ܣܶܦܪܳܐ ܕܡܰܦܩܳܢܳܐ 2
2
1ܘܰܐܙّܶܗ ܓܰܒ̥ܪܳܐ ܡܶܢ̱ ܒܶܝ ܠܶܘܺܝ، ܘܡ݄ܕ ܠܶܗ ܗ̄ܺܝ ܒܰܪܬ̥ܳܐ ܕܠܶܘܺܝ. 2ܘ݄ܛܥܺܝܢܳܐ ܗ̄ܺܝ ܐܰܢ̱ܬ̥ܬܳܐ ܘܡܰܘܠܰܕ ܠܰܗ ܐܰܒܪܳܐ. ܘ݄ܚܙܶܐ ܠܰܗ ܕܫܰܦܺܝܪܳܐ ܝܳܐ. ܘ݄ܬܠܶܐ ܠܰܗ ܬܠܳܬ̥ܳܐ ܝܰܪ̈ܚܶܐ. 3ܘܠܳܐ ܦܰܝ݄ܫ ܟܺܝܒܰܗ ܕܬܳܠܝܳܐ ܠܶܗ. ܘܡ݄ܕ ܠܰܗ ܩܺܝܒܽܘܬ̥ܳܐ ܕܩܰܝܣܳܐ ܕܥܰܪܩܳܐ، ܘܫ݄ܥ ܠܰܗ ܒܽܗ̄ܘ ܩܺܝܪܳܐ ܘܒܽܗ̄ܘ ܙܶܦܬܳܐ ܘܡܰܚܰܬ ܠܰܗ ܗ̄ܽܘ ܙܥܽܘܪܳܐ ܐܶܒܰܗ. ܘܡܰܚܰܬ ܠܰܗ ܒܺܗ̄ܝ ܕܽܘܟܬ̥ܳܐ ܕܰܡّܰܝ̈ܶܐ ܪ̈ܰܩܺܝܩܶܐ ܥܰܠ ܣܰܦ̊ܬ̥ܶܗ ܕܽܗ̄ܘ ܢܰܗܪܳܐ. 4ܘܩܰܝܺܝܡܳܐ ܗ̄ܺܝ ܚܳܬ̥ܳܐ ܡܶܢ̱ ܪܽܘܚܩܳܐ ܕܳܐܕ̥ܥܳܐ ܡܶܢ̱ ܟܡܺܝܣ݄ܡ ܐܶܒܶܗ.
5ܘܢܰܚܺܝܬܳܐ ܗ̄ܺܝ ܒܰܪܬ̥ܳܐ ܕܦܶܪܥܽܘܢ ܕܣܳܚܝܳܐ ܒܽܗ̄ܘ ܢܰܗܪܳܐ، ܘܰܓܪ̈ܰܥܝܳܬ̥ܰܝܕ̥ܰܗ ܡܗܰܠܟ̥ܺܝ ܗ̄ܘܰܘ̱ ܥܰܠ ܣܰܦ̊ܬ̥ܶܗ ܕܽܗ̄ܘ ܢܰܗܪܳܐ. ܘ݄ܚܙܶܐ ܠܰܗ ܗ̄ܺܝ ܩܺܝܒܽܘܬ̥ܳܐ ܒܺܗ̄ܝ ܕܽܘܟܬ̥ܳܐ ܕܰܡّܰܝ̈ܶܐ ܪ̈ܰܩܺܝܩܶܐ. ܘ݄ܡܫܰܕܰܪ ܠܰܗ ܗ̄ܰܓܪ̈ܰܥܝܳܬ̥ܰܝܕ̥ܰܗ ܘܡܺܝܕܳܐ ܠܰܗ. 6ܘ݄ܦܬܺܝܚܳܐ ܠܰܗ ܘ݄ܚܙܶܐ ܠܰܗ ܗ̄ܽܘ ܙܥܽܘܪܳܐ، ܘܟܰܐܠܶܗ ܗ̄ܽܘ ܙܥܽܘܪܳܐ ܟܳܒܳܟ̥ܶܐ. ܘܡܰܪܚܰܡ ܠܰܗ ܐܰܥܠܶܗ ܘܐܡ݄ܪ ܠܰܗ: ”ܡܰܗ̄ܢ ܐܰܒܢ̈ܶܐ ܕܰܥّܶܒܪ̈ܳܝܶܐ ܝܳܐ ܗܰܢܳܐ.“ 7ܘܐܡ݄ܪ ܠܰܗ ܗ̄ܺܝ ܚܳܬ̥ܰܝܕ̥ܶܗ (ܕܡܽܘܫܶܐ) ܠܺܗ̄ܝ ܒܰܪܬ̥ܳܐ ܕܦܶܪܥܽܘܢ: ”ܟ݄ܐܒܥܰܬ ܐ݄ܙّܺܝ ܩܳܪܝܳܐ ܐ̱ܢܳܐ ܠܰܟ̥ ܐܰܢ̱ܬ̥ܬܳܐ ܡܰܘܢܩܳܢܺܝܬ̥ܳܐ ܡܰܢ̱ ܥّܶܒܪ̈ܳܝܶܐ، ܕܡܰܘܢܩܳܐ ܠܰܟ̥ ܗ̄ܽܘ ܙܥܽܘܪܰܢܳܐ؟“ 8ܘܐܡ݄ܪ ܠܰܗ ܠܰܗ ܗ̄ܺܝ ܒܰܪܬ̥ܳܐ ܕܦܶܪܥܽܘܢ: ”ܙܰܟ̥.“ ܘܰܐܙّܰܗ ܗ̄ܺܝ ܥܠܰܝܡܬܳܐ ܘ݄ܩܪܶܐ ܠܰܗ ܠܺܗ̄ܝ ܐܶܡܳܐ ܕܽܗ̄ܘ ܙܥܽܘܪܳܐ. 9ܘܐܡ݄ܪ ܠܰܗ ܠܰܗ ܗ̄ܺܝ ܒܰܪܬ̥ܳܐ ܕܦܶܪܥܽܘܢ: ”ܡܘ̇ܕ ܠܰܟ̥ ܗ̄ܽܘ ܙܥܽܘܪܰܢܳܐ. ܡܰܘܢܰܩ ܠܺܝ ܝܳܐ ܘܳܐܢܳܐ ܓܕܳܗ̄ܒܰܠܠܰܟ̥ ܗ̄ܽܘ ܐܰܓ̥ܪܰܝܕ̥ܰܟ̥.“ ܘܡ݄ܕ ܠܰܗ ܗ̄ܺܝ ܐܰܢ̱ܬ̥ܬܳܐ ܗ̄ܽܘ ܙܥܽܘܪܳܐ ܘܡܰܘܢܰܩ ܠܰܗ ܠܶܗ. 10ܘܝܰܪܽܒ̥ ܗ̄ܽܘ ܙܥܽܘܪܳܐ. ܘܡܰܝܬܶܐ ܠܰܗ ܠܺܗ̄ܝ ܒܰܪܬ̥ܳܐ ܕܦܶܪܥܽܘܢ. ܘܗܰܘܺܝ ܠܰܗ ܝܳܐ ܐܰܒܪܳܐ، ܘ݄ܩܪܶܐ ܠܰܗ ܐ݄ܫܡܶܗ ”ܡܽܘܫܶܐ،“ ܥܰܠ ܕܐܡ݄ܪ ܠܰܗ ”ܕܡܰܢ̱ ܡّܰܝ̈ܶܐ ܓܪ݄ܫ ܠܺܝ.“
11ܘܗܰܘܺܝ ܒܰܝّܰܘܡ̈ܰܢ݄ܟ، ܘܝܰܪܽܒ̥ ܡܽܘܫܶܐ ܘܢܰܦ݄ܩ ܠܓܰܒ ܗ̄ܰܢ ܐܰܚ̈ܽܘܢܳܢܰܝܕ̥ܶܗ، ܘ݄ܚܙܶܐ ܠܶܗ ܗ̄ܽܘ ܫܽܘܥܒܳܕܰܬّ̥ܶܗ. ܘ݄ܚܙܶܐ ܠܶܗ ܓܰܒ̥ܪܳܐ ܡܶܨܪܳܝܳܐ ܕܟܳܡܳܚܶܐ ܠܓܰܒ̥ܪܳܐ ܥܶܒܪܳܝܳܐ ܡܰܗ̄ܢ ܐܰܚ̈ܽܘܢܳܢܰܝܕ̥ܶܗ، ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ. 12ܘܕܰܥ݄ܪ ܚ݄ܪ ܠܶܗ ܠܰܗ̄ܪܟܶܐ ܘܠܰܗ̄ܪܟܶܐ ܘ݄ܚܙܶܐ ܠܶܗ ܕܠܰܝܬ ܢܳܫܳܐ، ܘ݄ܩܛܺܝܠ ܠܶܗ ܗ̄ܽܘ ܡܶܨܪܳܝܳܐ، ܘ݄ܛܡ݄ܪ ܠܶܗ ܒܽܗ̄ܘ ܥܰܦܪܳܐ. 13ܘܢܰܦ݄ܩ ܒܝܰܘܡܳܐ ܚܪܶܢܳܐ، ܘ݄ܚܙܶܐ ܠܶܗ ܟܰܐܠ݄ܢ ܬܪܶܝ ܓܰܒ̥ܪ̈ܶܐ ܥܶܒܪ̈ܳܝܶܐ ܟܳܡܓܰܪ݄ܢ ܚܕ̥ܳܕ̥̈ܶܐ. ܘܐܡ݄ܪ ܠܶܗ ܠܽܗ̄ܘ ܚܰܪܒ̥ܳܐ: ”ܠܡ݄ܢ ܟܳܡܳܚܰܬ ܠܚܰܒ̥ܪܳܟ̥؟