ܣܶܦܪܳܐ ܕܡܰܦܩܳܢܳܐ 14
14
1ܘܡ݄ܫܓ̥ܶܠ ܠܶܗ ܡܳܪܝܳܐ ܥܰܡ ܡܽܘܫܶܐ ܘܐܡ݄ܪ ܠܶܗ: 2”ܐܰܡܰܪ ܠܒܶܝ ܐܺܝܣܪܳܐܶܝܠ ܕܕܳܥܪܺܝ ܘܝܳܬܒ̥ܺܝ ܥܰܠ ܗ̄ܽܘ ܓܰܒܳܐ ܕܚܶܪܺܝܬ̥ܳܐ، ܒܰܝܢ ܡܰܓܕܽܘܠ ܘܒܰܝܢ ܗ̄ܽܘ ܝܰܡܳܐ، ܡܩܰܒ݄ܠ ܒܥܶܠܨܳܦܽܘܢ. ܘܝܳܬܒ̥ܺܝܬܽܘ ܩܽܘܕ̱ܡܶܗ ܕܽܗ̄ܘ ܝܰܡܳܐ. 3ܘ݄ܓܕܳܐܡ݄ܪ ܦܶܪܥܽܘܢ ܥܰܠ ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ ܕܢܽܘܟ̥ܪ̈ܳܝܶܐ ܢܶܝ ܒܺܗ̄ܝ ܐܰܪܥܳܐ. ܘ݄ܣܟ̥ܺܝܪ ܐܰܥܠܰܝّܶܗ ܗ̄ܽܘ ܡܰܕ̥݄ܒܪܳܐ.“ 4ܘܐܡ݄ܪ ܠܶܗ ܡܳܪܝܳܐ ܠܡܽܘܫܶܐ: ”ܐܳܢܳܐ ܓܡܰܩܫܶܐ ܐ̱ܢܳܐ ܠܶܒܶܗ ܕܦܶܪܥܽܘܢ، ܘ݄ܓܫܳܕ̥ܶܐ ܒ݄ܬ̥ܪܰܝܟ̥ܽܘ. ܘ݄ܓܡܺܝܫܰܒܰܚ ܐ̱ܢܳܐ ܒܦܶܪܥܽܘܢ ܘ݄ܒܟܽܘܠܶܗ ܗ̄ܽܘ ܚܰܝܠܰܝܕ̥ܶܗ. ܘ݄ܓܕ݄ܐܕ̥ܥܺܝ ܗ̄ܰܡّܶܨܪ̈ܳܝܶܐ ܕܳܐܢܳܐ ܐ̱ܢܳܐ ܡܳܪܝܳܐ.“ ܘܣ݄ܡّܶܗ ܗܰܘܟ̥ܰܐ.
5ܘܡܰܘܕ̥ܰܥّܶܗ ܠܽܗ̄ܘ ܡܰܠܟܳܐ ܕܡܶܨܪܶܝܢ ܕܰܐܙّܶܗ ܝܳܐ ܗ̄ܽܘ ܥܰܡܳܐ. ܘ݄ܡܫܰܩܠ݄ܒ ܠܶܒܶܗ ܕܦܶܪܥܽܘܢ ܘܕܰܓܪ̈ܶܝܥܰܝܕ̥ܶܗ ܥܰܠ ܗ̄ܽܘ ܥܰܡܳܐ، ܘܐܡ݄ܪّܶܗ: ”ܡ݄ܢ ܣ݄ܡ ܠܰܢ ܕ݄ܡܫܰܕܰܪ ܠܰܢ ܐܺܝܣܪܳܐܶܝܠ ܡܽܗ̄ܘ ܫܽܘܥܒܳܕ̥ܰܝܕ̥ܰܢ؟“ 6ܘܡܰܐܣ݄ܪ ܠܶܗ ܗ̄ܰܡّܰܪ̈ܟܒܳܬ̥ܰܝܕ̥ܶܗ ܕܰܣّ݄ܘܣܝ̈ܶܐ، ܘܡܰܘܒܶܠ ܠܶܗ ܗ̄ܽܘ ܥܰܡܰܝܕ̥ܶܗ ܐܰܥܡܶܗ. 7ܘܡܰܘܒܶܠ ܠܶܗ ܫܶܬ̥ܡܳܐܐ ܡܰܪ̈ܟܒܳܬ̥ܳܐ ܡܓܰܒܝ̈ܶܐ، ܘܟܽܘܠّܶܗ ܗ̄ܰܡّܰܪ̈ܟܒܳܬ̥ܳܐ ܕܰܡّܶܨܪ̈ܳܝܶܐ، ܘܓܰܒ̥ܪ̈ܶܐ ܥܰܠ ܟܽܘܠّܶܗ (ܗ̄ܰܡّܰܪ̈ܟܒܳܬ̥ܳܐ). 