ܡܓܰܠܝܘܢ ܕܝܘܚܢܢ 2
2
ܗ̄ܺܝ ܡ݄ܫܬܽܘܬ̥ܳܐ ܒܩܳܛܢܶܐ: ܗ̄ܺܝ ܐܳܬ̥ܳܐ ܩܰܕ̱ܡܰܝܬܳܐ
1ܒܽܗ̄ܘ ܝܰܘܡܳܐ ܕܰܬܠܳܬ̥ܳܐ، ܗܰܘܝܳܐ ܡ݄ܫܬܽܘܬ̥ܳܐ ܒܩܳܛܢܶܐ، ܗ̄ܺܝ ܡܕ̥ܺܝܢ̱ܬܳܐ ܕܽܗ̄ܘ ܓܠܺܝܠܳܐ، ܘܺܗ̄ܝ ܐܶܡܳܐ ܕܝܶܫܽܘܥ ܬܰܡܳܐ ܗ̄ܘܰܐ. 2ܘܝܶܫܽܘܥ ܣܬܶܝ ܘܰܬّܰܠܡܺܝܕ̥̈ܰܝܕ̥ܶܗ ܩܪ݄ܢ ܠܺܗ̄ܝ ܡ݄ܫܬܽܘܬ̥ܳܐ. 3ܘܬܰܝ݄ܡ ܗ̄ܽܘ ܚܰܡܪܳܐ، ܘܺܗ̄ܝ ܐܶܡܳܐ ܟܳܐܡّܳܪ̱ܐ ܠܝܶܫܽܘܥ: ”ܚܰܡܪܳܐ ܠܰܝ̱ܬّܶܗ.“ 4ܝܶܫܽܘܥ ܟܳܐܡܰܪ ܠܰܗ: ”ܡܳܐ ܠܺܝ ܘܶܐܠܰܟ̥، ܐܰܢ̱ܬ̥ܬܳܐ؟ ܗܶܫ ܠܰܐ ܐܬ̥ܝܳܐ ܗ̄ܺܝ ܫܳܥܬ̥ܰܝܕ̥ܺܝ.“ 5ܗ̄ܺܝ ܐܶܡܳܐ ܟܳܐܡّܳܪ̱ܐ ܠܰܡܫܰܡܫܳܢ̈ܶܐ: ”ܗ̄ܽܘ ܡܶܕܶܐ ܕܳܐܡܰܪܟ̥ܽܘ، ܣܽܘܡܽܘ!“ 6ܘܟ݄ܬ ܗ̄ܘܰܐ ܬܰܡܳܐ ܫܶܬ̥ ܝܰܐܓܳܢ̈ܶܐ ܕܟܶܐܦ̈ܶܐ ܡܰܚ̈ܬܶܐ ܬܰܡܳܐ ܠܰܫܰܢ ܗ̄ܺܝ ܫܝܳܓ̥ܬܳܐ ܕܰܝّܽܘܕ̥̈ܳܝܶܐ، ܥܳܪܰܠّܶܗ ܗ݄ܢ ܬܡܳܢܺܝ ܠܺܝܬܪ̈ܶܐ ܘܗ݄ܢ ܡܳܐܐ ܘܥ݄ܣܪܺܝ. 7ܟܳܐܡܰܪّܶܗ ܝܶܫܽܘܥ: ”ܡܠܰܝܽܘ ܡܰܝ̈ܶܐ ܒܰܝّܰܐܓܳܢ̈ܶܐ.“ ܘ݄ܡܠܰܢّܶܗ ܗܳܠ ܠܰܠܥ݄ܠ. 8ܟܳܐܡܰܪّܶܗ: ”ܐܳܥܕܳܐ ܓܪܰܦܽܘ ܡ݄ܢّܶܗ ܘܡܰܝܬܶܝܽܘ ܠܽܗ̄ܘ ܪܺܝܫܳܐ ܕܺܗ̄ܝ ܡ݄ܫܬܽܘܬ̥ܳܐ.