ܥܒܳܕ̥̈ܶܐ ܕܰܫܠܺܝܚ̈ܶܐ 16
16
ܛܺܝܡܳܬ̥ܶܐܳܘܣ ܟܡܳܛܶܐ ܠܦܰܘܠܳܘܣ ܘ݄ܠܫܺܝܠܳܐ
1ܘܡܰܛܺܝ ܗ̄ܘܰܐ ܠܺܗ̄ܝ ܡܕ̥ܺܝܢ̱ܬܳܐ ܕܕܶܪܒܺܝ ܘܠܽܘܣܛܪܰܐ. ܘܬܰܡܳܐ ܟ݄ܬ ܗ̄ܘܰܐ ܚܰܕ̱ ܬܰܠܡܺܝܕ̥ܳܐ ܕ݄ܐܫܡܶܗ ܛܺܝܡܳܬ̥ܶܐܳܘܣ؛ ܐܰܒܪܶܗ ܕ݄ܚܕ̥ܳܐ ܗܽܘܕ̥ܰܝܬܳܐ ܡܗܰܝܡܰܢܬܳܐ، ܘܽܗ̄ܘ ܒܰܒܰܝܕ̥ܶܗ ܐܰܪܡܳܝܳܐ ܗ̄ܘܰܐ. 2ܘܟܽܘܠّܶܗ ܗ̄ܰܬّܰܠܡܺܝܕ̥̈ܶܐ ܕܡܶܢ̱ ܠܽܘܣܛܪܰܐ ܘܡܶܢ̱ ܐܺܝܩܳܢܺܘܳܢ ܣ݄ܗܕܺܝ ܗ̄ܘܰܘ̱ ܐܰܥܠܶܗ. 3ܠܰܗ̄ܢܳܐ ܐܰܒ݄ܥ ܦܰܘܠܳܘܣ ܕܡܰܘܒܶܠ ܠܶܗ ܐܰܥܡܶܗ؛ ܘܡ݄ܕ ܠܶܗ ܓܙ݄ܪ ܠܶܗ (ܡܛܰܗܰܪ ܠܶܗ) ܠܰܫܰܢ ܗ̄ܰܝّܽܘܕ̥̈ܳܝܶܐ ܕܟ݄ܬ ܗ̄ܘܰܝܢܶܝ ܒܽܗ̄ܘ ܐܰܬ̥ܪܳܐ، ܡܺܐܝܕ̥ܶܗ ܕܟܽܘܠّܶܗ ܐܳܕ̥ܥܺܝ ܗ̄ܘܰܘ̱ ܠܽܗ̄ܘ ܒܰܒܳܐ ܕܟ݄ܬ ܝܳܐ ܐܰܪܡܳܝܳܐ. 4ܘܺܗ̄ܝ ܢܰܩܠܐ ܕܫܳܦ̊ܥܺܝ ܗ̄ܘܰܘ̱ ܒܰܡܕ̥̈ܺܝܢܳܬ̥ܳܐ ܟ݄ܪܙܺܝ ܗ̄ܘܰܘ̱ ܘܡܰܘܠܦܺܝ ܗ̄ܘܰܘ̱ ܢّܶܝ ܕܢܳܛܪܺܝ ܗ̄ܰܦّܽܘܩܕ̈ܳܢܶܐ ܕ݄ܟܬ̥ܽܒّ̥ܶܗ ܗ̄ܰܫܠܺܝܚ̈ܶܐ ܘܰܩّܰܫ̈ܶܐ ܕܒܽܐܘܪܶܫܠܶܡ.
5ܐܶܠܳܐ ܗ̄ܰܥّܺܕ̈ܳܬ̥ܳܐ ܡܺܝܚܳܨܺܝ ܗ̄ܘܰܘ̱ ܒܺܗ̄ܝ ܗܰܝܡܳܢܽܘܬ̥ܳܐ، ܘܙܰܝܕܺܝ ܗ̄ܘܰܘ̱ ܒܽܗ̄ܘ ܡܶܢܝܳܢܳܐ ܟܽܘܠ ܝܰܘܡܳܐ.
