Matáyoso 24
24
Gɛgada gá ɔnyɛb wá Gɔdányá
(Mál 13.1-4; Lúk 21.5-7)
1Yésu máal ná guám agá ɔnyɛ́b wá Gɔdányá ká údɔ́mb, bafɔ́nɔfɔ́n abábɛ́sɛdɛnɛn wɔ́, ká bédíye wɔ́ nɛnama na bɛfuág bá ɔnyɛb. 2Uganyɛ gɔ́b ká: «Nuguánan gifuág egie a? Ngúnuɔ́yɔɔn agá meliŋítas ká ta nɛdany nímoom nɛdɛgɔlɔbɛn nɛdálán agá sɔ́g nɛdany. Buanda gidigid gagadɛg.» 3Anyɛ́ umáabá ilukié agá nɔgɔnd na bolifié, bafɔ́nɔfɔ́n bág ɔbɔ́gɔ́gɛ́d wɔ́ agá buay báganyɛ ká: «Diɔ́yɛ́dɛ́n niík búganúbiál, ɔ́diɔ́yɛdɛn bulinsi búgenúdíye guúl gɔ́w na guman gá gus.»
Gubanyɛg gá guɔ́bɛ́g
4Uwondinyi bɔ́ ká: «Ánubɛ́nyáŋanyáŋ, mɔnd dinúnéní. 5Band giod gólón agá ɔfɛ́n wám, bɔ́gɔyɔ ká: “Yaŋuá nnyá Kilíse”, bégeneneni band giod. 6Nugɔ́bɔɔn bódógonyi bide, na bioŋúl bá bide, nudɛbiá gɔg buwa, búguófoon ká búbiál, ta anaány, búdigabá guman gá gus. 7Gɛdɔŋ gebígébelidinyi sɔ́g gɛdɔŋ, bufuŋ bígébélidinyi sɔ́g bufuŋ nsana gabá agá mɔkɔɔ́m, gus biéyen agá mɔkɔɔ́m. 8Manda amaány gidigid gabá anyɛ gubanyɛg gá meyú má nubiényé. 9Band gaal ká bénúsésenyi, bɔ́nuɔ́nɔ́, band bá gus gidigid ganúfɛ́ma gá busió bá ɔfɛ́n wám; 10Giod gabɛ́yɛ́bɛd guádáb gɛsɛgɛl igiány; bɔ́gɔsɔ́mɔnɛn bónd báfɛ́manɛn. 11Mubús má bɛsɔbɔ giod gaám buas agá giŋi ká bénénenyi giod gá band 12Bɔbɛ gasans nɛnama nɛ́nyá ká ɛlɛ́ga yá giod gá band gonig. 13Mɔnd ugɔnuɔ́mínɔɔn gɔg meyú guám agá gusúgúdenyi, Gɔdányá gosódi wɔ́. 14Bɔ́gɔyɔ ndág yá nsɔ́m ya bufúŋ bá muana agá gus gidigid ká egúl gidigid yá gus ɔ́b yɛ́, ány guman gá gus bád gusiám.