8ܘܡܰܩܫܶܐ ܠܶܗ ܡܳܪܝܳܐ ܠܶܒܶܗ ܕܦܶܪܥܽܘܢ ܗ̄ܽܘ ܡܰܠܟܳܐ ܕܡܶܨܪܶܝܢ. ܘ݄ܫܕܶܐ ܠܶܗ ܒ݄ܬ̥݄ܪ ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ. ܘܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ ܢܰܦܺܝܩܺܝ ܒܺܐܝܕ̥ܳܐ ܥܶܠܰܝܬܳܐ. 9ܘ݄ܫܕܰܠّܶܗ ܗ̄ܰܡّܶܨܪ̈ܳܝܶܐ ܒ݄ܬ̥ܪܰܝّܶܗ. ܘܡܰܛ݄ܢّܶܗ ܘܗ݄ܢّܶܝ ܝܰܬܺܝܒ̥̈ܶܐ ܥܰܠ ܗ̄ܽܘ ܝܰܡܳܐ. ܘܟܽܘܠّܶܗ ܗ̄ܰܣّܘ̇ܣܝ̈ܶܐ ܕܦܶܪܥܽܘܢ ܘܰܡّܰܪ̈ܟܒܳܬ̥ܰܝܕ̥ܶܗ ܘܰܦّܰܪ̈ܳܫܶܐ ܘܽܗ̄ܘ ܚܰܝܠܰܝܕ̥ܶܗ (ܡܰܛ݄ܢّܶܗ) ܘܗ݄ܢّܶܝ ܝܰܬܺܝܒ̥̈ܶܐ ܥܰܠ ܓܰܒܰܗ ܕܚܶܪܺܝܬ̥ܳܐ، ܡܩܰܒ݄ܠ ܒܥܶܠܨܳܦܽܘܢ.
10ܘ݄ܡܩܰܪܰܒ̥ ܠܶܗ ܦܶܪܥܽܘܢ. ܘܡܰܥܠܰܠّܶܗ ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ ܥܰܝܢ̈ܳܬ̥ܰܝّܶܗ ܘ݄ܚܙܰܠّܶܗ ܗ̄ܰܡّܶܨܪ̈ܳܝܶܐ ܐܰܬ̥ܳܝ̈ܶܐ ܒ݄ܬ̥ܪܰܝّܶܗ. ܘܙܰܝܺܝܥܺܝ ܓ̥ܰܠܰܒܶܐ. ܘ݄ܡܨܰܠܰܠّܶܗ ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ ܠܡܳܪܝܳܐ. 11ܘܐܡ݄ܪّܶܗ ܠܡܽܘܫܶܐ: ”ܩܰܝ ܠܰܝ̱ܬ ܗ̄ܘܰܐ ܩܰܒ̥ܪ̈ܶܐ ܒܡܶܨܪܶܝܢ ܡ݄ܕ ܠܳܟ̥ ܠܰܢ ܕܡܰܝܬ̥ܺܝܢܰܐ ܒܽܗ̄ܘ ܡܰܕ̥݄ܒܪܳܐ؟ ܠܡ݄ܢ ܣ݄ܡ ܠܳܟ̥ ܐܶܒܰܢ ܗܰܘܟ̥ܰܐ ܘܡܰܘܦܰܩ ܠܳܟ̥ ܠܰܢ ܡܶܢ̱ ܡܶܨܪܶܝܢ؟ 