ܗ̄ܽܘ ܚܶܙܘܳܐ ܕܦܰܘܠܳܘܣ ܒ݄ܛܪܳܘܰܐܣ
6ܘ݄ܡܗܰܠܰܟّ̥ܶܗ ܒܰܗ̄ܢ ܐܰܬ̥ܪ̈ܰܘܳܬ̥ܳܐ ܕ݄ܦܪܽܘܓ̥ܺܝܰܐ ܘܓܰܠܰܛܺܝܰܐ، ܐܶܠܳܐ ܪܽܘܚܳܐ ܕܩܽܘܕܫܳܐ ܡܰܟܠܰܠّܰܗ ܕܠܳܐ ܡ݄ܫܓ̥ܳܠܺܝ ܗ̄ܺܝ ܡܶܠܬ̥ܳܐ ܕܰܐܠܳܗܳܐ ܒܰܐܣܺܝܰܐ. 7ܘܺܗ̄ܝ ܢܰܩܠܐ ܕܰܐܬ̥݄ܢ ܠܽܗ̄ܘ ܐܰܬ̥ܪܳܐ ܕܡܽܘܣܺܝܰܐ، ܐ݄ܒܥܺܝ ܗ̄ܘܰܘ̱ ܕ݄ܐܙّ݄ܢ ܡܶܢ̱ ܬܰܡܳܐ ܠܒܺܝܬܽܘܢܺܝܰܐ، ܐܶܠܳܐ ܗ̄ܺܝ ܪܽܘܚܳܐ ܕܝܶܫܽܘܥ ܠܳܐ ܛܪܶܐ ܠܰܗ ܠّܶܗ. 8ܘܺܗ̄ܝ ܢܰܩܠܐ ܕܢܰܦܺܝܩܺܝ ܡܶܢ̱ ܡܽܘܣܺܝܰܐ ܢܰܚܺܝܬܺܝ ܠܽܗ̄ܘ ܐܰܬ̥ܪܳܐ ܕ݄ܛܪܳܘܰܐܣ. 9ܘܒܽܗ̄ܘ ܚܶܙܘܳܐ ܕܽܗ̄ܘ ܠܰܠܝܳܐ ܚܙܶܐ ܠܦܰܘܠܳܘܣ ܚܰܕ̱ ܓܰܒ̥ܪܳܐ ܡܰܩܕܽܘܢܳܝܳܐ ܕܟܳܩܳܝ݄ܡ ܘܟܳܐܒ݄ܥ ܡܶܢܶܗ ܘܟܳܐܡ݄ܪ: ”ܬܳܟ̥ ܠܡܰܩܶܕܳܘܢܺܝܰܐ ܘ݄ܡܥܰܕܰܪ ܠܺܝ.“
10ܘܺܗ̄ܝ ܢܰܩܠܐ ܕ݄ܚܙܶܐ ܠܶܗ ܦܰܘܠܳܘܣ ܗ̄ܽܘ ܚܶܙܘܰܢܳܐ، ܡܶܚܕ̥ܳܐ ܐܰܒܺܝܥܺܝܢܰܐ ܕܢܳܦܩܺܝܢܰܐ ܠܡܰܩܶܕܳܘܢܺܝܰܐ ܥܰܠ ܕܰܐܕ̥ܺܝܥܺܝܢܰܐ ܕܡܳܪܰܢ ܩܪܶܐ ܠܶܗ ܠܰܢ ܕ݄ܡܣܰܒܪܺܝܢܰܢّܶܗ.
