ܣܶܦܪܳܐ ܕ݄ܒܪܺܝܬ̥ܳܐ 34
34
1ܘܢܰܦܺܝܩܳܐ ܕܺܝܢܰܐ ܗ̄ܺܝ ܒܰܪܬ̥ܳܐ ܕܠܶܝܳܐ ܕܡܰܘܠܕܳܐ ܠܝܰܥܩܽܘܒ ܕܚܳܙܝܳܐ ܗ̄ܰܒܢ̈ܳܬ̥ܳܐ ܕܽܗ̄ܘ ܐܰܬ̥ܪܳܐ. 2ܘܚ݄ܙܝܳܐ ܠܶܗ ܫܟܺܝܡ ܗ̄ܽܘ ܐܰܒܪܳܐ ܕ݄ܚܡܽܘܪ ܗ̄ܽܘ ܚܰܘܳܝܳܐ ܗ̄ܽܘ ܪܺܝܫܳܐ ܕܺܗ̄ܝ ܐܰܪܥܳܐ. ܘܡܰܘܒܠܳܐ ܠܶܗ ܘܕܰܡ݄ܟ̥ ܐܰܥܡܰܗ ܘ݄ܬܒ̥݄ܪ ܠܶܗ ܗ̄ܽܘ ܐܺܝܩܳܪܰܝܕ̥ܰܗ. 3ܘ݄ܡܥܰܠܩܳܐ ܗ̄ܺܝ ܢܰܦܫܰܝܕ̥ܶܗ ܒܕܺܝܢܰܐ ܗ̄ܺܝ ܒܰܪܬ̥ܳܐ ܕܝܰܥܩܽܘܒ، ܘ݄ܪܚ݄ܡ ܠܶܗ ܠܺܗ̄ܝ ܛܠܺܝܬ̥ܳܐ، ܘ݄ܡܒܰܣܰܡ ܠܶܗ ܠܶܒܰܗ ܕܺܗ̄ܝ ܛܠܺܝܬ̥ܳܐ. 4ܘܐܡ݄ܪ ܠܶܗ ܫܟܺܝܡ ܠ݄ܚܡܽܘܪ ܗ̄ܽܘ ܒܰܒܰܝܕ̥ܶܗ: ”ܡܘ̇ܕ ܠܺܝ ܗ̄ܺܝ ܛܠܺܝܬ̥ܰܬ̥ܶܐ ܐܰܢ̱ܬ̥ܬܳܐ.“ 5ܘܝܰܥܩܽܘܒ ܫܰܡ݄ܥ ܕ݄ܡܚܰܪܰܡّܶܗ ܕܺܝܢܰܐ ܗ̄ܺܝ ܒܰܪܬ̥ܰܝܕ̥ܶܗ. ܘܰܗ̄ܢ ܐܰܒܢ̈ܰܝܕ̥ܶܗ ܥܰܡ ܗ̄ܰܚّܰܝ̈ܘܳܬ̥ܳܐ (ܩܰܛܥ̈ܶܐ) ܒܺܗ̄ܝ ܚܰܩܠܳܐ ܗ̄ܘܰܝܢܶܝ. ܘܝܰܥܩܽܘܒ ܠܳܐ ܡܬܰܢܶܐ ܠܶܗ ܗ݄ܠ ܕܰܐܬ̥݄ܢ.
6ܘܢܰܦ݄ܩ ܚܡܽܘܪ ܗ̄ܽܘ ܒܰܒܳܐ ܕ݄ܫܟܺܝܡ ܠܓܰܒ ܝܰܥܩܽܘܒ ܕܡ݄ܫܓ̥݄ܠ ܐܰܥܡܶܗ. 7ܘܰܗ̄ܢ ܐܰܒܢ̈ܶܐ ܕܝܰܥܩܽܘܒ ܐܰܬ̥݄ܢ ܡܺܗ̄ܝ ܚܰܩܠܳܐ. ܘܺܗ̄ܝ ܢܰܩܠܐ ܕܰܓّܰܒ̥ܪ̈ܶܐ ܫܰܡܺܝܥܺܝ ܥܰܝ݄ܩّܶܗ ܘ݄ܪܓ̥ܺܝܙܺܝ ܓ̥ܰܠܰܒܶܐ ܥܰܠ ܕܣ݄ܡّܶܗ ܒܺܝܫܽܘܬ̥ܳܐ ܒܺܐܝܣܪܳܐܶܝܠ، ܘ݄ܬܒ̥݄ܪّܶܗ ܗ̄ܽܘ ܐܺܝܩܳܪܳܐ ܕܺܗ̄ܝ ܒܰܪܬ̥ܳܐ ܕܝܰܥܩܽܘܒ. ܘܗܰܘܟ̥ܰܐ ܠ݄ܐ ܓܡܺܝܣ݄ܡ. 8ܘ݄ܫܓ̥ܺܝܠ ܚܡܽܘܪ ܐܰܥܡܰܝّܶܗ ܘܐܡ݄ܪ ܠܰܗ ܠّܶܗ: ”ܫܟܺܝܡ ܗ̄ܽܘ ܐܰܒܪܰܝܕ̥ܺܝ ܦܨܺܝܚܳܐ ܗ̄ܺܝ ܢܰܦܫܰܝܕ̥ܶܗ ܒܺܗ̄ܝ ܒܰܪܬ̥ܰܬ̥ܟ̥ܽܘ، ܗܰܒ̥ܽܘ ܠܶܗ ܝܳܐ ܐܰܢ̱ܬ̥ܬܳܐ. 9ܘܣܽܘܡܽܘ ܚܰܬ̥ܢܽܘܬ̥ܳܐ ܐܰܥܡܰܢ. ܗ̄ܰܒܢ̈ܳܬ̥ܰܬ̥ܟ̥ܽܘ ܗܰܒ̥ܽܘ ܠܰܢ، ܘܰܒܢ̈ܳܬ̥ܰܝܕ̥ܰܢ ܡܽܘܕܽܘ ܠܟ̥ܽܘ. 10ܘܰܐܥܡܰܢ ܝܺܬܰܒ̥ܽܘ. ܘܺܗ̄ܝ ܐܰܪܥܳܐ ܟܰܐܠܰܗ ܩܽܘܕ̱ܡܰܝܟ̥ܽܘ. ܝܺܬܰܒ̥ܽܘ ܘ݄ܡܬܰܓܶܪܽܘ ܘܺܝܪܰܬ̥ܽܘ ܐܶܒܰܗ.“ 11ܘܐܡ݄ܪ ܠܶܗ ܫܟܺܝܡ ܠܽܗ̄ܘ ܒܰܒܰܝܕ̥ܰܗ ܘܠܰܗ̄ܢ ܐܰܚ̈ܽܘܢܳܢܰܝܕ̥ܰܗ: ”ܟܳܐܒܰܥ ܐ̱ܢܳܐ ܕܚܳܙܶܐ ܐ̱ܢܳܐ ܪ̈ܰܚܡܶܐ ܒܥܰܝܢ̈ܳܬ̥ܰܝܟ̥ܽܘ، ܘܟܘ̇ܠ ܡܶܕܶܐ ܕ݄ܐܡّܺܪ̱ܝܬܽܘ ܠܺܝ ܓܕܳܗ̄ܒܶܐ ܐ̱ܢܳܐ. 12ܘܡܰܙܶܕܽܘ ܐܰܥܠܺܝ ܓ̥ܰܠܰܒܶܐ ܗ̄ܽܘ ܡܰܗܪܳܐ ܘܰܡّܰܘܗ̈ܒܳܬ̥ܳܐ، ܘ݄ܓܕܳܗ̄ܒܶܐ ܐ̱ܢܳܐ ܗ̄ܽܘ ܡܶܕܶܐ ܕ݄ܐܡّܺܪ̱ܝܬܽܘ ܠܺܝ، ܘܗܰܒ̥ܽܘ ܠܺܝ ܗ̄ܺܝ ܒܰܪܬ̥ܰܬ̥ܶܐ ܐܰܢ̱ܬ̥ܬܳܐ.“
13ܘܡܰܕܥܰܪّܶܗ ܗ̄ܰܢ ܐܰܒܢ̈ܶܐ ܕܝܰܥܩܽܘܒ ܠ݄ܫܟܺܝܡ ܘܠ݄ܚܡܽܘܪ ܗ̄ܽܘ ܒܰܒܰܝܕ̥ܶܗ ܘܐܡ݄ܪّܰܗ ܠܶܗ ܒܢܶܟ̥ܠܳܐ، ܥܰܠ ܕ݄ܡܚܰܪܰܡّܶܗ ܕܺܝܢܰܐ ܗ̄ܺܝ ܚܳܬ̥ܰܬّ̥ܶܗ، 14ܘܐܡ݄ܪّܶܗ: ”ܠܰܝܒܰܢ ܕܣܰܝܡܺܝܢܰܐ ܗ̄ܽܘ ܡܰܐܡܪܰܢܳܐ ܕܳܗ̄ܒܺܝܢܰܐ ܚܳܬ̥ܰܢ ܠܓܰܒ̥ܪܳܐ ܠܳܐ ܓܙܺܝܪܳܐ (ܓܰܒ̥ܪܳܐ ܫܺܝܥܳܐ) ܥܰܠ ܕܟ݄ܬ ܝܳܐ ܥܰܝܒܳܐ ܐܶܠܰܢ. 15ܐܶܠܳܐ ܒܰܗ̄ܬ̥ܶܐ ܓܡܰܩܒܠܺܝܢܰܐ ܠܟ̥ܽܘ: ܐܶܢ ܓܕܳܗ̄ܘܺܝܬܽܘ ܐܟ̥ܳܬ̥ܰܢ ܘܡ݄ܓܙܳܪܺܝܬܽܘ ܟܘ̇ܠ ܓܰܒ̥ܪܳܐ ܐܟ̥ ܕܟܺܝܬ ܢܰܐ ܐܰܚܢܰܐ ܓܙܺܝܪ̈ܶܐ. 16ܓܕܳܗ̄ܒܺܝܢܰܐ ܠܟ̥ܽܘ ܗ̄ܰܒܢ̈ܳܬ̥ܰܝܕ̥ܰܢ، ܘܰܒܢ̈ܳܬ̥ܰܬ̥ܟ̥ܽܘ ܓܡܰܝܕܺܝܢܰܐ، ܘ݄ܓܝܳܬܒ̥ܺܝܢܰܐ ܐܰܥܡܰܝܟ̥ܽܘ ܘ݄ܓܕܳܗ̄ܘܺܝܢܰܐ ܚܰܕ̱ ܥܰܡܳܐ. 17ܘ݄ܕܠܳܐ ܫܳܡܥܺܝܬܽܘ ܠܰܢ ܘܡ݄ܓܙܳܪܺܝܬܽܘ، ܓܡܰܝܕܺܝܢܰܐ ܗ̄ܺܝ ܒܰܪܬ̥ܰܝܕ̥ܰܢ ܘ݄ܓܕ݄ܐܙّܰܢ.“
18ܘܫܰܦܺܝܪܺܝ ܗ̄ܰܡّܰܐܡܪ̈ܰܬّ̥ܶܗ ܒܥܰܝܢܶܗ ܕ݄ܚܡܽܘܪ ܘ݄ܒܥܰܝܢܶܗ ܕ݄ܫܟܺܝܡ ܗ̄ܽܘ ܐܰܒܪܰܝܕ̥ܶܗ. 19ܘܠܳܐ ܡܥܰܘ݄ܩ ܗ̄ܽܘ ܛܰܠܝܳܐ (ܫܟܺܝܡ) ܕܣܳܝ݄ܡ ܒܽܗ̄ܘ ܡܰܐܡܪܰܢܳܐ ܕܓ̥ܰܠܰܒܶܐ ܪܚ݄ܡ ܠܶܗ ܗ̄ܺܝ ܒܰܪܬ̥ܳܐ ܕܝܰܥܩܽܘܒ. ܘܗܺܝّܶܗ ܙ݄ܕ ܚܰܕ̱ ܡܝܰܩܪܳܐ ܗ̄ܘܰܐ ܒܟܽܘܠܶܗ ܗ̄ܽܘ ܒܰܝܬܳܐ ܕܽܗ̄ܘ ܒܰܒܰܝܕ̥ܶܗ. 20ܘܰܐܬ̥ܺܝ ܚܡܽܘܪ ܘ݄ܫܟܺܝܡ ܗ̄ܽܘ ܐܰܒܪܰܝܕ̥ܶܗ ܠܽܗ̄ܘ ܬܰܪܥܳܐ ܕܺܗ̄ܝ ܡܕ̥ܺܝܢ̱ܬܰܬّ̥ܶܗ ܘ݄ܫܓ̥ܺܝܠܺܝ ܥܰܡ ܗ̄ܰܢ ܢܳܫ̈ܶܐ ܕܺܗ̄ܝ ܡܕ̥ܺܝܢ̱ܬܰܬّ̥ܶܗ ܘܐܡ݄ܪّܰܢّܶܗ: 21”ܗ̄ܰܓّܰܒ̥ܪ̈ܰܢܺܝ ܒ݄ܫܠܳܡܳܐ ܢܶܝ ܐܰܥܡܰܢ، ܛܪܳܐ ܝܳܬܒ̥ܺܝ ܒܺܗ̄ܝ ܐܰܪܥܳܐ ܘ݄ܡܬܰܓܪܺܝ ܐܶܒܰܗ. ܘܺܗ̄ܝ ܐܰܪܥܳܐ ܟܰܐܠܰܗ ܪܘܺܝܚܬܳܐ ܝܳܐ ܡܶܢ̱ ܬܪܶܝ ܓܰܒ̈ܶܐ ܩܽܘܕ̱ܡܰܝّܶܗ. ܗ̄ܰܒܢ̈ܳܬ̥ܰܬّ̥ܶܗ ܓܡܰܝܕܺܝܢܰܐ ܢܶܝ ܐܶܠܰܢ ܢܶܫ̈ܶܐ، ܘܰܒܢ̈ܳܬ̥ܰܝܕ̥ܰܢ ܓܕܳܗ̄ܒܺܝܢܰܐ ܐܰܠّܶܗ. 22ܐܶܠܳܐ ܗ̄ܰܓّܰܒ̥ܪ̈ܶܐ ܒܰܗ̄ܬ̥ܶܐ ܓܡܰܩܒܠܺܝ ܠܰܢ ܕܝܳܬܒ̥ܺܝ ܐܰܥܡܰܢ ܘܗܳܘܺܝܢܰܐ ܥܰܡܳܐ ܚܰܕ̱ ܗ̄ܺܝ ܢܰܩܠܐ ܕܓܳܙܪܺܝܢܰܐ ܟܘ̇ܠ ܓܰܒ̥ܪܳܐ ܐܟ̥ ܕܟ݄ܬܢܶܝ ܗ݄ܢّܶܝ ܓܙܺܝܪ̈ܶܐ. 23ܗ̄ܰܙّܽܘ̈ܙܰܬّ̥ܶܗ ܘܰܩّܶܢ̈ܝܳܢܰܬّ̥ܶܗ ܘܟܽܘܠّܶܗ ܗ̄ܰܚّܰܝ̈ܘܳܬ̥ܰܬّ̥ܶܗ ܟܰܐܠܶܗ ܕܺܝܕ̥ܰܢ ܢܶܝ. ܐܶܠܳܐ ܛܪܳܐ ܫܳܡܥܺܝܢܰܢّܶܗ ܘ݄ܓܝܳܬܒ̥ܺܝ ܐܰܥܡܰܢ.“ 24ܘܫܰܡܺܝܥܺܝ ܡܶܢ̱ ܫܟܺܝܡ ܘܡܶܢ̱ ܚܡܽܘܪ ܗ̄ܽܘ ܒܰܒܰܝܕ̥ܶܗ ܟܽܘܠّܶܗ ܗ̄ܰܢ ܢܰܦܳܩ̈ܶܐ ܕܡܽܗ̄ܘ ܬܰܪܥܳܐ ܕܺܗ̄ܝ ܡܕ̥ܺܝܢ̱ܬܰܝܕ̥ܶܗ، ܘ݄ܓܙܺܝܪ ܟܘ̇ܠ ܓܰܒ̥ܪܳܐ، ܟܘ̇ܠ ܢܰܦܳܩܳܐ ܕܽܗ̄ܘ ܬܰܪܥܳܐ ܕܺܗ̄ܝ ܡܕ̥ܺܝܢ̱ܬܰܝܕ̥ܶܗ.