12ܠܰܝ̱ܬ ܗ̄ܘܰܐ ܗܰܢܳܐ ܗ̄ܽܘ ܡܰܐܡܪܳܐ ܕܐܡ݄ܪ ܗ̄ܘܰܘ̱ ܠܰܢ ܠܳܟ̥ ܒܡܶܨܪܶܝܢ: ܛܪܰܝ ܠܰܢ ܕܥܳܒܕܺܝܢܰܐ ܠܰܡّܶܨܪ̈ܳܝܶܐ. ܡܺܐܝܕ̥ܶܗ ܕܛܰܒ̥ ܗ̄ܘܰܐ ܐܶܠܰܢ ܕܥܳܒ̥ܕܺܝܢܰܐ ܠܰܡّܶܨܪ̈ܳܝܶܐ ܡܶܢ̱ ܕܡܰܝܬ̥ܺܝܢܰܐ ܒܽܗ̄ܘ ܡܰܕ̥݄ܒܪܰܢܳܐ.“ 13ܘܐܡ݄ܪ ܠܶܗ ܡܽܘܫܶܐ ܠܽܗ̄ܘ ܥܰܡܳܐ: ”ܠܳܐ ܙܰܝܥܺܝܬܽܘ. ܢܛܰܪܽܘ ܘ݄ܚܙܰܝܽܘ ܗ̄ܽܘ ܦܽܘܪܩܳܢܳܐ ܕܡܳܪܝܳܐ ܕ݄ܓܣܳܝܰܡ ܠܶܗ ܐܰܠܟ̥ܽܘ ܐܰܕܝܰܘܡܰܐ. ܒܶܗ ܐܰܝܕܰܪܒܳܐ ܟܚܳܙܺܝܬܽܘ ܗ̄ܰܡّܶܨܪ̈ܳܝܶܐ ܐܰܕܝܰܘܡܰܐ، ܢܰܩܠܐ ܚܪܶܬܳܐ ܠܳܐ ܓܚܳܙܺܝܬܽܘܢّܶܗ ܠܥܳܠܰܡ. 14ܡܳܪܝܳܐ ܓ݄ܡܚܰܪ݄ܒ ܡܶܢ̱ ܚܠܳܦܰܝܟ̥ܽܘ، ܘܗܰܬܽܘ ܠ݄ܐ ܓܪܳܡܫܺܝܬܽܘ.“ ܘ݄ܡܨܰܠܶܐ ܠܶܗ ܡܽܘܫܶܐ ܩ݄ܕ̱ܡ ܡܳܪܝܳܐ.
15ܘܐܡ݄ܪ ܠܶܗ ܡܳܪܝܳܐ ܠܡܽܘܫܶܐ: ”ܡ݄ܢܝܳܐ ܕܟܳܡܨܰܠܰܬ ܠܺܝ؟ ܐܰܡܰܪ ܠܒܶܝ ܐܺܝܣܪܳܐܶܝܠ ܛܪܳܐ ܡܰܛܥܢܺܝ ܘ݄ܐܙّ݄ܢ. 16ܘܗܰܬ ܡܰܥܠܰܝ ܗ̄ܺܝ ܚܰܛܪܰܝܕ̥ܳܟ̥ ܘܡܰܢܚ݄ܬ ܐܺܝܕ̥ܳܟ̥ ܥܰܠ ܗ̄ܽܘ ܝܰܡܳܐ، ܘ݄ܦܠܰܓ̥ܶܗ. ܘ݄ܛܪܳܐ ܥܳܒܪܺܝ ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ ܠܰܘܓ̥݄ܠ ܕܽܗ̄ܘ ܝܰܡܳܐ ܥܰܠ ܗ̄ܺܝ ܐܰܪܥܰܝܕ̥ܶܗ (ܒܝܰܒܫܳܐ). 