Markus 11
11
Yesu huk abəra Wərusalima
(Mat 21.1-11; Luk 19.28-40; Yhw 12.12-19)
1Ndə aa ɗa huk abəra Wərusalima, slaɓ aska Baytifaji abə Baytaniya, mbeh abəra wəzəm Uliv Yesu zlən a zlən magəli tə aagi gbak atama, 2zlap a zlapatana iŋgaya: «Huni nda a hayak ma dzuk ma ndza atama kuni. Ndə huni kaaɗa gwar kuni, huni kaagəra mbə madambərzhahw tadzawaya, ala tava a tafzə kusəm a heɗe akas. Huni pəlazə, huni daaka. 3Andza ala taɗiwzahuni: “Huni pəla ava?” iy. Huni zhinanə: “Bay Madagal ma kaɗiwi, a azhinahu səkən kwa ka kahkah.”» 4Tsaw aa nda, nda gəra aa gəra mbə madambərzhahw tadzawaya a bəza ata ligi a təf. Pəl aa pəlazə. 5Həji ndiɓi aagi, a taba həji ma ndza a tsutsa aagi, ɗiw aa ɗiwzata: «Huni ɗal mandza a tsutsa veme? Huni pəl mbə madambərzhahw watsa ava?» 6Zhin aa zhinatana andza ndə Yesu a zlap, mbasl aa mbaslata ka. 7Leŋ aa daanə mbə madambərzhahw a Yesu, bəlik aagi rəkuts ta a heɗe, Yesu takaf a taf tə a heɗe. 8Vərəm ana həji ma kabəlik rəkuts ta aagi ka ata təf, ndiɓi aagi bahwha vajiɗ ma ndza a ŋge a damə aagi a bəliki. 9Həji ma kanda atama Yesu aagi, abə ma kasəbar aagi kadza wəla, aagi iŋgaya:
«Sləf a Bizlaf!
Bizlaf mapish bəzla tə ma təwah ata ala ma ndaha ata zləm tə!
10Bizlaf mapish bəzla tə ma təwah ata la ndza bay ma kandaha,
la ndza bay ataa Dawda ma ɗa jiji takwa!
Sləf a Bizlaf ma ndza a wəzəm!»
11Yesu gwar a Wərusalima, tsaw a nda a jak kwakus Bizlaf. Ndə a taŋ la ma ndza abəra bəza tiwtiw, tsaa kanda tə a Baytaniya abə magəli tə ma wam aha gbak aagi, ara ndə ŋtsəɓahw taɗal tə.
Yesu tabəzla shikiɗ bəza
(Mat 21.18-19)
12Apat tə, ndə aa kandaa ta a bəza a Baytaniya, mintish a kadza Yesu bəza. 13Gəra a gəra shikiɗ minja abə gədək tə, gbəv tadza tə, kərəɗ a kərəɗha abəra mpi watsa aska gas mbə tə. Kata a kaalima mbə tə ka vəw, iy. Ama, tagəraɓa a heɗe akas, səy vajiɗ tə ana ma ndza a heɗe. Tanaka a vaŋ ata ŋtəra ta mbəw təs. 14A tsutsa, Yesu zlap a zlapanə a shikiɗ: «Ara ala tsa mbə kwa a takam kwa vepiy.» Aa kazlima ana magəli tə aagi.
Yesu a jak kwakus Bizlaf
(Mat 21.12-17; Luk 19.45-48; Yhw 2.13-22)
15Ndə aa gwar ta a Wərusalima, Yesu tsaa nda a jak kwakus Bizlaf, dəba a agam həji ma kaber səkən abə ma səkəm səkən aagi a jak kwakus Bizlaf. Dəba a adzəɓatana la ber səkən ataa həji ma mbaɗ dala aagi ka, abə la ndza ataa həji ma ber ghuɗgum aagi, 16kwa tambasl ala ka ŋtaguleŋ a ndaa tə a bəza a jak kwakus Bizlaf abə səkən akas. 17A diwzha tə, dəba a asərəkatana səkən, i təmta iŋgaya: «Tsakwa ana ma ma ŋtiraya a ɗerewal ma ghwaɗeɗe: Bizlaf iŋgaya:
Həji aɓin a ya jak naka, jak ta tarha ataa həji aagi tiwtiw.