ܦܰܘܠܳܘܣ ܒܦܺܝܠܺܝܦܳܘܣ
11ܘܰܐܙّܰܢ ܡܶܢ̱ ܛܪܳܘܰܐܣ ܘ݄ܬܪ݄ܨ ܠܰܢ ܠܣܰܡܳܬ̥ܪܰܩܺܝ، ܘܠܽܗ̄ܘ ܝܰܘܡܳܐ ܚܪܶܢܳܐ ܐܰܬ̥ܺܝܢܰܐ ܠܺܗ̄ܝ ܡܕ̥ܺܝܢ̱ܬܳܐ ܕܢܶܐܰܦܳܘܠܺܝܣ. 12ܘܡܶܢ̱ ܬܰܡܳܐ ܠܦܺܝܠܺܝܦܳܘܣ ܕܟ݄ܬ ܝܳܐ ܗ̄ܺܝ ܪܺܝܫܳܐ ܕܡܰܩܶܕܳܘܢܺܝܰܐ، ܘܡܰܫܪܺܝܬ̥ܳܐ ܕܰܪّܽܘܡܳܝ̈ܶܐ ܝܳܐ. ܘܦܰܝܺܝܫܺܝܢܰܐ ܒܺܗ̄ܝ ܡܕ̥ܺܝܢ̱ܬܰܬ̥ܶܐ ܝܰܘܡ̈ܶܐ ܝܕ̥̈ܺܝܥܶܐ. 13ܘܢܰܦܺܝܩܺܝܢܰܐ ܒܝܰܘܡܶܗ ܕܫܰܒܬ̥ܳܐ ܠܰܪܒ̥ܰܠ ܡܽܗ̄ܘ ܬܰܪܥܳܐ ܕܺܗ̄ܝ ܡܕ̥ܺܝܢ̱ܬܳܐ ܥܰܠ ܣܰܦ̊ܬܶܗ ܕܽܗ̄ܘ ܢܰܗܪܳܐ، ܡܺܐܝܕ̥ܶܗ ܕܡ݄ܚܙܶܐ ܗ̄ܘܰܐ ܬܰܡܳܐ ܒܰܝܬܳܐ ܕܺܗ̄ܝ ܨܠܽܘܬ̥ܳܐ. ܘܺܗ̄ܝ ܢܰܩܠܐ ܕܝܰܬܺܝܒ̥ܺܝܢܰܐ ܡ݄ܫܓ̥ܳܠܺܝ ܗ̄ܘܰܝ ܢܰܐ ܥܰܡ ܗ̄ܰܢ ܢܶܫ̈ܶܐ ܕܠܰܬܺܝܡܺܝ ܗ̄ܘܰܘ̱ ܬܰܡܳܐ. 14ܘܟ݄ܬ ܗ̄ܘܰܐ ܚܕ̥ܳܐ ܐܰܢ̱ܬ̥ܬܳܐ ܐ݄ܫܡܰܗ ܠܽܘܕܺܝܰܐ ܡܺܗ̄ܝ ܡܕ̥ܺܝܢ̱ܬܳܐ ܕܬܶܐܘܰܛܺܝܪܰܐ، ܡܙܰܒܢܳܐ ܗ̄ܘܰܐ ܐܰܪܓܘܳܢܳܐ، ܘܙܰܝܥܳܐ ܗ̄ܘܰܐ ܡܰܢ̱ ܐܠܳܗܳܐ. ܠܰܗ̄ܬ̥ܶܐ ܡܳܪܰܢ ܦܬ݄ܚ ܠܶܗ ܠܶܒܰܗ، ܘܫ݄ܡܥܳܐ ܗ̄ܘܰܐ ܗ̄ܽܘ ܡܶܕܶܐ ܕܳܐܡܰܪ ܗ̄ܘܰܐ ܦܰܘܠܳܘܣ. 15ܘܥܰܡܺܝܕ̥ܳܐ ܗܺܝّܰܗ ܘܰܗ̄ܢ ܢܳܫ̈ܶܐ ܕܽܗ̄ܘ ܒܰܝܬܰܝܕ̥ܰܗ. ܘܳܐܒܥܳܐ ܗ̄ܘܰܐ ܡܶܢܰܢ ܘ݄ܐܡّܳܪ̱ܐ ܗ̄ܘܰܐ: ”ܕܶܐܢ ܒ݄ܫܪܳܪܳܐ ܕ݄ܬܟ̥ܺܝ̈ܠܳܝܶܐ ܗܰܬܽܘ ܕ݄ܡܗܰܝܡܰܢ ܠܺܝ ܒܡܳܪܰܢ، ܬܳܟ̥ܽܘ ܫܪܰܝܽܘ ܒܽܗ̄ܘ ܒܰܝܬܰܝܕ̥ܺܝ.“ ܘܓ̥ܰܠܰܒܶܐ ܚ݄ܨ ܠܰܗ ܐܰܥܠܰܢ.