25ܘܗܰܘܺܝ ܒܽܗ̄ܘ ܝܰܘܡܳܐ ܕܰܬܠܳܬ̥ܳܐ، ܗ̄ܺܝ ܢܰܩܠܐ ܕܚܺܝܨ ܗ̄ܽܘ ܟܶܐܒ̥ܰܬّ̥ܶܗ، ܗ̄ܰܬܪܶܝ ܐܰܒܢ̈ܶܐ ܕܝܰܥܩܽܘܒ، ܫܶܡܥܽܘܢ ܘܠܶܘܺܝ ܗ̄ܰܢ ܐܰܚ̈ܽܘܢܳܢܶܐ ܕܕܺܝܢܰܐ، ܟܘ̇ܠ ܚܰܕ̱ ܡ݄ܕ ܠܶܗ ܗ̄ܽܘ ܣܰܝܦܰܝܕ̥ܶܗ، ܘܥܰܒܺܝܪܺܝ ܥܰܠ ܗ̄ܺܝ ܡܕ̥ܺܝܢ̱ܬܳܐ ܒܫܶܠܝܳܐ (ܐ݄ܫܡܳܐ ܐ݄ܫܡܳܐ) ܘ݄ܩܛ݄ܠّܶܗ ܟܘ̇ܠ ܓܰܒ̥ܪܳܐ. 26ܘܠ݄ܚܡܽܘܪ ܘܠ݄ܫܟܺܝܡ ܗ̄ܽܘ ܐܰܒܪܰܝܕ̥ܶܗ ܩܛܺܝܠ݄ܢّܶܗ ܒܦܶܡܶܗ ܕܽܗ̄ܘ ܣܰܝܦܳܐ. ܘܡ݄ܕّܶܗ ܠܕܺܝܢܰܐ ܗ̄ܺܝ ܚܳܬ̥ܰܬّ̥ܶܗ ܡܽܗ̄ܘ ܒܰܝܬܳܐ ܕ݄ܫܟܺܝܡ ܘܢܰܦܺܝܩܺܝ. 27ܘܰܗ̄ܢ ܐܰܒܢ̈ܶܐ ܕܝܰܥܩܽܘܒ ܥܰܒܺܝܪܺܝ (ܐܰܬ̥݄ܢ) ܥܰܠ ܩܛܺܝ̈ܠܶܐ ܘܡ݄ܕّܶܗ ܗ̄ܽܘ ܡܶܕܶܐ ܕܺܗ̄ܝ ܡܕ̥ܺܝܢ̱ܬܳܐ ܥܰܠ ܕ݄ܡܚܰܪܰܡّܶܗ ܠܕܺܝܢܰܐ ܗ̄ܺܝ ܚܳܬ̥ܰܬّ̥ܶܗ. 28ܘܰܥܘܳܢ̈ܰܬّ̥ܶܗ ܘܰܬّܰܘܪ̈ܰܬّ̥ܶܗ ܘܰܚܡܳܪ̈ܰܬّ̥ܶܗ ܕܒܺܗ̄ܝ ܡܕ̥ܺܝܢ̱ܬܳܐ ܘ݄ܕܒܺܗ̄ܝ ܚܰܩܠܳܐ ܡܺܝܕ݄ܢّܶܗ. 29ܘܟܽܘܠّܶܗ ܗ̄ܰܙّܽܘ̈ܙܰܬّ̥ܶܗ ܘܟܽܘܠّܶܗ ܗ̄ܰܢ ܢܰܥܺܝܡ̈ܰܬّ̥ܶܗ ܫܒܰܠّܶܗ ܥܰܡ ܗ̄ܰܢ ܢܶܫ̈ܰܬّ̥ܶܗ. ܘ݄ܓܢܽܒّ̥ܶܗ ܟܘ̇ܠ ܡܶܕܶܐ ܕܟܺܝܬ ܒܺܗ̄ܝ ܡܕ̥ܺܝܢ̱ܬܳܐ.
30ܘܐܡ݄ܪ ܠܶܗ ܝܰܥܩܽܘܒ ܠܫܶܡܥܽܘܢ ܘ݄ܠܠܶܘܺܝ: ”ܡܰܟܽܒ̥ܟ̥ܽܘ ܠܺܝ ܕ݄ܬܒ̥݄ܪܟ̥ܽܘ ܠܺܝ ܒܰܝܢ ܗ̄ܰܥّܳܡܽܘܪ̈ܶܐ ܕܺܗ̄ܝ ܐܰܪܥܳܐ: ܒܰܝܢ ܗ̄ܰܟܢܰܥܢܳܝ̈ܶܐ ܘܒܰܝܢ ܗ̄ܰܦّܰܪ̈ܙܳܝܶܐ، ܘܳܐܢܳܐ ܐ݄ܫܡܳܐ ܐ̱ܢܳܐ ܒܽܗ̄ܘ ܡܶܢܝܳܢܳܐ، ܘܓ݄ܕܠܳܬܡܺܝ ܐܰܥܠܺܝ ܘ݄ܓܡܳܚ݄ܢ ܠܺܝ. ܘ݄ܓܡܺܝܣܰܟܰܪ ܐ̱ܢܳܐ ܐܳܢܳܐ ܘܽܗ̄ܘ ܒܰܝܬܰܝܕ̥ܺܝ.“ 31ܘܗ݄ܢّܶܝ ܐܡ݄ܪّܶܗ: ”ܐܟ̥ ܕܺܗ̄ܝ ܙܰܢܳܝܬܳܐ ܣ݄ܡّܶܗ ܠܚܳܬ̥ܰܢ.“
Právě zvoleno:
ܣܶܦܪܳܐ ܕ݄ܒܪܺܝܬ̥ܳܐ 34: ܟܬܒܐ