“ ܘܡܰܝܬܰܠّܶܗ. 9ܘܺܗ̄ܝ ܢܰܩܠܐ ܕ݄ܛܥ݄ܡ ܠܶܗ ܗ̄ܽܘ ܪܺܝܫܳܐ ܕܺܗ̄ܝ ܡ݄ܫܬܽܘܬ̥ܳܐ ܡܰܢ̱ ܡّܰܝ̈ܰܢ݄ܟ ܕܗܰܘ݄ܢ ܚܰܡܪܳܐ، ܘܠܳܐ ܐܕ̥ܰܥ ܗ̄ܘܰܐ ܡܰܐܝܟܳܐ ܗ̄ܘܰܐ، ܐܶܠܳܐ ܗ̄ܰܡܫܰܡܫܳܢ̈ܶܐ ܐܳܕ̥ܥܺܝ ܗ̄ܘܰܘ̱ ܡܺܐܝܕ̥ܶܗ ܕܗ݄ܢّܶܝ ܡܠܰܠّܶܗ ܗ̄ܰܡّܰܝ̈ܶܐ. ܗ̄ܽܘ ܪܺܝܫܳܐ ܕܺܗ̄ܝ ܡ݄ܫܬܽܘܬ̥ܳܐ ܩܪܶܐ ܠܶܗ ܠܽܗ̄ܘ ܚܰܬ̥ܢܳܐ، 10ܘܐܡ݄ܪ ܠܶܗ ܠܶܗ: ”ܟܘ̇ܠ ܢܳܫܳܐ ܒܺܗ̄ܝ ܩܰܕ̱ܡܰܝܬܳܐ ܚܰܡܪܳܐ ܛܳܒ̥ܳܐ ܟܡܰܝܬܶܐ، ܘܡ݄ܐ ܕܪܰܘ݄ܢ، ܗܶܕܺܝ ܐܰܝܢܰܐ ܕܟ݄ܬ ܝܳܐ ܢܳܩܽܘܨܳܐ، ܐܶܠܳܐ ܗܰܬ ܛܪܶܐ ܠܳܟ̥ ܗ̄ܽܘ ܚܰܡܪܳܐ ܛܳܒ̥ܳܐ ܗܳܠ ܐܳܥܕܳܐ.“ 11ܗܰܬ̥ܶܐ ܝܳܐ ܗ̄ܺܝ ܐܳܬ̥ܳܐ ܩܰܕ̱ܡܰܝܬܳܐ ܕܣ݄ܡ ܠܶܗ ܝܶܫܽܘܥ، ܒܩܳܛܢܶܐ ܕ݄ܓܠܺܝܠܳܐ، ܘܡܰܘܕ̥ܰܥ ܠܶܗ ܗ̄ܽܘ ܫܽܘܒܚܰܝܕ̥ܶܗ، ܘ݄ܡܗܰܝܡܰܢّܶܗ ܐܶܒܶܗ ܗ̄ܰܬّܰܠܡܺܝܕ̥̈ܰܝܕ̥ܶܗ. 12ܘܒ݄ܬ̥݄ܪ ܡܰܗ̄ܬ̥ܶܐ ܢܰܚ݄ܬ ܠ݄ܟܦܰܪܢܰܚܽܘܡ، ܗܺܝّܶܗ ܘܺܗ̄ܝ ܐܶܡܳܐ ܘܰܗ̄ܢ ܐܰܚ̈ܽܘܢܳܢܶܐ ܘܰܬّܰܠܡܺܝܕ̥̈ܰܝܕ̥ܶܗ، ܘܦܰܝܺܝܫܺܝ ܬܰܡܳܐ ܟܡܳܐ ܝܰܘܡ̈ܶܐ.
