ܥܒܳܕ̥̈ܶܐ ܕܰܫܠܺܝܚ̈ܶܐ 5
5
ܚܰܢܰܢܝܳܐ ܘܺܗ̄ܝ ܐܰܢ̱ܬ̥ܬܰܝܕ̥ܶܗ ܫܰܦܺܝܪܳܐ
1ܘܟ݄ܬ ܗ̄ܘܰܐ ܚܰܕ̱ ܓܰܒ̥ܪܳܐ ܕ݄ܐܫܡܶܗ ܚܰܢܰܢܝܳܐ ܥܰܡ ܗ̄ܺܝ ܐܰܢ̱ܬ̥ܬܰܝܕ̥ܶܗ ܕ݄ܐܫܡܰܗ ܫܰܦܺܝܪܰܐ، ܡܙܰܒܰܢ ܗ̄ܘܰܝ ܠܶܗ ܗ̄ܺܝ ܚܰܩܠܰܝܕ̥ܶܗ. 2ܘܡ݄ܕ ܠܶܗ ܡܽܗ̄ܘ ܛܺܝܡܰܝܕ̥ܰܗ ܘ݄ܬܠܶܐ ܠܶܗ، ܘܺܗ̄ܝ ܐܰܢ̱ܬ̥ܬܳܐ ܐܳܕ̥݄ܥܳܐ ܗ̄ܘܰܐ ܐܶܒܶܗ. ܘܡܰܝܬܶܐ ܠܶܗ ܡܶܕܶܐ ܡܰܢ̱ ܙّܽܘܙ̈ܶܐ ܘܡܰܚܰܬ ܠܶܗ ܩ݄ܕ̱ܡ ܗ̄ܰܪّܰܓ̥̈ܠܳܬ̥ܳܐ ܕܰܫܠܺܝܚ̈ܶܐ. 3ܘܫܶܡܥܽܘܢ ܐܡ݄ܪ ܠܶܗ ܠܶܗ: ”ܚܰܢܰܢܝܳܐ! ܠܡ݄ܢ ܗܰܘܟ̥ܰܐ ܗ̄ܽܘ ܣܳܛܳܢܳܐ ܡܠܶܐ ܠܶܗ ܠܶܒܳܟ̥ ܕ݄ܡܕܰܓܠܰܬ ܥܰܠ ܪܽܘܚܳܐ ܕܩܽܘܕܫܳܐ ܘܬܳܠܰܬ ܡܰܢ̱ ܙّܽܘܙ̈ܶܐ ܕܽܗ̄ܘ ܛܺܝܡܳܐ ܕܺܗ̄ܝ ܚܰܩܠܳܐ؟ 4ܩܰܝ ܠܰܝ̱ܬ ܗ̄ܘܰܐ ܕܺܝܕ̥ܳܟ̥ ܡܶܩ݄ܕ̱ܡ ܕܡܺܝܙܰܒܢܳܐ؟ ܘܡܶܢ̱ ܕ݄ܡܙܰܒܢܳܐ ܢܰܩܠܐ ܚܪܶܬܳܐ ܟ݄ܬ ܗ̄ܘܰܝ ܠܳܟ̥ ܫܽܘܠܛܳܢܳܐ ܥܰܠ ܗ̄ܽܘ ܛܺܝܡܰܝܕ̥ܰܗ؟ ܠܡ݄ܢ ܡܰܚ݄ܬ ܠܳܟ̥ ܒܠܶܒܳܟ̥ ܕܣܰܝܡܰܬ ܗ̄ܽܘ ܡܶܕܰܢܳܐ؟ ܗܰܬ ܠܳܐ ܥܰܠ ܗ̄ܰܢ ܢܳܫ̈ܶܐ ܡܕܰܓܶܠ ܠܳܟ̥ ܐܶܠܳܐ ܥܰܠ ܐܰܠܳܗܳܐ.