ܣܶܦܪܳܐ ܕܡܰܦܩܳܢܳܐ 10
10
1ܘܐܡ݄ܪ ܠܶܗ ܡܳܪܝܳܐ ܠܡܽܘܫܶܐ: ”ܙܳܟ̥ ܓܰܒ ܦܶܪܥܽܘܢ، ܡܺܐܝܕ̥ܶܗ ܕܳܐܢܳܐ ܡܰܩܫܶܐ ܠܺܝ ܠܶܒܶܗ ܘܠܶܒܶܗ ܕܰܓܪ̈ܶܝܥܰܝܕ̥ܶܗ ܠܰܫܰܢ ܕܣܳܝܰܡ ܐ̱ܢܳܐ ܗ̄ܰܢ ܐܳܬ̥ܘ̈ܳܬ̥ܰܢܺܝ ܒܰܝܢܳܬ̥ܰܝّܶܗ. 2ܘܠܰܫܰܢ ܕܡ݄ܫܓ̥ܳܠܰܬ ܩ݄ܕ̱ܡ ܗ̄ܽܘ ܐܰܒܪܰܝܕ̥ܳܟ̥ ܘܽܗ̄ܘ ܐܰܒܪܳܐ ܕܽܗ̄ܘ ܐܰܒܪܰܝܕ̥ܳܟ̥ ܗ̄ܽܘ ܡܶܕܶܐ ܕܣ݄ܡ ܠܺܝ ܒܰܡّܶܨܪ̈ܳܝܶܐ، ܘܰܗ̄ܢ ܐܳܬ̥ܘ̈ܳܬ̥ܳܐ ܕܣ݄ܡ ܠܺܝ ܒܰܝܢܳܬ̥ܰܝّܶܗ، ܘ݄ܓܕ݄ܐܕ̥ܥܺܝܬܽܘ ܕܳܐܢܳܐ ܐ̱ܢܳܐ ܡܳܪܝܳܐ.“
3ܘܰܐܬ̥݄ܢ ܡܽܘܫܶܐ ܘܰܐܗܪܽܘܢ ܠܓܰܒ ܦܶܪܥܽܘܢ ܘܐܡ݄ܪّܰܗ ܠܶܗ: ”ܗܰܘܟ̥ܰܐ ܟܳܐܡ݄ܪ ܡܳܪܝܳܐ ܐܰܠܳܗܳܐ ܕܰܥّܶܒܪ̈ܳܝܶܐ: ܗ݄ܠ ܠܶܐܡܰܐ ܠ݄ܐ ܟ݄ܐܒܥܰܬ ܕܙܰܝܥܰܬ ܡܶܢܺܝ. ܡܫܰܕ݄ܪ ܗ̄ܽܘ ܥܰܡܰܝܕ̥ܺܝ ܕܥܳܒܰܕ ܠܺܝ. 4ܘ݄ܕܠ݄ܐ ܐܒܥܰܬ ܕ݄ܡܫܰܕܪܰܬ ܗ̄ܽܘ ܥܰܡܰܝܕ̥ܺܝ، ܟܰܐܠܺܝ ܪܰܡܚ݄ܠ ܓܡܰܝܬܶܐ ܐ̱ܢܳܐ ܩܰܡܨܳܐ ܥܰܠ ܟܽܘܠܶܗ ܗ̄ܽܘ ܬܚܽܘܡܰܝܕ̥ܳܟ̥. 5ܘܓ݄ܡܟܰܣܶܐ ܥܰܝܢܰܗ ܕܺܗ̄ܝ ܐܰܪܥܳܐ. ܘܢܳܫܳܐ ܠ݄ܐ ܓܩܳܕ݄ܪ ܚܳܙܶܐ ܗ̄ܺܝ ܐܰܪܥܳܐ. ܘ݄ܓܕܳܐܟ̥݄ܠ (ܗ̄ܽܘ ܩܰܡܨܳܐ) ܗ̄ܽܘ ܡܶܕܶܐ ܕ݄ܛܪܶܐ ܠܶܗ ܠܟ̥ܽܘ ܗ̄ܽܘ ܒܰܪܕܳܐ. ܘ݄ܓܕܳܐܟ̥݄ܠ ܟܽܘܠّܶܗ ܗ̄ܰܢ ܐܺܝܠܳܢ̈ܶܐ ܗܰܢܺܝ ܕܝܰܥ݄ܢ ܐܰܠܟ̥ܽܘ ܒܺܗ̄ܝ ܚܰܩܠܳܐ 6ܘܓ݄ܕܡ݄ܡܠ݄ܢ ܗ̄ܰܒّܳܬܰܝ̈ܕ̥ܳܟ̥ ܘܰܒّܳܬ̈ܶܐ ܕܰܓܪ̈ܶܝܥܰܝܕ̥ܳܟ̥ ܘܰܒّܳܬ̈ܶܐ ܕܟܽܘܠّܶܗ ܗ̄ܰܡّܶܨܪ̈ܳܝܶܐ ܕܠܳܐ ܚܙܰܠّܶܗ ܗ̄ܰܒّܰܒ̈ܰܝܕ̥ܳܟ̥ ܘܰܒّܰܒ̈ܶܐ ܕܰܒّܰܒ̈ܰܝܕ̥ܳܟ̥ ܗܰܘܟ̥ܰܐ (ܡܶܕܶܐ) ܡܽܗ̄ܘ ܝܰܘܡܳܐ ܕܗܰܘ݄ܢ ܥܰܠ ܗ̄ܺܝ ܐܰܪܥܳܐ ܘܗ݄ܠ ܠܰܐܕܝܰܘܡܰܐ.“ ܘܕܰܥܺܝܪܺܝ ܢܰܦܺܝܩܺܝ ܡܶܩ݄ܕ̱ܡ ܦܶܪܥܽܘܢ. 7ܘܰܓܪ̈ܶܝܥܶܐ ܕܦܶܪܥܽܘܢ ܐܡ݄ܪّܰܗ ܠܶܗ: ”ܗ݄ܠ ܐܶܡܰܐ ܓܕܽܗ̄ܘܝܳܐ ܠܰܢ ܗ̄ܺܝ ܛܰܪܦ̊ܰܠܬܰܬ̥ܶܐ؟ ܡܫܰܕ݄ܪ ܠܰܓّܰܒ̥ܪ̈ܶܐ ܕ݄ܐܙّ݄ܢ ܥܳܒܕܺܝ ܠܡܳܪܝܳܐ ܐܰܠܳܗܰܬّ̥ܶܗ. ܗ݄ܠ ܐܳܥܕܳܐ ܠ݄ܐ ܟ݄ܐܕ̥ܥܰܬ ܕܚܰܪܺܝܒ̥ܳܐ ܡܶܨܪܶܝܢ.“
8ܘܗ݄ܢّܶܝ ܡܰܕܥܰܪّܶܗ ܡܽܘܫܶܐ ܘܰܐܗܪܽܘܢ ܠܓܰܒ ܦܶܪܥܽܘܢ، ܘܐܡ݄ܪ ܠܰܗ ܠّܶܗ: ”ܙܳܟ̥ܽܘ ܥܒܰܕܽܘ ܠܡܳܪܝܳܐ ܐܰܠܳܗܰܬ̥ܟ̥ܽܘ. ܐܶܠܳܐ ܡܰܢ ܘܡܰܢ ܓܕ݄ܐܙّ݄ܢ؟“ 9ܐܡ݄ܪ ܠܶܗ ܠܶܗ ܡܽܘܫܶܐ: ”ܓܕ݄ܐܙّܰܢ ܥܰܡ ܗ̄ܰܥܠܰܝܡ̈ܰܝܕ̥ܰܢ ܘܥܰܡ ܗ̄ܰܣّܳܒ̥̈ܰܝܕ̥ܰܢ، ܥܰܡ ܗ̄ܰܢ ܐܰܒܢ̈ܰܝܕ̥ܰܢ ܘܥܰܡ ܗ̄ܰܒܢ̈ܳܬ̥ܰܝܕ̥ܰܢ، ܘܥܰܡ ܗ̄ܰܥܘܳܢ̈ܰܝܕ̥ܰܢ ܘܥܰܡ ܗ̄ܰܬّܰܘܪ̈ܰܝܕ̥ܰܢ ܓܕ݄ܐܙّܰܢ. ܡܺܐܝܕ̥ܶܗ ܕܥܶܐܕ̥ܳܐ ܕܡܳܪܝܳܐ ܝܳܐ ܐܶܠܰܢ.“ 10ܘܐܡ݄ܪ ܠܰܗ ܠّܶܗ: ”ܛܪܳܐ ܗܳܘܶܐ ܗܰܘܟ̥ܰܐ. ܡܳܪܝܳܐ ܐܰܥܡܰܝܟ̥ܽܘ. ܐܶܠܳܐ ܡ݄ܐ ܕ݄ܡܫܰܕܰܪ ܠܺܝ ܐܰܠܟ̥ܽܘ ܘܠܰܗ̄ܢ ܐܺܝܩܰܪ̈ܝܳܬ̥ܰܬ̥ܟ̥ܽܘ، ܚܙܰܝܽܘ، ܕܠ݄ܐ ܐܙّܶܗ ܗܳܘܶܐ ܒܺܝܫܬܳܐ ܩܽܘܕ̱ܡܰܝܟ̥ܽܘ. 11ܠܳܐ ܗܰܘܟ̥ܰܐ. ܐܳܥܕܳܐ ܙܳܟ̥ܽܘ ܗܰܬܽܘ ܗ̄ܰܓّܰܒ̥ܪ̈ܶܐ، ܘ݄ܥܒܰܕܽܘ ܩ݄ܕ̱ܡ ܡܳܪܝܳܐ. ܡܺܐܝܕ̥ܶܗ ܕ݄ܬ̥ܢܳܚܳܐ ܟ݄ܐܒܥܺܝܬܽܘ.“ ܘܡܰܘܦܩ݄ܢّܶܗ ܡܶܢ̱ ܩܽܘܕ̱ܡܶܗ ܕܦܶܪܥܽܘܢ.
12ܘܐܡ݄ܪ ܠܶܗ ܡܳܪܝܳܐ ܠܡܽܘܫܶܐ: ”ܡܰܥܠܰܝ ܐܺܝܕ̥ܳܟ̥ ܥܰܠ ܗ̄ܺܝ ܐܰܪܥܳܐ ܕܡܶܨܪܶܝܢ ܒܽܗ̄ܘ ܩܰܡܨܳܐ، ܘܓ݄ܕܣܳܠ݄ܩ ܥܰܠ ܗ̄ܺܝ ܐܰܪܥܳܐ ܕܡܶܨܪܶܝܢ ܘ݄ܓܕܳܐܟ̥݄ܠ ܗ̄ܽܘ ܓܶܠܳܐ ܕܺܗ̄ܝ ܐܰܪܥܳܐ ܘܟܘ̇ܠ ܡܶܕܶܐ ܕ݄ܛܪܶܐ ܠܶܗ ܗ̄ܽܘ ܒܰܪܕܳܐ.“ 13ܘܡܰܥܠܶܐ ܠܶܗ ܡܽܘܫܶܐ ܗ̄ܺܝ ܚܰܛܪܰܝܕ̥ܶܗ ܥܰܠ ܗ̄ܺܝ ܐܰܪܥܳܐ ܕܡܶܨܪܶܝܢ. ܘܡܳܪܝܳܐ ܡܰܘܦܰܩ ܠܶܗ ܫܰܘܒܳܐ ܥܰܠ ܗ̄ܺܝ ܐܰܪܥܳܐ، ܟܽܘܠܶܗ ܗ̄ܽܘ ܐܺܝܡܳܡܰܘܳܐ ܘܟܽܘܠܶܗ ܗ̄ܽܘ ܠܰܠܝܳܐ، ܘܗܰܘܺܝ ܨܰܦܪܳܐ ܩܶܕܰܡܬܳܐ، ܘܽܗ̄ܘ ܫܰܘܒܳܐ ܡ݄ܕ ܠܶܗ ܗ̄ܽܘ ܩܰܡܨܳܐ. 14ܘܣܰܠ݄ܩ ܗ̄ܽܘ ܩܰܡܨܳܐ ܥܰܠ ܟܽܘܠܰܗ ܗ̄ܺܝ ܐܰܪܥܳܐ ܕܡܶܨܪܶܝܢ، ܘܢܰܚ݄ܬ ܒܟܽܘܠܶܗ ܗ̄ܽܘ ܬܚܽܘܡܳܐ ܕܰܡّܶܨܪ̈ܳܝܶܐ. ܚܺܝܨܳܐ ܗ̄ܘܰܐ ܓ̥ܰܠܰܒܶܐ، ܘܐܟ̥ܳܬ̥ܶܗ ܠܰܐ ܗ̄ܘܺܝ ܩܰܡܨܳܐ ܡܶܩ݄ܕ̱ܡ ܡܶܢܶܗ، ܘܠܳܐ ܒ݄ܬ̥ܪܶܗ ܣܬܶܝ ܓܕܳܗ̄ܘܶܐ ܐܟ̥ܳܬ̥ܶܗ. 15ܘ݄ܡܟܰܣܶܐ ܠܶܗ ܦܳܬ̥ܰܗ ܕܺܗ̄ܝ ܐܰܪܥܳܐ ܟܽܘܠܰܗ، ܘ݄ܡܥܰܬܰܡ ܠܰܗ ܗ̄ܺܝ ܐܰܪܥܳܐ. ܘܰܐܟ̥ܺܝܠ ܠܶܗ ܗ̄ܽܘ ܓܶܠܳܐ ܕܺܗ̄ܝ ܐܰܪܥܳܐ ܟܽܘܠܰܗ، ܘܟܽܘܠّܶܗ ܗ̄ܰܦّܺܐܪ̈ܶܐ ܕܰܗ̄ܢ ܐܺܝܠܳܢ̈ܶܐ ܕ݄ܛܪܶܐ ܠܶܗ ܗ̄ܽܘ ܒܰܪܕܳܐ. ܘܠܳܐ ܦܰܝ݄ܫ ܛܰܪܦܳܐ ܒܺܐܝܠܳܢܳܐ ܘܠܳܐ ܓܶܠܳܐ ܒܚܰܩܠܳܐ ܒܟܽܘܠܰܗ ܗ̄ܺܝ ܐܰܪܥܳܐ ܕܡܶܨܪܶܝܢ. 16ܘܡܰܠ݄ܙ ܠܶܗ ܦܶܪܥܽܘܢ ܕܩܳܪܶܐ ܠܡܽܘܫܶܐ ܘܠܰܐܗܪܽܘܢ، ܘܐܡ݄ܪ ܠܰܗ ܠّܶܗ: ”ܚܰܛܺܝ ܐ̱ܢܳܐ ܩ݄ܕ̱ܡ ܡܳܪܝܳܐ ܐܰܠܳܗܰܬ̥ܟ̥ܽܘ ܘܩܽܘܕ̱ܡܰܝܟ̥ܽܘ. 17ܗܰܢ ܢܰܩܠܐ ܣܬܶܝ ܫܒܰܩܽܘ ܗ̄ܺܝ ܚܛܺܝܬ̥ܰܝܕ̥ܺܝ، ܘ݄ܡܨܰܠܶܝܽܘ ܩ݄ܕ̱ܡ ܡܳܪܝܳܐ ܐܰܠܳܗܰܬ̥ܟ̥ܽܘ ܕܡܰܪܚ݄ܩ ܗ̄ܽܘ ܡܰܘܬܰܢܳܐ ܡܶܢܺܝ.“ 18ܘܢܰܦ݄ܩ ܡܽܘܫܶܐ ܡܶܢ̱ ܩܽܘܕ̱ܡܶܗ ܕܦܶܪܥܽܘܢ، ܘ݄ܡܨܰܠܶܐ ܠܶܗ ܩ݄ܕ̱ܡ ܡܳܪܝܳܐ. 19ܘܕܰܥ݄ܪ ܡܳܪܝܳܐ ܡܰܝܬܶܐ ܠܶܗ ܗܰܘܰܐ ܕܽܗ̄ܘ ܡܰܥܪܒܳܐ ܚ݄ܨܬܳܐ ܓ̥ܰܠܰܒܶܐ. ܘܡ݄ܕ ܠܰܗ ܗ̄ܽܘ ܩܰܡܨܳܐ ܘ݄ܡܚܰܠܰܩ ܠܰܗ ܒܽܗ̄ܘ ܝܰܡܳܐ ܕܣܽܘܦ. ܘܠܳܐ ܦܰܝ݄ܫ ܘܠܳܐ ܚܰܕ̱ ܩܰܡܨܳܐ ܒܟܽܘܠܶܗ ܗ̄ܽܘ ܬܚܽܘܡܳܐ ܕܰܡّܶܨܪ̈ܳܝܶܐ. 20ܘܡܰܩܫܶܐ ܠܶܗ ܡܳܪܝܳܐ ܠܶܒܶܗ ܕܦܶܪܥܽܘܢ، ܘܠܳܐ ܡܫܰܕܰܪ ܠܶܗ ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ.
21ܘܐܡ݄ܪ ܠܶܗ ܡܳܪܝܳܐ ܠܡܽܘܫܶܐ: ”ܡܰܥܠܰܝ ܐܺܝܕ̥ܳܟ̥ ܠܺܗ̄ܝ ܫܡܰܝܳܐ، ܘ݄ܓܕܳܗ̄ܘܶܐ ܚܶܫܟ̥ܳܐ ܥܰܠ ܗ̄ܺܝ ܐܰܪܥܳܐ ܕܡܶܨܪܶܝܢ، ܘ݄ܓܕܽܗ̄ܘܝܳܐ ܥ݄ܬܡܳܐ ܥܰܬܽܘܡܬܳܐ.“ 22ܘܡܰܥܠܶܐ ܠܶܗ ܡܽܘܫܶܐ ܐܺܝܕ̥ܶܗ ܠܺܗ̄ܝ ܫܡܰܝܳܐ ܘܗܰܘܺܝ ܥ݄ܬܡܳܐ ܘܥܰܡܛܳܢܳܐ ܒܟܽܘܠܰܗ ܗ̄ܺܝ ܐܰܪܥܳܐ ܕܡܶܨܪܶܝܢ ܬܠܳܬ̥ܳܐ ܝܰܘܡ̈ܶܐ. 23ܢܳܫܳܐ ܠܳܐ ܚܳܙܶܐ ܗ̄ܘܰܐ ܠܽܗ̄ܘ ܐܰܚܽܘܢܳܐ. ܘܢܳܫܳܐ ܠܳܐ ܩܰܝ݄ܡ ܡܶܢ̱ ܕܽܘܟܬ̥ܶܗ ܬܠܳܬ̥ܳܐ ܝܰܘܡ̈ܶܐ. ܐܶܠܳܐ ܠܟܽܘܠّܶܗ ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ ܒܰܗܪܳܐ ܗ̄ܘܰܐ ܒܺܗ̄ܝ ܕܽܘܟܬ̥ܳܐ ܕܽܗ̄ܘ ܝܺܬܳܒ̥ܰܬّ̥ܶܗ. 24ܘ݄ܩܪܶܐ ܠܶܗ ܦܶܪܥܽܘܢ ܠܡܽܘܫܶܐ، ܘܐܡ݄ܪ ܠܶܗ ܠܶܗ: ”ܙܳܟ̥ܽܘ ܥܒܰܕܽܘ ܠܡܳܪܝܳܐ ܐܰܠܳܗܰܬ̥ܟ̥ܽܘ، ܒܶܠܚܽܘܕ̥ܶܗ ܗ̄ܰܥܘܳܢ̈ܰܬ̥ܟ̥ܽܘ ܘܰܬّܰܘܪ̈ܰܬ̥ܟ̥ܽܘ ܛܪܰܝܽܘ (ܗܰܪܟܶܐ)، ܘ݄ܛܪܳܐ ܗ̄ܰܢ ܐܺܝܩܰܪ̈ܝܳܬ̥ܰܬ̥ܟ̥ܽܘ ܣܬܶܝ ܐܙّ݄ܢ ܐܰܥܡܰܝܟ̥ܽܘ.