ܝܶܫܽܘܥ ܟܡܰܘܦ݄ܩ ܗ̄ܰܡܙܰܒܢܳܢ̈ܶܐ ܘܰܡܨܰܪ̈ܦܳܢܶܐ ܡܽܗ̄ܘ ܗܰܝܟܠܳܐ
ܡܬܝ 12:12‐13؛ ܡܪܩܘܣ 11:15‐17؛ ܠܘܩܐ 19:45‐46
13ܘܩܰܪܺܝܒ̥ܳܐ ܗ̄ܘܰܐ ܗ̄ܽܘ ܦܶܨܚܳܐ ܕܰܝّܽܘܕ̥̈ܳܝܶܐ، ܘܣܰܠ݄ܩ ܝܶܫܽܘܥ ܠܽܐܘܪܶܫܠܶܡ. 14ܘ݄ܚܙܶܐ ܠܶܗ ܒܽܗ̄ܘ ܗܰܝܟܠܳܐ ܠܰܗ̄ܢܺܝ ܕܟܳܡܙܰܒܢܺܝ ܬܰܘܪ̈ܶܐ ܘܥܶܪ̈ܒܶܐ ܘܝܰܘܢ̈ܶܐ، ܘܰܠܡܨܰܪ̈ܦܳܢܶܐ (ܕܰܙّܽܘܙ̈ܶܐ) ܝܰܬܺܝܒ̥̈ܶܐ. 15ܘܣ݄ܡ ܠܶܗ ܠܶܗ ܫܰܘܛܳܐ ܡܽܗ̄ܘ ܚܰܒ̥ܠܳܐ، ܘܡܰܘܦܰܩ ܠܶܗ ܠܟܘ̇ܠّܶܗ ܡܽܗ̄ܘ ܗܰܝܟܠܳܐ: ܗ̄ܰܥّܶܪ̈ܒܶܐ ܘܰܬّܰܘܪ̈ܶܐ ܘܰܡܨܰܪ̈ܦܳܢܶܐ، ܘ݄ܡܒܰܪܒܰܙ ܠܶܗ ܗ̄ܰܙّܽܘܙ̈ܰܬّ̥ܶܗ ܘܡܰܩܠܰܒ ܠܶܗ ܗ̄ܰܛّܶܒ݄̈ܠܝܳܬ̥ܰܬّ̥ܶܗ. 16ܘܠܰܗ̄ܢ݄ܟ ܕܟܳܡܙܰܒܢܺܝ ܝܰܘܢ̈ܶܐ ܐܡ݄ܪ ܠܶܗ: ”ܡܽܘܕܽܘ ܗܰܢܺܝ ܡܰܗ̄ܪܟܶܐ، ܘܠܳܐ ܣܰܝܡܺܝܬܽܘ ܗ̄ܽܘ ܒܰܝܬܳܐ ܕܒܰܒܺܝ ܒܰܝܬܳܐ ܕܺܗ̄ܝ ܬܰܓܳܪܽܘܬ̥ܳܐ!“ 17ܘܡܰܕ̥ܟܰܪّܶܗ ܗ̄ܰܬّܰܠܡܺܝܕ̥̈ܰܝܕ̥ܶܗ ܗ̄ܽܘ ܡܶܕܶܐ ܕ݄ܟܬ̥ܺܝܒ̥: ”ܗ̄ܽܘ ܛܢܳܢܳܐ ܕܽܗ̄ܘ ܒܰܝܬܰܝܕ̥ܳܟ̥ ܐܰܟ̥ܺܝܠ ܠܶܗ ܠܺܝ.“ 18ܡܰܕܥܰܪّܶܗ ܗ̄ܰܝّܽܘܕ̥̈ܳܝܶܐ ܘܐܡ݄ܪّܰܗ ܠܶܗ: ”ܡ݄ܢ ܐܳܬ̥ܳܐ ܟܡܰܚܘܰܬ ܠܰܢ ܕܗܰܢܺܝ ܟܣܰܝܡܰܬ؟“ 19ܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܰܗ ܠّܶܗ: ”ܕܪܰܝܽܘ ܗ̄ܽܘ ܗܰܝܟܠܰܢܳܐ، ܘܳܐܢܳܐ ܟܡܰܩ݄ܡܢܶܗ ܒ݄ܬܠܳܬ̥ܳܐ ܝܰܘܡ̈ܶܐ.