“ 5ܘܺܗ̄ܝ ܢܰܩܠܐ ܕܫܰܡ݄ܥ ܚܰܢܰܢܝܳܐ ܗ̄ܰܡّܰܐܡܪ̈ܰܢܺܝ ܢܰܦ݄ܠ ܘܡܰܝ݄ܬ̥. ܘܙܽܘܥܬ̥ܳܐ ܪܰܒܬ̥ܳܐ ܢܰܦܺܝܠܳܐ ܥܰܠ ܟܽܘܠّܶܗ ܗܰܢܺܝ ܕܫܰܡܺܝܥܺܝ. 6ܘܩܰܝܺܝܡܺܝ ܥܠܰܝܡ̈ܶܐ ܕܒܰܝܢܳܬ̥ܰܝّܶܗ، ܘ݄ܡܟܰܢܦܰܠّܶܗ ܘܡܰܘܦܰܩّܶܗ ܩܒ̥݄ܪّܶܗ. 7ܘܒ݄ܬ̥݄ܪ ܬܠ݄ܬ̥ ܫܳܥ̈ܶܐ، ܗ̄ܺܝ ܐܰܢ̱ܬ̥ܬܰܝܕ̥ܶܗ ܣܬܶܝ ܥܰܒܺܝܪܳܐ، ܘܠܳܐ ܐܕ̥ܥܳܐ ܗ̄ܘܰܐ ܡ݄ܢ ܗܰܘܺܝ. 8ܘܫܶܡܥܽܘܢ ܐܡ݄ܪ ܠܶܗ ܠܰܗ: ”ܐܡܰܪ ܠܺܝ، ܐܶܢ ܒܽܗ̄ܘ ܛܺܝܡܰܢܳܐ ܡܙܰܒܰܢܟ̥ܽܘ ܗ̄ܺܝ ܚܰܩܠܳܐ؟“ ܘܗܺܝّܰܗ ܐܡ݄ܪ ܠܰܗ: ”ܐܺܝܢ، ܒܽܗ̄ܘ ܛܺܝܡܰܢܳܐ.“ 9ܐܡ݄ܪ ܠܶܗ ܠܰܗ ܫܶܡܥܽܘܢ: ”ܥܰܠ ܕܗܰܬܽܘ ܡܰܚ݄ܬܟ̥ܽܘ ܒܗܰܘܢܰܝܟ̥ܽܘ ܕ݄ܡܢܰܣܺܝܬܽܘ ܪܽܘܚܳܐ ܕܡܳܪܝܳܐ، ܟܰܐܠ݄ܢ ܗ̄ܰܪّܰܓ̥̈ܠܳܬ̥ܳܐ ܕܰܩّܰܒ̥ܳܪ̈ܶܐ ܕܽܗ̄ܘ ܓܰܒ̥ܪܰܝܕ̥ܰܟ̥ ܒܽܗ̄ܘ ܬܰܪܥܳܐ، ܘܗ݄ܢّܶܝ ܓܡܰܘܦܩܺܝ ܠܰܟ̥.“ 10ܘܒܺܗ̄ܝ ܫܳܥܬ̥ܰܝܕ̥ܰܗ ܢܰܦܺܝܠܳܐ ܩ݄ܕ̱ܡ ܪ̈ܰܓ̥ܠܳܬ̥ܰܝّܶܗ ܘܡܰܝܺܝܬ̥ܳܐ، ܘܥܰܒܺܝܪܺܝ ܗ̄ܰܥܠܰܝܡ̈ܰܢ݄ܟ ܘܚ݄ܙܝܰܠّܶܗ ܟܰܐܠܰܗ ܡܺܝܬ̥ܬܳܐ. ܘ݄ܡܟܰܢܦ݄ܠܰܠّܶܗ ܘܡܰܘܒܠܰܠّܶܗ ܩܒ̥ܺܝܪܰܠّܶܗ ܓܰܒ ܗ̄ܽܘ ܓܰܒ̥ܪܰܝܕ̥ܰܗ. 11ܘܗܰܘܺܝ ܙܽܘܥܬ̥ܳܐ ܪܰܒܬ̥ܳܐ ܒܺܗ̄ܝ ܥܺܕ̱ܬܳܐ ܟܽܘܠܰܗ ܘ݄ܒܟܽܘܠّܶܗ ܗܰܢ݄ܟ ܕܫܰܡܺܝܥܺܝ.