“ 14ܡܰܕܥܰܪ ܠܶܗ: ”ܡܰܢܝܳܐ ܕܣ݄ܡ ܠܶܗ ܠܳܟ̥ ܪܺܝܫܳܐ ܘܕܰܝܳܢܳܐ ܐܰܥܠܰܢ؟ ܠܰܫܰܢ ܕܩܳܛܠܰܬ ܠܺܝ ܟ݄ܐܡّܰܪ̱ܬ؟ ܐܟ̥ ܕ݄ܩܛܺܝܠ ܠܳܟ̥ ܐܰܬ̥ܡ݄ܠ ܗ̄ܽܘ ܡܶܨܪܳܝܰܘܳܐ؟“ ܘܙܰܝ݄ܥ ܡܽܘܫܶܐ ܘܐܡ݄ܪ ܠܶܗ: ”ܒ݄ܫܪܳܪܳܐ ܝܕ̥ܺܝܥ ܗ̄ܽܘ ܡܰܐܡܪܰܢܳܐ.“ 15ܘܫܰܡ݄ܥ ܦܶܪܥܽܘܢ ܗ̄ܽܘ ܡܰܐܡܪܰܢܳܐ، ܘܰܐܒ݄ܥ ܕܩܳܛ݄ܠ ܠܡܽܘܫܶܐ. ܘܥܰܪ݄ܩ ܡܽܘܫܶܐ ܡܶܢ̱ ܩܽܘܕ̱ܡܶܗ ܕܦܶܪܥܽܘܢ، ܘܰܐܙّܶܗ ܠܺܗ̄ܝ ܐܰܪܥܳܐ ܕܡܶܕܝܰܢ. ܘܝܰܬܽܒ̥ ܥܰܠ ܗ̄ܺܝ ܒܺܐܪܳܐ.
16ܘܟ݄ܬ ܗ̄ܘܰܐ ܠܽܗ̄ܘ ܟܽܘܡܪܳܐ ܕܡܶܕܝܰܢ ܫܒ̥ܰܥ ܒܢ̈ܳܬ̥ܳܐ. ܘܳܐܬ̥݄ܢ ܗ̄ܘܰܘ̱ ܘܓܳܪܫܺܝ ܗ̄ܘܰܘ̱ ܡܰܝ̈ܶܐ ܘܡܳܠ݄ܢ ܗ̄ܘܰܘ̱ ܗ̄ܰܓّܽܘܪ̈ܢܶܐ ܕܡܰܫܬ݄ܢ ܗ̄ܰܥܘܳܢ̈ܶܐ ܕܽܗ̄ܘ ܒܰܒܰܬّ̥ܶܗ. 17ܘܳܐܬ̥݄ܢ ܗ̄ܘܰܘ̱ ܗ̄ܰܪّܳܥܝ̈ܶܐ ܘܛܳܪܕܺܝ ܗ̄ܘܰܢّܶܗ. ܘܩܰܝ݄ܡ ܡܽܘܫܶܐ ܘ݄ܦܪܺܝܩܺܝ ܠܶܗ ܘܡܰܫܬܶܐ ܠܶܗ ܗ̄ܰܥܘܳܢ̈ܰܬّ̥ܶܗ. 18ܘܰܐܬ̥݄ܢ ܓܰܒ ܪܰܥܽܘܐܶܝܠ ܗ̄ܽܘ ܒܰܒܰܬّ̥ܶܗ. ܘܐܡ݄ܪ ܠܰܗ ܠّܶܗ: ”ܠܡ݄ܢ ܒܣܽܘܪܗܳܒܳܐ ܡܰܫܬܰܠܟ̥ܽܘ ܐܰܕܝܰܘܡܰܐ؟“ 19ܐܡ݄ܪّܰܗ ܠܶܗ: ”ܓܰܒ̥ܪܳܐ ܡܶܨܪܳܝܳܐ ܦܪ݄ܩ ܠܶܗ ܠܰܢ ܡܺܗ̄ܝ ܐܺܝܕ̥ܳܐ ܕܰܪّܳܥܝ̈ܶܐ. ܘ݄ܓܪ݄ܫ ܠܶܗ ܠܰܢ ܡܰܝ̈ܶܐ ܣܬܶܝ ܘܡܰܫܬܶܐ ܠܶܗ ܗ̄ܰܥܘܳܢ̈ܰܝܕ̥ܰܢ.“ 20ܘܐܡ݄ܪ ܠܶܗ ܠܰܒܢ̈ܳܬ̥ܰܝܕ̥ܶܗ: ”ܐܰܝܟܳܐ ܝܳܐ؟ ܠܡ݄ܢ ܡܰܪܦܰܠܟ̥ܽܘ ܗ̄ܽܘ ܓܰܒ̥ܪܳܐ؟ ܙܳܟ̥ܽܘ ܩܪܰܝܽܘ ܠܶܗ ܕܳܐܟ̥݄ܠ ܠܰܚܡܳܐ.