܗ: ”ܗܰܢܳܐ ܝܳܐ ܗ̄ܽܘ ܦܰܓ̥ܪܰܝܕ̥ܺܝ ܕܠܰܫܰܢܰܝܟ̥ܽܘ ܟܡܺܝܬܰܗܒ̥ܶܐ. ܣܽܘܡܽܘ ܗܰܢܳܐ ܕܽܘܟ̥ܪܳܢܳܐ ܐܶܠܺܝ.“ 20ܘܗܰܘܟ̥ܰܐ ܣܬܶܝ ܥܰܠ ܗ̄ܽܘ ܟܳܣܳܐ، ܒ݄ܬ̥݄ܪ ܕܡܰܚܫܰܡّܶܗ، ܐܡ݄ܪ ܠܶܗ: ”ܗܰܢܳܐ ܝܳܐ ܗ̄ܽܘ ܟܳܣܳܐ ܕܺܝܰܬܺܝܩܺܝ (ܗ̄ܽܘ ܩܝܳܡܳܐ) ܚܰܕ̱ܬ̥ܳܐ ܒܽܗ̄ܘ ܐܰܕܡܰܝܕ̥ܺܝ ܕܟܳܡܺܝܒ݄ܙ ܡܶܢ̱ ܚܠܳܦܰܝܟ̥ܽܘ. 21ܘܟܰܐܠܰܗ ܗ̄ܺܝ ܐܺܝܕ̥ܳܐ ܕܽܗ̄ܘ ܡܰܫܠܡܳܢܰܝܕ̥ܺܝ ܥܰܠ ܗ̄ܽܘ ܦܳܬܽܘܪܳܐ. 22ܘܰܐܒܪܶܗ ܕܢܳܫܳܐ ܐܰܙܳܠܳܐ ܝܳܐ ܐܟ̥ ܕ݄ܡܥܰܝ݄ܢ ܐܶܠܶܗ، ܐܶܠܳܐ ܘܳܝܳܐ ܠܽܗ̄ܘ ܓܰܒ̥ܪܰܘܳܐ ܕܒܺܐܝܕ̥ܶܗ ܓܡܺܝܬܰܫܠ݄ܡ.“ 23ܘ݄ܡܫܰܪܰܠّܶܗ ܕ݄ܡܥܰܩܒܺܝ ܒܰܝܢܳܬ̥ܰܝّܶܗ ܕܡܰܢܝܳܐ ܡ݄ܢّܶܗ ܗܰܘܳܐ ܕܓ݄ܕܣܳܝ݄ܡ ܠܰܗ.
ܗ̄ܽܘ ܪܺܝܫܳܐ ܡܫܰܡܫܳܢܳܐ ܝܳܐ
24ܘܗܰܘܺܝ ܡܰܐܡܪܳܐ ܘܬܶܢܳܝܳܐ ܒܰܝܢܳܬ̥ܰܝّܶܗ ܥܰܠ ܕܡܰܢܝܳܐ ܗ̄ܽܘ ܪܰܒܳܐ ܕܒܰܝܢܳܬ̥ܰܝّܶܗ. 25ܘܝܶܫܽܘܥ ܐܡ݄ܪ ܠܰܗ ܠّܶܗ: ”ܗ̄ܰܡّܰܠܟ̈ܶܐ ܕܰܥّܰܡ̈ܶܐ ܡܳܪ̈ܶܐ ܢܶܝ ܥܰܠ ܗ̄ܰܥّܰܡ̈ܰܬّ̥ܶܗ، ܘܰܫّܰܠܺܝ̈ܛܶܐ ܕܟ݄ܬܢܶܝ ܐܰܥܠܰܝّܶܗ ܟܡ݄ܩܪ݄ܢ ܣܰܝܳܡ̈ܶܐ ܕܛܳܒ̥̈ܳܬ̥ܳܐ. 26ܘܗܰܬܽܘ ܠܳܐ ܗܰܘܟ̥ܰܐ. ܐܶܠܳܐ ܐܰܝܢܰܐ ܕܟ݄ܬ ܝܳܐ ܪܰܒ ܒܰܝܢܳܬ̥ܰܝܟ̥ܽܘ ܛܪܳܐ ܗ̄ܘܶܐ ܐܟ̥ ܕܽܗ̄ܘ ܙܥܽܘܪܳܐ، ܘܰܐܝܢܰܐ ܕܟ݄ܬ ܝܳܐ ܪܺܝܫܳܢܳܐ ܐܟ̥ ܕܽܗ̄ܘ ܡܫܰܡܫܳܢܳܐ ܗܳܘܶܐ. 27ܡܰܢܝܳܐ ܕܪܰܒ؟ ܕܟ݄ܬ ܝܳܐ ܝܰܬܺܝܒ̥ܳܐ ܥܰܠ ܗ̄ܽܘ ܦܳܬܽܘܪܳܐ ܐܰܘ ܗܰܘܳܐ ܕ݄ܡܫܰܡ݄ܫ؟ ܠܰܝ̱ܬ ܝܳܐ ܗ̄ܽܘ ܝܰܬܺܝܒ̥ܳܐ ܥܰܠ ܗ̄ܽܘ ܦܳܬܽܘܪܳܐ؟ ܘܳܐܢܳܐ ܒܰܝܢܳܬ̥ܰܝܟ̥ܽܘ ܐ̱ܢܳܐ ܐܟ̥ ܕܰܗ̄ܘܳܐ ܕܟܳܡܫܰܡ݄ܫ. 28ܘܗܰܬܽܘ ܗ̄ܬܽܘ ܕܩܰܝܡܺܝܬܽܘ ܐܰܥܡܺܝ ܒܰܗ̄ܢ ܢܶܣܝ̈ܽܘܢܰܝܕ̥ܺܝ، 29ܘܳܐܢܳܐ ܟ݄ܡܘܰܥܰܕܢܰܢܟ̥ܽܘ، ܐܟ̥ ܕ݄ܡܘܰܥܰܕ ܠܶܗ ܠܺܝ ܗ̄ܽܘ ܐܰܒܰܝܕ̥ܺܝ، ܡܰܠܟܽܘܬ̥ܳܐ، 30ܕܳܐܟ̥ܠܺܝܬܽܘ ܘܫܳܬܺܝܬܽܘ ܥܰܠ ܗ̄ܽܘ ܦܳܬܽܘܪܳܐ ܕܺܗ̄ܝ ܡܰܠܟܽܘܬ̥ܰܝܕ̥ܺܝ، ܘ݄ܓܝ݄ܬܒ̥ܺܝܬܽܘ ܥܰܠ ܗ̄ܰܟّܽܘܪ̈ܣܝܶܐ ܘܕܰܝܢܺܝܬܽܘ ܗ̄ܰܬܪܰܥܣܰܪ ܫܰܒ̈ܛܶܐ ܕܺܐܝܣܪܳܐܶܝܠ.“
ܢܒܺܝܽܘܬ̥ܳܐ ܥܰܠ ܗ̄ܽܘ ܟܦܳܪܳܐ ܕܦܶܛܪܽܘܣ
ܡܬܝ 26:13‐53؛ ܡܪܩܘܣ 14:27‐31؛ ܝܘܚܢܢ 13:36‐38
31ܘܐܡ݄ܪ ܠܶܗ ܝܶܫܽܘܥ ܠܫܶܡܥܽܘܢ: ”ܫܶܡܥܽܘܢ، ܟܰܐܠܶܗ ܗ̄ܽܘ ܣܳܛܳܢܳܐ ܟܳܐܒ݄ܥ ܕܥܳܪܰܒ̥ܟ̥ܽܘ ܐܟ̥ ܕܰܚّܶܛ̈ܶܐ. 32ܘܳܐܢܳܐ ܡܨܰܠܶܐ ܠܺܝ ܠܰܫܰܢܳܟ̥ ܕܠܳܐ ܡܣܰܟܪܰܬ ܗ̄ܺܝ ܗܰܝܡܳܢܽܘܬ̥ܰܝܕ̥ܳܟ̥. ܘܗܰܬ ܣܬܶܝ، ܒܙܰܒܢܳܐ، ܕܥܰܪ ܘܚܘܿܨ ܗ̄ܰܢ ܐܰܚ̈ܽܘܢܳܢܰܝܕ̥ܳܟ̥ ܒܽܗ̄ܘ ܫܪܳܪܳܐ.“ 33ܘܫܶܡܥܽܘܢ ܐܡ݄ܪ ܠܶܗ ܠܶܗ: ”ܡܳܪܝ، ܐܰܥܡܳܟ̥ ܡܛܰܝܒܳܐ ܐ̱ܢܳܐ ܠܽܗ̄ܘ ܚܒܽܘܫܝܳܐ ܘܠܽܗ̄ܘ ܡܰܘܬܳܐ.“ 34ܘܐܡ݄ܪ ܠܶܗ ܠܶܗ ܝܶܫܽܘܥ: ”ܟܳܐܡܰܪ ܐ̱ܢܳܐ ܠܳܟ̥، ܫܶܡܥܽܘܢ، ܐܰܕܝܰܘܡܰܐ، ܡܶܩ݄ܕ̱ܡ ܕܩܳܪܶܐ ܗ̄ܽܘ ܙܳܓ̥ܳܐ، ܬܠ݄ܬ̥ ܟܳܪ̈ܶܐ ܓܟ݄ܦܪܰܬ ܕܠ݄ܐ ܟ݄ܐܕ̥ܥܰܬ ܠܺܝ.“
ܗܘܰܝܽܘ ܡܛܰܝܒ̈ܶܐ
35ܘܐܡ݄ܪ ܠܰܗ ܠّܶܗ: ”ܗ̄ܺܝ ܢܰܩܠܐ ܕ݄ܡܫܰܕܰܪ ܠܺܝ ܠܟ̥ܽܘ ܕܠܳܐ ܟܺܝ̈ܣܶܐ ܘ݄ܕܠܳܐ ܩܽܘܪ̈ܥܶܐ ܘܠܳܐ ܡܣܳܢ̈ܶܐ، ܩܰܝ ܢܰܩ݄ܨܟ̥ܽܘ ܡܶܕܶܐ؟“ ܐܡ݄ܪّܰܗ ܠܶܗ: ”ܘܠܳܐ ܡܶܕܶܐ.“ 36ܘܐܡ݄ܪ ܠܰܗ ܠّܶܗ: ”ܡܳܐܥܕܳܐ، ܡܰܢ ܕܟ݄ܬ ܠܶܗ ܟܺܝܣܳܐ ܛܪܳܐ ܡܳܝܰܕ ܠܶܗ، ܘܗܰܘܟ̥ܰܐ ܣܬܶܝ ܩܽܘܪܥܳܐ. ܘܡܰܢ ܕܠܰܝ̱ܬ ܠܶܗ ܣܰܝܦܳܐ ܛܪܳܐ ܡܙܰܒ݄ܢ ܗ̄ܽܘ ܠܒܽܘܫܰܝܕ̥ܶܗ ܘܙܳܒ̥ܰܢ ܠܶܗ ܣܰܝܦܳܐ. 37ܘܟܳܐܡܰܪ ܐ̱ܢܳܐ ܠܟ̥ܽܘ: ܗܰܬ̥ܶܐ ܣܬܶܝ ܕܟ݄ܬ ܝܳܐ ܟܬ̥ܽܒ̥ܬܳܐ ܠܳܙ݄ܡ ܕܟܳܡܠܳܐ ܐܶܒܺܝ: ’ܥܰܡ ܗ̄ܰܚّܰܛܳܝ̈ܶܐ ܚܫܺܝܒ̥،‘ ܡܺܐܝܕ̥ܶܗ ܕܟܽܘܠّܶܗ (ܕ݄ܟܬ̥ܺܝܒ̥ܺܝ) ܕܰܐܥܠܺܝ ܟܰܡܺܝܠܺܝ.“ 38ܘܗ݄ܢّܶܝ ܐܡ݄ܪّܰܗ ܠܶܗ: ”ܡܳܪܰܢ، ܟܰܐܠܶܗ ܗܰܪܟܶܐ ܟܺܝܬ ܬܪܶܝ ܣܰܝ̈ܦܶܐ.“ ܘܐܡ݄ܪ ܠܰܗ ܠّܶܗ: ”ܟܡܰܟܦ݄ܢ.“
ܗ̄ܺܝ ܨܠܽܘܬ̥ܳܐ ܕܝܶܫܽܘܥ ܕܥܰܠ ܛܽܘܪ ܙܰܝ̈ܬܶܐ
ܡܬܝ 26:36‐46؛ ܡܪܩܘܣ 14:32‐42
39ܘܢܰܦ݄ܩ ܘܰܐܙّܶܗ، ܐܟ̥ ܕܽܗ̄ܘ ܥܝܳܕ̥ܰܝܕ̥ܶܗ، ܠܽܗ̄ܘ ܛܽܘܪܳܐ ܕܒܶܝܬ̥ ܙܰܝ̈ܬܶܐ. ܘܰܐܙّ݄ܢ ܒ݄ܬ̥ܪܶܗ ܗ̄ܰܬّܰܠܡܺܝܕ̥̈ܰܝܕ̥ܶܗ. 40ܘܺܗ̄ܝ ܢܰܩܠܐ ܕܡܰܛܺܝ ܠܺܗ̄ܝ ܕܽܘܟܬ̥ܳܐ، ܐܡ݄ܪ ܠܰܗ ܠّܶܗ: ”ܡܨܰܠܰܝܽܘ ܕܠܳܐ ܥ݄ܒܪܺܝܬܽܘ ܠܢܶܣܝܽܘܢܳܐ.“ 41ܘܪܰܚ݄ܩ ܡ݄ܢّܶܗ ܐܟ̥ ܕܚܶܠܰܩܬܳܐ ܕܟܶܐܦܳܐ، ܘ݄ܒܪ݄ܟ ܠܶܗ ܘ݄ܡܨܰܠܶܐ ܗ̄ܘܰܐ، 42ܘܐܡ݄ܪ ܠܶܗ: ”ܐܰܒܳܐ، ܐܶܢ ܟ݄ܐܒܥܰܬ، ܛܪܳܐ ܥܳܒ݄ܪ ܡܶܢܺܝ ܗ̄ܽܘ ܟܳܣܰܢܳܐ، ܐܶܠܳܐ ܛܪܳܐ ܗ̄ܘܶܐ ܗ̄ܽܘ ܨܶܒܝܳܢܰܝܕ̥ܳܟ̥ ܘܠܳܐ ܕܺܝܕ̥ܺܝ.“ 43ܘ݄ܚܙܶܐ ܐܶܠܶܗ ܡܰܠܰܐܟ̥ܳܐ ܡܺܗ̄ܝ ܫܡܰܝܳܐ ܕܡܰܩܘܶܐ ܠܶܗ. 44ܘܺܗ̄ܝ ܢܰܩܠܐ ܕܗܰܘܺܝ ܒܙܽܘܥܬ̥ܳܐ ܕܠܳܐ ܟܠܳܝܳܐ ܡܨܰܠܶܐ ܗ̄ܘܰܐ، ܘܗܰܘܝܳܐ ܗ̄ܺܝ ܕܰܥܬܰܝܕ̥ܶܗ ܐܟ̥ ܕܢܽܘܩ̈ܛܶܐ ܕܰܐܕܡܳܐ ܩܰܠܳܥܳܐ، ܘܢܰܦ݄ܠ ܥܰܠ ܗ̄ܺܝ ܐܰܪܥܳܐ. 45ܘܩܰܝ݄ܡ ܡܺܗ̄ܝ ܨܠܽܘܬ̥ܰܝܕ̥ܶܗ ܘܰܐܬ̥ܺܝ ܓܰܒ ܗ̄ܰܬّܰܠܡܺܝܕ̥̈ܰܝܕ̥ܶܗ، ܘ݄ܚܙܰܠّܶܗ ܕܰܡܺܝܟ̥̈ܶܐ ܡܺܗ̄ܝ ܥܺܝܩܽܘܬ̥ܳܐ. 46ܘܐܡ݄ܪ ܠܰܗ ܠّܶܗ: ”ܡ݄ܢܝܳܐ ܝܳܐ ܕܕܰܡܺܝ̈ܟ̥ܶܐ ܗܰܬܽܘ؟ ܩܽܘܡܽܘ ܘ݄ܡܨܰܠܰܝܽܘ ܕܠܳܐ ܥ݄ܒܪܺܝܬܽܘ ܠܢܶܣܝܽܘܢܳܐ.“
ܝܺܗܽܘܕ̥ܳܐ ܟܡܰܫܠܶܡ ܗ̄ܽܘ ܪܰܒܰܝܕ̥ܶܗ
ܡܬܝ 26:47‐56؛ ܡܪܩܘܣ 14:43‐50؛ ܝܘܚܢܢ 18:3‐11
47ܘܗܶܫ ܗܺܝّܶܗ ܟܡ݄ܫܓ̥݄ܠ، ܟܰܐܠܶܗ ܟܶܢܫܳܐ ܘܗܰܘܳܐ ܕ݄ܟܡ݄ܩܪܶܐ ܝܺܗܽܘܕ̥ܳܐ، ܚܰܕ̱ ܡܰܢ̱ ܬܪܰܥܣܰܪ، ܟܳܐܬ̥ܶܐ ܩܽܘܕ̱ܡܰܝّܶܗ، ܘ݄ܡܩܰܕܰܡ ܠܶܗ ܠܓܰܒ ܝܶܫܽܘܥ، ܘ݄ܢܫ݄ܩ ܠܶܗ. ܘܗܰܬ̥ܶܐ ܗ̄ܘܰܐ ܗ̄ܺܝ ܐܳܬ̥ܳܐ ܕܗܽܒ̥ ܠܰܗ ܠّܶܗ: ܐܰܝܢܰܐ ܕܢܳܫܰܩܢܶܗ ܗܺܝّܶܗ ܝܳܐ. 48ܐܡ݄ܪ ܠܶܗ ܠܶܗ ܝܶܫܽܘܥ: ”ܝܰܐ ܝܺܗܽܘܕ̥ܳܐ، ܒ݄ܢܫܰܩܬܳܐ ܟܡܰܫܠܡܰܬ ܐܰܒܪܶܗ ܕܢܳܫܳܐ؟“ 49ܘܺܗ̄ܝ ܢܰܩܠܐ ܕ݄ܚܙܰܠّܶܗ ܗܰܢܺܝ ܕܰܐܥܡܶܗ ܗ̄ܽܘ ܡܶܕܶܐ ܕܗܰܘܺܝ ܐܡ݄ܪّܰܗ ܠܶܗ: ”ܡܳܪܰܢ، ܟܡܳܚܺܝܢܰܢّܶܗ ܒܽܗ̄ܘ ܣܰܝܦܳܐ؟“ 50ܘܚܰܕ̱ ܡ݄ܢّܶܗ ܡܚܶܐ ܠܶܗ ܗ̄ܽܘ ܓܪܶܝܥܳܐ ܕܽܗ̄ܘ ܪܰܒܳܐ ܕܰܟّܳܗ̈ܢܶܐ ܘ݄ܩܛ݄ܥ ܠܶܗ ܐܰܕ̥ܢܶܗ ܕܽܗ̄ܘ ܝܰܡܺܝܢܳܐ. 51ܘܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܶܗ: ”ܟܠܰܝܽܘ ܗܳܠ ܠܰܗ̄ܪܟܶܐ.“ ܘܓ݄ܫ ܠܶܗ ܒܺܗ̄ܝ ܐܰܕ̥ܢܳܐ ܕܰܗ̄ܘܳܐ ܕ݄ܡܚܶܐ، ܘܡܰܢ݄ܚ ܠܶܗ. 52ܘܐܡ݄ܪ ܠܶܗ ܝܶܫܽܘܥ ܠܰܗ̄ܢ݄ܟ ܕܰܐܬ̥݄ܢ ܐܰܥܠܶܗ، ܗ̄ܰܪّܰܒ̈ܶܐ ܕܰܟّܳܗ̈ܢܶܐ ܘܰܩّܰܫ̈ܶܐ ܘܰܪّܺܝܫܳܢ̈ܶܐ ܕܰܗ̄ܢ ܢܳܛܽܘܪ̈ܶܐ ܕܽܗ̄ܘ ܗܰܝܟܠܳܐ: ”ܐܟ̥ ܕܥܰܠ ܚܰܕ̱ ܩܰܛܳܠܳܐ ܘܓܰܢܳܒ̥ܳܐ ܢܰܦܺܝܩܺܝܬܽܘ ܒܣܰܝ̈ܦܶܐ ܘ݄ܒܚܰܛܪ̈ܳܬ̥ܳܐ ܕܙܳܒܛܺܝܬܽܘ ܠܺܝ؟“ 53ܟܽܘܠ ܝܰܘܡܳܐ ܐܰܥܡܰܝܟ̥ܽܘ ܗ̄ܘܰܝ ܐ̱ܢܳܐ ܒܽܗ̄ܘ ܗܰܝܟܠܳܐ، ܘܠܳܐ ܡܰܚ݄ܬܟ̥ܽܘ ܐܺܝܕ̥ܳܐ ܐܰܥܠܺܝ، ܐܶܠܳܐ ܗܰܬ̥ܶܐ ܝܳܐ ܗ̄ܺܝ ܫܳܥܬ̥ܰܬ̥ܟ̥ܽܘ، ܘܽܗ̄ܘ ܫܽܘܠܛܳܢܳܐ ܕܽܗ̄ܘ ܚܶܫܽܘܟ̥ܳܐ.
ܗ̄ܽܘ ܟܦܳܪܳܐ ܕܫܶܡܥܽܘܢ
ܡܬܝ 26:57‐58؛ 26:69‐75؛ ܡܪܩܘܣ 14:53‐54؛ 14:66‐72؛ ܝܘܚܢܢ 18:12‐18؛ 18:25‐27
54ܘ݄ܙܒ݄ܛّܶܗ ܘܡܰܝܬܰܠّܶܗ ܠܽܗ̄ܘ ܒܰܝܬܳܐ ܕܽܗ̄ܘ ܪܰܒܳܐ ܕܰܟّܳܗ̈ܢܶܐ. ܘܫܶܡܥܽܘܢ ܐܳܬ̥ܶܐ ܗ̄ܘܰܐ ܒ݄ܬ̥ܪܶܗ ܡܶܢ̱ ܪܰܚܽܘܩܳܐ. 55ܘܡܰܕܠܰܩّܶܗ ܢܽܘܪܳܐ ܒܦܰܠܓܰܗ ܕܺܗ̄ܝ ܕܳܪܬܳܐ، ܘܝܳܬܒ̥ܺܝ ܗ̄ܘܰܘ̱ ܚܶܕ̥ܳܪܰܗ، ܘܫܶܡܥܽܘܢ ܣܬܶܝ ܝܳܬܰܒ̥ ܗ̄ܘܰܐ ܒܰܝܢܳܬ̥ܰܝّܶܗ. 56ܘ݄ܚܙܶܐ ܠܰܗ ܚܕ̥ܳܐ ܥܠܰܝܡܬܳܐ ܝܰܬܺܝܒ̥ܳܐ ܓܰܒ ܗ̄ܺܝ ܢܽܘܪܳܐ، ܘܚ݄ܪ ܠܰܗ ܐܶܒܶܗ ܘܐܡ݄ܪ ܠܰܗ: ”ܘܗܰܢܳܐ ܣܬܶܝ ܐܰܥܡܶܗ ܗ̄ܘܰܐ.“ 57ܘܗܺܝّܶܗ ܟܰܦ݄ܪ ܘܐܡ݄ܪ ܠܶܗ: ”ܝܰܐ ܐܰܢ̱ܬ̥ܬܳܐ، ܠ݄ܐ ܟܳܐܕ̥ܰܥܢܶܗ.“ 58ܘܒ݄ܬ̥݄ܪ ܐ݄ܫܡܳܐ، ܚܙܶܐ ܠܶܗ ܚܰܕ̱ ܚܪܶܢܳܐ ܘܐܡ݄ܪ ܠܶܗ ܠܶܗ: ”ܘܗܰܬ ܣܬܶܝ ܡ݄ܢّܶܗ ܗܰܬ.“ ܘܟܶܐܦܳܐ ܐܡ݄ܪ ܠܶܗ: ”ܠܳܐ، ܠܰܝ̱ܬ ܐ̱ܢܳܐ.“ 59ܘܒ݄ܬ̥݄ܪ ܫܳܥܬ̥ܳܐ ܡܶܕܶܐ، ܚܰܕ̱ ܚܪܶܢܳܐ ܡܬܰܢܶܐ ܗ̄ܘܰܐ ܘܳܐܡܰܪ ܗ̄ܘܰܐ: ”ܒ݄ܫܪܳܪܳܐ ܗܰܢܳܐ ܣܬܶܝ ܐܰܥܡܶܗ ܗ̄ܘܰܐ، ܘܟܰܐܠܶܗ ܓܠܺܝܠܳܝܳܐ ܝܳܐ.“ 60ܘܐܡ݄ܪ ܠܶܗ ܟܶܐܦܳܐ: ”ܝܰܐ ܓܰܒ̥ܪܳܐ، ܠ݄ܐ ܟܳܐܕ̥ܰܥ ܐ̱ܢܳܐ ܡ݄ܢ ܟ݄ܐܡّܰܪ̱ܬ.“ ܘܡܶܚܕ̥ܳܐ ܘܗܺܝّܶܗ ܟܡ݄ܫܓ̥݄ܠ، ܩܪܶܐ ܠܶܗ ܗ̄ܽܘ ܙܳܓ̥ܳܐ. 61ܘܕܰܥ݄ܪ ܝܶܫܽܘܥ ܘܚ݄ܪ ܠܶܗ ܒܟܶܐܦܳܐ. ܘܡܰܕ̥ܟܰܪ ܠܶܗ ܫܶܡܥܽܘܢ ܗ̄ܽܘ ܡܰܐܡܪܳܐ ܕܡܳܪܰܢ ܕܐܡ݄ܪ ܗ̄ܘܰܝ ܠܶܗ ܕܡܶܩ݄ܕ̱ܡ ܕܩܳܪܶܐ ܗ̄ܽܘ ܙܳܓ̥ܳܐ، ܓ݄ܕܟ݄ܦܪܰܬ ܐܶܒܺܝ ܬܠ݄ܬ̥ ܟܳܪ̈ܶܐ. 62ܘܢܰܦ݄ܩ ܫܶܡܥܽܘܢ ܠܰܪܒ̥ܰܠ ܘܒܰܟ̥ܺܝ ܒܰܟ̥ܝܳܐ ܡܰܪ̱ܺܝܪܳܐ.
ܟ݄ܡܒܰܙܚܺܝ، ܘܟ݄ܡܟܰܣ݄ܢ ܘ݄ܟܡܳܚ݄ܢ ܠܶܗ
ܡܬܝ 26:67‐68؛ ܡܪܩܘܣ 14:65
63ܘܰܓّܰܒ̥ܪ̈ܶܐ ܕ݄ܙܒ݄ܛّܶܗ ܝܶܫܽܘܥ ܡܒܰܙܚܺܝ ܗ̄ܘܰܘ̱ ܐܶܒܶܗ ܘ݄ܡܟܰܣ݄ܢ ܗ̄ܘܰܝ ܠܶܗ، 64ܘܡܳܚ݄ܢ ܗ̄ܘܰܝ ܠܶܗ ܥܰܠ ܦܳܬ̥ܶܗ ܘ݄ܐܡّܺܪ̱ܝ ܗ̄ܘܰܘ̱: ”ܡ݄ܬܢܰܒܰܝ، ܡܰܢ ܡܚܶܐ ܠܶܗ ܠܳܟ̥؟“ 65ܘܓ̥ܰܠܰܒܶܐ ܡܶܕ̈ܳܢܶܐ ܚܪ̈ܶܢܶܐ ܡܓܰܕܦܺܝ ܗ̄ܘܰܘ̱ ܘ݄ܐܡّܺܪ̱ܝ ܗ̄ܘܰܘ̱ ܐܰܥܠܶܗ.
ܝܶܫܽܘܥ ܟܩܳܝ݄ܡ ܩ݄ܕ̱ܡ ܗ̄ܺܝ ܟ̥ܢܽܘܫܬܳܐ
ܡܬܝ 26:59‐66؛ ܡܪܩܘܣ 14:55‐64؛ ܝܘܚܢܢ 18:19‐24
66ܘ݄ܒܩܶܕܰܡܬܳܐ ܠܰܬܺܝܡܺܝ ܗ̄ܰܩّܰܫ̈ܶܐ ܘܰܪّܰܒ̈ܶܐ ܕܰܟّܳܗ̈ܢܶܐ ܘܰܣّܳܦܪ̈ܶܐ ܘܡܰܘܣܰܩّܶܗ ܠܺܗ̄ܝ ܟܢܽܘܫܬܰܬّ̥ܶܗ، 67ܘܐܡ݄ܪّܰܗ ܠܶܗ: ”ܐܶܢ ܗܰܬ ܗ̄ܰܬ ܡܫܺܝܚܳܐ ܐܡܰܪ ܠܰܢ؟“ ܘܐܡ݄ܪ ܠܰܗ ܠّܶܗ: ”ܕܳܐܡܰܪ ܐ̱ܢܳܐ ܠܟ̥ܽܘ ܠ݄ܐ ܓ݄ܡܗܰܝܡܢܺܝܬܽܘ، 68ܘܕ݄ܡܫܰܐܶܠ ܐ̱ܢܳܐ ܠܟ̥ܽܘ، ܠ݄ܐ ܟܡܰܕ݄ܥܪܺܝܬܽܘ ܐܰܘ ܫܳܪܺܝܬܽܘ ܠܺܝ. 69ܡܳܐܥܕܳܐ ܓܕܳܗ̄ܘܶܐ ܐܰܒܪܶܗ ܕܢܳܫܳܐ ܝܰܬܺܝܒ̥ܳܐ ܡܽܗ̄ܘ ܝܰܡܺܝܢܳܐ ܕܽܗ̄ܘ ܚܰܝܠܳܐ ܕܰܐܠܳܗܳܐ.“ 70ܘܟܽܘܠّܶܗ ܐܡ݄ܪّܶܗ: ”ܗܰܢ ܢܰܩܠܐ ܗܰܬ ܗ̄ܰܬ ܗ̄ܽܘ ܐܰܒܪܳܐ ܕܰܐܠܳܗܳܐ.“ ܐܡ݄ܪ ܠܰܗ ܠّܶܗ ܝܶܫܽܘܥ: ”ܗܰܬܽܘ ܟ݄ܐܡّܺܪ̱ܝܬܽܘ ܕܳܐܢܳܐ ܐ̱ܢܳܐ.“ 71ܘܐܡ݄ܪّܶܗ: ”ܡ݄ܢܝܳܐ ܗܶܫ ܕܟܳܐܒܰܥ ܠܰܢ ܣܳܗܕ̈ܶܐ، ܡܺܐܝܕ̥ܶܗ ܕܰܐܚܢܰܐ ܫܰܡܺܝܥܺܝܢܰܐ ܡܶܢ̱ ܦܶܡܶܗ.“
Právě zvoleno:
ܡܓܰܠܝܘܢ ܕܠܘܩܐ 22: ܟܬܒܐ
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Suryoyo Bible © 2024 Aramaic Bible Translation