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Suryoyo Bible © 2024 Aramaic Bible Translation
ܣܶܦܪܳܐ ܕ݄ܒܪܺܝܬ̥ܳܐ 34
34
1ܘܢܰܦܺܝܩܳܐ ܕܺܝܢܰܐ ܗ̄ܺܝ ܒܰܪܬ̥ܳܐ ܕܠܶܝܳܐ ܕܡܰܘܠܕܳܐ ܠܝܰܥܩܽܘܒ ܕܚܳܙܝܳܐ ܗ̄ܰܒܢ̈ܳܬ̥ܳܐ ܕܽܗ̄ܘ ܐܰܬ̥ܪܳܐ. 2ܘܚ݄ܙܝܳܐ ܠܶܗ ܫܟܺܝܡ ܗ̄ܽܘ ܐܰܒܪܳܐ ܕ݄ܚܡܽܘܪ ܗ̄ܽܘ ܚܰܘܳܝܳܐ ܗ̄ܽܘ ܪܺܝܫܳܐ ܕܺܗ̄ܝ ܐܰܪܥܳܐ. ܘܡܰܘܒܠܳܐ ܠܶܗ ܘܕܰܡ݄ܟ̥ ܐܰܥܡܰܗ ܘ݄ܬܒ̥݄ܪ ܠܶܗ ܗ̄ܽܘ ܐܺܝܩܳܪܰܝܕ̥ܰܗ. 3ܘ݄ܡܥܰܠܩܳܐ ܗ̄ܺܝ ܢܰܦܫܰܝܕ̥ܶܗ ܒܕܺܝܢܰܐ ܗ̄ܺܝ ܒܰܪܬ̥ܳܐ ܕܝܰܥܩܽܘܒ، ܘ݄ܪܚ݄ܡ ܠܶܗ ܠܺܗ̄ܝ ܛܠܺܝܬ̥ܳܐ، ܘ݄ܡܒܰܣܰܡ ܠܶܗ ܠܶܒܰܗ ܕܺܗ̄ܝ ܛܠܺܝܬ̥ܳܐ. 4ܘܐܡ݄ܪ ܠܶܗ ܫܟܺܝܡ ܠ݄ܚܡܽܘܪ ܗ̄ܽܘ ܒܰܒܰܝܕ̥ܶܗ: ”ܡܘ̇ܕ ܠܺܝ ܗ̄ܺܝ ܛܠܺܝܬ̥ܰܬ̥ܶܐ ܐܰܢ̱ܬ̥ܬܳܐ.“ 5ܘܝܰܥܩܽܘܒ ܫܰܡ݄ܥ ܕ݄ܡܚܰܪܰܡّܶܗ ܕܺܝܢܰܐ ܗ̄ܺܝ ܒܰܪܬ̥ܰܝܕ̥ܶܗ. ܘܰܗ̄ܢ ܐܰܒܢ̈ܰܝܕ̥ܶܗ ܥܰܡ ܗ̄ܰܚّܰܝ̈ܘܳܬ̥ܳܐ (ܩܰܛܥ̈ܶܐ) ܒܺܗ̄ܝ ܚܰܩܠܳܐ ܗ̄ܘܰܝܢܶܝ. ܘܝܰܥܩܽܘܒ ܠܳܐ ܡܬܰܢܶܐ ܠܶܗ ܗ݄ܠ ܕܰܐܬ̥݄ܢ.
6ܘܢܰܦ݄ܩ ܚܡܽܘܪ ܗ̄ܽܘ ܒܰܒܳܐ ܕ݄ܫܟܺܝܡ ܠܓܰܒ ܝܰܥܩܽܘܒ ܕܡ݄ܫܓ̥݄ܠ ܐܰܥܡܶܗ. 7ܘܰܗ̄ܢ ܐܰܒܢ̈ܶܐ ܕܝܰܥܩܽܘܒ ܐܰܬ̥݄ܢ ܡܺܗ̄ܝ ܚܰܩܠܳܐ. ܘܺܗ̄ܝ ܢܰܩܠܐ ܕܰܓّܰܒ̥ܪ̈ܶܐ ܫܰܡܺܝܥܺܝ ܥܰܝ݄ܩّܶܗ ܘ݄ܪܓ̥ܺܝܙܺܝ ܓ̥ܰܠܰܒܶܐ ܥܰܠ ܕܣ݄ܡّܶܗ ܒܺܝܫܽܘܬ̥ܳܐ ܒܺܐܝܣܪܳܐܶܝܠ، ܘ݄ܬܒ̥݄ܪّܶܗ ܗ̄ܽܘ ܐܺܝܩܳܪܳܐ ܕܺܗ̄ܝ ܒܰܪܬ̥ܳܐ ܕܝܰܥܩܽܘܒ. ܘܗܰܘܟ̥ܰܐ ܠ݄ܐ ܓܡܺܝܣ݄ܡ. 8ܘ݄ܫܓ̥ܺܝܠ ܚܡܽܘܪ ܐܰܥܡܰܝّܶܗ ܘܐܡ݄ܪ ܠܰܗ ܠّܶܗ: ”ܫܟܺܝܡ ܗ̄ܽܘ ܐܰܒܪܰܝܕ̥ܺܝ ܦܨܺܝܚܳܐ ܗ̄ܺܝ ܢܰܦܫܰܝܕ̥ܶܗ ܒܺܗ̄ܝ ܒܰܪܬ̥ܰܬ̥ܟ̥ܽܘ، ܗܰܒ̥ܽܘ ܠܶܗ ܝܳܐ ܐܰܢ̱ܬ̥ܬܳܐ. 9ܘܣܽܘܡܽܘ ܚܰܬ̥ܢܽܘܬ̥ܳܐ ܐܰܥܡܰܢ. ܗ̄ܰܒܢ̈ܳܬ̥ܰܬ̥ܟ̥ܽܘ ܗܰܒ̥ܽܘ ܠܰܢ، ܘܰܒܢ̈ܳܬ̥ܰܝܕ̥ܰܢ ܡܽܘܕܽܘ ܠܟ̥ܽܘ. 10ܘܰܐܥܡܰܢ ܝܺܬܰܒ̥ܽܘ. ܘܺܗ̄ܝ ܐܰܪܥܳܐ ܟܰܐܠܰܗ ܩܽܘܕ̱ܡܰܝܟ̥ܽܘ. ܝܺܬܰܒ̥ܽܘ ܘ݄ܡܬܰܓܶܪܽܘ ܘܺܝܪܰܬ̥ܽܘ ܐܶܒܰܗ.“ 11ܘܐܡ݄ܪ ܠܶܗ ܫܟܺܝܡ ܠܽܗ̄ܘ ܒܰܒܰܝܕ̥ܰܗ ܘܠܰܗ̄ܢ ܐܰܚ̈ܽܘܢܳܢܰܝܕ̥ܰܗ: ”ܟܳܐܒܰܥ ܐ̱ܢܳܐ ܕܚܳܙܶܐ ܐ̱ܢܳܐ ܪ̈ܰܚܡܶܐ ܒܥܰܝܢ̈ܳܬ̥ܰܝܟ̥ܽܘ، ܘܟܘ̇ܠ ܡܶܕܶܐ ܕ݄ܐܡّܺܪ̱ܝܬܽܘ ܠܺܝ ܓܕܳܗ̄ܒܶܐ ܐ̱ܢܳܐ. 12ܘܡܰܙܶܕܽܘ ܐܰܥܠܺܝ ܓ̥ܰܠܰܒܶܐ ܗ̄ܽܘ ܡܰܗܪܳܐ ܘܰܡّܰܘܗ̈ܒܳܬ̥ܳܐ، ܘ݄ܓܕܳܗ̄ܒܶܐ ܐ̱ܢܳܐ ܗ̄ܽܘ ܡܶܕܶܐ ܕ݄ܐܡّܺܪ̱ܝܬܽܘ ܠܺܝ، ܘܗܰܒ̥ܽܘ ܠܺܝ ܗ̄ܺܝ ܒܰܪܬ̥ܰܬ̥ܶܐ ܐܰܢ̱ܬ̥ܬܳܐ.“
13ܘܡܰܕܥܰܪّܶܗ ܗ̄ܰܢ ܐܰܒܢ̈ܶܐ ܕܝܰܥܩܽܘܒ ܠ݄ܫܟܺܝܡ ܘܠ݄ܚܡܽܘܪ ܗ̄ܽܘ ܒܰܒܰܝܕ̥ܶܗ ܘܐܡ݄ܪّܰܗ ܠܶܗ ܒܢܶܟ̥ܠܳܐ، ܥܰܠ ܕ݄ܡܚܰܪܰܡّܶܗ ܕܺܝܢܰܐ ܗ̄ܺܝ ܚܳܬ̥ܰܬّ̥ܶܗ، 14ܘܐܡ݄ܪّܶܗ: ”ܠܰܝܒܰܢ ܕܣܰܝܡܺܝܢܰܐ ܗ̄ܽܘ ܡܰܐܡܪܰܢܳܐ ܕܳܗ̄ܒܺܝܢܰܐ ܚܳܬ̥ܰܢ ܠܓܰܒ̥ܪܳܐ ܠܳܐ ܓܙܺܝܪܳܐ (ܓܰܒ̥ܪܳܐ ܫܺܝܥܳܐ) ܥܰܠ ܕܟ݄ܬ ܝܳܐ ܥܰܝܒܳܐ ܐܶܠܰܢ. 15ܐܶܠܳܐ ܒܰܗ̄ܬ̥ܶܐ ܓܡܰܩܒܠܺܝܢܰܐ ܠܟ̥ܽܘ: ܐܶܢ ܓܕܳܗ̄ܘܺܝܬܽܘ ܐܟ̥ܳܬ̥ܰܢ ܘܡ݄ܓܙܳܪܺܝܬܽܘ ܟܘ̇ܠ ܓܰܒ̥ܪܳܐ ܐܟ̥ ܕܟܺܝܬ ܢܰܐ ܐܰܚܢܰܐ ܓܙܺܝܪ̈ܶܐ. 16ܓܕܳܗ̄ܒܺܝܢܰܐ ܠܟ̥ܽܘ ܗ̄ܰܒܢ̈ܳܬ̥ܰܝܕ̥ܰܢ، ܘܰܒܢ̈ܳܬ̥ܰܬ̥ܟ̥ܽܘ ܓܡܰܝܕܺܝܢܰܐ، ܘ݄ܓܝܳܬܒ̥ܺܝܢܰܐ ܐܰܥܡܰܝܟ̥ܽܘ ܘ݄ܓܕܳܗ̄ܘܺܝܢܰܐ ܚܰܕ̱ ܥܰܡܳܐ. 17ܘ݄ܕܠܳܐ ܫܳܡܥܺܝܬܽܘ ܠܰܢ ܘܡ݄ܓܙܳܪܺܝܬܽܘ، ܓܡܰܝܕܺܝܢܰܐ ܗ̄ܺܝ ܒܰܪܬ̥ܰܝܕ̥ܰܢ ܘ݄ܓܕ݄ܐܙّܰܢ.“