ܦܰܘܠܳܘܣ ܘܫܺܝܠܳܐ ܟܡܰܢܺܝܚܺܝ ܥܠܰܝܡܬܳܐ ܚܰܪܳܫܬܳܐ ܘܗ݄ܢّܶܝ ܟܡ݄ܚܒܳܫܺܝ
16ܘܗܰܘܺܝ، ܘܰܐܚܢܰܐ ܐܰܙ̈ܳܠܶܐ ܠܽܗ̄ܘ ܒܰܝܬܳܐ ܕܺܗ̄ܝ ܨܠܽܘܬ̥ܳܐ، ܢܰܦܺܝܩܳܐ ܩܽܘܕ̱ܡܰܢ ܚܕ̥ܳܐ ܥܠܰܝܡܬܳܐ ܕܟ݄ܬ ܗ̄ܘܰܐ ܐܶܒܰܗ ܪܽܘܚܳܐ ܕܰܚّܰܪ̈ܫܶܐ. ܘܣܰܝܡܳܐ ܗ̄ܘܰܐ ܬܰܓܳܪܽܘܬܳܐ (ܘܙܽܘܙ̈ܶܐ) ܓ̥ܰܠܰܒܶܐ ܠܰܡّܳܪ̈ܰܝܕ̥ܰܗ ܡܽܗ̄ܘ ܥܒ̥ܳܕ̥ܳܐ ܕܰܚّܰܪ̈ܫܶܐ ܕܣܰܝܡܳܐ ܗ̄ܘܰܐ. 17ܘܳܐܬ̥ܝܳܐ ܗ̄ܘܰܐ ܒ݄ܬ̥ܪܶܗ ܕܦܰܘܠܳܘܣ ܘܒ݄ܬ̥ܪܰܢ ܘܡܰܙܥܩܳܐ ܗ̄ܘܰܐ ܘ݄ܐܡّܳܪ̱ܐ ܗ̄ܘܰܐ: ”ܗ̄ܰܢ ܢܳܫ̈ܰܢܺܝ ܗ̄ܰܥّܰܒܕ̈ܶܐ ܕܰܐܠܳܗܳܐ ܗ̄ܽܘ ܥܶܠܳܝܳܐ ܢܶܝ، ܘܟ݄ܡܣܰܒܪ݄ܢܟ̥ܽܘ ܗ̄ܽܘ ܕܰܪܒܳܐ ܕܰܚّܰܝ̈ܶܐ.“ 18ܘܗܰܘܟ̥ܰܐ ܣܰܝܡܳܐ ܗ̄ܘܰܐ ܓ̥ܰܠܰܒܶܐ ܝܰܘܡ̈ܶܐ، ܘ݄ܪܓܺܝܙ ܦܰܘܠܳܘܣ ܘܐܡ݄ܪ ܠܶܗ ܠܺܗ̄ܝ ܪܽܘܚܰܝܳܐ: ”ܒ݄ܐܫܡܶܗ ܕܝܶܫܽܘܥ ܡܫܺܝܚܳܐ ܟܳܗ̄ܒܶܐ ܐ̱ܢܳܐ ܠܰܟ̥ ܦܽܘܩܕܳܢܳܐ ܕܢܳܦܩܰܬ ܡܶܢܰܗ!“ ܘܒܺܗ̄ܝ ܫܳܥܬ̥ܰܝܕ̥ܰܗ ܢܰܦܺܝܩܳܐ. 19ܘܺܗ̄ܝ ܢܰܩܠܐ ܕ݄ܚܙܰܠّܶܗ ܗ̄ܰܡّܳܪ̈ܰܝܕ̥ܰܗ ܕܢܰܦ݄ܩ ܡܶܢܰܗ ܗ̄ܽܘ ܣܰܒܪܳܐ ܕܺܗ̄ܝ ܬܶܓܽܘܪܬܰܬّ̥ܶܗ (ܘܰܙّܽܘܙ̈ܰܬّ̥ܶܗ)، ܙܒ݄ܛّܶܗ ܠܦܰܘܠܳܘܣ ܘ݄ܠܫܺܝܠܳܐ، ܡܓܰܪܓ݄ܫ݄ܢّܶܗ ܡܰܡܛܰܢّܶܗ ܠܽܗ̄ܘ ܫܽܘܩܳܐ. 20ܘ݄ܡܩܰܕܡ݄ܢّܶܗ ܠܰܕّܰܝܳܢ̈ܶܐ ܘܠܰܪّܺܝܫܳܢ̈ܶܐ ܕܺܗ̄ܝ ܡܕ̥ܺܝܢ̱ܬܳܐ ܘܐܡ݄ܪّܶܗ: ”ܗ̄ܰܢ ܢܳܫ̈ܰܢܺܝ ܟܣܰܝܡܺܝ ܒܽܘܠܒܳܠܳܐ ܒܺܗ̄ܝ ܡܕ̥ܺܝܢ̱ܬܰܝܕ̥ܰܢ، ܥܰܠ ܕܟ݄ܬ ܢܶܝ ܝܽܘܕ̥̈ܳܝܶܐ. 21ܘܟܳܟ݄ܪܙܺܝ ܠܰܢ ܥܝܳܕ̥̈ܶܐ ܗܰܢܺܝ ܕܠ݄ܐ ܟܳܗ̄ܘܶܐ ܠܰܢ ܕܡܰܩܒܠܺܝܢܰܐ ܘܣܰܝܡܺܝܢܰܢّܶܗ ܥܰܠ ܕܪ̈ܽܘܡܳܝܶܐ ܢܰܐ.“ 22ܘܢܳܫ̈ܶܐ ܓ̥ܰܠܰܒܶܐ ܠܰܬܺܝܡܺܝ ܐܰܥܠܰܝّܶܗ، ܗ̄ܺܝ ܢܰܩܠܝܳܐ ܗ̄ܰܕّܰܝܳܢ̈ܶܐ ܩܛ݄ܥّܶܗ ܗ̄ܰܠܒܽܘܫ̈ܰܬّ̥ܶܗ ܘܗܽܒّ̥ܶܗ ܦܽܘܩܕܳܢܳܐ ܕܡܳܚ݄ܢّܶܗ. 23ܘܒ݄ܬ̥݄ܪ ܕ݄ܡܚܰܢܢܰܢّܶܗ ܓ̥ܰܠܰܒܶܐ، ܡܚܰܠܩ݄ܢّܶܗ ܒܽܗ̄ܘ ܚܒܽܘܫܝܳܐ، ܘܗܽܒّ̥ܶܗ ܦܽܘܩܕܳܢܳܐ ܠܽܗ̄ܘ ܢܳܛܽܘܪܳܐ ܕܽܗ̄ܘ ܚܒܽܘܫܝܳܐ ܕܢܳܛܰܪّܶܗ ܛܳܒ̥ܳܐ ܛܳܒ̥ܳܐ. 24ܘܗܺܝّܶܗ، ܗ̄ܺܝ ܢܰܩܠܐ ܕܡ݄ܕ ܠܶܗ ܗ̄ܽܘ ܦܽܘܩܕܳܢܰܢܳܐ، ܡܰܥܒܪܺܝ ܠܶܗ ܘ݄ܚܒܺܝܫܺܝ ܠܶܗ ܒܽܗ̄ܘ ܒܰܝܬܳܐ ܕܠܰܘܓ̥݄ܠ ܕܽܗ̄ܘ ܚܒܽܘܫܝܳܐ، ܘܡܰܐܣ݄ܪ ܠܶܗ ܪ̈ܰܓ̥ܠܳܬ̥ܰܝّܶܗ ܒܥܽܘܠܒܳܐ ܕܩܰܝܣ̈ܶܐ.
