San Marcos 4
4
Jesuska yachachin parihuyachishpa tarpuk runamanta
(Mt 13.1-23; Lc 8.4-15)
1Jesuska kallarirka yachachinata shuk kuti ashwan yaku mayanpi. Chaypi karka achka runa tantarishka paypa kuchunpi. Chaypi uraykurka shuk boti yakupi kahukpi chaypi tiyarirka, tukuy runakunaka kiparirkakuna yaku mayanllapi. 2Achka imakunata yachachirka parihuyachishpa yachachinakunawa, yachachihushkanpi kasna rimarka:
3“Alita uyawaychi. Shuk tarpuk llukshirka tarpunapa. 4Tarpuhushpan, shuk muyukunaka urmarkakuna ñanpi mayanpi, chaypi shamurkakauna pishkukunaka mikurkakuna. 5Shuk muyukunaka urmarkakuna rumisapapi, maypimi mana yapa allpaka tiyarkachu, chayratulla wiñarirka, mana allpa tiyashkanrayku. 6Intika llukshishpan, rupachirka chaymanta chakirirka, mana ankunka tiyashkanrayku. 7Shuk muyukunaka urmarkakuna kashasapa chawpipi. Kashakunaka wiñashpankuna payta wañuchirkakuna, chayrayku mana muyuyarkachu. 8Shuk muyukunaka urmarkakuna ali allpapi, chaypi alita wiñashpan achkata muyuyarka. Shuka muyuyarka kimsa chunka muyuta, shuka sokta chunka muyukunata, chaymanta shuka muyuyarka shuk pachak muyukunata”. 9Chaymanta paykunata rimarka: “Maykanpami tiyan rinrinka uyananpa uyachun”.
10Kiparishpan sapallan, maykankunami paypa kuchunpi kahurkakuna chay chunka ishkay disipulunkunawa pakta tapurkakuna imatata rimanayan chay parihuyachishpa yachachinaka.
11Jesuska aynirka: “Kankunata asirtachini nima pi yachashkanta Yaya Diospa ali kamachinanmanta; maykankunami kahunkuna kanchapi paykunata rimani parihuyachishpa yachachinawa, 12rikushpankunapas, mana asirtanankunapa; uyashpankunapas mana uyanankunapa; mana kirinankunapa chasna uchankuna mana kananpa llakichirishka”.
13Chaymantapas Jesuska rimarka: “Mana asirtashpaykichika kay parihuyachishpa yachachinata, ¿Imashnataya chasnaka atipankichima asirtanata chay shuk parihuyachishpa yachachinakunataka? 14Chay tarpuk runaka kanmi maykanmi tarpun Yaya Diospa shiminta. 15Shukkunaka kanahun ñanpishina maypimi urmarkakuna muyukunaka. Paykunapi tarpunchi Yaya Diospa shimita, chayratulla, uyashkankuna washa, shamun Satanaska chaypi kunkachin chay Yaya Diospa shimi tarpurishkata shunkunkunamanta. 16Shukkunaka kanahun rumisapa allpapishina maypimi urmarkakuna muyukunaka. Uyashpankuna Yaya Diospa shimita, chayratulla kushilla uyanahun. 17Ashwan mana tiyashpan ankunkunaka, kawsayninka kan yapa uchilla, shamushpan llakiykunaka chaymanta parisichiy tukuhushpankuna chay Yaya Diospa shimin ranti, chayratulla sakinahun Yaya Diosta katinata. 18Shukkunaka kanahun kashasapa allpashina maypimi muyukunaka urmarkakuna. Chaykunaka kanahun maykankunami uyanahun Yaya Diospa shimita, 19chay yuyarinakuna kay mundumanta, chaymanta llullachirina chay suma rikurikkunamanta, chaymanta sakina shuk imakuna ranti, yaykunahun paykunapi chasna chinkachinahun chay Yaya Diospa shimita, chayrayku mana muyuyanñachu. 20Tiyan shukkunapas, paykuna kanahun suma allpashina maypimi muyukunaka urmarkakuna. Paykuna kanahun maykankunami uyanahun Yaya Diospa shimita chaymanta wakaychanahun, achkata muyuyanahun; ¡shukkunaka muyuyanahun kimsa chunka muyuta, shukkunaka sokta chunkata, shukkunaña shuk pachakta!”