18ܘܫܰܦܺܝܪܺܝ ܗ̄ܰܡّܰܐܡܪ̈ܰܬّ̥ܶܗ ܒܥܰܝܢܶܗ ܕ݄ܚܡܽܘܪ ܘ݄ܒܥܰܝܢܶܗ ܕ݄ܫܟܺܝܡ ܗ̄ܽܘ ܐܰܒܪܰܝܕ̥ܶܗ. 19ܘܠܳܐ ܡܥܰܘ݄ܩ ܗ̄ܽܘ ܛܰܠܝܳܐ (ܫܟܺܝܡ) ܕܣܳܝ݄ܡ ܒܽܗ̄ܘ ܡܰܐܡܪܰܢܳܐ ܕܓ̥ܰܠܰܒܶܐ ܪܚ݄ܡ ܠܶܗ ܗ̄ܺܝ ܒܰܪܬ̥ܳܐ ܕܝܰܥܩܽܘܒ. ܘܗܺܝّܶܗ ܙ݄ܕ ܚܰܕ̱ ܡܝܰܩܪܳܐ ܗ̄ܘܰܐ ܒܟܽܘܠܶܗ ܗ̄ܽܘ ܒܰܝܬܳܐ ܕܽܗ̄ܘ ܒܰܒܰܝܕ̥ܶܗ. 20ܘܰܐܬ̥ܺܝ ܚܡܽܘܪ ܘ݄ܫܟܺܝܡ ܗ̄ܽܘ ܐܰܒܪܰܝܕ̥ܶܗ ܠܽܗ̄ܘ ܬܰܪܥܳܐ ܕܺܗ̄ܝ ܡܕ̥ܺܝܢ̱ܬܰܬّ̥ܶܗ ܘ݄ܫܓ̥ܺܝܠܺܝ ܥܰܡ ܗ̄ܰܢ ܢܳܫ̈ܶܐ ܕܺܗ̄ܝ ܡܕ̥ܺܝܢ̱ܬܰܬّ̥ܶܗ ܘܐܡ݄ܪّܰܢّܶܗ: 21”ܗ̄ܰܓّܰܒ̥ܪ̈ܰܢܺܝ ܒ݄ܫܠܳܡܳܐ ܢܶܝ ܐܰܥܡܰܢ، ܛܪܳܐ ܝܳܬܒ̥ܺܝ ܒܺܗ̄ܝ ܐܰܪܥܳܐ ܘ݄ܡܬܰܓܪܺܝ ܐܶܒܰܗ. ܘܺܗ̄ܝ ܐܰܪܥܳܐ ܟܰܐܠܰܗ ܪܘܺܝܚܬܳܐ ܝܳܐ ܡܶܢ̱ ܬܪܶܝ ܓܰܒ̈ܶܐ ܩܽܘܕ̱ܡܰܝّܶܗ. ܗ̄ܰܒܢ̈ܳܬ̥ܰܬّ̥ܶܗ ܓܡܰܝܕܺܝܢܰܐ ܢܶܝ ܐܶܠܰܢ ܢܶܫ̈ܶܐ، ܘܰܒܢ̈ܳܬ̥ܰܝܕ̥ܰܢ ܓܕܳܗ̄ܒܺܝܢܰܐ ܐܰܠّܶܗ. 22ܐܶܠܳܐ ܗ̄ܰܓّܰܒ̥ܪ̈ܶܐ ܒܰܗ̄ܬ̥ܶܐ ܓܡܰܩܒܠܺܝ ܠܰܢ ܕܝܳܬܒ̥ܺܝ ܐܰܥܡܰܢ ܘܗܳܘܺܝܢܰܐ ܥܰܡܳܐ ܚܰܕ̱ ܗ̄ܺܝ ܢܰܩܠܐ ܕܓܳܙܪܺܝܢܰܐ ܟܘ̇ܠ ܓܰܒ̥ܪܳܐ ܐܟ̥ ܕܟ݄ܬܢܶܝ ܗ݄ܢّܶܝ ܓܙܺܝܪ̈ܶܐ. 23ܗ̄ܰܙّܽܘ̈ܙܰܬّ̥ܶܗ ܘܰܩّܶܢ̈ܝܳܢܰܬّ̥ܶܗ ܘܟܽܘܠّܶܗ ܗ̄ܰܚّܰܝ̈ܘܳܬ̥ܰܬّ̥ܶܗ ܟܰܐܠܶܗ ܕܺܝܕ̥ܰܢ ܢܶܝ. ܐܶܠܳܐ ܛܪܳܐ ܫܳܡܥܺܝܢܰܢّܶܗ ܘ݄ܓܝܳܬܒ̥ܺܝ ܐܰܥܡܰܢ.“ 24ܘܫܰܡܺܝܥܺܝ ܡܶܢ̱ ܫܟܺܝܡ ܘܡܶܢ̱ ܚܡܽܘܪ ܗ̄ܽܘ ܒܰܒܰܝܕ̥ܶܗ ܟܽܘܠّܶܗ ܗ̄ܰܢ ܢܰܦܳܩ̈ܶܐ ܕܡܽܗ̄ܘ ܬܰܪܥܳܐ ܕܺܗ̄ܝ ܡܕ̥ܺܝܢ̱ܬܰܝܕ̥ܶܗ، ܘ݄ܓܙܺܝܪ ܟܘ̇ܠ ܓܰܒ̥ܪܳܐ، ܟܘ̇ܠ ܢܰܦܳܩܳܐ ܕܽܗ̄ܘ ܬܰܪܥܳܐ ܕܺܗ̄ܝ ܡܕ̥ܺܝܢ̱ܬܰܝܕ̥ܶܗ.
