ܣܶܦܪܳܐ ܕܡܰܦܩܳܢܳܐ 13
13
1ܘܐܡ݄ܪ ܠܶܗ ܡܳܪܝܳܐ ܠܡܽܘܫܶܐ: 2”ܡܩܰܕ݄ܫ ܠܺܝ ܟܘ̇ܠ ܒܽܘܟ̥ܪܳܐ ܕܦܳܬ݄ܚ ܟܘ̇ܠ ܟܰܪܣܳܐ ܡܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ، ܕܰܗ̄ܢ ܢܳܫ̈ܶܐ ܘܕܰܚّܰܝ̈ܘܳܬ̥ܳܐ، ܕܺܝܕ̥ܺܝ ܢܶܝ.“ 3ܘܐܡ݄ܪ ܠܶܗ ܡܽܘܫܶܐ ܠܽܗ̄ܘ ܥܰܡܳܐ: ”ܡܰܕ̥ܟܶܪܽܘ ܗ̄ܽܘ ܝܰܘܡܰܢܳܐ ܕܢܰܦܺܝܩܺܝܬܽܘ ܐܶܒܶܗ ܡܺܗ̄ܝ ܐܰܪܥܳܐ ܕܡܶܨܪܶܝܢ، ܡܽܗ̄ܘ ܐܰܬ̥ܪܳܐ ܕܺܗ̄ܝ ܓܪܰܥܝܽܘܬ̥ܳܐ. ܡܺܐܝܕ̥ܶܗ ܕܒܺܐܝܕ̥ܳܐ ܚ݄ܨܬܳܐ ܡܰܘܦܰܩ ܠܶܗ ܠܟ̥ܽܘ ܡܳܪܝܳܐ ܡܰܗ̄ܪܟܶܐ، ܘܠܳܐ ܡ݄ܬܐܟ̥݄ܠ ܚܰܡܺܝܥܳܐ. 4ܒܽܗ̄ܘ ܝܰܘܡܰܢܳܐ ܟܢܳܦܩܺܝܬܽܘ ܒܽܗ̄ܘ ܝܰܪܚܳܐ ܕܰܗّܰܒܳܒ̈ܶܐ. 5ܘ݄ܓܕܳܗ̄ܘܶܐ ܗ̄ܺܝ ܢܰܩܠܐ ܕܡܳܪܝܳܐ ܡܰܥܒܰܪܟ̥ܽܘ ܠܺܗ̄ܝ ܐܰܪܥܳܐ ܕܰܟܢܰܥܢܳܝ̈ܶܐ ܘܕܰܚّܺܝܬ̥ܳܝ̈ܶܐ ܘܕܰܗ̄ܢ ܐܳܡܽܘܪ̈ܳܝܶܐ ܘܕܰܚّܰܘܳܝ̈ܶܐ ܘܕܰܝّܳܒܽܘܣܳܝ̈ܶܐ ܘܕܰܦّܰܪ̈ܙܳܝܶܐ ܐܟ̥ ܕܺܝܡܶܐ ܠܶܗ ܠܰܒّܰܒܳܢ̈ܰܬ̥ܟ̥ܽܘ ܕ݄ܓܕܳܗ̄ܒܰܠܟ̥ܽܘ ܐܰܪܥܳܐ ܕ݄ܟܩܳܠܥܳܐ ܚܰܠܒ̥ܳܐ ܘܕܰܒ̥ܫܳܐ، ܓ݄ܡܫܰܡܫܺܝܬܽܘ ܗ̄ܺܝ ܬܶܫܡܶܫܬܰܬ̥ܶܐ ܒܽܗ̄ܘ ܝܰܪܚܰܢܳܐ. 6ܫܰܒ̥ܥܳܐ ܝܰܘܡ̈ܶܐ ܓܕܳܐܟ̥ܠܺܝܬܽܘ ܦܰܛܺܝܪܳܐ، ܘܒܽܗ̄ܘ ܝܰܘܡܳܐ ܕܰܫّܰܒ̥ܥܳܐ ܥܶܐܕ̥ܳܐ ܝܳܐ ܠܡܳܪܝܳܐ. 7ܦܰܛܺܝܪܳܐ ܓܕܳܐܟ̥ܠܺܝܬܽܘ ܫܰܒ̥ܥܳܐ ܝܰܘܡ̈ܶܐ ܘܠܳܐ ܡ݄ܚܙܶܐ ܓܰܒܰܝܟ̥ܽܘ ܚܰܡܺܝܥܳܐ ܒܟܽܘܠܶܗ ܗ̄ܽܘ ܬܚܽܘܡܰܬ̥ܟ̥ܽܘ. 8ܘ݄ܓܡܰܚܘܺܝܬܽܘ ܠܰܗ̄ܢ ܐܰܒܢ̈ܰܬ̥ܟ̥ܽܘ ܒܽܗ̄ܘ ܝܰܘܡܰܘܳܐ (ܘ݄ܐܡّܺܪ̱ܝܬܽܘ): ܡܺܐܝܕ̥ܶܗ ܕܗܰܬ̥ܶܐ ܣ݄ܡ ܠܶܗ ܠܺܝ ܐܰܠܳܗܰܝܕ̥ܺܝ ܗ̄ܺܝ ܢܰܩܠܐ ܕܢܰܦ݄ܩ ܐ̱ܢܳܐ ܡܶܢ̱ ܡܶܨܪܶܝܢ. 9ܘ݄ܓܕܳܗ̄ܘܶܐ ܠܳܟ̥ ܐܳܬ̥ܳܐ ܥܰܠ ܐܺܝܕ̥ܳܟ̥ ܘܕܽܘܟ̥ܪܳܢܳܐ ܒܰܝܢ ܥܰܝܢ̈ܳܬ̥ܳܟ̥ ܠܰܫܰܢ ܕܳܗ̄ܘܶܐ ܗ̄ܽܘ ܢܳܡܽܘܣܳܐ ܕܡܳܪܝܳܐ ܒܦܶܡܳܟ̥، ܡܺܐܝܕ̥ܶܗ ܕܒܺܐܝܕ̥ܳܐ ܚ݄ܨܬܳܐ ܡܰܘܦܰܩ ܠܶܗ ܠܳܟ̥ ܡܳܪܝܳܐ ܡܶܢ̱ ܡܶܨܪܶܝܢ. 10ܘ݄ܢܛܰܪ ܗ̄ܽܘ ܦܽܘܩܕܳܢܰܢܳܐ ܘܽܗ̄ܘ ܢܳܡܽܘܣܰܢܳܐ ܠܽܗ̄ܘ ܝܰܘܡܰܝܕ̥ܶܗ ܡܶܢ̱ ܙܰܒܢܳܐ ܠܙܰܒܢܳܐ.
11”ܘܺܗ̄ܝ ܢܰܩܠܐ ܕܡܰܥܒܰܪ ܠܳܟ̥ ܡܳܪܝܳܐ ܠܺܗ̄ܝ ܐܰܪܥܳܐ ܕܰܟܢܰܥܢܳܝ̈ܶܐ ܐܟ̥ ܕܺܝܡܶܐ ܠܶܗ ܠܳܟ̥ ܘܠܰܒّܰܒܳܢ̈ܰܝܕ̥ܳܟ̥ ܘܳܗ̄ܒܶܐ ܠܳܟ̥ ܝܳܐ، 12ܦܪܰܫ ܟܘ̇ܠ ܒܽܘܟ̥ܪܳܐ ܕܦܳܬ݄ܚ ܟܰܪܣܳܐ ܠܡܳܪܝܳܐ، ܘܟܘ̇ܠ ܝܰܠܕܳܐ ܩܰܕ̱ܡܳܝܳܐ ܕܰܚّܰܝ̈ܘܳܬ̥ܳܐ، ܕܳܗ̄ܘܶܐ ܕܶܟܪܳܐ، ܠܡܳܪܝܳܐ ܓܕܳܗ̄ܘܶܐ. 13ܘܟܘ̇ܠ ܒܽܘܟ̥ܪܳܐ ܕܶܟܪܳܐ ܕܦܳܬ݄ܚ ܟܰܪܣܳܐ ܕܰܚّܰܝ̈ܘܳܬ̥ܳܐ ܦܰܪܳܐ ܓ݄ܡܩܰܪܒ̥ܰܬ ܡܶܢ̱ ܚܠܳܦܶܗ ܘܦ݄ܪܩܰܬ ܠܶܗ، ܘ݄ܕܠܳܐ ܦ݄ܪܩܰܬ ܠܶܗ ܩܛܰܠ ܠܶܗ. ܘܟܘ̇ܠ ܒܽܘܟ̥ܪܳܐ ܡܰܗ̄ܢ ܢܳܫ̈ܶܐ ܕܰܗ̄ܢ ܐܰܒܢ̈ܰܝܕ̥ܳܟ̥ ܓ݄ܡܩܰܪܒ̥ܰܬ ܡܶܢ̱ ܚܠܳܦܶܗ ܘܦ݄ܪܩܰܬ ܠܶܗ.
