Matáyoso 21
21
Gubíŋín gá Yésu Yelósalɛm
(Mál 11.1-11; Lúk 19.28-40; Sáŋ 12.12-16)
1Bámáal bágányá gúbɛ́nyɛkaan ká baám Yélúsalɛm egúy na tísɔn wa Bɛtɛfasé, buáy bá nɔgɔnd ná magɔ́nɛd má Bolifié, Yésu uwadɔ́m bafɔ́nɔfɔ́n bág bándɛ. 2Uganyɛ gɔ́b ká: «Ánɔ́b agá gɛdɔŋ gínyá agán gá busió, nugaguál nubíŋín, núgɔgúfuɔgɛn gɛgányá na mɔɔn wa abaŋ bɛbia esúŋén, núsúŋun, núŋólónin wɔ́. 3Mɔnd mɔ́nuɔ́yɛdɛn buanda, nuondinyi wɔ́ ká: “Ɔgúnɔ́ wambaná bɔ́.” Ugagúnɛn ká núlén wɔ́ kɔ́ na kɔ́.» 4Búgabiál anaány ká buanda Ɔgúnɔ́ mɔ́ɔyɛ́d agá niíd ná ibús bífuógidonyi. Umɔyɛ́d ká: 5Ɔ́nuɔyɛ́dɛ́n ɔmbúlɔ wa Síyɔŋ#21.5 Siyɔ́ŋ guámba guɔyɛd ká band bá Yelósalɛm. Alɛ́ŋɛ́d Esa 62.11; Sak 9.9 ká: Lɛ́ŋɛ́dɛ́, ofuŋ wɔw uwɔgɔn guúlen ɔgɔwɔ, unyɛ yédududu, unyɛ abɔ́lɛ́gán agá gɛgányá na mɔɔn wa abaŋ bɛbia, mɔɔn wá bunyam ubɛ́dɔ́ganá bɛnɔ. 6Bafɔ́nɔfɔ́n abáb, abál anyɛ́ Yésu máabɛ́dɛ́n bɔ́. 7Obólón gɛgányá na mɔɔn wa abaŋ bɛbia; abádálaan bɛla bɔ́b agá manyam amaány, Yésu uwelukumin kɔ́. 8Band giod agá giŋi abányɛgaan bɛla bɔ́b agá nŋili. Bómodió abásɔ́mba dugagás dá madɛ́d bádálaan agá nŋili ká bógólonyi wɔ́. 9Biŋi bá band bámáandá agá busió na agá gélem gág máagaán duwéwé bɔ́yɔ ká: «Nugúm bá na Mɔɔn wá Défide! Gɛfɔn bá na ewe wúlené agá ɔfɛ́n wá Ɔgúnɔ́! Nugúm bá na Gɔdányá ugumuana muana muana!» 10Tísɔn wa Yelúsalɛm gidigid mabá ebuéŋídény anyɛ́ Yésu méebíŋín kɔ́. Band bá tísɔn uwaány mobiófoón ká: «Ány mɔnd a ewe?» 11Biŋi bá band móndínónyí ká: «Ibús Yésu wɔ́, wúleniné Násalɛd unyá agá giéns gá gus gá Galilé.»
Yésu gúkɔŋa bedús agá Ɔnyɛb
(Mál 11.15-19; Lúk 19.45-48; Sáŋ 2.13-16)
12Yésu gubíŋín agá ɔnyɛb wá Gɔdányá, uwakɔ́ŋa bónd na bedús manda bámáabá kɔ́ gidigid; uwegusenyi betébélé bá band bámáabá bénugenyi muonyi, na eluku yá bedús munug. 13«Uganyɛ gɔb ká: Gɔdányá guɔ́yɔ agág gá gugál ká: Bágabɛ́laan nuyá nám ká, nuyá ná mbísógól, banuá gɔg, nusaman guíyi nú, gians gá béeb!» 14Bebúdebude na bigónd abábɛ́nyɛkɛnɛn wɔ́ agá ɔnyɛb wá Gɔdányá, uwéŋúgi bɔ́. 15Bɔgɔgɔ na bóŋ bisele mɔ́ɔb gudá ta bɔ́guɔyɔ anyɛ́ bámáan méŋeméŋe wa manda Yésu máalá, obónd ɔbɔ́b baábayɔ bámáabá bánsá agá ɔnyɛb wá Gɔdányá, bɔ́yɔ ká: «Nugúm bá na mɔɔn wá Défide!» 16Bágányɛ gág ká: «Ɔguɔ́bɔɔn buanda bɔ́yɔnɔ́ a?» Yésu ganyɛ gɔ́b gɔg ká: «Búnyɛ nɔ́, numabása nudɛbana buóny ebue búnyá buɔ́ŋɔ́n agá mbɔbɔnɔ ká: Eŋíd yá baábayɔ na yá biendiny guɔ́yɔ nugúm nɔ́w anyɛ́ ebílénené?» 17Uwosió bɔ́ babɛ́gɔ́nán ány, uwaám agá tísɔn gá gɔb Betaní, uwabɛ́dɛ́mɛn kɔ́.
Yésu na bɔdɛ́d bá figiyé
(Mál 11.12-14,20-25)
18Mémbelibél na budúdug, anyɛ́ Yésu máabá uganyá guondoon agá tísɔn, nsana iyadɛgɛn wɔ́. 19Uwaán egúy na nŋili bɔdɛ́d bábɛ́laná ká Figiyé. Uwabɛ́nyɛkɛn, biány na biány umɔ́ɔfuɔ́gɛ́n. Uganyɛ gá bú ká: «Adɛ́nuánd guóm bɛsamɔ ta gá buɔ́s!» Bɔdɛ́d ubuádánágag kɔ́ na kɔ́. 20Bafɔ́nɔfɔ́n ánaan anaány, ebédúm guméŋémeŋ, bágányɛ ká: «Nanyá bɔdɛ́d ebue ménudúmbí gudánágag e?» 21Uganyɛ gɔ́b ká: «Ngúnuɔ́yɔɔn agá meliŋítas ká, númábia giondi ɔdɛ́mɔ ta gudílénen, nunyɛ bágual buanda ubú mmánuál bɔdɛ́d ebue. Nunyɛ bágual nuɔyɛdɛn muát nɔgɔnd enue ká: “Élíkí ány ébiéti agá manáŋ abɔ́sa”, búgabiál. 22Buanda gidigid nugonuófún na giondi ɔdɛ́mɔ́ agá mbísógól, nugabia bú.»
Bugaga bá Yésu
(Mál 11.27-33; Lúk 20.1-8)
23Yésu máal úmébíŋín agá ɔnyɛb wá Gɔdányá, bɔgɔ́gɔ, na bagɔn bá gɛdɔŋ abábɛ́nyɛkɛnɛn wɔ́ gɛsɛgɛl umáabá ufúnyifunyi, bágányɛ gág ká: «Na bugaga búnúm alaná manda amaány e? Ányá unyá gugufá bú?» 24Uganyɛ gɔ́b ká: «Yaŋuá sɔ́n ngogúnuófún nŋófuny táŋ imoom, númoŋondinyi, kányɛ́ ngɔgúnúnuɔ́yɛdɛn na bugaga búnúm yalaná manda eme. 25Ngúnuófoon ká o, nduén yá Sáŋa móolónín nány, muana e, gúmén aga band e?» Ebédúm guanɔna bɔ́biɔ́yɔɔn ká: «Dímɔ́yɛd ká: “Muana”, ugɔgúdiɔ́yɛdɛn ká: “Gagiág numeén guádáb wɔ́?” 26Dímɔ́yɛd ká: “Aga band”, digúbianan ká dɛ́bɛ́nyáŋanyaŋ na giŋi gá band, gágual bem wɔbɔ gúbɛ́dága ká Sáŋa nyɛ ibús.» 27Obóndinyi gɔg ká: «Didigúlɛnsaan.» Uwɔ́ sɔ́n guondinyi bɔ́ ká: «Yaŋuá sɔ́n ndigúnuɔ́yɔɔn na bugaga búnúm yalaná manda amaány.»