ܐܳܬ̥ܘ̈ܳܬ̥ܳܐ ܘܬܶܕ݄ܡܪ̈ܳܬ̥ܳܐ ܓ̥ܰܠܰܒܶܐ
12ܘܗܳܘ݄ܢ ܗ̄ܘܰܘ̱ ܥܰܠ ܐܺܝܕ̥̈ܳܬ̥ܳܐ ܕܰܫܠܺܝܚ̈ܶܐ ܓ̥ܰܠܰܒܶܐ ܐܳܬ̥ܘ̈ܳܬ̥ܳܐ ܘܬܶܕ݄ܡܪ̈ܳܬ̥ܳܐ ܒܰܝܢ ܗ̄ܽܘ ܥܰܡܳܐ. ܘܟܽܘܠّܶܗ ܠܰܬܺܝܡ̈ܶܐ ܗ̄ܘܰܝܢܶܝ ܥܰܡ ܚܕ̥ܳܕ̥̈ܶܐ ܒܽܗ̄ܘ ܐܶܣܛܽܘܳܐ ܕ݄ܫܠܶܝܡܳܘܢ. 13ܘܡܰܗ̄ܢ ܢܳܫ̈ܶܐ ܚܪ̈ܶܢܶܐ، ܢܳܫܳܐ ܙܳܝܰܥ ܗ̄ܘܰܐ ܕ݄ܡܩܰܪܽܒ̥ ܣܺܝܕܰܝّܶܗ، ܐܶܠܳܐ ܗ̄ܽܘ ܥܰܡܳܐ ܡܳܘܪܰܒ̥ ܗ̄ܘܰܐ ܠّܶܗ. 14ܘܓ̥ܰܠܰܒܶܐ ܙܰܝܕܺܝ ܗ̄ܘܰܘ̱ ܐܰܝܢܰܐ ܕ݄ܡܗܰܝܡܢܺܝ ܗ̄ܘܰܘ̱ ܒܡܳܪܝܳܐ، ܡܰܢ̱ ܓّܰܒ̥ܪ̈ܶܐ ܘܡܰܗ̄ܢ ܢܶܫ̈ܶܐ، 15ܗܳܠ ܕܡܰܘܦܩܺܝ ܗ̄ܘܰܘ̱ ܗ̄ܰܟّܰܐܺܝܒ̥̈ܶܐ ܡܚܰܠܩ̈ܶܐ ܒ̈ܰܓّܰܠܶܐ ܠܰܫّܽܘܩ̈ܶܐ ܠܰܫܰܢ ܕܶܐܡܰܐ ܕܳܐܬ̥ܶܐ ܫܶܡܥܽܘܢ، ܘܶܐܢ ܗ̄ܽܘ ܛܶܠܳܠܰܝܕ̥ܶܗ ܐܳܬ̥ܶܐ ܐܰܥܠܰܝّܶܗ. 16ܘܳܐܬ̥݄ܢ ܗ̄ܘܰܘ̱ ܓ̥ܰܠܰܒܶܐ ܠܣܺܝܕܰܝّܶܗ ܡܶܢ̱ ܡܕ̥ܺܝܢ̈ܳܬ̥ܳܐ ܚܪ̈ܶܢܶܐ ܕܚܶܕ̥ܳܪ ܐܽܘܪܶܫܠܶܡ، ܘܡܰܝܬ݄ܢ ܗ̄ܘܰܘ̱ ܟܰܐܺܝܒ̥̈ܶܐ ܘܗܰܢܺܝ ܕܳܗ̄ܘ݄ܢ ܗ̄ܘܰܘ̱ ܐܰܒّܶܗ ܪ̈ܽܘܚܶܐ ܒܺܝܫ̈ܶܐ، ܘܢܳܝܰܚ ܗ̄ܘܰܘ̱ ܠܟܘ̇ܠّܶܗ.
ܗ̄ܰܫܠܺܝܚ̈ܶܐ ܒܽܗ̄ܘ ܚܒܽܘܫܝܳܐ
17ܘܽܗ̄ܘ ܪܰܒܳܐ ܕܰܟّܳܗ̈ܢܶܐ ܡܠܶܐ ܗ̄ܘܰܐ ܚܣܳܡܳܐ، ܘܟܽܘܠّܶܗ ܕܰܐܥܡܶܗ ܕܟ݄ܬ ܗ̄ܘܰܝ ܢܶܝ ܡܽܗ̄ܘ ܝܽܘܠܦܳܢܳܐ ܕܰܙّܰܕ̈ܽܘܩܳܝܶܐ، 18ܘܡܰܚ݄ܬّܶܗ ܐܺܝܕ̥ܳܐ ܥܰܠ ܗ̄ܰܫܠܺܝܚ̈ܶܐ ܘܨܺܝܕ݄ܢّܶܗ ܘܡܰܐܣܪ݄ܢّܶܗ ܒܽܗ̄ܘ ܚܒܽܘܫܝܳܐ. 19ܘܒܽܗ̄ܘ ܠܰܠܝܰܘܳܐ، ܗ̄ܽܘ ܡܰܠܰܐܟ̥ܳܐ ܕܡܳܪܝܳܐ ܦܬ݄ܚ ܠܶܗ ܗ̄ܽܘ ܬܰܪܥܳܐ ܕܽܗ̄ܘ ܚܒܽܘܫܝܳܐ، ܘܡܰܘܦܩܺܝ ܠܶܗ ܘܐܡ݄ܪ ܠܰܗ ܠّܶܗ: 20”ܙܳܟ̥ܽܘ ܩܽܘܡܽܘ ܒܽܗ̄ܘ ܗܰܝܟܠܳܐ ܘܐܡܰܪܽܘ ܠܽܗ̄ܘ ܥܰܡܳܐ ܗ̄ܰܡّܰܐܡܪ̈ܰܢܺܝ ܕܰܚّܰܝ̈ܶܐ ܟܽܘܠّܶܗ.“ 21ܘ݄ܒܩܶܕܰܡܬܳܐ، ܢܰܦܺܝܩܺܝ ܘܥܰܒܺܝܪܺܝ ܠܽܗ̄ܘ ܗܰܝܟܠܳܐ، ܘܡܰܘܠܦܺܝ ܗ̄ܘܰܘ̱. ܘܽܗ̄ܘ ܪܰܒܳܐ ܕܰܟّܳܗ̈ܢܶܐ ܘܗܰܢܺܝ ܕܰܐܥܡܶܗ ܩܪܰܠّܶܗ ܠܰܚّܰܒ̥ܪ̈ܳܢܰܬّ̥ܶܗ ܘܠܰܩّܰܫ̈ܶܐ ܕܺܐܝܣܪܳܐܶܝܠ، ܘ݄ܡܫܰܕܰܪّܶܗ ܕܡܰܝܬ݄ܢ ܗ̄ܰܫܠܺܝܚ̈ܶܐ ܡܽܗ̄ܘ ܚܒܽܘܫܝܳܐ. 22ܘܺܗ̄ܝ ܢܰܩܠܐ ܕܰܐܙّ݄ܢ ܗܰܢܺܝ ܕ݄ܡܫܰܕܪܺܝ ܠܳܐ ܚܙܰܢّܶܗ ܒܽܗ̄ܘ ܚܒܽܘܫܝܳܐ، ܘܕܰܥܺܝܪܺܝ ܐܰܬ̥݄ܢ، 23ܘܐܡ݄ܪّܶܗ: ”ܚܙܶܐ ܠܰܢ ܗ̄ܽܘ ܚܒܽܘܫܝܳܐ ܣܟ̥ܺܝܪܳܐ ܛܳܒ̥ܳܐ، ܘܰܗ̄ܢ ܢܳܛܽܘܪ̈ܶܐ ܩܺܝܡ̈ܶܐ ܥܰܠ ܗ̄ܰܬّܰܪ̈ܥܶܐ، ܘ݄ܦܬ݄ܚ ܠܰܢ، ܐܶܠܳܐ ܢܳܫܳܐ ܠܳܐ ܚܙܶܐ ܠܰܢ ܬܰܡܳܐ.“ 24ܘܺܗ̄ܝ ܢܰܩܠܐ ܕܫܰܡܺܝܥܺܝ ܗ̄ܰܡّܰܐܡܪ̈ܰܢܺܝ، ܗ̄ܰܪّܰܒ̈ܶܐ ܕܰܟّܳܗ̈ܢܶܐ ܘܰܪّܺܝܫܳܢ̈ܶܐ ܕܰܗ̄ܢ ܢܳܛܽܘܪ̈ܶܐ ܕܽܗ̄ܘ ܗܰܝܟܠܳܐ ܡܚܰܝܪܺܝ ܐܰܥܠܰܝّܶܗ، ܘܚܳܫܒ̥ܺܝ ܗ̄ܘܰܘ̱ ܒܠܶܒܰܝّܶܗ ܕܡ݄ܢܝܳܐ ܗܰܬ̥ܶܐ؟ 25ܘܰܐܬ̥ܺܝ ܚܰܕ̱ ܡܰܘܕ̥ܰܥ ܠܰܗ ܠّܶܗ ܕܰܓّܰܒܪ̈ܰܢ݄ܟ ܕ݄ܚܒ݄ܫܟ̥ܽܘ ܒܽܗ̄ܘ ܚܒܽܘܫܝܳܐ، ܟܰܐܠ݄ܢ ܩܺܝܡ̈ܶܐ ܒܽܗ̄ܘ ܗܰܝܟܠܳܐ ܘ݄ܟܡܰܘܠܦܺܝ ܠܽܗ̄ܘ ܥܰܡܳܐ. 26ܗܶܕܺܝ ܐܰܙّ݄ܢ ܗ̄ܰܪّܺܝܫܳܢ̈ܶܐ ܕܰܗ̄ܢ ܢܳܛܽܘܪ̈ܶܐ ܥܰܡ ܕ̈ܰܚܫܶܐ ܕܡܰܝܬ݄ܢّܶܗ، ܐܶܠܳܐ ܠܳܐ ܒܽܗ̄ܘ ܚܰܝܠܳܐ ܥܰܠ ܕܙܰܝܥܺܝ ܗ̄ܘܰܘ̱ ܕܠ݄ܐ ܐܙّܶܗ ܪܳܓܰܡّܶܗ ܗ̄ܽܘ ܥܰܡܳܐ.