14”ܘܺܗ̄ܝ ܢܰܩܠܐ ܕ݄ܡܫܰܐܶܠ ܠܳܟ̥ ܗ̄ܽܘ ܐܰܒܪܰܝܕ̥ܳܟ̥ ܪܰܡܚ݄ܠ ܘܕܳܐܡܰܪ ܠܳܟ̥: ܡ݄ܢܝܳܐ ܗܰܢܳܐ؟ ܓܕ݄ܐܡّܰܪ̱ܬ ܠܶܗ: ܒܺܐܝܕ̥ܳܐ ܚ݄ܨܬܳܐ ܡܰܘܦܰܩ ܠܶܗ ܠܰܢ ܡܳܪܝܳܐ ܡܶܢ̱ ܡܶܨܪܶܝܢ ܡܺܗ̄ܝ ܕܽܘܟܬ̥ܳܐ ܕܺܗ̄ܝ ܓܪܰܥܝܽܘܬ̥ܳܐ. 15ܘܺܗ̄ܝ ܢܰܩܠܐ ܕܩܰܫܺܝ ܦܶܪܥܽܘܢ ܘܠܰܐ ܐܒ݄ܥ ܕ݄ܡܫܰܕܰܪ ܠܰܢ، ܩܛܺܝܠ ܠܶܗ ܡܳܪܝܳܐ ܟܽܘܠّܶܗ ܗ̄ܰܒّܽܘܟ̥ܪ̈ܶܐ ܕܒܺܗ̄ܝ ܐܰܪܥܳܐ ܕܡܶܨܪܶܝܢ، ܡܽܗ̄ܘ ܒܽܘܟ̥ܪܳܐ ܕܰܗ̄ܢ ܢܳܫ̈ܶܐ ܗ݄ܠ ܠܽܗ̄ܘ ܒܽܘܟ̥ܪܳܐ ܕܰܚّܰܝ̈ܘܳܬ̥ܳܐ. ܡܰܗ̄ܘܟ̥ܰܐ ܟܳܡܕܰܒܰܚ ܐ̱ܢܳܐ ܠܡܳܪܝܳܐ ܟܘ̇ܠ ܝܰܠܕܳܐ ܩܰܕ̱ܡܳܝܳܐ ܕܳܗ̄ܘܶܐ ܕܶܟܪܳܐ. ܘ݄ܡܩܰܪܰܒ̥ ܐ̱ܢܳܐ ܡܶܢ̱ ܚܠܳܦ ܕܟܽܘܠّܶܗ ܗ̄ܰܒّܽܘܟ̥ܪ̈ܶܐ ܕܰܗ̄ܢ ܐܰܒܢ̈ܰܝܕ̥ܺܝ. 16ܘ݄ܓܕܳܗ̄ܘܶܐ ܠܳܟ̥ ܐܳܬ̥ܳܐ ܥܰܠ ܐܺܝܕ̥ܳܟ̥ ܘܕܽܘܟ̥ܪܳܢܳܐ ܥܰܠ ܓܒ̥ܺܝܢܳܟ̥، ܡܺܐܝܕ̥ܶܗ ܕܒܺܐܝܕ̥ܳܐ ܚ݄ܨܬܳܐ ܡܰܘܦܰܩ ܠܶܗ ܠܳܟ̥ ܡܳܪܝܳܐ ܡܶܢ̱ ܡܶܨܪܶܝܢ.“
17ܘܺܗ̄ܝ ܢܰܩܠܐ ܕ݄ܡܫܰܕܰܪ ܠܶܗ ܦܶܪܥܽܘܢ ܠܽܗ̄ܘ ܥܰܡܳܐ، ܐܰܠܳܗܳܐ ܠܳܐ ܡܰܘܒܠܺܝ ܠܶܗ ܒܽܗ̄ܘ ܕܰܪܒܳܐ ܕܺܗ̄ܝ ܐܰܪܥܳܐ ܕܰܦܠܶܫܬܳܝ̈ܶܐ ܥܰܠ ܕܟ݄ܬ ܗ̄ܘܰܐ ܩܰܪܽܒ̥ܬܳܐ، ܡܺܐܝܕ̥ܶܗ ܕܐܡ݄ܪ ܠܶܗ ܐܰܠܳܗܳܐ ”ܟܺܝܬ ܕܙܳܝ݄ܥ ܗ̄ܽܘ ܥܰܡܳܐ ܗ̄ܺܝ ܢܰܩܠܐ ܕܚܳܙ݄ܢ ܗ̄ܽܘ ܩܪܳܒܳܐ ܘܕܳܥܪܺܝ ܠܡܶܨܪܶܝܢ.