ܥܒܳܕ̥̈ܶܐ ܕܰܫܠܺܝܚ̈ܶܐ 15
15
ܫܓ̥ܽܘܫܝܳܐ ܘܡܰܗܒ̥ܳܐ ܘ݄ܫܩܳܠܳܐ ܒܰܐܢܛܺܝܳܟ̥ܺܝܰܐ
1ܘܢܳܫ̈ܶܐ ܡܶܢ̱ ܝܺܗܽܘܕ̥ ܢܰܚܺܝܬܺܝ ܗ̄ܘܰܘ̱ (ܠܰܐܢܛܺܝܳܟ̥ܺܝܰܐ) ܘܡܰܘܠܦܺܝ ܗ̄ܘܰܘ̱ ܠܰܗ̄ܢ ܐܰܚ̈ܽܘܢܳܢܶܐ: ”ܐܶܢ ܠܳܐ ܡ݄ܓܙܳܪܺܝܬܽܘ ܐܟ̥ ܕܽܗ̄ܘ ܥܝܳܕ̥ܳܐ ܕܽܗ̄ܘ ܢܳܡܽܘܣܳܐ ܠܰܒܟ̥ܽܘ ܥ݄ܒܪܺܝܬܽܘ ܠܰܚّܰܝ̈ܶܐ.“ 2ܘܗܰܘܺܝ ܗ̄ܘܰܘ̱ ܫܓ̥ܽܘܫܝܳܐ ܪܰܒܳܐ، ܘܡܰܗܒ̥ܳܐ ܘ݄ܫܩܳܠܳܐ ܠܦܰܘܠܳܘܣ ܘܒܰܪܢܰܒܰܐ ܐܰܥܡܰܝّܶܗ. ܘܥܰܠ ܗ̄ܽܘ ܡܰܐܡܪܰܢܳܐ، ܡܰܛܝܳܐ ܕܣܳܠܩܺܝ ܦܰܘܠܳܘܣ ܘܒܰܪܢܰܒܰܐ ܥܰܡ ܚܪ̈ܶܢܶܐ ܠܽܐܘܪܶܫܠܶܡ ܠܓܰܒ ܗ̄ܰܫܠܺܝܚ̈ܶܐ ܘܰܩّܰܫ̈ܶܐ ܠܰܫܰܢ ܗ̄ܽܘ ܩܰܛܪܰܢܳܐ. 3ܘܺܗ̄ܝ ܥܺܕ̱ܬܳܐ ܡܠܰܘ݄ܢ ܠܰܗ ܡܫܰܕܪܺܝ ܠܰܗ. ܘ݄ܡܗܰܠܟ̥ܺܝ ܗ̄ܘܰܘ̱ ܒܦܽܘܢܺܝܩܺܝ ܟܽܘܠܰܗ، ܘܒܰܝܢ ܗ̄ܰܫّܳܡܪ̈ܳܝܶܐ ܣܬܶܝ ܘܗ݄ܢّܶܝ ܡ݄ܫܓ̥ܳܠܺܝ ܗ̄ܘܰܘ̱ ܥܰܠ ܗ̄ܽܘ ܕܥܳܪܳܐ (ܘܺܗ̄ܝ ܬܝܳܒܽܘܬ̥ܳܐ) ܕܰܥّܰܡ̈ܶܐ، ܘܡܰܦܨܚܺܝ ܗ̄ܘܰܘ̱ ܦܨܺܝܚܽܘܬ̥ܳܐ ܪܰܒܬ̥ܳܐ ܠܟܘ̇ܠّܶܗ ܗ̄ܰܢ ܐܰܚ̈ܽܘܢܳܢܶܐ.
4ܘܺܗ̄ܝ ܢܰܩܠܐ ܕܰܐܬ̥݄ܢ ܠܽܐܘܪܶܫܠܶܡ، ܘ݄ܡܬܰܩܒܠܺܝ ܡܺܗ̄ܝ ܥܺܕ̱ܬܳܐ ܘܡܰܢ̱ ܫܠܺܝܚ̈ܶܐ ܘܡܰܢ̱ ܩّܰܫ̈ܶܐ. ܘܗ݄ܢّܶܝ ܐܡ݄ܪّܰܢّܶܗ ܟܽܘܠ ܡܶܕܶܐ ܕܣ݄ܡ ܠܶܗ ܐܰܠܳܗܳܐ ܐܰܥܡܰܝّܶܗ.