“ 21ܘ݄ܦܨܺܝܚ ܡܽܘܫܶܐ ܕܝܳܬܽܒ̥ ܥܰܡ ܗ̄ܽܘ ܓܰܒ̥ܪܳܐ. ܘܗܽܒ̥ ܠܶܗ ܠܶܗ ܗ̄ܺܝ ܒܰܪܬ̥ܰܝܕ̥ܶܗ ܨܶܦܽܘܪܳܐ ܐܰܢ̱ܬ̥ܬܳܐ. 22ܘܡܰܘܠܰܕ ܠܰܗ ܐܰܒܪܳܐ ܘ݄ܩܪܶܐ ܠܶܗ ܐ݄ܫܡܶܗ ”ܓܶܪܫܽܘܢ“ (ܢܽܘܟ̥ܪܳܝܳܐ) ܥܰܠ ܕܐܡ݄ܪ ܠܶܗ: ”ܢܽܘܟ̥ܪܳܝܳܐ ܗܰܘܺܝ ܐ̱ܢܳܐ ܒܰܐܪܥܳܐ ܢܽܘܟ̥ܪܰܝܬܳܐ.“ ܘܡܰܘܠܰܕ ܠܰܗ ܗ̄ܽܘ ܐܰܒܪܳܐ ܕܰܬܪܶܝ ܠܡܽܘܫܶܐ، ܘ݄ܩܪܶܐ ܠܶܗ ܐ݄ܫܡܶܗ ܐܶܠܺܝܥܳܙܳܪ ܥܰܠ (ܕܐܡ݄ܪ ܠܶܗ:) ”ܕܰܐܠܳܗܳܐ ܕܰܒّܰܒܳܢ̈ܰܝܕ̥ܺܝ ܗܰܘܺܝ ܗ̄ܽܘ ܡܥܰܕܪܳܢܰܝܕ̥ܺܝ ܘܽܗ̄ܘ ܦܳܪܽܘܩܰܝܕ̥ܺܝ ܡܽܗ̄ܘ ܣܰܝܦܳܐ ܕܦܶܪܥܽܘܢ.“
23ܘܗܰܘܺܝ ܡܶܢ̱ ܒ݄ܬ̥݄ܪ ܝܰܘܡ̈ܳܬ̥ܳܐ ܓ̥ܰܠܰܒܶܐ ܡܰܝ݄ܬ̥ ܗ̄ܽܘ ܡܰܠܟܳܐ ܕܡܶܨܪܶܝܢ. ܘܡܰܢܺܝܢܺܝ ܗ̄ܘܰܘ̱ ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ ܡܺܗ̄ܝ ܓܪܰܥܝܽܘܬ̥ܳܐ ܩܫܺܝܬܳܐ، ܘ݄ܡܨܰܠܰܠّܶܗ. ܘܣܰܠܺܝܩܳܐ ܗ̄ܺܝ ܓܥܰܝܬܰܬّ̥ܶܗ ܓܰܒ ܐܰܠܳܗܳܐ ܡܺܗ̄ܝ ܓܪܰܥܝܽܘܬ̥ܳܐ. 24ܘܫܰܡ݄ܥ ܐܰܠܳܗܳܐ ܗ̄ܽܘ ܬܶܢܺܝܢܰܬّ̥ܶܗ، ܘ݄ܕ̥ܟ݄ܪ ܠܶܗ ܗ̄ܽܘ ܩܝܳܡܰܝܕ̥ܶܗ ܕܥܰܡ ܐܰܒܪܳܗܳܡ ܘܥܰܡ ܐܺܝܣܚܳܩ ܘܥܰܡ ܝܰܥܩܽܘܒ. 25ܘ݄ܚܙܶܐ ܠܶܗ ܐܰܠܳܗܳܐ ܠܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ، ܘܰܐܕ̥݄ܥ ܐܰܠܳܗܳܐ.
Právě zvoleno:
ܣܶܦܪܳܐ ܕܡܰܦܩܳܢܳܐ 2: ܟܬܒܐ
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Suryoyo Bible © 2024 Aramaic Bible Translation