San Mateo 14
14
Bawtisak Juan wañushkanmanta
(Mr 6.14-29; Lc 9.7-9)
1Chay punchakunapi apu Herodeska uyarka Jesús achka mana atipaypakunata rurahushkanta. 2Chaypi runankunata rimarka: “Chayka Bautisak Juanmi kawsarishka wañushkanmanta. Chayraykumi paypi tiyan chay poderkunaka.”
3Kay Herodeska ñawpa Juanta kadenakunawa watashpan karselpi churarka. Chayta rurarka wawkin Felipepa warmin Herodias chasna munashkanrayku. 4Juanka kunarka kasna nishpa: “Mana alichu kachuykiwa kawsanaykipa.” 5Herodeska Juanta wañuchichinayashpanpas, runakunata manchashpan mana atiparkachu. Tukuy runakuna yacharkakuna Juanka shuk profeta kananta.
6Herodespa wawayarishkan puncha paktarishpan fiestata rurarka. Chaypi Herodiaspa shipas wawanka sumakta baylarka, tukuy kayashkan runakunapa rikushkankunapi. Chayta rikushpan Herodeska yapa kushikurka. 7Chayrayku chay shipasta shutipa paktachinanta kasna nirka: “Imatachari tapuwanki, chayta kushkaykimi”.
8Chay, shipaska mamanmanta kunarishka kashpan kasna rimarka: “Kuway shuk kallanapi, Bautisak Juanpa umanta.”
9Chay tapushkanwa yapa llakichirka chay aputa. Achka runakuna mesapi kahukkunapa puntanpi rimashkanrayku kamachirka kunankunapa paypa tapushkanta. 10Kamachirka Juanpa umanta pitishpa wañuchikrinankunapa karselpi. 11Chasna pitishkankunawasha shuk kallanapi apamushpankuna chay shipasta kurkakuna; chaymanta chay shipaska mamantaña kurka. 12Chay chishillata, yachashpankuna Juanpa disipulunkunaka paypa aychanta, apashpankuna urku uchkupi churashpa tapakrirkakuna. Churashkankunawasha rirkakuna Jesusta rimanankunapa.
Jesuska pichka waranka runakunata kararka
(Mr 6.30-44; Lc 9.10-17; Jn 6.1-14)
13Chayta yachashpan Jesuska rirka chaymanta shuk botipi, chunlla allpama. Chasna Jesús rihushkanta achka runakuna yachashpankuna, tukuy llaktakunamanta purishpa katirkakuna. 14Jesuska botimanta llukshihushpan achka runakunata rikurka. Paykunata rikushpan llakirirka. Chasna llakichishpan chay unkushkakunata anpirka. 15Ña tutayahushpan disipulunkunaka kayllayashpankuna rimarkankuna payta: “Ñami kahunchi chishi, kaypika manami tiyanchu nima ima. Rimay kay tukuy runakunata kutinankunapa llaktakunama rantikrinankunapa mikunankunata.”
16Chaypi Jesuska rimarka: “Mana rinankuna tiyanchu nima imarayku, kankuna karaychi paykunata.” 17Chaypiña paykunaka aynirkakuna: “Pichka panstu, ishkay challwastullami tiyan.” 18Jesuska aynirka: “Apamuychi ñukama.” 19Chaypiña kamachirka runakunata tiyarinankunapa kiwayu allpapi. Chasna apishpan chay pichka panta, chaymanta chay ishkay challwata, silu awama rikushpan agradesirka. Chasna agradesishkan washa, pakishpan kurka disipulunkunata, paykunaña kurkakuna chay achka runakunataña. 20Tukuy mikurkakuna saksanankunakama, mikushkankuna washa tantarkakuna tukuy chay puchurishkanta chunka ishkay tasa untakta. 21Chay mikushka karikunaka karkakuna pichka warankashina, mana yupashpa warmikunata nima wawakunatapas.
Jesuska yaku awata purirka
(Mr 6.45-52; Jn 6.16-21)
22Chaymanta Jesuska disipulunkunata rimarka botipi uraykunankunapa, chaypi paykunata nirka: “Ñawpahuychi chay kucha chinpama, ñuka tukuy kay achka runakunata rimanaynikama kutinankunapa”.
23Chay runakuna rishkankunawasha, Jesuska sapallan shuk urku awama sikarka Yayan Diosta mañananpa. Tutayanankama payka sapallan chaypi karka. 24Chay botika ña kahurka chawpi kuchapi, chaypi ulaska sinchita waktarka, wayraka puntankunamanta kashkanrayku. 25Ña pakarihushpan Jesuska yaku awata purishpa paykunama rirka. 26Yaku awata purihushkanta rikushpankuna disipulonkunaka mancharirkakuna, yapa mancharishpankuna sinchita kaparirkakuna: “¡Hey, shuk almami!”
27Chay ratulla Jesuska paykunata rimarka: “¡Sinchikuriychi! ¡Ñukami kahuni!”#14.27 Kahuni Chay Ñukami kani nishkaka kan Yaya Diospa. Shuk shutin. ¡Ama manchariychichu!
28Chaypi Pedroka aynirka: “Yayayni, kan kashpaykika, rimay kanma rinaynipa yaku awata purishpa.”
29Jesuska aynirka: “Shamuy ñukama.”
Chayta uyashpan Pedroka botimanta uraykushpan Jesusma rirka yaku awata purishpa. 30Sinchi wayra paypi waktarihushkanta musyashpan, yapa mancharishpan kallarirka yaykunata. Chaypi sinchita kaparirka: “¡Yayayni, kishpichiway!”
31Chay ratulla Jesuska makinmanta apihushpan rimarka: “¡Mana ñukapi sinchikuk runa!” ¿Imaraykutaya mana kirishkankichu?
32Pedroka Jesuswa botipi yaykuhushkankunapi chay sinchi wayraka pasarirka. 33Chaypi botipi kahukkunaka Jesuspa puntanpi kunkurishpankuna nirkakuna: “Shutipami Yaya Diospa Wawan kanki.”
Jesuska achka unkushkakunata anpirka Genesaret allpapi
(Mr 6.53-56)
34Chay sinchi wayra pasarishpanña chay kucha chinpama Genesaret allpapi Jesuswa parihu paktakrirkakuna. 35Chaypi kawsak runakunaka Jesusta riksishpankuna tukuy runakunata rimashpa purirkakuna: “Ñami Jesuska paktamushka” nishpa. Chayta yachashpankuna unkushkakunata Jesusma apamurkakuna. 36Chay unkushkakunaka sinchita tapurkakuna, churarishkan shiminllatapas llankanankunapa. ¡Tukuy llankashkakunaka kiparirkakuna anpirishka!
Právě zvoleno:
San Mateo 14: QUP_B
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2025 AIDIA
© 2025 Seed Company