ܦܰܘܠܳܘܣ ܘܫܺܝܠܳܐ ܟܢ݄ܦܩܺܝ ܠܺܗ̄ܝ ܚܺܐܪܽܘܬ̥ܳܐ
25ܘ݄ܒܦܰܠܓܶܗ ܕܠܰܠܝܳܐ، ܦܰܘܠܳܘܣ ܘܫܺܝܠܳܐ ܡܨܰܠ݄ܢ ܗ̄ܘܰܘ̱ ܘ݄ܡܫܰܒܚܺܝ ܗ̄ܘܰܘ̱ ܠܰܐܠܳܗܳܐ؛ ܘܰܚܒܺܝܫܳܝ̈ܶܐ ܫ݄ܡܥܺܝ ܗ̄ܘܰܢّܶܗ. 26ܘܡܶܚܕ̥ܳܐ ܗܰܘܺܝ ܙܽܘܠܙܳܠܳܐ ܪܰܒܳܐ ܘܗܺܝܙܺܝ ܗ̄ܰܫّܶܬܶܐܣ̈ܶܐ ܕܽܗ̄ܘ ܚܒܽܘܫܝܳܐ، ܘܡܶܚܕ̥ܳܐ ܦܬܺܝܚܺܝ ܟܽܘܠّܶܗ ܗ̄ܰܬّܰܪ̈ܥܶܐ، ܘܰܗ̄ܢ ܐܰܣܽܘܪ̈ܰܬّ̥ܶܗ ܟܽܘܠّܶܗ ܫܪ݄ܢ. 27ܘܺܗ̄ܝ ܢܰܩܠܐ ܕܩܰܝ݄ܡ ܗ̄ܽܘ ܢܳܛܽܘܪܳܐ ܡܺܗ̄ܝ ܫܰܢܬ̥ܳܐ، ܘ݄ܚܙܶܐ ܠܶܗ ܗ̄ܰܬّܰܪ̈ܥܶܐ ܕܽܗ̄ܘ ܚܒܽܘܫܝܳܐ ܦܬܺܝܚ̈ܶܐ، ܡ݄ܕ ܠܶܗ ܣܰܝܦܳܐ ܘܰܐܒ݄ܥ ܕܩܳܛ݄ܠ ܪܽܘܚܶܗ، ܥܰܠ ܕܚܳܫܰܒ̥ ܗ̄ܘܰܐ ܕܥܰܪܺܝܩܺܝ ܗ̄ܰܚܒܺܝܫ̈ܶܐ. 28ܘܦܰܘܠܳܘܣ ܩܪܶܐ ܠܶܗ ܠܶܗ ܒܩܳܠܳܐ ܥܶܠܳܝܳܐ ܘܐܡ݄ܪ ܠܶܗ ܠܶܗ: ”ܠܳܐ ܣܰܝܡܰܬ ܒܪܽܘܚܳܟ̥ ܡܶܕܶܐ ܒܺܝܫܳܐ، ܡܺܐܝܕ̥ܶܗ ܕܟܽܘܠܰܢ ܗܰܪܟܶܐ ܢܰܐ.