Guɔ́bɛ́g ugugɔ́gɔ́n
(Mál 13.14-23; Lúk 21.20-24)
15«Nsɛ́ ewe ubananá sɔ́ŋɔ́n bú bese na bese. Anɛ́ nuganuán Asɛŋɛna wa mabasɛ giod ndénye agá ɛsámb yá kɔɔ́m, ká úbá kɔ́ gɔɔ́gɔ anyɛ́ ibús yá Gɔdányá Daniɛ́la mɔ́ɔyɔ́ gág gá busío, 16ebe báganúbá agá giéns gá gus ɛgɛ́ bábɛ́laná ká Yudé gɔbínɔnɔn giáy gá dɔgɔnd#24.16 Alɛ́ŋɛ́d Dan 9.27, 11.31, 12.11.; 17ewe ugánúbá agá balánda dibíŋín agá gians ká úgɔ́l manda mág; 18Ewe uganɔ́bá agá gisién, diondo na gélem ká wɔ́gɔ́l gɛla gá níyo; 19medúg amaány, gɔsɔ́g na bagánd báganúbianan eŋum, na ebe bégenúfúŋenyi. 20Ónubísógólónyí ká búdíbiál ká band bɛ́nɔnɔn gɛ́sɛgɛl gá gianta gá níyo ta ɔ́gɔ ka buɔ́s bá sábát. 21Gágual ká, gigúl igiány guɔ́bɛ́g gabá giod anyɛ́ gúmabásaná gúdiála, gutɔ guedúm agá gulɔŋ gá gus, gusiám ínen, gúdɛ́ɛnuánd gubá nɔ́ ta buɔ́s. 22Gɔdányá éen udiondí mɔɔ́s amaány mesúg, gesí mɔnd wa gusɔ́d dɛɛ́nubá. Umondí mɔ́ mesúg góbusió bá ebe ɔbɔ́ uméeyíd. 23Kánɛ gunyá ká, mɔnd mɔ́nuɔ́yɛ́dɛn ká: “Kilíse nyɛ aya” ta ɔ́gɔ ká: “Unyɛ éné” nudiádáb. 24Gágual ká bekilíse#24.24 Bekilíse anányɛ gúnyá band bɔ́biɔ́yɔnɔ́ bányɛ bosód. bá bɛsɔbɔ na mubús má bɛsɔbɔ gámaan buas na buas, bála bigégén bá manda na bisey ká béneni band, ta band bányá beyíden, búmabá yɔd yɔd. 25Nɛ́nuán, mmákɛ́n gunúbiés.
Gúul gá mɔɔn wá mɔnd
(Mál 13.24-27; Lúk 21.25-28)
26«Bɔ́mɔ́nuɔ́yɛdɛn ká: “Uwe agá giɔ́ndɔ́”, nudɛbɛ. Ta ká: “Uwe aya agá gians”, nudiélúmínyí. 27Gá guán, guúl gá Mɔɔn wá mɔnd gabá anɛ ɛmanyɛmany ɛmanyɛmɛnaná guédúm buáy ubú ɔɔ́ny ámanɛná guám buáy ubú ɔɔ́ny ábɛ́dɛ́máná. 28Kɔɔ́m gɛlɔŋ gá buanda nyá, gɔ́gɔ́ bigól fuéŋené. 29Guɔ́bɛ́g gá mɔɔs amaány ánuál gúmadɔ́mb, ɔɔ́ny fú, ool diánd guségéde. Muódód ganáafɔ́gaán ugumuaná musiguánán, bɛgaga bá manda manyá ugumuaná gebíbueŋidi. 30Ány bágánuán bulinsi bá Mɔɔn wá mɔnd búbídiyenyi ugumuana, egúl yá gus gidigid áb gá gúbɛ́sɔ́sɔ́la, yánaan Mɔɔn wá mɔnd anyɛ́ wúlené agá nugánd nágadá na giod gá bugaga na nugúm. 31Gianta gá nsɛb gɔdɔ́ŋɛ́d, waád gɔdɔ́maan bɛɛngɛlɛs bág agá embéŋ enkim yá gus, ká boól bágɔ́sá band bág ɔbɔ́ uméeyé gubanyɛg gá eníné nibéŋ ná gus, gusiám gá enie. 32Ánɔsɔ́ŋɔ́n gúfúnyifunyi gúleniné agá bɔ́dɛd bábílaná ká figiyé: gigúl ɛgɛ́ bɛgas bág mónuondo dɛbɛdɛb, bimɔ́dɔsɔ, nugúlɛnsaan ká gɛnɔ́g gá gɛ́sɛgɛl ganyɛ egúyegúy. 33Nɛnama niád, banuá sɔ́n, gigúl nuganuán manda amaány biála, ánɔlɛ́ns ká Mɔɔn wá mɔnd ganyɛ egúy, ugany agá nibíŋínin. 34Agá meliŋítas nŋúnuɔ́yɔɔn, anyɛ́ búganúbiál, band bá nɔgɔndɔ enue gabá bámaány bédigú gidigid. 35Na gus na muana ánɔ́dɔ́mb, móony mám digadɔ́mb.