Nima ima pakarishka kiparinchu mana rikurishka kashpanka
(Lc 8.16-18)
21Chaymantapas rimarka: “Manami shuk lanparintaka sintichishpanchi churanchimachu kahun ukupi, nima puñuna ukupi ashwan, ¡Sintichinchimi churananchipa lanparin churanapi! 22Manami tiyanchu nima ima pakarishka mana riksirishka kashpanka, chaymanta mana tiyanchu nima ima pakarishka mana llukshishpanka punchapi. 23Maykanpachari tiyan rinrinka uyananpa, uyachun”. 24Chaymantapas rimarka: “Alita asirtaychi uyahushkaykichita, maykan tupunawami kankunaka shukkunata tapunkichi, chay tupuwallatatami tupuy tukunkichi, chaymanta ashwan pasatami. 25Maykanpami tiyan, kuy tukunka; maykanpami mana tiyanchu, uchillastu tiyapushkanta kichuy tukunka”.
Muyu wiñashkamanta parihuyachishpa yachachina
26Chaymantapas Jesuska rimarka: “Yaya Diospa ali kamachinanka kan imashnami shuk karika wichan muyukunata allpapi: 27Ña payka puñuhushpan mana kashpaka kahushpan likcharishka, punchapi tutapipas muyuka tukyarin chasna wiñan, nima imata yachashpan payka. 28Allpaka pay kikinlla wiñachin. Puntiru tukyarin tarpuka, chaymanta wiñan, sisan, muyuyan, pukun. 29Chay muyuka pukushpan, chay ratulla sabliwa pallanchi, ña pallana punchaka paktarishkanrayku”.
Mostasa muyumanta parihuyachishpa yachachina
(Mt 13.31-32; Lc 13.18-19)
30Chaymanta Jesuska rimarka: “¿Imawashi ashwan parihuyachinchima Yaya Diospa ali kamachinanta? ¿Ima parihuyachinawashi parihuyachinchima? 31Atipan parihuyanata mostasa muyuwa. Tarpuhushpanchi allpapi kan tukuy muyukunamanta yapa uchillastu. 32Tarpurishkan washa wiñan tukuy tarpukunamanta yapa atunta. Ramayan atunta chay ukupi pishkukunaka wasinkunata ruranahun.” 33Achka parihuyachina yachachinakunawa imashnami kaykunata Jesuska rimarka chay Yaya Diospa shimimanta, maykamami paykuna atiparkakuna asirtanata. 34Chay parihuyachina yachachinakuna mana kashpanka mana yachachipayarkachu, ashwan disipulunkunallata yachachipayarka sapallankunata.
Sinchi wayrata, ulastapas Jesuska kasillayachirka
(Mt 8.23-27; Lc 8.22-25)
35Chay punchalla, ña tutayahushpan, Jesuska rimarka disipulunkunata: “Akuychi pasashunchi chay shuk chinpama.” 36Ña rihuni nishpan chay achka runakunata, rirkakuna paywa botipi maypimi kahurka. Chaymanta shuk botikunawapas parihu rirkakuna. 37Ña chinpahushpankuna atarirka sinchi tamya wayrawa pakta. Chayrayku ulaskunaka sinchita botipi waktarirkakuna, chay botika tikranayanankama.
38Jesuska kahurka boti sikipi, chaypi puñurayahurka shuk sanwanapi. Chaypi likchachishpa rimarkakuna: “¡Yachachik! ¿Manachu llakichinki ñukanchita ña tikrahushkanchita?”
39Atarishpan Jesuska chay wayrata ulastapas sinchi shimiwa kamachirka:
¡Kasillayay wayra! ¡Kasillayay ulas!
Chay rimashkanllawa pasarirka wayraka, tukuy kiparirka kasilla.
40Disipulunkunataña rimarka:
“¿Imaraykutaya yapa mancharinkichi? ¿Manarachu sinchikuhunkichi ñukapi?”
41Paykunaka kahurkakuna yapa mancharishka, chaypi tapunakurkakuna paykunapura:
“¿Pitaya payka, wayra yakupas kasunahun?”
Právě zvoleno:
San Marcos 4: QUP_B
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2025 AIDIA
© 2025 Seed Company