ܗ̄ܰܬّܰܠܡܺܝܕ̥̈ܶܐ ܟܡܰܚܘ݄ܢ ܗ̄ܽܘ ܫܪܳܪܳܐ ܕܰܐܠܳܗܳܐ
27ܘܺܗ̄ܝ ܢܰܩܠܐ ܕܡܰܝܬ݄ܢّܶܗ، ܡܰܩܺܝܡ݄ܢّܶܗ ܩ݄ܕ̱ܡ ܟܽܘܠܶܗ ܗ̄ܽܘ ܥܰܡܳܐ، ܘܽܗ̄ܘ ܪܰܒܳܐ ܕܰܟّܳܗ̈ܢܶܐ ܕܰܥ݄ܪ ܐܡ݄ܪ ܠܰܗ ܠّܶܗ: 28”ܠܳܐ ܦܽܘܩܕܳܢܳܐ ܡܦܰܩܰܕ ܠܰܢ ܐܰܠܟ̥ܽܘ ܕ݄ܠܢܳܫܳܐ ܠܳܐ ܡܰܘܠܦܺܝܬܽܘ ܒܽܗ̄ܘ ܐ݄ܫܡܰܢܳܐ؟ ܘܗܰܬܽܘ ܟܰܐܠܶܗ ܡܠܰܠܟ̥ܽܘ ܠܽܐܘܪܶܫܠܶܡ ܡܽܗ̄ܘ ܝܽܘܠܦܳܢܰܬ̥ܟ̥ܽܘ، ܘܟ݄ܐܒܥܺܝܬܽܘ ܕܡܰܝܬܺܝܬܽܘ ܐܰܥܠܰܢ ܗ̄ܽܘ ܐܰܕܡܳܐ ܕܽܗ̄ܘ ܓܰܒ̥ܪܰܢܳܐ.“
29ܡܰܕܥܰܪ ܠܶܗ ܫܶܡܥܽܘܢ، ܥܰܡ ܗ̄ܰܫܠܺܝܚ̈ܶܐ، ܘܐܡ݄ܪ ܠܰܗ ܠّܶܗ: ”ܥܰܠ ܐܰܠܳܗܳܐ ܟܠܳܙ݄ܡ ܡܰܨܺܝܬ̥ܺܝܢܰܐ ܙ݄ܕ ܡܰܗ̄ܢ ܢܳܫ̈ܶܐ! 30ܐܰܠܳܗܳܐ ܕܰܒّܰܒܳܢ̈ܰܝܕ̥ܰܢ ܡܰܩ݄ܡ ܠܶܗ ܠܝܶܫܽܘܥ، ܗܰܘܳܐ ܕܗܰܬܽܘ ܩܛ݄ܠܟ̥ܽܘ ܗ̄ܺܝ ܢܰܩܠܐ ܕ݄ܡܥܰܠܰܩܟ̥ܽܘ ܥܰܠ ܩܰܝܣܳܐ. 31ܐܶܠܶܗ ܠܰܗ̄ܢܳܐ ܐܰܠܳܗܳܐ ܡܰܩ݄ܡ ܠܶܗ ܪܺܝܫܳܐ ܘܡܰܚܝܳܢܳܐ (ܦܳܪܽܘܩܳܐ)، ܘܡܰܥܠܶܐ ܠܶܗ ܒܽܗ̄ܘ ܝܰܡܺܝܢܰܝܕ̥ܶܗ ܕܳܗ̄ܒܶܐ ܬܝܳܒܽܘܬ̥ܳܐ ܘܫܽܘܒܩܳܢܳܐ ܕܰܚܛܳܗ̈ܶܐ ܠܺܐܝܣܪܳܐܶܝܠ. 32ܘܰܐܚܢܰܐ ܣܳܗܕ̈ܶܐ ܢܰܐ ܠܰܡّܰܐܡܪ̈ܰܢܺܝ، ܘܪܽܘܚܳܐ ܕܩܽܘܕܫܳܐ ܗܰܘܳܐ ܕܗܽܒ̥ ܠܶܗ ܐܰܠܳܗܳܐ ܠܰܐܝܢܰܐ ܕ݄ܡܗܰܝܡܢܺܝ ܐܶܒܶܗ.“
