Matáyoso 15
15
Yésu gúsuŋenenyi na Bafalisiɛ́ŋ
(Mál 7.1-13)
1Bafalisiɛ́ŋ na bóŋ bisele bá Yelúsalɛm abád gubɛ́sɛdɛnɛn Yésu, ɔbɔ́yɛd gág ká: 2«Gagiág bafɔ́nɔfɔ́n bɔ́w diáládáná bisele bá badadá e?» Gágual ká bádɛgúbɛ́sɔ́ga ɛmbɔ́g gigúl bámbaná gunyánan. 3Yésu ganyɛ gɔ́b ká: «Banuá sɔ́n, gagiág nudiáládáná bisele bá Gɔdányá, nubígɔ́dɛ́naná guala gán e? 4Gɔdányá mɔyɛ́d ká: Kanyá tiɔ́ na nigódió: Ewe sɔ́n unyɔmɔnɔ́ sié ɔ́gɔ ká inyódió, ugúsɛgɛmanan na nigú. 5Banuá gɔg nuguɔ́yɔ ká: “Mɔnd gidigid wɔyɔnɔ́ gá inyódió ɔ́gɔ gá sié ká: Buanda ínyá gubá ká ngúfá ká búgúdúgún, ngéŋin Gɔdányá bú, 6nɛnama ná mɔnd iniány digúgúmenyi sié.” Anaány nufugené bisele bá Gɔdányá ká nuála anyɛ́ bisele bá besié bán ɔ́yɔnɔ́. 7Banuá nuɔsɛgɔnɔ́ gubá gán gá muát! Ibús Esayí mabá ná nɛɛm gigúl uméedúmbényí gugál gá Gɔdányá, gúmɔyɔ́ ká:
8Band ebe gúŋkanya gɔɔ́gɔ agá bɛ́bábɛn, ɛdɛm sɔ́b nyɛ ayáyá nam.
9Guŋkanya gɔ́b nyɛ gá gilé,
gágual ká saá bisele bá Gɔdányá béfúnyifunyé, bisele bɔ́b béfúnyifunyé.»
Buanda buálaná ká mɔnd bá na biíle
(Mál 7.14-23)
10Agá gélem ány, Yésu uwabɛ́lɛ́gɛn giŋi gá band, uganyɛ gɔ́b ká: «Ɔ́numbɛ́dɔ́lɛ́gɛ́n nuónd núsɔ́ŋɔ́n! 11Búdɛ́bá ebue búbíŋené agá niíd ná mɔnd buálaná ká mɔnd bá na biíle, ebue gɔg búamaná agá niíd ná mɔnd, búbú buálaná ká ubá na biíle.» 12Bafɔ́nɔfɔ́n abábɛ́nyɛkɛnɛn wɔ́ bágányɛ ká: «Agúlɛnsan ká Bafalisiɛ́ŋ saal bɔ́bɔɔn gugál uguány gúmésésídényí bɔ́ giod e?» 13Uwondinyi bɔ́ ká: «Bɔgɔ́nɛd gidigid sié wam unyá ugumuana máal udigɔ́nɔ́, bánúbál bú. 14Ánɔnɛɛ́n bɔ́, bányɛ bebúdebude béndenyé bɔsɔ́g bébúdebude. Obúdobudo méndenyi sɔ́g obúdobudo, bágagua bɔ́bɔ́ bem agá ɔmbɛ́l!» 15Piéle ganyɛ ká: «Díbúlúnín nsab eye.» 16Yésu ganyɛ ká: «Banuá sɔ́n numányɛ kand nsiŋi e? 17Nudɛgúlɛnsan ká buanda gidigid búbíŋené agá niíd gúdúmbanɛn agá duna e, buésúgúdényi agá idúg e? 18Buámaná agá niíd ná mɔnd, guúlenin agá ɔdɛm, búbú buóndonyó mɔnd biíle. 19Biád bá ɛmbɛ́dágɛ́dɛ́n guúlenin agá ɔdɛm, muɔ́nɔ́n, guanda musɔm, gubídɔ́bɔ, buéb, géŋ géŋ, mugálán. 20Manda amaány gidigid móndonyó mɔnd biíle agá eŋís yá Gɔdányá. Gunyánan gɔg kand gubɛ́sɔ́gɛd ɛmbɔ́g diguóndonyi mɔnd biíle agá eŋís yá Gɔdányá.»