25ܘܗܰܘܺܝ ܒܽܗ̄ܘ ܝܰܘܡܳܐ ܕܰܬܠܳܬ̥ܳܐ، ܗ̄ܺܝ ܢܰܩܠܐ ܕܚܺܝܨ ܗ̄ܽܘ ܟܶܐܒ̥ܰܬّ̥ܶܗ، ܗ̄ܰܬܪܶܝ ܐܰܒܢ̈ܶܐ ܕܝܰܥܩܽܘܒ، ܫܶܡܥܽܘܢ ܘܠܶܘܺܝ ܗ̄ܰܢ ܐܰܚ̈ܽܘܢܳܢܶܐ ܕܕܺܝܢܰܐ، ܟܘ̇ܠ ܚܰܕ̱ ܡ݄ܕ ܠܶܗ ܗ̄ܽܘ ܣܰܝܦܰܝܕ̥ܶܗ، ܘܥܰܒܺܝܪܺܝ ܥܰܠ ܗ̄ܺܝ ܡܕ̥ܺܝܢ̱ܬܳܐ ܒܫܶܠܝܳܐ (ܐ݄ܫܡܳܐ ܐ݄ܫܡܳܐ) ܘ݄ܩܛ݄ܠّܶܗ ܟܘ̇ܠ ܓܰܒ̥ܪܳܐ. 26ܘܠ݄ܚܡܽܘܪ ܘܠ݄ܫܟܺܝܡ ܗ̄ܽܘ ܐܰܒܪܰܝܕ̥ܶܗ ܩܛܺܝܠ݄ܢّܶܗ ܒܦܶܡܶܗ ܕܽܗ̄ܘ ܣܰܝܦܳܐ. ܘܡ݄ܕّܶܗ ܠܕܺܝܢܰܐ ܗ̄ܺܝ ܚܳܬ̥ܰܬّ̥ܶܗ ܡܽܗ̄ܘ ܒܰܝܬܳܐ ܕ݄ܫܟܺܝܡ ܘܢܰܦܺܝܩܺܝ. 27ܘܰܗ̄ܢ ܐܰܒܢ̈ܶܐ ܕܝܰܥܩܽܘܒ ܥܰܒܺܝܪܺܝ (ܐܰܬ̥݄ܢ) ܥܰܠ ܩܛܺܝ̈ܠܶܐ ܘܡ݄ܕّܶܗ ܗ̄ܽܘ ܡܶܕܶܐ ܕܺܗ̄ܝ ܡܕ̥ܺܝܢ̱ܬܳܐ ܥܰܠ ܕ݄ܡܚܰܪܰܡّܶܗ ܠܕܺܝܢܰܐ ܗ̄ܺܝ ܚܳܬ̥ܰܬّ̥ܶܗ. 28ܘܰܥܘܳܢ̈ܰܬّ̥ܶܗ ܘܰܬّܰܘܪ̈ܰܬّ̥ܶܗ ܘܰܚܡܳܪ̈ܰܬّ̥ܶܗ ܕܒܺܗ̄ܝ ܡܕ̥ܺܝܢ̱ܬܳܐ ܘ݄ܕܒܺܗ̄ܝ ܚܰܩܠܳܐ ܡܺܝܕ݄ܢّܶܗ. 29ܘܟܽܘܠّܶܗ ܗ̄ܰܙّܽܘ̈ܙܰܬّ̥ܶܗ ܘܟܽܘܠّܶܗ ܗ̄ܰܢ ܢܰܥܺܝܡ̈ܰܬّ̥ܶܗ ܫܒܰܠّܶܗ ܥܰܡ ܗ̄ܰܢ ܢܶܫ̈ܰܬّ̥ܶܗ. ܘ݄ܓܢܽܒّ̥ܶܗ ܟܘ̇ܠ ܡܶܕܶܐ ܕܟܺܝܬ ܒܺܗ̄ܝ ܡܕ̥ܺܝܢ̱ܬܳܐ.
30ܘܐܡ݄ܪ ܠܶܗ ܝܰܥܩܽܘܒ ܠܫܶܡܥܽܘܢ ܘ݄ܠܠܶܘܺܝ: ”ܡܰܟܽܒ̥ܟ̥ܽܘ ܠܺܝ ܕ݄ܬܒ̥݄ܪܟ̥ܽܘ ܠܺܝ ܒܰܝܢ ܗ̄ܰܥّܳܡܽܘܪ̈ܶܐ ܕܺܗ̄ܝ ܐܰܪܥܳܐ: ܒܰܝܢ ܗ̄ܰܟܢܰܥܢܳܝ̈ܶܐ ܘܒܰܝܢ ܗ̄ܰܦّܰܪ̈ܙܳܝܶܐ، ܘܳܐܢܳܐ ܐ݄ܫܡܳܐ ܐ̱ܢܳܐ ܒܽܗ̄ܘ ܡܶܢܝܳܢܳܐ، ܘܓ݄ܕܠܳܬܡܺܝ ܐܰܥܠܺܝ ܘ݄ܓܡܳܚ݄ܢ ܠܺܝ. ܘ݄ܓܡܺܝܣܰܟܰܪ ܐ̱ܢܳܐ ܐܳܢܳܐ ܘܽܗ̄ܘ ܒܰܝܬܰܝܕ̥ܺܝ.“ 31ܘܗ݄ܢّܶܝ ܐܡ݄ܪّܶܗ: ”ܐܟ̥ ܕܺܗ̄ܝ ܙܰܢܳܝܬܳܐ ܣ݄ܡّܶܗ ܠܚܳܬ̥ܰܢ.“
Právě zvoleno:
:
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Suryoyo Bible © 2024 Aramaic Bible Translation