“ 29ܘܡܰܢܗܰܪ ܠܶܗ ܫܪܳܓ̥ܳܐ ܘܩܰܝ݄ܡ ܥܰܒ݄ܪ ܠܰܘܓ̥݄ܠ ܘܗܺܝّܶܗ ܟܪܳܥ݄ܠ، ܘܢܰܦ݄ܠ ܥܰܠ ܪ̈ܰܓ̥ܠܳܬ̥ܶܗ ܕܦܰܘܠܳܘܣ ܘ݄ܕܫܺܝܠܳܐ. 30ܘܡܰܘܦܩܺܝ ܠܶܗ ܠܰܪܒ̥ܰܠ ܘܐܡ݄ܪ ܠܰܗ ܠّܶܗ: ”ܝܰܐ ܡܳܪܰܝܕ̥ܺܝ: ܡ݄ܢ ܟܳܐܒܰܥ ܠܺܝ ܕܣܳܝܰܡ ܐ̱ܢܳܐ ܠܰܫܰܢ ܕܚܳܝܶܐ ܐ̱ܢܳܐ؟“ 31ܘܗ݄ܢّܶܝ ܐܡ݄ܪّܰܗ ܠܶܗ: ”ܡܗܰܝܡ݄ܢ ܒܡܳܪܰܢ ܝܶܫܽܘܥ ܡܫܺܝܚܳܐ ܘܕܳܗ̄ܘ݄ܢ ܠܳܟ̥ ܚܰܝ̈ܶܐ ܐܶܠܳܟ̥ ܘܠܽܗ̄ܘ ܒܰܝܬܰܝܕ̥ܳܟ̥.“ 32ܘ݄ܫܓ̥ܺܝܠܺܝ ܐܰܥܡܶܗ ܗ̄ܺܝ ܡܶܠܬ̥ܳܐ ܕܡܳܪܝܳܐ ܘܥܰܡ ܟܽܘܠّܶܗ ܗ̄ܰܢ ܢܳܫ̈ܶܐ ܕܽܗ̄ܘ ܒܰܝܬܰܝܕ̥ܶܗ. 33ܘܒܺܗ̄ܝ ܫܳܥܬ̥ܰܝܕ̥ܰܗ، ܡܰܘܒܠܺܝ ܠܶܗ ܘܡܰܣܚܰܠّܶܗ ܡܺܗ̄ܝ ܡܰܚܝܰܬّ̥ܶܗ. ܘܒܺܗ̄ܝ ܫܳܥܬ̥ܰܝܕ̥ܰܗ ܥܰܡ݄ܕ̥ ܗܺܝّܶܗ ܘܟܽܘܠّܶܗ ܗ̄ܰܢ ܢܳܫ̈ܶܐ ܕܽܗ̄ܘ ܒܰܝܬܰܝܕ̥ܶܗ. 34ܘܡܰܘ̇ܒܠܺܝ ܠܶܗ ܡܰܣܠܰܩܺܝ ܠܶܗ ܠܽܗ̄ܘ ܒܰܝܬܰܝܕ̥ܶܗ ܘܡܰܚ݄ܬ ܠܰܗ ܠّܶܗ ܦܳܬܽܘܪܳܐ. ܘܡ݄ܦܨܰܚ ܗ̄ܘܰܐ ܗܺܝّܶܗ ܘܰܗ̄ܢ ܢܳܫ̈ܶܐ ܕܽܗ̄ܘ ܒܰܝܬܰܝܕ̥ܶܗ ܒܺܗ̄ܝ ܗܰܝܡܳܢܽܘܬ̥ܳܐ ܕܰܐܠܳܗܳܐ.