“ 20ܘܟ݄ܐܡّܺܪ̱ܝ ܠܶܗ ܗ̄ܰܝّܽܘܕ̥̈ܳܝܶܐ: ”ܒܫܶܬ̥ ܘܰܐܪܒܥܺܝ ܐ݄ܫܢ̈ܶܐ ܒܢܶܐ ܗ̄ܽܘ ܗܰܝܟܠܰܢܳܐ، ܘܗܰܬ ܟܡܰܩܺܝܡܰܬ ܠܶܗ ܒ݄ܬܠܳܬ̥ܳܐ ܝܰܘܡ̈ܶܐ؟“ 21ܐܶܠܳܐ ܗܺܝّܶܗ ܐܡ݄ܪ ܗ̄ܘܳܐ ܠܶܗ ܥܰܠ ܗ̄ܽܘ ܗܰܝܟܠܳܐ ܕܽܗ̄ܘ ܦܰܓ̥ܪܰܝܕ̥ܶܗ. 22ܘܺܗ̄ܝ ܢܰܩܠܐ ܕܩܰܝ݄ܡ ܡܒܰܝܢ ܗ̄ܰܡّܺܝ̈ܬ̥ܶܐ، ܡܰܕ̥ܟܰܪّܶܗ ܗ̄ܰܬّܰܠܡܺܝܕ̥̈ܰܝܕ̥ܶܗ ܕܐܡ݄ܪ ܗ̄ܘܳܐ ܠܶܗ ܗܰܬ̥ܶܐ، ܘܡܗܰܝܡܰܢّܶܗ ܠܰܟܬ̥ܳܒ̥̈ܶܐ ܘܠܺܗ̄ܝ ܡܶܠܬ̥ܳܐ ܕܐܡ݄ܪ ܠܶܗ ܝܶܫܽܘܥ.
ܝܶܫܽܘܥ ܟܳܐܕ̥݄ܥ ܡ݄ܢ ܟܺܝܬ ܒܽܗ̄ܘ ܢܳܫܳܐ
23ܘܺܗ̄ܝ ܢܰܩܠܐ ܕܟ݄ܬ ܗ̄ܘܰܐ ܝܶܫܽܘܥ ܒܽܐܘܪܶܫܠܶܡ، ܒܽܗ̄ܘ ܥܶܐܕ̥ܳܐ ܕܽܗ̄ܘ ܦܶܨܚܳܐ، ܓ̥ܰܠܰܒܶܐ ܡܗܰܝܡܰܢّܶܗ ܐܶܒܶܗ ܥܰܠ ܕ݄ܚܙܰܠّܶܗ ܗ̄ܰܢ ܐܳܬ̥ܘ̈ܳܬ̥ܳܐ ܕܟܳܣܳܝ݄ܡ. 24ܐܶܠܳܐ ܝܶܫܽܘܥ ܠܳܐ ܡܗܰܝܡܰܢ ܗ̄ܘܰܐ ܠّܶܗ ܒܢܰܦܫܶܗ، ܥܰܠ ܕܳܐܕ̥ܰܥ ܗ̄ܘܰܐ ܠܟܽܘܠ ܢܳܫܳܐ، 25ܘܠܰܝ̱ܬ ܗ̄ܘܰܐ ܣܢܺܝܩܳܝܳܐ ܕܢܳܫܳܐ ܣܳܗܰܕ ܠܶܗ، ܥܰܠ ܕܗܺܝّܶܗ ܐܳܕ̥ܰܥ ܗ̄ܘܰܐ ܡ݄ܢ ܟܺܝܬ ܒܽܗ̄ܘ ܢܳܫܳܐ.
Právě zvoleno:
ܡܓܰܠܝܘܢ ܕܝܘܚܢܢ 2: ܟܬܒܐ
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Suryoyo Bible © 2024 Aramaic Bible Translation