Giondi ɔdɛ́mɔ́ gá agánd wa Kánahán
(Mál 7.30)
21Yésu máal wadɔgan ány, uwɔ́b agá giéns gá gus gá bɔtísɔn bá Tiíl na Sidɔ́ŋ. 22Agánd wa Kanaháŋ omodió umóolónín agá bɔkɔ́m abaány uwedúm guánsa wɔyɔ ká: «Ɔgúnɔ́ Yésu, Mɔɔn wá Défide, nŋán gɔsɔ́g. Giád gá gíliíndie gúsésenyi ɔmbúlɔ wam bese na bese.» 23Yésu dimondinyi wɔ́ ta siɔdɛd. Bafɔ́nɔfɔ́n bág abábɛ́nyɛkɛnɛn wɔ́, bágányɛ gág ká: «Gúgí wɔ́, gágual ká uguánsa agás gá gélem.» 24Uwondinyi bɔ́ ká: «Bámandɔ́m gɔɔ́gɔ gá baan Bísalayɛ́la bányá anyɛ bɛdɔ́mbá binyímen.» 25Agánd uwaány uwesigunsín gɔg Yésu enú egegus uganyɛ gág ká: «Ɔgúnɔ́, gesíndúgun!» 26Uganyɛ ká: «Búdíbá bese ká bɔ́gɔ́l mányán má baábayɔ, béŋin dubuábuá.» 27Agánd ganyɛ ká: «Búnyɛ nɔ́ Ɔgúnɔ́, ta anaány, dubuábuá gúnyánan imfufu síguananá gúsígúsié wa tébéle wa muát nuyá.» 28Yésu ganyɛ gɔg ká: «Giondi ɔdɛmɔ́ gɔ́w nyɛ gianta! Nsɛ́ búbiál anyɛ́ ebílénené!» Ɔmbúlɔ waga uwéŋúg kɔ́ na kɔ́ agá gɛsɛgɛl igiány.
Yésu guéŋúgenyi band giod
(Mál 7.31-37)
29Yésu uwéliki ány, uwɔb agá nsɔ́l ya manáŋ abɔ́sa wa Galilé. Uwabɔ́lɛ́g agá nɔgɔnd, uwelukumin kɔ́. 30Gianta gá giŋi gá band igiábɛ́nyɛkɛnɛn wɔ́, bámabá na bigónd, na bebúdebude, na binsúgule, na bimúke, na band bómodió giod bámáabɛ́dáŋɔná, abágaan bɔ́ agá bɛgɔnd bá Yésu, uwéŋúgenyi bɔ́. 31Band bá biŋi ebédúm guméŋémeŋ gágual ká bámáanaán bimúke gála, bigónd ánda, binsúgule éŋúgeen, bebúdebude ánan. Ebégúmenyi Gɔdányá wa Ísalayɛ́la.
Yésu ményísí band dɔns dúní
(Mál 8.1-10; Mat 14.13-21)
32Yésu gɔbɛ́lɛ́gɛn bafɔ́nɔfɔ́n bág, uganyɛ gɔ́b ká: «Nguánan giŋi gá band egie gɔsɔ́g, medug mádadɔ eme bányá nam, bádɛ́bá andɔ na buanda bágúnyá. Ndɛguámba gugúgi bɔ́ na nsana, eményi bágagúgɔlɔgɔsaan na nsana agá nŋili.» 33Bafɔ́nɔfɔ́n ganyɛ gág ká: «Manyán giod gegúdílín nány aya agá giɔ́ndɔ́ egie ká dínyísenyi nɛnama ná giŋi gá band ebe ká bódúg e?» 34Uganyɛ gɔ́b ká: «Nunyɛ na bɛngɔka bíník e?» Báganyɛ ká: «Bɛ́tɛ́ndád nomo, na gɛdám gá muɔbɔ.» 35Uganyɛ gá band ká bélúkumen egegus, 36uwɔgɔ́l bɛnyɔka bɛ́tɛ́ndád nomo na muɔbɔ. Umáal úméeŋin Gɔdányá nukany, uwánsa bɛ́, uwéŋin bafɔ́nɔfɔ́n bág, ebéŋeen band. 37Abányánan bɔ́bɔ́ gidigid obódúgoon, abádɔ́mbán biéns bíméesiénén, bímofuóg insada ɛ́tɛ́ndád nomo. 38Banɔ́mandɔ bámáanyánán mabá dɔns dúní, bádimaban bagánd na baábayɔ. 39Yésu máal úmeégúgi giŋi gá band, uwabɔ́lɛ́g agá gilu, uwɔb agá giéns gá gus gá Magadan.
Právě zvoleno:
Matáyoso 15: MMU2
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
CABTAL