35ܘܡܶܢ̱ ܕܗܰܘܺܝ ܨܰܦܪܳܐ، ܗ̄ܰܕّܰܝܳܢ̈ܶܐ ܡܫܰܕܰܪّܶܗ ܗ݄ܢ ܡܰܢ̱ ܕّܰܚܫ̈ܶܐ ܕ݄ܐܡّܺܪ̱ܝ ܠܽܗ̄ܘ ܪܺܝܫܳܐ ܕܽܗ̄ܘ ܚܒܽܘܫܝܳܐ: ”ܡܰܪܦܰܝ ܗ̄ܰܢ ܢܳܫ̈ܰܢ݄ܟ.“ 36ܘܺܗ̄ܝ ܢܰܩܠܐ ܕܫܰܡ݄ܥ ܗ̄ܽܘ ܢܳܛܽܘܪܳܐ، ܥܰܒ݄ܪ ܐܡ݄ܪ ܠܶܗ ܗ̄ܽܘ ܛܶܒܰܢܳܐ ܠܦܰܘܠܳܘܣ: ”ܗ̄ܰܕّܰܝܢ̈ܶܐ ܡܫܰܕܰܪّܶܗ ܦܽܘܩܕܳܢܳܐ ܕܡܰܪܦ݄ܢܟ̥ܽܘ، ܘܳܐܥܕܳܐ ܢܦܰܩܽܘ ܘܙܳܟ̥ܽܘ ܒ݄ܫܠܳܡܳܐ.“ 37ܦܰܘܠܳܘܣ ܐܡ݄ܪ ܠܶܗ ܠܶܗ: ”ܠܳܐ ܣ݄ܡ ܠܰܢ ܚܰܪܒܽܘܬ̥ܳܐ.“ ܘܗ݄ܢّܶܝ ܡܚܰܠّܰܗ ܠܰܢ ܩ݄ܕ̱ܡ ܗ̄ܽܘ ܥܰܡܳܐ ܟܽܘܠܶܗ، ܘ݄ܡܚܰܠܰܩّܰܗ ܠܰܢ ܒܽܗ̄ܘ ܚܒܽܘܫܝܳܐ، ܘܰܐܚܢܰܐ ܢܳܫ̈ܶܐ ܪ̈ܽܘܡܳܝܶܐ ܢܰܐ، ܘܳܐܥܕܳܐ ܥܰܠ ܟܰܣܝܳܐ ܟܡܰܘܦܩܺܝ ܠܰܢ؟ ܠܳܐ، ܐܶܠܳܐ ܛܪܳܐ ܗ݄ܢّܶܝ ܐܳܬ̥݄ܢ ܡܰܘܦܩܺܝ ܠܰܢ. 38ܘܰܐܙّ݄ܢ ܗ̄ܰܕّܰܚܫ̈ܶܐ ܘܐܡ݄ܪّܶܗ ܠܰܕّܰܝܳܢ̈ܶܐ ܗ̄ܽܘ ܡܰܐܡܪܰܢܳܐ ܕܐܡܺܝܪ ܐܰܠّܶܗ. ܘܺܗ̄ܝ ܢܰܩܠܐ ܕܫܰܡܺܝܥܺܝ ܕܪ̈ܽܘܡܳܝܶܐ ܢܶܝ، ܙܰܝܺܝܥܺܝ. 39ܘܰܐܬ̥݄ܢ ܓܰܒܰܝّܶܗ، ܘܰܐܒܺܝܥܺܝ ܡ݄ܢّܶܗ ܕܢܳܦܩܺܝ ܘ݄ܐܙّ݄ܢ ܡܺܗ̄ܝ ܡܕ̥ܺܝܢ̱ܬܳܐ. 40ܘܺܗ̄ܝ ܢܰܩܠܐ ܕܢܰܦܺܝܩܺܝ ܡܽܗ̄ܘ ܚܒܽܘܫܝܳܐ، ܥܰܒܺܝܪܺܝ ܓܰܒ ܠܽܘܕܺܝܰܐ، ܘܬܰܡܳܐ ܚܙܰܠّܶܗ ܠܰܗ̄ܢ ܐܰܚ̈ܽܘܢܳܢܶܐ، ܘ݄ܡܒܰܣܰܡّܶܗ ܠܶܒܰܝّܶܗ ܘܢܰܦܺܝܩܺܝ.
Právě zvoleno:
ܥܒܳܕ̥̈ܶܐ ܕܰܫܠܺܝܚ̈ܶܐ 16: ܟܬܒܐ
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Suryoyo Bible © 2024 Aramaic Bible Translation