ܓܰܡܰܠܺܝܐܶܝܠ ܡܝܰܩܪܳܐ ܒܰܝܢ ܗ̄ܰܝّܽܘܕ̥̈ܳܝܶܐ
33ܘܺܗ̄ܝ ܢܰܩܠܐ ܕܫܰܡܺܝܥܺܝ ܗ̄ܰܡّܰܐܡܪ̈ܰܢܺܝ، ܠܳܗܒܺܝ ܗ̄ܘܰܘ̱ ܒܽܗ̄ܘ ܪܽܘܓ̥ܙܳܐ، ܘ݄ܐܒܥܺܝ ܗ̄ܘܰܘ̱ ܕܩܳܛܠ݄ܢّܶܗ. 34ܘܩܰܝ݄ܡ ܗ̄ܘܰܐ ܚܰܕ̱ ܡܰܢ̱ ܦܪ̈ܺܝܫܶܐ ܕ݄ܐܫܡܶܗ ܓܰܡܰܠܺܝܐܶܝܠ، ܡܰܠܦܳܢܳܐ ܕܽܗ̄ܘ ܢܳܡܽܘܣܳܐ، ܘ݄ܡܝܰܩܪܳܐ ܒܰܝܢ ܗ̄ܽܘ ܥܰܡܳܐ ܟܽܘܠܶܗ، ܗܰܢܳܐ ܗܽܒ̥ ܠܶܗ ܦܽܘܩܕܳܢܳܐ ܕܡܰܘܦܩܺܝ ܗ̄ܰܫܠܺܝܚ̈ܶܐ ܠܰܪܒ̥ܰܠ ܫܰܘܛܳܐ. 35ܘܐܡ݄ܪ ܠܰܗ ܠّܶܗ: ”ܝܰܐ ܓܰܒܪ̈ܶܐ ܕܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ، ܗܘܰܝܽܘ ܡܳܪܳܐ ܠܪܽܘܚܰܝܟ̥ܽܘ ܘ݄ܚܙܰܝܽܘ ܒܶܗ ܡ݄ܢ ܓܠܳܙܰܡܟ̥ܽܘ ܕܣܰܝܡܺܝܬܽܘ ܠܰܗ̄ܢ ܢܳܫ̈ܰܢܺܝ. 36ܡܶܩ݄ܕ̱ܡ ܡܳܐܥܕܳܐ، ܩܰܝ݄ܡ ܗ̄ܘܰܐ ܬܳܘܕܰܐ ܘܐܡ݄ܪ ܠܶܗ ܥܰܠ ܪܽܘܚܶܗ ܕܟ݄ܬ ܝܳܐ ܡܶܕܶܐ ܪܰܒܳܐ، ܘܰܐܙّ݄ܢ ܒ݄ܬ̥ܪܶܗ ܐܟ̥ ܐܰܪܒܰܥܡܳܐܐ ܓܰܒܪ̈ܶܐ. ܗܺܝّܶܗ ܩܛܺܝܠ ܘܗܰܢ݄ܟ ܕܰܐܙّ݄ܢ ܗ̄ܘܰܘ̱ ܒ݄ܬ̥ܪܶܗ ܡܒܰܪܒܙܺܝ، ܘܗܰܘ݄ܢ ܐܟ̥ ܕܠܳܐ ܡܶܕܶܐ. 37ܘܩܰܝ݄ܡ ܒ݄ܬ̥݄ܪ ܡܶܢܶܗ ܝܺܗܽܘܕ̥ܳܐ ܗ̄ܽܘ ܓܠܺܝܠܳܝܳܐ ܒܰܝّܰܘܡ̈ܳܬ̥ܳܐ ܕܡ݄ܟܬ̥ܳܒ̥ܺܝ ܗ̄ܘܰܘ̱ ܗ̄ܰܢ ܢܳܫ̈ܶܐ ܒ݄ܟܣܶܦܪܺܝܫܳܐ، ܘ݄ܓܪ݄ܫ ܠܶܗ ܒ݄ܬ̥ܪܶܗ ܥܰܡܳܐ ܓ̥ܰܠܰܒܶܐ. ܗܺܝّܶܗ ܡܰܝ݄ܬ̥ ܘܟܽܘܠّܶܗ ܗܰܢܺܝ ܕܰܐܙّ݄ܢ ܒ݄ܬ̥ܪܶܗ ܡܒܰܪܒܙܺܝ. 38ܘܳܐܥܕܳܐ ܟܳܐܡܰܪ ܐ̱ܢܳܐ ܠܟ̥ܽܘ، ܪܚܰܩܽܘ ܡܰܗ̄ܢ ܢܳܫ̈ܰܢܺܝ، ܡܰܪܦܶܝܽܘܢّܶܗ. ܕܶܐܢ ܡܰܗ̄ܢ ܢܳܫ̈ܶܐ ܝܳܐ ܗ̄ܽܘ ܝܽܘܠܦܳܢܰܢܳܐ ܘܽܗ̄ܘ ܥܒ̥ܳܕܰܢܳܐ ܓܡ݄ܫܪ݄ܢ ܘܒ݄ܛܠܺܝ، 39ܘܶܐܢ ܡܰܢ̱ ܐܠܳܗܳܐ ܝܳܐ، ܠܳܐ ܟܳܐܬ̥ܝܳܐ ܒܺܐܝܕ̥̈ܰܝܟ̥ܽܘ ܕ݄ܡܒܰܛܠܺܝܬܽܘ ܠܶܗ، ܕܠ݄ܐ ܐܙّܶܗ ܡ݄ܚܙܺܝܬܽܘ ܡܩܰܒ݄ܠ ܕܰܐܠܳܗܳܐ ܟܩܰܝܡܺܝܬܽܘ.“ 40ܘܡܰܩܒܰܠّܶܗ ܗ̄ܽܘ ܡܰܐܡܪܰܝܕ̥ܶܗ، ܘ݄ܩܪܰܠّܶܗ ܠܰܫܠܺܝܚ̈ܶܐ ܘ݄ܡܚܰܢّܰܢّܶܗ ܘܗܽܒّ̥ܰܢّܶܗ ܦܽܘܩܕܳܢܳܐ ܕܠܳܐ ܡ݄ܫܓ̥ܳܠܺܝ ܒ݄ܐܫܡܶܗ ܕܝܶܫܽܘܥ، ܘܡܰܪܦܰܢّܶܗ. 41ܘܢܰܦܺܝܩܺܝ ܡܶܢ̱ ܩܽܘܕ̱ܡܰܝّܶܗ ܦܨܺܝܚܳܝ̈ܶܐ ܥܰܠ ܕܫܰܘ݄ܢ ܕܠܰܫܰܢ ܗ̄ܽܘ ܐ݄ܫܡܳܐ ܡܺܝܨܰܥܪܺܝ. 42ܘܟܽܘܠ ܝܰܘܡܳܐ ܠ݄ܐ ܟܳܠ݄ܢ ܗ̄ܘܰܘ̱ ܡܽܗ̄ܘ ܬܶܘܠܺܝܦܳܐ ܒܽܗ̄ܘ ܗܰܝܟܠܳܐ ܘܒܽܗ̄ܘ ܒܰܝܬܳܐ، ܘ݄ܡܣܰܒܪܺܝ ܗ̄ܘܰܘ̱ ܥܰܠ ܡܳܪܰܢ ܝܶܫܽܘܥ ܡܫܺܝܚܳܐ.
Právě zvoleno:
ܥܒܳܕ̥̈ܶܐ ܕܰܫܠܺܝܚ̈ܶܐ 5: ܟܬܒܐ
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Suryoyo Bible © 2024 Aramaic Bible Translation