Ta mɔnd udɛgɔ́lɛnsaan buɔ́s
(Mál 13.32,35; Lúk 17.26-27,34-35; 12.39-40)
36«Agá giáy gá budug na gɛsɛgɛl ɛgɛ́ manda amaány ganúbiála, ta mɔnd udɛgɔlɛnsan; ta ɛngɛlɛs bá muana, ta mɔɔn, asiá Babá uwɔ́ eŋényé. 37Anaány buanda búmáabɛ́dɔ́mbaán gá gigul gá Nowé, ganuánd gubídɔ́mbaan gá gúul gá Mɔɔn wá mɔnd. 38Búmabá ká, ká nɔbɔl ná gifúfie mányɛ núdɛ́guá, band manyánán, bábúwánan, begíŋe bagánd, béŋeen bɛgɔna bɔ́b gá bigiŋ gutɔ guám anyɛ́ Nowé méebíŋín agá gilu; 39bádimáagɛ́nan ta na buanda, guám anyɛ́ nɔbɔl ná gifúfie móol unuɔ́nɔ bɔ́ ták. Anaány guúl gá Mɔɔn wá mɔnd ganúbá. 40Gigul igiány, banɔ́mandɔ bándɛ máabá budiádany, bɔ́gɔgɔ́l omoom, bátɛɛ́n ondodió#24.40 Alɛ́ŋɛ́d 1Tes 4.13-18.; 41bagánd bándɛ mágɔla manda agá dɔgɔl, bɔ́gɔgɔ́l omoom, batɛ́n ondodi. 42Énubíbídenyi gágual ká nudɛgɔ́lɛnsan buɔ́s ubú Ɔgúnɔ́ wanɔ gonúsiondo. 43Nugúlɛnsaan bese na bese ká, muát nunyá málɛnsan ká na budug bá ínen, gá gɛ́sɛgɛl gá gíná éŋéb gegúnuúl, ugúlɔbɔɔn nŋanyuá, udɛbá bágɔ́nɛ́n eŋéb uwaány ká waád gians gá gúbíŋín. 44Buád buandá, banuá sɔ́n, ánɔbá babɛ́dábɔ́nan, gobúsió ká gigúl igiány ɛgɛ́ núnɔmɔnɔmá gɛ́gɛ́ yaŋuá Mɔɔn wá mɔnd ngenúul.
Eŋél buól wá nuládád
(Lúk 12.42-46)
45«Unúm eŋél buol unyá na nuládád na nsiŋi e? Uwɔ́ muát nuyá dényígenenyé wɔ́ ká wáfɛnaan bɔsɔ́g bél buol anyɛ́ buofonó. 46Bese giod na eŋél buol waád uwɔ́ mása waga ganuál úmósiondo, ufuɔgɛn ká úguála buád buol ubuány. 47Agá meliŋítas nŋúnuɔ́yɔɔn ká, ugedényígenyi wɔ́ ká wéndenyi bɔnɛ́m bág gidigid. 48Búmábá ká, unyɛ giád gá éŋeli buol, ubiɔ́yɔɔn agág gá ɔdɛm ká: “Mása wam digúsiondoón fiaŋ”, 49wɔbɛn gugide bɔsɔ́gɔ́ bág bɔ́ buol, unyánan, ubúwánan na bebél magɛ́b. 50Mása wa eŋél buol uwaány gasiám buɔ́s ubú éŋel buol uwaány diébíbídényé na agá gɛ́sɛgɛl ɛgɛ́ údiálɛnsána; 51masa waga geéŋin wɔ́ nusésídeny gɔɔ́gɔ anyɛ́ band bá bunéŋ biananá nusésídény kɔɔ́m anyɛ́ bábáŋaná bábíbánda bikeled.
Právě zvoleno:
Matáyoso 24: MMU2
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
CABTAL