ܗ̄ܽܘ ܟܢܽܘܫܝܳܐ ܩܰܕ̱ܡܳܝܳܐ ܒܽܐܘܪܶܫܠܶܡ ܘܰܩّܳܢܘܢ̈ܶܐ ܕܡܰܚܰܬ ܠܶܗ
5ܘܢܳܫ̈ܶܐ ܡܰܗ̄ܢ݄ܟ ܕ݄ܡܗܰܝܡܰܢّܶܗ، ܘܟ݄ܬ ܗ̄ܘܰܝܢܶܝ ܡܽܗ̄ܘ ܝܽܘܠܦܳܢܳܐ ܕܰܦܪ̈ܺܝܫܶܐ، ܩܰܝܺܝܡܺܝ ܘܐܡ݄ܪّܶܗ: ”ܐܳܒܰܥ ܗ̄ܘܰܐ ܠܟ̥ܽܘ ܕܓ݄ܙܪܺܝܬܽܘܢّܶܗ (ܡܛܰܗܪܺܝܬܽܘܢّܶܗ) ܘܡܰܘܠܦܺܝܬܽܘܢّܶܗ ܕܢܳܛܪܺܝ ܗ̄ܽܘ ܢܳܡܽܘܣܳܐ ܕܡܽܘܫܶܐ.“ 6ܘܠܰܬܺܝܡܺܝ ܗ̄ܰܫܠܺܝܚ̈ܶܐ ܘܰܩّܰܫ̈ܶܐ ܕܕܳܪܫܺܝ ܗ̄ܽܘ ܡܰܐܡܪܰܢܳܐ. 7ܘܒ݄ܬ̥݄ܪ ܕܝܰܪ݄ܟ̥ ܗ̄ܽܘ ܡܰܐܡܪܳܐ ܘܬܶܢܳܝܳܐ، ܩܰܝ݄ܡ ܫܶܡܥܽܘܢ ܘܐܡ݄ܪ ܠܰܗ ܠّܶܗ: ”ܝܰܐ ܓܰܒܪ̈ܶܐ ܐܰܚ̈ܽܘܢܳܢܶܐ، ܗܰܬܽܘ ܟ݄ܐܕ̥ܥܺܝܬܽܘ ܕܡܰܢ̱ ܝّܰܘܡ̈ܶܐ ܩܰܕ̱ܡܳܝ̈ܶܐ، ܐܰܠܳܗܳܐ ܓܒܶܐ ܠܶܗ ܗ̄ܰܥّܰܡ̈ܶܐ ܕܫ݄ܡܥܺܝ ܡܶܢ̱ ܦܶܡܺܝ ܗ̄ܺܝ ܡܶܠܬ̥ܳܐ ܕܺܗ̄ܝ ܣܒܰܪܬ̥ܳܐ ܘ݄ܡܗܰܝܡܢܺܝ. 8ܘܰܐܠܳܗܳܐ ܕܟܳܐܕ̥݄ܥ ܒܰܠّܶܒ̈ܶܐ، ܣܗ݄ܕ ܠܶܗ ܐܰܥܠܰܝّܶܗ ܘܗܽܒ̥ ܠܰܗ ܠّܶܗ ܪܽܘܚܳܐ ܕܩܽܘܕܫܳܐ ܐܟ̥ ܕܗܽܒ̥ ܠܶܗ ܐܶܠܰܢ. 9ܘܠܳܐ ܦܪ݄ܫ ܠܶܗ ܒܰܝܢ ܐܶܠܰܢ ܘܰܐܠّܶܗ ܒܡܶܕܶܐ، ܡܺܐܝܕ̥ܶܗ ܕ݄ܡܕܰܟܶܐ ܠܶܗ (ܡܰܫ݄ܓ̥ ܠܶܗ) ܠܶܒܰܝّܶܗ ܒܺܗ̄ܝ ܗܰܝܡܳܢܽܘܬ̥ܳܐ. 10ܘܳܐܥܕܳܐ ܠܡ݄ܢ ܟ݄ܡܢܰܣܺܝܬܽܘ ܠܰܐܠܳܗܳܐ ܕܡܰܚܬܺܝܬܽܘ ܢܺܝܪܳܐ ܥܰܠ ܩܕ̥̈ܳܠܶܐ ܕܰܬّܰܠܡܺܝܕ̥̈ܶܐ، ܐܰܝܢܰܐ ܕܠܳܐ ܗ̄ܰܒّܰܒܳܢ̈ܰܝܕ̥ܰܢ ܘܠܳܐ ܐܰܚܢܰܐ ܩܰܕܺܝܪܺܝܢܰܐ ܕܛܳܥܢܺܝܢܰܐ؟ 11ܐܶܠܳܐ ܒܺܗ̄ܝ ܛܰܝܒܽܘܬ̥ܳܐ ܕܡܳܪܰܢ ܝܶܫܽܘܥ ܡܫܺܝܚܳܐ ܟ݄ܡܗܰܝܡܢܺܝܢܰܐ ܕܳܗ̄ܘܶܐ ܠܰܢ ܚܰܝ̈ܶܐ ܐܟ̥ܳܬ̥ܰܝّܶܗ.“ 12ܘܟܽܘܠّܶܗ ܗ̄ܰܢ ܢܳܫ̈ܶܐ ܕܒܽܗ̄ܘ ܟܢܽܘܫܝܳܐ ܟܰܠ݄ܢ. ܘܫܳܡܥܺܝ ܗ̄ܘܰܘ̱ ܠܦܰܘܠܳܘܣ ܘ݄ܠܒܰܪܢܰܒܰܐ ܕ݄ܐܡّܺܪ̱ܝ ܗ̄ܘܰܘ̱ ܟܽܘܠ ܡܶܕܶܐ ܕܣ݄ܡ ܠܶܗ ܐܰܠܳܗܳܐ ܒܺܐܝܕ̥̈ܳܬ̥ܰܝّܶܗ، ܐܳܬ̥ܘ̈ܳܬ̥ܳܐ ܘܬܶܕ݄ܡܪ̈ܳܬ̥ܳܐ ܒܰܝܢ ܗ̄ܰܥّܰܡ̈ܶܐ. 13ܘܒ݄ܬ̥݄ܪ ܕܟܰܠ݄ܢ، ܩܰܝ݄ܡ ܝܰܥܩܽܘܒ ܘܐܡ݄ܪ ܠܶܗ: ”ܝܰܐ ܓܰܒܪ̈ܶܐ ܐܰܚ̈ܽܘܢܳܢܶܐ، ܫܡܰܥܽܘ ܠܺܝ: 14ܫܶܡܥܽܘܢ ܐܡ݄ܪ ܠܶܗ ܠܟ̥ܽܘ ܐܰܝܕܰܪܒܳܐ ܡܫܰܪܶܐ ܠܶܗ ܐܰܠܳܗܳܐ ܕ݄ܡܢܰܩܶܐ ܡܰܢ̱ ܥّܰܡ̈ܶܐ ܥܰܡܳܐ ܠܽܗ̄ܘ ܐ݄ܫܡܰܝܕ̥ܶܗ. 15ܘܽܗ̄ܘ ܡܰܐܡܪܰܢܳܐ ܟܳܠܳܚ݄ܡ ܠܽܗ̄ܘ ܡܰܐܡܪܳܐ ܕܰܗ̄ܢ ܢܒܺܝ̈ܶܐ ܐܟ̥ ܕ݄ܟܬ̥ܺܝܒ̥: 16’ܒ݄ܬ̥݄ܪ ܡܰܗ̄ܢܺܝ، ܓܕܳܥܰܪ ܐ̱ܢܳܐ ܘܡܰܩ݄ܡ ܐ̱ܢܳܐ ܗ̄ܽܘ ܡܰܫܟܢܳܐ (ܒܰܝܬܳܐ) ܕܕܰܘܺܝܕ̥ ܕܢܰܦ݄ܠ؛ ܘ݄ܓܒܳܢܶܐ ܐ̱ܢܳܐ ܗ̄ܽܘ ܡܶܕܶܐ ܕܢܰܦ݄ܠ ܡܶܢܶܗ ܘ݄ܓܡܰܩ݄ܡܢܶܗ، 17ܠܰܫܰܢ ܟܽܘܠّܶܗ ܗ̄ܰܢ ܢܳܫ̈ܶܐ ܐ݄ܒܥܺܝ ܠܡܳܪܝܳܐ، ܘܟܽܘܠّܶܗ ܗ̄ܰܥّܰܡ̈ܶܐ ܕ݄ܩܪܶܐ ܐ݄ܫܡܺܝ ܐܰܥܠܰܝّܶܗ، ܟܳܐܡ݄ܪ ܡܳܪܝܳܐ ܕܣ݄ܡ ܠܶܗ ܗܰܢܺܝ ܟܽܘܠّܶܗ. 18ܝܕ̥̈ܺܝܥܶܐ ܢܶܝ ܗ̄ܰܥܒܳܕ̥̈ܶܐ ܕܰܐܠܳܗܳܐ ܡܶܢ̱ ܥܳܠܰܡ.‘ 19ܡܰܗ̄ܘܟ̥ܰܐ ܐܳܢܳܐ ܟܳܐܡܰܪ ܐ̱ܢܳܐ: ܛܪܳܐ ܠܳܐ ܡܰܚܬܺܝ ܝܽܘܩܪܳܐ ܥܰܠ ܐܰܝܢܰܐ ܕܟܳܕܳܥܪܺܝ ܠܰܐܠܳܗܳܐ ܡܰܢ̱ ܥّܰܡ̈ܶܐ. 20ܐܶܠܳܐ ܕܡܺܝܫܰܕ݄ܪ ܐܰܠّܶܗ ܕܪܳܚܩܺܝ ܡܰܢ̱ ܕّܶܒܚ̈ܶܐ ܡܚܰܪ̈ܡܶܐ، ܘܡܺܗ̄ܝ ܙܳܢܝܽܘܬ̥ܳܐ، ܘܡܽܗ̄ܘ ܚܢܺܝܩܳܐ ܘܡܽܗ̄ܘ ܐܰܕܡܳܐ. 21ܡܺܐܝܕ̥ܶܗ ܕܡܽܘܫܶܐ، ܡܰܢ̱ ܕّܳܪ̈ܶܐ ܩܰܕ̱ܡܳܝ̈ܶܐ، ܟ݄ܬ ܗ̄ܘܰܝ ܠܶܗ ܟܳܪ̈ܽܘܙܶܐ ܒܟܽܘܠ ܡܕ̥ܺܝܢ̱ܬܳܐ ܒܰܟܢܽܘܫ̈ܳܬ̥ܳܐ ܕ݄ܒܟܽܘܠّܶܗ ܗ̄ܰܫّܰܒ̈ܶܐ ܩܳܪ݄ܢ ܠܶܗ (ܠܽܗ̄ܘ ܢܳܡܽܘܣܳܐ).“
ܐܶܓܰܪܬ̥ܳܐ ܕܡܽܗ̄ܘ ܟܢܽܘܫܝܳܐ ܠܰܥّܰܡ̈ܶܐ
22ܗܶܕܺܝ ܗ̄ܰܫܠܺܝܚ̈ܶܐ ܘܰܩّܰܫ̈ܶܐ ܥܰܡ ܗ̄ܺܝ ܥܺܕ̱ܬܳܐ ܟܽܘܠܰܗ ܡܢܰܩܰܠّܶܗ ܓܰܒܪ̈ܶܐ ܡ݄ܢّܶܗ ܘ݄ܡܫܰܕܪ݄ܢّܶܗ ܠܰܐܢܛܺܝܳܟ̥ܺܝܰܐ ܥܰܡ ܦܰܘܠܳܘܣ ܘܒܰܪܢܰܒܰܐ: ܠܺܝܗܽܘܕ̥ܳܐ ܕ݄ܟܡ݄ܩܪܶܐ ܒܰܪܫܰܒܳܐ ܘ݄ܠܫܺܝܠܳܐ، ܓܰܒܪ̈ܶܐ ܪ̈ܺܝܫܳܢܶܐ ܗ̄ܘܰܝܢܶܝ ܒܰܝܢ ܗ̄ܰܢ ܐܰܚ̈ܽܘܢܳܢܶܐ. 23ܘ݄ܟܬ̥ܽܒّ̥ܶܗ ܐܶܓܰܪܬ̥ܳܐ ܒܺܐܝܕ̥̈ܳܬ̥ܰܝّܶܗ ܗܰܘܟ̥ܰܐ: ”ܫܠܳܡܳܐ ܡܰܢ̱ ܫܠܺܝܚ̈ܶܐ ܘܰܩّܰܫ̈ܶܐ ܘܰܗ̄ܢ ܐܰܚ̈ܽܘܢܳܢܶܐ ܠܰܗ̄ܢ ܐܰܚ̈ܽܘܢܳܢܶܐ ܡܰܢ̱ ܥܰܡ̈ܶܐ ܕܟ݄ܬ ܢܶܝ ܒܰܐܢܛܺܝܳܟ̥ܺܝܰܐ ܘ݄ܒܣܽܘܪܺܝܰܐ ܘ݄ܒܩܺܝܠܺܝܩܺܝܰܐ. 24ܫܰܡܺܝܥܺܝܢܰܐ ܕܢܳܫ̈ܶܐ ܡܶܢܰܢ ܢܰܦܺܝܩܺܝ ܘ݄ܫܓ̥݄ܫّܰܢܟ̥ܽܘ ܒܰܡّܰܐܡܪ̈ܶܐ ܘܡܰܕܥܰܪّܶܗ ܗ̄ܰܢ ܢܰܦܫ̈ܳܬ̥ܰܬ̥ܟ̥ܽܘ ܘܟ݄ܐܡّܺܪ̱ܝ: ܕܡ݄ܓܙܳܪܺܝܬܽܘ ܘܢ݄ܛܪܺܝܬܽܘ ܗ̄ܽܘ ܢܳܡܽܘܣܳܐ، ܗܰܢܺܝ ܕܰܐܚܢܰܐ ܠܳܐ ܗܽܒ̥ ܠܰܢ ܦܽܘܩܕܳܢܳܐ ܐܰܠّܶܗ. 25ܡܰܗ̄ܘܟ̥ܰܐ، ܚܙܶܐ ܠܰܢ ܟܽܘܠܰܢ ܕܒܽܗ̄ܘ ܟܢܽܘܫܝܳܐ، ܘ݄ܡܢܰܩܶܐ ܠܰܢ ܓܰܒܪ̈ܶܐ ܘ݄ܡܫܰܕܪܺܝ ܠܰܢ ܓܰܒܰܝܟ̥ܽܘ ܥܰܡ ܗ̄ܰܚّܰܒܺܝܒ̈ܰܝܕ̥ܰܢ ܦܰܘܠܳܘܣ ܘܒܰܪܢܰܒܰܐ، 26ܓܰܒܪ̈ܶܐ ܕܗܽܒّ̥ܶܗ ܢܰܦܫ̈ܰܝّܶܗ ܠܰܫܰܢ ܗ̄ܽܘ ܐ݄ܫܡܳܐ ܕܡܳܪܰܢ ܝܶܫܽܘܥ ܡܫܺܝܚܳܐ. 27ܘ݄ܡܫܰܕܰܪ ܠܰܢ ܐܰܥܡܰܝّܶܗ ܠܺܝܗܽܘܕ̥ܳܐ ܘ݄ܠܫܺܝܠܳܐ ܕܗ݄ܢّܶܝ ܒܦܶܡ̈ܰܝّܶܗ ܕ݄ܐܡّ݄ܪ̱ܢܟ̥ܽܘ ܗܰܢܺܝ: 28ܥܰܠ ܕܗܰܘܺܝ ܨܶܒܝܳܢܳܐ ܠܪܽܘܚܳܐ ܕܩܽܘܕܫܳܐ، ܘܶܐܠܰܢ ܣܬܶܝ، ܕܠܳܐ ܡܺܝܬܰܚ݄ܬ ܐܰܥܠܰܝܟ̥ܽܘ ܝܽܘܩܪܳܐ ܝܰܩܽܘܪܳܐ ܠܰܪܒ̥ܰܠ ܡܰܗ̄ܢܺܝ ܕܟ݄ܬ ܢܶܝ ܐܳܠܨܳܝ̈ܶܐ: 29ܕܪܳܚܩܺܝܬܽܘ ܡܽܗ̄ܘ ܕܒܺܝܚܳܐ ܘܡܽܗ̄ܘ ܐܰܕܡܳܐ ܘܡܽܗ̄ܘ ܚܢܺܝܩܳܐ ܘܡܺܗ̄ܝ ܙܳܢܝܽܘܬ̥ܳܐ. ܘܺܗ̄ܝ ܢܰܩܠܐ ܕܢܳܛܪܺܝܬܽܘ ܢܰܦܫܰܝܟ̥ܽܘ ܡܰܗ̄ܢܺܝ، ܛܳܒ̥̈ܶܐ ܓܕܳܗ̄ܘܺܝܬܽܘ. ܘ݄ܗܘܰܝܽܘ ܫܰܪܺܝܪ̈ܶܐ ܒܡܳܪܰܢ.“
ܗ̄ܰܥّܰܡ̈ܶܐ ܟܡ݄ܦܨܳܚܺܝ ܒܺܗ̄ܝ ܐܶܓܰܪܬ̥ܳܐ
30ܘܗܰܢ݄ܟ ܕ݄ܡܫܰܕܪܺܝ، ܐܰܬ̥݄ܢ ܠܰܐܢܛܺܝܳܟ̥ܺܝܰܐ، ܘܣ݄ܡّܶܗ ܟܢܽܘܫܝܳܐ ܠܽܗ̄ܘ ܥܰܡܳܐ ܟܽܘܠܶܗ ܘܗܽܒّ̥ܶܗ ܗ̄ܺܝ ܐܶܓܰܪܬ̥ܳܐ. 31ܘܺܗ̄ܝ ܢܰܩܠܐ ܕ݄ܩܪܰܠّܶܗ ܦܨܺܝܚܺܝ ܘ݄ܬ̥ܢܺܝܚܺܝ. 32ܘ݄ܒܡܰܐܡܪܳܐ ܡܰܠܝܳܐ ܗܽܒّ̥ܶܗ ܚܰܝܠܳܐ ܠܰܗ̄ܢ ܐܰܚ̈ܽܘܢܳܢܶܐ ܘܡܰܚܺܝܨ݄ܢّܶܗ، ܡܺܐܝܕ̥ܶܗ ܕܺܝܗܽܘܕ̥ܳܐ ܘܫܺܝܠܳܐ ܣܬܶܝ ܢܒܺܝ̈ܶܐ ܗ̄ܘܰܝܢܶܝ. 33ܘܒ݄ܬ̥݄ܪ ܕܦܰܝܺܝܫܺܝ ܙܰܒܢܳܐ ܬܰܡܳܐ، ܗ̄ܰܢ ܐܰܚ̈ܽܘܢܳܢܶܐ ܫܪܰܢّܶܗ ܒ݄ܫܠܳܡܳܐ ܠܓܰܒ ܗ̄ܰܫܠܺܝܚ̈ܶܐ.
34ܐܶܠܳܐ ܫܺܝܠܳܐ ܐܰܒ݄ܥ ܕܦܳܝ݄ܫ ܬܰܡܳܐ. 35ܘܦܰܘܠܳܘܣ ܘܒܰܪܢܰܒܰܐ ܦܰܝܺܝܫܺܝ ܒܰܐܢܛܺܝܳܟ̥ܺܝܰܐ، ܘܡܰܘܠܦܺܝ ܗ̄ܘܰܘ̱ ܘ݄ܡܣܰܒܪܺܝ ܗ̄ܘܰܘ̱ ܗ̄ܺܝ ܡܶܠܬ̥ܳܐ ܕܰܐܠܳܗܳܐ ܥܰܡ ܓ̥ܰܠܰܒܶܐ ܚܪ̈ܶܢܶܐ.