“ 25ܐܡ݄ܪ ܠܶܗ ܡܽܘܫܶܐ ܠܦܶܪܥܽܘܢ: ”ܘܗܰܬ ܣܬܶܝ ܓܕܳܗ̄ܒܰܬ ܒܺܐܝܕ̥̈ܳܬ̥ܰܢ ܩܽܘܪ̈ܒܳܢܶܐ ܘܕܶܒܚ̈ܶܐ، ܘܕܳܒܚܺܝܢܰܐ ܠܡܳܪܝܳܐ ܐܰܠܳܗܰܝܕ̥ܰܢ؟ 26ܘܰܚّܰܝ̈ܘܳܬ̥ܰܝܕ̥ܰܢ ܣܬܶܝ ܛܪܳܐ ܐܙّ݄ܢ ܐܰܥܡܰܢ، ܘܠܳܐ ܦܳܝ݄ܫ ܡܶܢܰܢ ܗܰܪܟܶܐ ܘܠܳܐ ܚܕ̥ܳܐ ܛܰܦܪܳܐ (ܚܰܝܽܘܬ̥ܳܐ)، ܡܺܐܝܕ̥ܶܗ ܕܡ݄ܢّܶܗ ܟܡܰܝܕܺܝܢܰܐ ܕܥܳܒܕܺܝܢܰܐ ܩ݄ܕ̱ܡ ܡܳܪܝܳܐ ܐܰܠܳܗܰܝܕ̥ܰܢ. ܘܰܐܚܢܰܐ ܠ݄ܐ ܟܳܐܕ̥ܥܺܝܢܰܐ ܡ݄ܢ ܓ݄ܡܩܰܕܡܺܝܢܰܐ ܩ݄ܕ̱ܡ ܡܳܪܝܳܐ ܡ݄ܐ ܕܡܳܛܺܝܢܰܐ ܠܬܰܡܳܐ.“ 27ܘܡܰܩܫܶܐ ܠܶܗ ܡܳܪܝܳܐ ܠܶܒܶܗ ܕܦܶܪܥܽܘܢ، ܘܠܰܐ ܐܒ݄ܥ ܕ݄ܡܫܰܕܰܪّܶܗ. 28ܘܐܡ݄ܪ ܠܶܗ ܦܶܪܥܽܘܢ ܠܡܽܘܫܶܐ: ”ܙܳܠܳܟ̥ ܡܶܢ̱ ܓܰܒܺܝ، ܘܡܰܚ݄ܬ ܒܒܳܠܳܟ̥ ܕܢܰܩܠܐ ܚܪܶܬܳܐ ܠܳܐ ܕܳܥܪܰܬ ܕܡ݄ܚܙܰܬ ܠܺܝ. ܡܺܐܝܕ̥ܶܗ ܕܒܽܗ̄ܘ ܝܰܘܡܳܐ ܕܡ݄ܚܙܰܬ ܠܺܝ ܓܡܰܝܬ̥ܰܬ.“ 29ܘܐܡ݄ܪ ܠܶܗ ܡܽܘܫܶܐ: ”ܫܰܦܺܝܪܳܐ ܐܡ݄ܪ ܠܳܟ̥، ܢܰܩܠܐ ܚܪܶܬܳܐ ܠ݄ܐ ܓܕܳܥܰܪ ܐ̱ܢܳܐ ܕܚܳܙܶܐ ܐ̱ܢܳܐ ܦܳܬ̥ܳܟ̥.“
Právě zvoleno:
ܣܶܦܪܳܐ ܕܡܰܦܩܳܢܳܐ 10: ܟܬܒܐ
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Suryoyo Bible © 2024 Aramaic Bible Translation