17ܘܳܐܢܳܐ ܓܡܰܩܫܶܐ ܐ̱ܢܳܐ (ܓܡܰܣܡܶܐ ܐ̱ܢܳܐ) ܠܶܒ̈ܶܐ ܕܰܡّܶܨܪ̈ܳܝܶܐ ܕܥܳܒܪܺܝ ܒ݄ܬ̥ܪܰܝّܶܗ. ܘ݄ܓܡܺܝܫܰܒܰܚ ܐ̱ܢܳܐ ܒܦܶܪܥܽܘܢ ܘ݄ܒܟܽܘܠܶܗ ܗ̄ܽܘ ܚܰܝܠܰܝܕ̥ܶܗ ܘܒܰܡّܰܪ̈ܟܒܳܬ̥ܰܝܕ̥ܶܗ ܘܒܰܦّܰܪ̈ܳܫܰܝܕ̥ܶܗ. 18ܘ݄ܓܕ݄ܐܕ̥ܥܺܝ ܗ̄ܰܡّܶܨܪ̈ܳܝܶܐ ܕܳܐܢܳܐ ܐ̱ܢܳܐ ܡܳܪܝܳܐ ܗ̄ܺܝ ܢܰܩܠܐ ܕܡܺܝܫܰܒܰܚ ܐ̱ܢܳܐ ܒܦܶܪܥܽܘܢ ܘ݄ܒܟܽܘܠܶܗ ܗ̄ܽܘ ܚܰܝܠܰܝܕ̥ܶܗ ܘܒܰܡّܰܪ̈ܟܒܳܬ̥ܰܝܕ̥ܶܗ ܘܒܰܦّܰܪ̈ܳܫܰܝܕ̥ܶܗ.“
19ܘ݄ܢܩܺܝܠ ܗ̄ܽܘ ܡܰܠܰܐܟ̥ܳܐ ܕܡܳܪܝܳܐ ܕܟ݄ܬ ܗ̄ܘܰܐ ܩܰܕ̱ܡܽܘܬ̥ܰܗ ܕܺܗ̄ܝ ܡܰܫܪܺܝܬ̥ܳܐ ܕܺܐܝܣܪܳܐܶܝܠ ܘܰܐܙّܶܗ ܗܰܘܺܝ ܒ݄ܬ̥ܪܰܝّܶܗ. ܘ݄ܢܩܺܝܠ ܗ̄ܽܘ ܥܰܡܽܘܕܳܐ ܕܰܥّܰܝܡ̈ܶܐ ܡܶܢ̱ ܩܰܕ̱ܡܽܘܬ̥ܰܝّܶܗ ܘܰܐܙّܶܗ ܩܰܝ݄ܡ ܒ݄ܬ̥ܪܰܝّܶܗ. 20ܘܥܰܒ݄ܪ ܒܰܝܢ ܗ̄ܺܝ ܡܰܫܪܺܝܬ̥ܳܐ ܕܰܡّܶܨܪ̈ܳܝܶܐ ܠܺܗ̄ܝ ܡܰܫܪܺܝܬ̥ܳܐ ܕܺܐܝܣܪܳܐܶܝܠ. ܘܗܰܘܺܝ ܥܰܝܡܳܐ ܘܥ݄ܬܡܳܐ ܟܽܘܠܶܗ ܗ̄ܽܘ ܠܰܠܝܳܐ. ܘܡܰܢܗܰܪ ܠܶܗ ܟܽܘܠܶܗ ܗ̄ܽܘ ܠܰܠܝܳܐ ܠܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ. ܘܠܳܐ ܡܩܰܪܰܒّ̥ܶܗ ܗܰܢܺܝ ܠܓܰܒ ܗܰܢܺܝ ܟܽܘܠܶܗ ܗ̄ܽܘ ܠܰܠܝܳܐ. 21ܘܡܰܥܠܶܐ ܠܶܗ ܡܽܘܫܶܐ ܐܺܝܕ̥ܶܗ ܥܰܠ ܗ̄ܽܘ ܝܰܡܳܐ. ܘ݄ܩܠ݄ܥ ܠܶܗ ܡܳܪܝܳܐ ܠܽܗ̄ܘ ܝܰܡܳܐ ܒܗܰܘܰܐ ܩܘܺܝܬ̥ܳܐ ܕܽܗ̄ܘ ܚܶܡܳܐ ܟܽܘܠܶܗ ܗ̄ܽܘ ܠܰܠܝܳܐ، ܘܣ݄ܡ ܠܶܗ ܗ̄ܽܘ ܝܰܡܳܐ ܝܰܒܫܳܐ، ܘ݄ܦܠܺܝܓ̥ܺܝ ܗ̄ܰܡّܰܝ̈ܶܐ. 22ܘܥܰܒܺܝܪܺܝ ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ ܠܰܘܓ̥݄ܠ ܕܽܗ̄ܘ ܝܰܡܳܐ ܒܺܗ̄ܝ ܐܰܪܥܳܐ ܝܰܒ݄ܫܬܳܐ. ܘܰܡّܰܝ̈ܶܐ ܗܰܘ݄ܢّܶܗ ܐܟ̥ ܕܫܽܘܪܳܐ ܡܽܗ̄ܘ ܝܰܡܺܝܢܰܬّ̥ܶܗ ܘܡܽܗ̄ܘ ܣܶܡܳܠܰܬّ̥ܶܗ. 23ܘ݄ܫܕܰܠّܶܗ ܗ̄ܰܡّܶܨܪ̈ܳܝܶܐ ܒ݄ܬ̥ܪܰܝّܶܗ ܘܥܰܒܺܝܪܺܝ ܟܽܘܠّܶܗ ܗ̄ܰܣّܘ̇ܣܝ̈ܶܐ ܕܦܶܪܥܽܘܢ ܘܰܡّܰܪ̈ܟܒܳܬ̥ܰܝܕ̥ܶܗ ܘܰܦّܰܪ̈ܳܫܰܝܕ̥ܶܗ ܒܓܰܘܶܗ ܕܽܗ̄ܘ ܝܰܡܳܐ. 24ܘܠܰܐܦ ܦܳܬ̥ܶܗ ܕܨܰܦܪܳܐ، ܚܙܶܐ ܡܳܪܝܳܐ ܠܺܗ̄ܝ ܡܰܫܪܺܝܬ̥ܳܐ ܕܰܡّܶܨܪ̈ܳܝܶܐ ܒܥܰܡܽܘܕܳܐ ܕܢܽܘܪܳܐ ܘ݄ܕܥܰܝܡܳܐ. ܘܣ݄ܡ ܠܶܗ ܫܓ̥ܽܘܫܝܳܐ ܒܺܗ̄ܝ ܡܰܫܪܺܝܬ̥ܳܐ ܕܰܡّܶܨܪ̈ܳܝܶܐ. 25ܘܡܰܐܣ݄ܪ ܠܶܗ (ܡܳܪܝܳܐ) ܗ̄ܰܓّܺܝ̈ܓ̥ܠܶܐ (ܗ̄ܰܕܽܘܠܰܒ̈ܶܐ) ܕܰܡّܰܪ̈ܟܒܳܬ̥ܰܬّ̥ܶܗ، ܘ݄ܒܥܰܣܩܽܘܬ̥ܳܐ ܩܳܠܥܺܝ ܗ̄ܘܰܢّܶܗ. ܘܐܡ݄ܪّܶܗ ܗ̄ܰܡّܶܨܪ̈ܳܝܶܐ: ”ܛܪܳܐ ܥܳܪܩܺܝܢܰܐ ܡܶܢ̱ ܩܽܘܕ̱ܡܶܗ ܕܒܶܝ ܐܺܝܣܪܳܐܶܝܠ، ܡܺܐܝܕ̥ܶܗ ܕܡܳܪܝܳܐ ܟܳܡܚܰܪ݄ܒ ܡܶܢ̱ ܚܠܳܦܰܝّܶܗ ܒܡܶܨܪܶܝܢ.“
26ܘܐܡ݄ܪ ܠܶܗ ܡܳܪܝܳܐ ܠܡܽܘܫܶܐ: ”ܡܰܢܚ݄ܬ ܐܺܝܕ̥ܳܟ̥ ܥܰܠ ܗ̄ܽܘ ܝܰܡܳܐ، ܘ݄ܓܕܳܥܪܺܝ ܗ̄ܰܡّܰܝ̈ܶܐ ܥܰܠ ܗ̄ܰܡّܶܨܪ̈ܳܝܶܐ ܘܥܰܠ ܗ̄ܰܡّܰܪ̈ܟܒܳܬ̥ܰܬّ̥ܶܗ ܘܥܰܠ ܗ̄ܰܦّܰܪ̈ܳܫܰܬّ̥ܶܗ.