ܗ̄ܽܘ ܡܰܐܙܠܳܐ ܕܰܬܪܶܝ ܠܺܗ̄ܝ ܣܒܰܪܬ̥ܳܐ
ܦܰܘܠܳܘܣ ܘܒܰܪܢܰܒܰܐ ܟܡ݄ܦܪܳܫܺܝ ܡܶܢ̱ ܚܕ̥ܳܕ̥̈ܶܐ
36ܘܒ݄ܬ̥݄ܪ ܟܡܳܐ ܝܰܘܡ̈ܶܐ، ܦܰܘܠܳܘܣ ܐܡ݄ܪ ܠܶܗ ܠܒܰܪܢܰܒܰܐ: ”ܬܳܟ̥ ܕܳܥܪܺܝܢܰܐ ܘܒ݄ܠܩܺܝܢܰܐ ܒܰܗ̄ܢ ܐܰܚ̈ܽܘܢܳܢܶܐ ܕ݄ܒܟܽܘܠ ܡܕ̥ܺܝܢ̱ܬܳܐ ܕ݄ܟܪ݄ܙ ܠܰܢ ܐܶܒܰܗ ܗ̄ܺܝ ܡܶܠܬ̥ܳܐ ܕܰܐܠܳܗܳܐ ܘܚܳܙܺܝܢܰܐ ܡ݄ܢ ܟܣܰܝܡܺܝ.“ 37ܘܒܰܪܢܰܒܰܐ ܐܳܒܰܥ ܗ̄ܘܰܐ ܕܡܰܘܒ݄ܠ ܐܰܥܡܶܗ ܝܽܘܚܰܢܳܢ ܗܰܘܳܐ ܕ݄ܩܪܶܐ ܡܰܪܩܳܘܣ، 38ܐܶܠܳܐ ܦܰܘܠܳܘܣ ܠܳܐ ܐܒܰܥ ܗ̄ܘܰܐ ܕܡܳܝܰܕ ܠܶܗ ܐܰܥܡܰܝّܶܗ ܡܺܐܝܕ̥ܶܗ ܕ݄ܛܪܶܐ ܗ̄ܘܰܝ ܠܶܗ ܡ݄ܢّܶܗ ܗ̄ܺܝ ܢܰܩܠܐ ܕܟ݄ܬ ܗ̄ܘܰܝܢܶܝ ܒܦܰ̊ܡܦܽܘܠܺܝܰܐ ܘܠܰܐ ܐܙّܶܗ ܗ̄ܘܰܐ ܐܰܥܡܰܝّܶܗ. 39ܘܡܺܐܝܕ̥ܶܗ ܕܠܰܐ ܐܬ̥݄ܢ ܠ݄ܚܕ̥ܳܕ̥̈ܶܐ ܦܪܺܝܫܺܝ ܡܶܢ̱ ܚܕ̥ܳܕ̥̈ܶܐ. ܘܒܰܪܢܰܒܰܐ ܡܰܘܒܶܠ ܠܶܗ ܠܡܰܪܩܳܘܣ ܘܰܐܙّ݄ܢ ܒܽܗ̄ܘ ܝܰܡܳܐ ܠܩܽܘܦܪܳܘܣ. 40ܘܦܰܘܠܳܘܣ ܡܢܰܩܶܐ ܠܶܗ ܠܫܺܝܠܳܐ ܘܢܰܦ݄ܩ ܘ݄ܡܠܰܘܶܐ ܡܰܗ̄ܢ ܐܰܚ̈ܽܘܢܳܢܶܐ ܠܺܗ̄ܝ ܛܰܝܒܽܘܬ̥ܳܐ ܕܰܐܠܳܗܳܐ. 41ܘ݄ܡܗܰܠܰܟ̥ ܗ̄ܘܰܐ ܒܣܽܘܪܺܝܰܐ ܘ݄ܒܩܺܝܠܺܝܩܺܝܰܐ، ܘܡܰܩܘܶܐ ܗ̄ܘܰܐ ܘܡܰܚ݄ܨ ܗ̄ܘܰܐ ܗ̄ܰܥّܺܕ̈ܳܬ̥ܳܐ.
Právě zvoleno:
ܥܒܳܕ̥̈ܶܐ ܕܰܫܠܺܝܚ̈ܶܐ 15: ܟܬܒܐ
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Suryoyo Bible © 2024 Aramaic Bible Translation