Nsab ya baan bándɛ
28Yésu gɔb na busió uganyɛ ká: «Giág nunyá bɔ́guɔyɛd gá nsab eye? Mɔnd mabiánán baan bág bándɛ. Uganyɛ gá wobusió ká: “Mɔɔnɔ́, mbɛ́ ínen agá gisién gám.” 29Uwondinyi sié ká: “Ndigúbaan”; mɔɔn wa gɛsɛgɛl biondíny bág ibiésésidenyi wɔ́, uwɔb. 30Uwabɛ́nyɛkɛnɛn wa gándɛ, uwɔyɛdɛn wɔ́ buanda búmoom. Uwaány uwondinyi ká: “Ngagɔ́b Báb”; ta anaány, uwɔlɔb ta gɔb. 31Gá baan bá mɔnd ewe, unúm umáal gubíléne gá sié?» Obóndinyi ká: «Wa busió» Yésu ganyɛ gɔ́b ká: «Ngúnuɔ́yɔɔn agá meliŋítas ká band bɔ́gɔ́lɔnɔ́ táas na bisoŋób gakɛn gán agá Bufuŋ bá Gɔdányá. 32Gágual ká Sáŋa móol aganuá, uwenúdíye nŋili inyá ndényé, nudɛmáadáb wɔ́; bedús táas, na bisoŋób gɔg máadáb wɔ́. Banuá, ta anyɛ́ numáan anaány, nudɛmabɛ́gɔ́ŋɔ́n ɛdɛm ká nuádáb wɔ́.»
Nsab ya bél buól bá biád bá ɛdɛm
(Mál 12.1-12; Lúk 20.9-19)
33Yésu ganyɛ sɔ́n ká: «Ánuánd gúbɛ́dɔ́lɛ́gɛn nsab ndodió. Mɔnd omodió máal gisién gá masamɔ má magɛ́b, uwɔbɔŋ gɛ́ na ɛgág, uwedíme ɔnɔg, uwafuág yans yá ɔgɛ́g. Uwabɛ́dɛ́n band bómodió gisién gág igiány, uwɔb gá ɔŋend. 34Anyɛ́ gigúl gá guay meésiégé, muát gisién uwaány uwadɔ́m bél buol bág aga band abaány ká bɔ́gɔ́l gág gɛdam gá bɛgayagaya. 35Band abaány abádɛgɛn bél buol abaány, uwomoom ebégide wɔ́, omodió, ɔbɔɔ́n, wa gádadɔ, ɔbɔɔ́n wɔ́ na adany. 36Uwand gɔdɔ́m bél buol bómodió giod gɔdɔ́mb bá nsua, band abaány abál buanda búmoom nɔbɔ. 37Gá gúmana, uwadɔ́m mɔɔn waga, ubiɔ́yɔɔn ká: “Bɔ́gɔguɔ́bɛ́n mɔɔn wam.” 38Ta anaány, anyɛ́ bámáan wɔ́, bágányɛ bɔ́bɔ́ na bɔ́bɔ́ ká: “Ogíndigínd ewe, énuúl diɔ́n wɔ́ dílɔ́bɔn bɛ́!” 39Abádɛgɛn wɔ́, abában wɔ́ negúné wa gisién, ɔbɔɔ́n wɔ́. 40Ány gɔg, muát gisién uwaány anyɛ́ ugenuúl, ugaal nanyá na band abaány e?» 41Obóndinyi ká: «Ugoól, wɔɔ́n babɛ bá band abaány ta guán bɔ́ gɔsɔ́g, úgɔ́l gisién wéŋin gá band bóndodió bégenuéŋin wɔ́ bɛsamɔ agá gɛsɛgɛl búgonuófoon.» 42Yésu ganyɛ gɔ́b ká: «Nudɛmaban mbɔbɔnɔ ya Gɔdányá yɔyɔnɔ́ ká:
Nɛdany ɛnɛ́ befuég móomb,
nɛ́nɛ́ nímésiíl nɛdany nɛ́bɛ́dɔ́ganá gians gidigid;
Buol bá Ɔgúnɔ́ ubuány:
búnyɛ́ buanda bégúméŋeméŋ agás gá eŋís.
43Buád buanda nnuɔ́yɔnɔ́ sɔ́n ká bégenuélínyi Bufuŋ bá Gɔdányá, béŋin bú gá band bógonuóm bɛsamɔ. 44Mɔnd uganúgua agá nɛdany iniány, gagandagand; ewe ɔwɔ́ nɛganúguɛn wɔ́, nɛgagɔla wɔ́#21.44 Móony eme dɛbá mɔyɛ́dɔ́n agá imbɔbɔnɔ siɔ́modió sá nugɛlɛ́k..» 45Anyɛ́ bɔgɔgɔ na bagɔn bá gɛdɔŋ mɔ́ɔb gugál uguány, abálɛns ká gúmabɛ́lɛ́ŋaán bɔ́. 46Ebédúm guamba nŋili yá guadɛgɛn wɔ́, ta anaány, bámabiánán buwa na biŋi bá band gágual ká bímabɛ́dágá ká unyɛ ibús.
Právě zvoleno:
Matáyoso 21: MMU2
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
CABTAL