“ 27ܘܡܰܥܠܶܐ ܠܶܗ ܡܽܘܫܶܐ ܐܺܝܕ̥ܶܗ ܥܰܠ ܗ̄ܽܘ ܝܰܡܳܐ. ܘܠܰܐܦ ܨܰܦܪܶܗ ܕܝܰܘܡܳܐ ܕܰܥ݄ܪ ܗ̄ܽܘ ܝܰܡܳܐ ܠܕܽܘܟܬ̥ܶܗ. ܘܰܡّܶܨܪ̈ܳܝܶܐ ܥܳܪܩܺܝ ܗ̄ܘܰܘ̱ ܠܩܽܒ̥ܠܶܗ. ܘ݄ܕܪܶܐ ܠܶܗ ܡܳܪܝܳܐ ܠܰܡّܶܨܪ̈ܳܝܶܐ ܒܓܰܘܶܗ ܕܽܗ̄ܘ ܝܰܡܳܐ. 28ܘܕܰܥܺܝܪܺܝ ܗ̄ܰܡّܰܝ̈ܶܐ، ܘ݄ܡܟܰܣܰܠّܶܗ ܗ̄ܰܡّܰܪ̈ܟܒܳܬ̥ܳܐ ܘܰܦّܰܪ̈ܳܫܶܐ ܘ݄ܠܟܽܘܠܶܗ ܗ̄ܽܘ ܚܰܝܠܳܐ ܕܦܶܪܥܽܘܢ ܕܥܰܒܺܝܪܺܝ ܒ݄ܬ̥ܪܰܝّܶܗ ܠܽܗ̄ܘ ܝܰܡܳܐ، ܘܠܳܐ ܦܰܝ݄ܫ ܡ݄ܢّܶܗ ܘܠܳܐ ܚܰܕ̱. 29ܘܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ ܡܗܰܠܰܟّ̥ܶܗ ܒܽܗ̄ܘ ܝܰܡܳܐ ܐܟ̥ ܕܥܰܠ ܐܰܪܥܳܐ ܝܰܒ݄ܫܬܳܐ. ܘܰܡّܰܝ̈ܶܐ ܗܰܘ݄ܢ ܐܰܠّܶܗ ܐܟ̥ ܕܫܽܘܪܳܐ ܡܽܗ̄ܘ ܝܰܡܺܝܢܰܬّ̥ܶܗ ܘܡܽܗ̄ܘ ܣܶܡܳܠܰܬّ̥ܶܗ. 30ܘ݄ܦܪ݄ܩ ܠܶܗ (ܡܦܰܨܶܐ ܠܶܗ) ܡܳܪܝܳܐ ܒܽܗ̄ܘ ܝܰܘܡܰܘܳܐ ܠܺܐܝܣܪܳܐܶܝܠ ܡܺܗ̄ܝ ܐܺܝܕ̥ܳܐ ܕܰܡّܶܨܪ̈ܳܝܶܐ. ܘ݄ܚܙܶܐ ܠܶܗ ܐܺܝܣܪܳܐܶܝܠ ܗ̄ܰܡّܶܨܪ̈ܳܝܶܐ ܟܡܰܝܬ̥ܺܝ ܥܰܠ ܣܰܦ̊ܬ̥ܶܗ ܕܽܗ̄ܘ ܝܰܡܳܐ. 31ܘ݄ܚܙܶܐ ܠܶܗ ܐܺܝܣܪܳܐܶܝܠ ܗ̄ܺܝ ܐܺܝܕ̥ܳܐ (ܚܰܝܠܳܐ) ܪܰܒܬ̥ܳܐ ܕܡܳܪܝܳܐ ܕܣ݄ܡ ܠܰܗ ܒܰܡّܶܨܪ̈ܳܝܶܐ. ܘܙܰܝ݄ܥ ܗ̄ܽܘ ܥܰܡܳܐ ܡܶܢ̱ ܡܳܪܝܳܐ، ܘ݄ܡܗܰܝܡܰܢّܶܗ ܒܡܳܪܝܳܐ ܘ݄ܒܡܽܘܫܶܐ ܗ̄ܽܘ ܥܰܒܕܰܝܕ̥ܶܗ.
Právě zvoleno:
ܣܶܦܪܳܐ ܕܡܰܦܩܳܢܳܐ 14: ܟܬܒܐ
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Suryoyo Bible © 2024 Aramaic Bible Translation