Ama, ataa aŋkuni, bəw huni bəw ka a bədəm ŋhil aagi.»
18Magulakwakw maɗal kwakus aagi, abə masərək ma ma garagar aagi, ndə aa zlima ma watsa, aa kagas təf ta dza Yesu ka a mci. Ama aa taɗal ŋzliŋ aka ara ndə həji aagi dagala aa kamay a zlima ma tə. 19Ndə ŋtsəɓahw a ɗal tə, Yesu abə magəli tə aagi tsaa kandaa ta a bəza a hayak ma dzamadzam.
Yesu abə shikiɗ ma ŋhwalaŋhwal
(Mat 21.20-22)
20Apat a kwaf tə, ndə aa kanda ata təf, gəra aa gəra shikiɗ nana taŋhwal tə abə dzara tə tiwtiw. 21Piyer deŋ a deŋzə ata ndə Yesu a zlapanə a shikiɗ: «Masərək, taŋzə shikiɗ ndə hwa va a gəyzə bəza nana taŋhwal tə tiwtiw,» iy. 22Yesu zlap a zlapatana a magəli tə aagi, iŋgaya: «Huni ɗalanə awa a Bizlaf! 23Sa zlapahuni a ɗa ŋter: Andza ala a zlapanə a wəzəm watsə: “Nda kwa a bəza a ɗi, fak ha kwa ka ata mtil,” andza ꞌunəf tə gbak akas, andza tatsa ŋkwaɓ tə ka ŋtaguleŋ ata səkən ndə a kaadeŋ a ɗalə, a aɗal andza sha. 24Sha ana ndə sa kazlapahuni: Andza, huni katarha a ɗiw səkən meni, huni deŋ ka a ha kuni, huni talima səkən watsa bəza, Bizlaf a avəlahuni səkən ndə huni ɗiwi. 25Ndə huni kaagara a wəzəm a tarha, andza səkən minja a walaŋ kuni abə ala aka, huni pəlanə mpət tə ka, aska Cihw kuni ma ndza a wəzəm a wəzlaf a pəlahuni səkən ma gamak ndə huni ɗal aagi ka yəm. 26[Ama andza huni tapəlatana mpət ataa həji ndiɓi aagi ka akas, Vava kuni ma ndza a wəzəm a wəzlaf a kaapəlahuni səkən ma gamak ndə huni gəy aagi akas.» ]
A ndaha ana ɓərɓər Yesu watsə a vata?
(Mat 21.23-27; Luk 20.1-8)
27Zhin aa zhin ta a Wərusalima zhana. Ndə Yesu a kaciwir a jak kwakus Bizlaf, magulakwakw maɗal kwakus aagi, masərək ma ma garagar aagi, abə həji ma gulakwakw aagi, azha aa kandaha ara. 28Ɗiw aa ɗiwzə: «Ma vəlahu təf ta ɗal ikwa vaya? Ma vəlahu ɓərɓər ta ɗal ikwa vaya?» 29Yesu zhin a zhinatana, iŋgaya: «Sa ɗiwahuni ma ŋtaguleŋ, andza huni tazhinaka bəza, sa aghalahuni ala ma vəlaka ɓərɓər ndə sa kaɗal səkən watsa abə sha. 30Ma zlənha Yahwana a ɗal batem vaya? Bizlaf vəw, həji ma dəgnak vəw? Huni zhinaka,» iy. 31Dəba aagi azlap a walaŋ ta: «Andza həji iŋgaya: “Bizlaf ma zlənazə,” həjiy, a aɗiwazahəji: “Huni ŋkula ji ma ataa Yahwana ara veme?” 32Andza həji aagi iŋgaya: “Həji aagi ma zlənazə”, həjiy?» Ŋzliŋ tadzata bəza ara həji aagi, ara ndə a ɗa, həji aagi kasən ci, Yahwana a ɗa ala ma ɗaf ma ndə a zlimazə ara Bizlaf ŋter. 33A tsutsa zhin aa zhinanə a Yesu: «Ni kasənəs.» Yesu zhin a zhinatana yəm: «Sa azha meni, sa kaaghalahuni ala ma vəlaka ɓərɓər ta ɗal səkən watsa akas.»
Právě zvoleno:
Markus 11: GOU
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