“ 18ܘܡܰܘܒܶܠ ܠܶܗ ܐܰܠܳܗܳܐ ܠܽܗ̄ܘ ܥܰܡܳܐ ܒܽܗ̄ܘ ܕܰܪܒܳܐ ܕܽܗ̄ܘ ܡܰܕ̥݄ܒܪܳܐ ܕܽܗ̄ܘ ܝܰܡܳܐ ܕܣܽܘܦ. ܘܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ ܡ݄ܕّܶܗ ܙܰܝܢܳܐ ܐܰܥܡܰܝّܶܗ ܗ̄ܺܝ ܢܰܩܠܐ ܕܣܰܠܺܝܩܺܝ ܗ̄ܘܰܘ̱ ܡܺܗ̄ܝ ܐܰܪܥܳܐ ܕܡܶܨܪܶܝܢ. 19ܘܡ݄ܕ ܠܶܗ ܡܽܘܫܶܐ ܗ̄ܰܓّܰܪ̈ܡܶܐ ܕܝܰܘܣܶܦ ܐܰܥܡܶܗ، ܡܺܐܝܕ̥ܶܗ ܕܺܝܡܳܝܳܐ ܡܰܘܡܶܐ ܠܶܗ (ܝܰܘܣܶܦ) ܠܒܶܝ ܐܺܝܣܪܳܐܶܝܠ ܘܐܡ݄ܪ ܠܶܗ: ”ܕܽܘܟ̥ܪܳܢܳܐ ܟܕ̥ܳܟܰܪܟ̥ܽܘ ܐܰܠܳܗܳܐ. ܡܰܣܠܶܩܽܘ ܗ̄ܰܓّܰܪ̈ܡܰܝܕ̥ܺܝ ܡܰܗ̄ܪܟܶܐ ܐܰܥܡܰܝܟ̥ܽܘ.“
20ܘܡܰܛܥܰܢّܶܗ ܡܶܢ̱ ܣܳܟܽܘܬ̥، ܘܝܰܬܺܝܒ̥ܺܝ ܒܳܐܬ̥ܳܡ ܒܽܗ̄ܘ ܬܚܽܘܡܳܐ ܕܽܗ̄ܘ ܡܰܕ̥݄ܒܪܳܐ. 21ܘܡܳܪܝܳܐ ܐܰܙّܶܗ ܒܩܰܕ̱ܡܽܘܬ̥ܰܝّܶܗ ܒܺܐܝܡܳܡܳܐ ܒܥܰܡܽܘܕܳܐ ܕܥܰܝܡܳܐ ܕܡܰܚܘܰܠّܶܗ ܗ̄ܽܘ ܕܰܪܒܳܐ، ܘ݄ܒܠܰܠܝܳܐ ܒܥܰܡܽܘܕܳܐ ܕܢܽܘܪܳܐ ܕܡܰܢܗ݄ܪ ܐܰܥܠܰܝّܶܗ ܕ݄ܐܙّ݄ܢ ܒܠܰܠܝܳܐ ܘܒܺܐܝܡܳܡܳܐ. 22ܘܠܳܐ ܡ݄ܦܪܰܫ ܗ̄ܘܰܐ ܗ̄ܽܘ ܥܰܡܽܘܕܳܐ ܕܽܗ̄ܘ ܥܰܝܡܳܐ ܒܺܐܝܡܳܡܳܐ ܘܠܳܐ ܗ̄ܽܘ ܥܰܡܽܘܕܳܐ ܕܺܗ̄ܝ ܢܽܘܪܳܐ ܒܠܰܠܝܳܐ ܡܶܢ̱ ܩܽܘܕ̱ܡܶܗ ܕܽܗ̄ܘ ܥܰܡܳܐ.
Právě zvoleno:
ܣܶܦܪܳܐ ܕܡܰܦܩܳܢܳܐ 13: ܟܬܒܐ
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Suryoyo Bible © 2024 Aramaic Bible Translation